Hch 2

Is jayubal Cham Espíritu Santo

1A yet max ayol c'ual k'in Pentecostés,*fn* junej max wajbaj ba eb creyente masanil. 2Ayman max bil jun tzet yetal satcan, axca junok cak'ek' caw wal ow yeq'ui. Pilan max nojil yul te na bay wajan ec' eb tu' yuj jun axca cak'ek' tu'. 3Ay juntzan tzet yetal max yil eb axca xak k'ak'ej max pukaxtok xol eb masanil, cax max jaycan yiban junjun eb. 4Max oc wal eb yalan yikbej Cham Espíritu Santo, max k'anjab aj eb yin juntzan tx'ok tiejal, atac'ala' tzet chi ak'i yal eb yuj Cham.

5A yet jun tiempoal tu', ay eb israel ayic' bay Jerusalén tu', tx'ok tx'okc'al lugaril titnak eb bay yulyibank'inal ti'. A ton wal bay Dios chi yal ba eb. 6A yet max ablay bil jun axca cak'ek' tu', xiwil anima max wajnaj oc bay jun na tu'. Caw wal max c'ayaj c'ul eb, yujtol junjunc'al eb max yab tzet chi yal junjun eb creyente yin is ti'.

7Caw wal max c'ayaj c'ul eb, max oc t'anan eb, axa yalon eb axca ti':

—A eb chi k'anjab ti', aj Galilea eb masanil. 8Palta ¿tzet xan chi jab pax tzet chi yal eb? Tol tx'ok tx'ok yel pax co ti' junjun on. 9A co xol ayon wajan on ec' ti', ay mac aj Partia. Ay mac aj Media, ay eb xin aj Elam, ay eb aj Mesopotamia, ay eb aj Judea, ay eb aj Capadocia, ay eb aj Ponto, c'al eb aj Asia. 10Ay c'apax eb aj Frigia, c'al eb aj Panfilia, c'al eb aj Egipto. Ay c'apax eb aj yulak yet Africa, bay cawilal Cirene. Ay c'apax juntzan eb aj Roma cayti', ay nanok eb jet israelal, axa nanxa eb xin, man israelok eb, palta ocnakxa eb yin co religión. 11Ay mac xin, aj Creta, yetok eb aj Arabia. Co masanilc'al chi jab yalon eb yin co ti' junjun on masanil tzet max el yunen Dios yetok is yipalil, ẍi eb.

12Toc'al max c'ayaj c'ul eb masanil. Max somchaj el c'ul eb, max yalon eb axca ti':

—¿Tzetlaj yayji juntzan ti'? ẍixac'al eb.

13Palta ay juntzanxa eb xin, tol chi buchwaj eb, cax chi yalon eb axca ti':

—A juntzan eb ti', uq'uem an eb, ẍi eb.

Max yalil Pedro is k'anej Dios

14Yuj tu xin, xan max aj wan Pedro yetok eb usluc'wan yet chekbejal. Max k'anjab nan xol conob yin ipejal axca ti': Ex aj Judeail winak, c'al jantak ex ayex ec' bay conob Jerusalén ti', ti chi wak' e yojtaknej el tzet yayji jun ti'. Acbajek e txiquin bay tzet ok wal ayex. 15¿Tom che na' tol uq'uem an on? C'amak. Ilab tol tolto chi aj c'u. 16Palta a jun tzet chi uj ti' max yalcan Joel, jun is chekbej Dios yet payxa, ayokto max yaloncan yabixal yul tx'an Un Tz'ibbilcanok, yet max yaloncan axca ti':

17Max yalon Dios axca ti': A yet ok jay lajub tiempoal, ok waoc Wespíritu yin masanil anima.

Ok yal eb e c'ajol c'al eb e cutz'in in k'anej. A eb ach'ej ay tzet ok tx'oxlay yil eb, c'al eb icham winak ok in k'anjab bay eb yin wayichejal.

18A yet juntzan c'ual tu', ok wacan oc Wespíritu yin eb nak in chekbej c'al yin eb ix in chekbej, cax ok yalon el eb in k'anej.

19Ok in tx'ox juntzan tzet yetal bay satcan, ok c'ayaj c'ul anima yiloni, yetok c'apax bay yulyibank'inal ti', ok in tx'ox c'apax juntzan tzet chi tx'oxon el wipalil. A ton chic', k'ak'ej, c'al miman mub axca asun.

20A c'u ok k'ekbok, axa xajaw axcaxac'al chic' ok yuncan elok, ẍi Cham Jajawil. A juntzan ti' ok yun yet c'amto chi jay jun c'ual yet yowal c'ul Cham. A jun c'ual tu', caw wal miman yelapnok, cax ok c'ayaj c'ul anima yuj.

21Axa masanil mac chi yal ba bay Cham Jajawil, ok colchaj el eb, ẍi yul tx'an Un tu'.

22Ex wet israelal, acbajek e txiquin bay juntzan ok wal ayex ti'. Max tx'oxk'abnej el Dios yopiso Jesús aj Nazaret ayex, yet max el yunen juntzan milagro, juntzan tzet yetal c'am bay chi jila', yetok juntzanxa tzet chi tx'oxon el is yipalil. A juntzan ti' max el yunen Dios yetok Cham. E yojtakxa juntzan ti' ayex ti'. 23Palta a Cham max alaycan oc yul e k'ab, yujtol axca tu' max el yin c'ul Dios. Nabilxa yuj Dios yettax payxa, tzet ok jayoc yiban Cham. Ayex ti', max e k'anbalnej eb yobtakwom, yet max e yak'on mitx'layok cax max e locban aj yin curus. Caytu' max e yut e yak'on camok. 24Palta max ictzonelay aj yuj Dios cax max elcan yikbej yailal camich yiban yujtol junelnej c'am yalon yet camich tu' yin. 25A cham rey David, yalnakcan yabixal Jesús, tol ok ictzonelayc'alta' ajok, xan max yalcan axca ti':

Wojtak tol ayc'al oc Cham Wajawil wetok. Yujtol ayic' Cham bay in watx' k'ab, xan c'am chi somchaj el in c'ul.

