Hch 8

Yajc'ulal Saulo yin eb creyente

1A Saulo, max cha c'ul k'okch'ennelay cam Esteban tu'. Axac'al yet jun c'u tu' max el yich yajc'ulnelay eb creyente sic'libil bay Jerusalén. Yuj tu' xan max el eb. Ay eb max toj bay juntzan conoblak yul yet Judea, ay eb max toj yulak yet Samaria. Asanxanej eb chekbej Jesús max cancan bay Jerusalén tu'. 2Maxc'al cam Esteban tu', max ilaytok is mimanil muklay yuj juntzan winak iom can Dios. Caw wal chi ok' eb yuj. 3A pax Saulo xin, caw chi aj can yak'on ajc'ulal yin eb creyente. Tojol yoc yulak na, chi jutxwi eltek winak c'al ix yulak na tu', cax chi ilaytok eb preso yuj.

Max al-lay el k'anejal yet colbanilej

4Axa eb max saklemcantok yel bay Jerusalén tu xin, tzanc'al bay max apni eb, max yalil eb yabixal colbanilej. 5A Felipe, a bay conob Samaria max apni, max c'oli yalon el yabixal Cristo nan xol eb anima bay tu'. 6Maxc'al yacbaj masanil eb anima txiquin bay tzet max yal tu'. Max yilon c'apax eb juntzan milagro max el tx'oxoni. 7A bay jun conob tu', xiwil anima ayoc espíritu yob yin, palta chic'al elcan yin eb yuj Felipe tu'. Yip yel yaw eb espíritu yob tu', cax chi el eb. Xiwil mac sicbinak el is mimanil, c'al eb c'am chi je' beyi, max watx'jican yuj Felipe tu'. 8Yuj juntzan tzet max uj tu', xan caw wal max tzaloj aj eb anima bay jun conob tu'.

9Ay jun winak chi yik Simón bay tu'. Caw wal chi etnewi anima, yujtol chi yala' tol miman yelapnok, cax ay tzet chi je' yuj. 10Pilan chi yaoc anima c'ul yin, eb yaynakil c'al eb mimek winak, cax chi yalon eb axca ti': A cham Simón ti', yel wali, caw wal ay yipalil Dios yin cham, ẍi eb.

11Caw wal chi yaoc eb c'ul yin cham, yujtol payxataxc'al max c'oli cham yak'onc'al c'ayaj c'ul eb anima, cax chi yaloni tol tz'akan ton c'ul. 12Palta axa Felipe chi alon el xol eb, tzetbil chi yun yoc eb yul k'ab Dios. Chi yalon c'apax el yabixal Jesucristo nan xol eb. Yuj tu xin, aylaj winak, c'al ix max yaoc c'ul yin tzet chi yal tu'. Max lajwi tu', max yak'on bautizar ba eb. 13Ilab c'apax Simón tu', max yaoc yin c'ul tzet max yal Felipe tu', cax max ak'lay bautizar. Max lajwi tu xin, tzakanxac'al yintak Felipe. Ay juntzan milagro max el tx'oxon Felipe tu' tol caw miman yelapnok. Caw wal max c'ayaj c'ul Simón tu' yet max yiloni.

14A yet max yaben eb chekbej Jesucristo ayic' bay Jerusalén, tol ay mac max yaoc c'ul yin k'anej Dios bay Samaria tu', cax max chekontok eb Pedro yetok Juan. 15A yet max apni oc eb, max txajli eb yuj eb creyente tu', yet watx' chi chacan eb Cham Espíritu Santo. 16Yujtol c'amto junok eb chi chaon Cham. Asantoc'al yin bi Cham Jajawil Jesús max ak'lay bautizar eb. 17Max batxbaj ajtok Pedro yetok Juan is k'ab yiban jolom eb, cax max chaoncan eb Cham Espíritu Santo.

18A yet max yilon Simón, tol a yet max yaon ajtok eb k'ab yiban jolom eb creyente tu', cax max chaoncan eb Cham Espíritu Santo; axa yalten tumin bay eb chekbej Jesucristo tu'. 19Max yalon bay eb axca ti':

—¿C'am mi chi je' e yak'on c'apax wikbej yet watx' tzanc'al mac chin batxbaj ajtok in k'ab yiban jolom, chi chacan Espíritu Santo wuj? ẍi nak bay eb.

