Hch 12

Is camichal Jacobo, c'al is presoal Pedro

1A yet jun tiempoal tu', max chail yich cham rey Herodes*fn* yetnen eb creyente. 2Max yak'on cham tzoc'lay el jolom Jacobo, is yuẍtak Juan. 3A yet max yilon cham rey tu', tol max cha c'ul eb israel jun tu', axa yak'on mitx'lay Pedro. A yet jun is k'in eb israel, yet chi loon eb ixim pan c'am yich, a yet tu' max mitx'layi. 4Lajwic'al michchaji, max alay oc yul preso, waklajonwan soldado max tayneni. Cantakwan eb chi taynen junjun el. A naon Herodes tol a yet chi lajwi k'in Pascua, cax chi tx'oxlay eltek Pedro nan xol anima, cax chi beyc'ulnelayi. 5Yuj tu' xan caw wal taynebil Pedro yul preso tu'. Cac'al ti' txajli eb creyente yin masanil is c'ul yuj Pedro.

Max eltek Pedro yul preso

6A yet jun ak'bal yet t'inanxa yilay eltek Pedro satak conob yuj Herodes tu', chi way Pedro nan xol cawan eb soldado, c'anani yayji yetok cab cadena. Ay c'apax oc taynemal ti' preso tu'. 7Palta ayman max jayoc jun yángel Cham Jajawil. Pilan max sakbi yul preso tu' yuj. Axa tenon tz'eyil c'ul Pedro tu', max tenon el is wayan. Lajwi tu' max yalon bay axca ti': Ajan wan yin ayman, ẍi bay. Toxac'al max yak' elc'ay jolnaj ba ch'en cadena ayoc yin k'ab Pedro tu'. 8Max yalon jun ángel tu' bay axca ti': Cawxanej oc a c'alil, cax chaon oc a xanab, ẍi bay. Max lajwi tu', max yalon bay junelxa axca ti': Aoc a jokan pichil, cax chach tzakloj wintak, ẍi bay.

9Axa yoc tzakan yintak tu', max eltek yul jun cuarto bay ayoctok tu'. A naoni, tol chi wayichli, man yojtakok ta yel wali tol lanan yeltek. 10Max eq'ueltek eb bay cab lugar bay ayic' eb soldado taynen preso tu', cax max elol eb bay jun ch'en puerta bay cawilalxa ti' calle. A jun ch'en puerta tu', munilc'al max jak ba bay eb, max eltek eb. A yet max lajwi yec'tok eb bay junxa calle, cax max beklaycan Pedro tu' tx'oklil yuj jun ángel tu'. 11Axa yilontek Pedro tu', tol caw wal yel. Yuj tu' xan max yal axca ti': A tinani', chi nachaj el wuj, tol caw yel max chektek Cham Jajawil jun yángel quin ul colon el yul k'ab Herodes, c'al yuj in colchaj c'apax el yalan jantak tzet chi yochej eb wet israelal chi yaoc wiban, ẍi.

12Lananto naobtanen juntzan tu', max apni oc bay yatut María, is txutx Juan, nak chi yik c'apax Marcos. Xiwil mac wajan ec' txajlok bay jun na tu' yuj Pedro. 13A yet max c'oxc'on octok bay babel puerta ti' calle, ay jun k'opoj ix chi yik Rode max eltek tak'wok. 14Palta a yet max yaben ix tol a Pedro, maj jak ix puerta tu'. Caw wal max tzaloj aj ix sic'libil, cax max yak'on ix yanej paxoc yul na yin ayman. Max yalon ix bay eb wajan ec' tu', tol a Pedro chi c'oxc'on octek ti' puerta. 15Axa yalon eb bay ix axca ti':

—Tekan ay a yabil chabil, ẍi eb bay ix.

Palta max tec'baj ba ix yaloni, tol wal yel a ton Pedro tu' ayic'ok, axa yalon eb axca ti':

—Manak Pedro tu'. Tekan a jun ángel chi tayneni, tekan a' chi jayi, ẍi eb bay ix.

16Palta Pedro, ac'ala'c'al c'oxc'on octok bay puerta tu'. Axa yet max jakon eb, max yilon eb, tol a Pedro tu' ayic'ok. Caw wal max c'ayaj c'ul eb yuj. 17Max yak'on Pedro yechel yetok k'ab bay eb, yet watx' chi numay eb. Lajwi tu' max yalon bay eb tzetbil max yun yilay eltek yuj Cham Jajawil yul preso tu', max yalon c'apax bay eb axca ti':

—Che yal juntzan ti' bay Jacobo, c'al bay juntzanxa eb juẍtak, ẍi.

Lajwi tu xin, max el xol eb. Axa toj bay junxa lugar.

18Axa max k'inibi aj junxa c'ual, axac'al chi yal eb soldado, yujtol maj nachaj el yuj eb, bay max ca toj Pedro tu'. 19Axa Herodes xin, caw wal max yak' saylay ec' sic'libil; palta majc'al ilchaj yuj eb saywajwom tu'. Catatu' max k'anlen el bay eb soldado tu', tzet max yun yel yet lanan taynen eb tu'. Lajwi tu xin, max chekon yak'lay cam eb. Lajwi tu', max el Herodes yul yet Judea, cax max toj cajay bay conob Cesarea.

Is camichal cham rey Herodes

20A yet junel, caw wal chi tit yowal cham rey Herodes yin eb anima aj Tiro c'al yin eb aj Sidón. Yuj tu xin, xan max lajtinej el ba eb, tzet watx' chi toj yut yalon ba eb bay cham. Max monten eb jun winak chi yik Blasto, nak sat yak'omal serbil cham rey tu'. Axa nak max yak'balnej eb, max bet k'anon nak mimanc'ulal bay cham rey tu' yin eb. Max k'an eb mimanc'ulal yujtol a bay conob cham rey tu' chi tit masanil tzet chi lo eb. 21Axa yalon cham rey tu' tzet c'ual chi jayoc eb satak cham. Yet jun c'ual max k'okcan cham tu', max yaoc cham juntzan is pichil caw wal watx', axca yet masanil eb rey chi yaocok. Lajwi tu' max ay chotan cham yul junok is trono, max c'oli k'anjab eltek cham bay eb anima tu'. 22Yet max lajwi yaben eb k'anjab cham, max yalon eb axca ti': A jun mac chi k'anjab eltek tu', man animaok, palta a junok eb dios chi k'anjabi, ẍi eb.

23Yet wal jun bek tu', max ak'laycan yabok ay yuj jun yángel Cham Jajawil, cax max oc is patzil, yujtol maj yala', tol asan co Mam Dios miman yelapnok. Catatu bian, max camajok. 24Palta a k'anej Cham Jajawil xin, max saklemc'altok xol anima. Pilanc'al max al-lay el bay junjun lugar.

25A yet max xew yion ba tzet chi yun Bernabé yetok Saulo bay Jerusalén, max toj eb, cax max yiontok eb Juan yetok, nak chi yik Marcos, axa meltzoj eb bay Antioquía tu'.

Currently Selected:

Hch 12: ATBYK89

Highlight

Copy