26Yuj tu' xan caw chi tzaloj in c'ul, cax chin bitni yin tzalojc'ulal. C'am tzet chin na' yuj in mimanil ti', yujtol chach waoc yipok in c'ul.

27Yujtol man ok a bekcan wanimail xol eb camnak, tamwal ok a cha' k'atok in mimanil ti', ayin tol sic'bil in el oj ti'.

28Max ak' wojtaknej el beal k'inalej. Ok in ak' tzalojbok yet ayin ec' etok, ẍi David tu' yul tx'an Un Tz'ibbilcan tu'.

29Ex wet conob, caw miman txequel tzet max yun yelcan apnok jichmam David tu'. Jojtak, tol camnak, cax mukaynak c'apaxok. A is mukbanil bay mukan tu' ac'ala' txequel tinani'. 30Palta a David tu', chekbej Dios yayji. Yojtak tol caw yel, ak'bil ton can ti' Dios bay, tol a Cham Cristo t'inan yelcan yinatilok, cax chi occan reyalil is q'uexelok. 31Ayokto max yojtaknen el David tu', tzet ok eloc Cham Cristo. Yuj tu' xan yalnakcanok, tol t'inan yictzonelay aj Cham. Yalnakcanok tol man ok beklaycan yuj Dios xol eb camnak, cax man ok chalay k'atok is mimanil c'apaxok. 32A Jesús, a Dios max ictzonen ajok. Co masanil, chi jak' co ba testigoal yin jun ti', yujtol max jila'. 33Yetok c'apaxok, max ilay paxaj satcan yuj yipalil Dios. Max yak' co Mam Dios Yespíritu bay, axcata' max yut yak'oncan is ti'. A Jesús max aontek jun che yil ti', c'al che yab ti'. 34A cham David, maj tok satcan yetok is mimanil, palta max yalcan axca ti':

Max yal Dios Jajawil bay Cham Wajawil axca ti': Ayan chotan bay in watx' k'ab ti',*fn*

35masantac'al ok wacan oc eb ajc'ul oc en batxlubok akan, ẍi Dios, ẍi David tu'.

36A Jesús ti', max e curusnej, palta chi wochej che yojtaknej el sic'libil e masanil ex wet israelal, tol a' co Yajawil yuj Dios, a' ay yopiso yin Cristoal, ẍi Pedro tu'.

37A yet max yaben eb wajan ec' bay tu' juntzan ti', caw wal max oc pitz'an yail yin c'ul eb, max yalon eb bay Pedro yetok bay juntzanxa eb chekbej Jesucristo axca ti':

—Ex jet conob, ¿tzet watx' chi jun tinani'? ẍi eb bay eb.

38Xan max yal Pedro bay eb axca ti':

—Naek e ba, cax che yak'on bautizar e ba junjun ex yin bi Jesucristo, yet watx' chi ilaycan el e yobtakil. Catatu bian, cax ok cajban oc Dios Yespíritu e yin junjun ex. 39Yujtol caytu' max yut yak'oncan is ti' ayex c'al ayon, c'al bay eb e yuninal, yetok masanil bay jantak eb cajan bay najat, yujtol a Cham Jajawil co Diosal, chi yak' Yespíritu bay masanil mac chi yawtej oc Cham yetok, ẍi Pedro bay eb.

40Xiwiltoc'al tzet yetal max yal bay eb, c'al yin yak'on na ba c'ul eb.

—¡Colek e ba bay jun yailal ok jay yiban eb jet animail yobtakwom! ẍi Pedro tu' bay eb.

41Yuj tu xin, ay eb max yaoc yin c'ul, tzet max yal Pedro tu', xan max yak' bautizar ba eb. A eb max oc creyenteal yet jun c'ual tu', ay mi oxebok mil eb. 42Caw wal max yaoc eb c'ul yin juntzan cuybanilej max yak' eb chekbej Jesús. Junxanej max yut eb nabal masanil. Chi wajbanc'al ba eb. Chi loon eb ixim pan, ixim nabaniltek Cham Jajawil, cax chi txajlic'al eb.

Is beybal eb babel creyente

43A eb chekbej Jesús, xiwil milagro max yun eb, yuj tx'oxon el eb yipalil Dios. Yuj tu xin, max xiwaj eb anima masanil. 44Masanil eb max yaoc c'ul yin Cristo, junxanej max yut ba eb. Junxanej c'apax max yut eb is tzetak yetal. 45Aylaj eb chi txonil is tx'otx', c'al juntzanokxa tzet ay eb, cax chi pojon ec' eb is tojol tu' xolak eb, atac'ala' is cawxinakil junjun eb. 46Junjunc'al c'u, cayc'al ti' wajban ba eb bay yamak'il templo Dios. Chi wajbaj c'apax ba eb bay nalak, cax chi pojon ec' eb is pan xol. Junxanej loj chi yun eb yuj tzalojc'ulal. Caw chi aj can junc'ulal xol eb. 47Cax chi yalon eb watx' k'anej bay Dios. Caw wal chi tzaloj masanil anima yetok eb. Cayc'al ti' max yun yak'lay ch'ib bisil iglesia yuj Cham Jajawil junjun c'u, yuj eb lananc'al colchaji.

Currently Selected:

Hch 2: ATBYK89

Highlight

Copy