20Axa yalon Pedro bay Simón tu':

—C'ayokab el a tumin etok. A jun sabalej chi el yin c'ul Dios chi yak'a', ¿tom chi je' a manon yetok a tumin tu' a naoni? 21Caw wal c'am alon et yin jun ti' jetok, yujtol man ton wal watx'ok a nabal yul sat Dios. 22Yuj tu xin, na a ba yin jun a yobtakil ti'. Al bay Dios, ta c'uxan chi joc'ay Dios a mul eban yuj tzet cha na tu'. 23Yujtol chi wila' tol caw wal ayoc sawenal en, cax asan tzet man watx'ok lanan ak'on serbil, ẍi Pedro tu' bay.

24Max yalon axca ti':

—Caw wal che k'an bay Cham Jajawil wuj, yet watx' c'am chi jayoc jabok jun yailal che yal tu' wiban, ẍi bay eb.

25Max lajwi yalon el Pedro c'al Juan yabixal Jesús c'al is k'anej Cham Jajawil, cax max meltzoj eb bay Jerusalén. Xiwil aldealak yul yet Samaria bay max ec' yalil eb k'anejal yet colbanilej.

Max yil-lej el ba Felipe yetok nak aj Etiopía

26Ay jun yángel Cham Jajawil max alon bay Felipe axca ti': Watx'nej a ba. Asi' bay sur, cax chach toj yul jun be chi tit bay Jerusalén, jun chi apni bay conob Gaza, ẍi bay.

A jun be tu' a ton jun chi ec' bay tz'inan tx'otx'. 27Axa toj tu'. Max yil-len el ba yetok jun winak aj Etiopía yul be tu'. A jun winak tu', eunuco,*fn* yajaw yuj jun xal ix chi ikon Candace,*fn* xal yajaw bay Etiopía tu'. C'ubom tumin yayji bay xal. Petoj cham yion ay ba bay Dios bay Jerusalén, 28cax lanan pax cham bay Etiopía. Chotan ajtok yul is carruaje, lanan yilon cham tx'an Un Tz'ibbilcan yuj Isaías, cham chekbej Dios. 29Axa yalon Cham Yespíritu Dios bay Felipe axca ti': Jitztok a ba c'atan jun carruaje tu', ẍi bay.

30Axa yet max apni oc c'atan, max yabeni, tol lanan yawten cham tx'an Un Tz'ibbilcan yuj Isaías. Axa yalon Felipe tu' bay axca ti':

—¿Chi mi nachaj el oj tzet chi yal tx'an Un tu'? ẍi bay.

31Max tak'wi cham:

—¿Tzet wal ok wut nachaj elok ta c'am mac chi coc' alnen ayin? Mata chach ajtek chotan wetok, cax cha coc' alnen ayin, ẍi cham bay.

32A tx'an un lanan yilon cham tu', chi yal axca ti':

Max ilaytok, axca chi yun yilaytok no calnel bay chi mak'lay camok. C'amc'al tzet max yala', tz'inc'al ẍi axca no calnel yet chi tzuklayi.

33Caw q'uixwiltak max utlay yuj eb, cax man bayc'al ijanok max yun beyc'ulnelayi.

C'am junok mac chi je' yaloni tol ay yinatil max cani, yujtol max ilay wal el bay sat tx'otx' ti', ẍi yul tx'an Un tu'.

34Yuj tu xin, xan max k'anlej el cham bay Felipe tu' axca ti':

—Chin k'anlej ayach, ¿mac ay yabixal jun max yalcan cham chekbej Dios ti'? ¿Ac'al mi oc Cham max yalcan yabixal, ma tx'ok junok mac chi yala'? ẍi bay.

35Axa Felipe max chael yich yalontek yabixal Jesús yin tx'an Un lanan yilon cham tu'. 36-37Lananc'al bey eb toj yul be xin, cax max apni oc eb bay jun aej. Axa yalon cham aj Etiopía tu' bay Felipe axca ti':

—Ilab jun a' aej ti', ¿c'am mi chi je' chin ak'xac'al bautizar tinani'? ẍi cham bay.*fn*

38Lajwi tu xin, max yalon cham eunuco tu' tol chi mitx'oc wanaj is carruaje, axa yaytok eb yul a' tu' cawanil. Axa yak'oncan bautizar ba cham yul a' tu'. 39A yet max lajwi paxajtek eb yul a' xin, max ilay el Felipe yuj Yespíritu Cham Jajawil. Majxa yil cham aj Etiopía tu' yin. Axa chaon be toj tu', max tojcan cham yin tzalojc'ulal. 40Axa Felipe tu xin, max apni bay jun conob chi yik Azoto. Pilan max ec' yalil k'anejal yet colbanilej bay juntzanxa conob, masantac'al max apni bay conob Cesarea.

Currently Selected:

Hch 8: ATBYK89

Highlight

Copy