1 R 6

Chabanilal el yich watx'ji templo

(2 Cr 3.1-14)

1Yet wal 480 abilxa yel eb israel bay Egipto, cax canebxa abil yoc Salomón yin reyalil, yet cabxa xajaw chaon el yich jun abil tu', a ton yet xajaw chi yik Ziv, max chalay el yich watx'nelay aj templo Jehová. 2A jun templo max chek Salomón watx'nelay tu', 27 metro max yun k'atil, baloneb metro max yun yul txiquin, nan is canlajoneb metro ay aj tel can. 3Axa is tentail templo tu' ay baloneb metro, lajan axca yul txiquin templo tu', axa is sat is tentail nan is so' metro. 4A wentenail, mimek max yuncan sat bay yul, axa yina txennej. 5Cax max watx'ji c'apax juntzan cuarto max oc oyan yinlak is ca paq'uil c'al bay yul is txiquin bay yintak templo tu'. 6Oxeb piso max yunej, babel piso, cab metro yetok 25 centímetro max yun sat, axa yet is cab piso, cab metro yetok 70 centímetro, axa yet is yox piso, oxeb metro yetok 15 centímetro max yun is sat. Jabjabil max yun yoc utz'utz'ok is pimal bay k'atil yet watx' c'am chi ol-lay is paq'uil bay chi oc is patzabil. 7Josbil ch'enc'al max oc yin watx'jubalok, watx'xac'al yayji ch'en yet max jayi, yuj tu' xan c'amxac'al bay max jab bil martillo tamwal junok josbal ch'en tamwal junokxa tzet ch'enal. 8A tu' ay is puertail juntzan cuarto tu' bay yetc'ulal co q'uexan yet chon octok bay templo. Yet chon ajtok bay yet is cab piso c'al bay yox piso, ay is k'ochal chi ec' oyoyok.

9A yet max lajwi yaj cajonal templo yuj Salomón, max oc te patzab c'al mimek chemte' naba c'ute' yiban. 10Cax max watx'nen aj cuartolak bay yinlak templo; cab metro yetok 25 centímetro max aj junjun piso, max oc is patzabil max apni oc yin templo, naba c'ute'c'al te'. 11Max lajwi tu xin, max yalon Jehová bay cham rey Salomón: 12A yuj jun templo max ak' watx'jok ti', chi wal ayach, tatol tzakan achc'al yintak in ley c'al in chekbanil, cax cheken masanil, ok yunc'al masanil tzet albil wuj bay David a mam. 13Ok in ayjokc'al ec' yul jun templo ti' cax ok in colon in conob Israel, manxac'al ok in bekcanok, ẍi Jehová.

14A yet max lajwi watx'jican templo yuj cham rey Salomón, 15caw wal watx' max yun yoc chemte' bay satlak is can paq'uil yul, naba c'ute'c'al elok. Max tojtac'al yich masantac'al max ajapnok yalan patzab, max ay c'apax chemte' yul, naba k'uk'taj. 16A bay yul templo bay yich, max makchej aj jun cuarto tol baloneb metroc'al yayji is can paq'uil. A makil max yaoc nan yul tu' naba c'ute'c'al elok, max tojxac'al bay yich masantac'al max ajapnok bay yalan patzab. A jun cuarto tu' a ton jun lugar tol asan Dios ay yet. 17Axa junxa makan yul templo satak eltek jun cuarto tu', ay 18 metro max yun is paq'uil. 18C'ute'c'al el masanil ayoc yul templo tu'; ay c'apax oc is yelbub sat chemte' tu' axca satlak te' c'al xumac; c'am junok ch'en chi txecloji.

19Caw wal watx' max yun watx'ji jun lugar tol asan Dios ay yet bay max octok caẍail is trato Jehová. 20Baloneb metro max yun is paq'uil, baloneb metro max yun c'apax yul is txiquin, baloneb metro max aj is tel can, naba oro max oc satlak is paq'uil bay yul. Cax max yak'on watx'jok jun altar naba c'ute', max oc c'apax oro yin. 21Max oc oro yinlak sat te chemte' yul junxa makan cuarto, cax max oc cadena naba oro, yin puertail lugar tol asan Dios ay yet. 22Chi yal elapnok, masanil yul templo naba oroxac'al elok, caytu' c'apax altar tu', ay bay ti' puertail jun lugar tol asan Dios ay yet, ay c'apax oc oro yin.

23Max yak' c'apax watx'jok cham rey Salomón cab yechel ángel chi yik querubín. A te olivo max yaoc yin, max occan bay jun lugar tol asan Dios ay yet. Ec'ban nan so' metro is tel junjun, 24cab metro yetok 25 centímetro is tel junjun xic', xan nan is so' metro chi mak cabil is xic' junjun querubín tu'. 25Lajanc'al tel is xic' eb cabil cax lajanc'al yili eb. 26Nan is so' metro ay aj is tel juntzan tu' cabil. 27Max alay octok juntzan querubín bay yul jun lugar tol asan Dios ay yet, tol jenan el xic', xan a jun is xic' jun chi apni oc yin sat paq'uil tu', axa junxa is xic' junxa chi apni c'apax oc bay junxa is paq'uil, axa junjunxa is xic' juntzan tu' chi chalej ba nan yul jun lugar tu'. 28Cax max alay c'apax oc oro yin juntzan querubín tu'. 29Bay masanil satlak is paq'uil bay yul cab cuarto ay yul templo tu', max alay oc yechel querubín, c'al yechel palma, c'al yechel xumac yelbubok. 30Max alay c'apax ay oro bay yiban te chemte' ayay bay yul cuarto tu' cabil. 31A is puertail bay chon octok ac'al te olivo ayoc yin, c'al bay jolom puertail c'al is marcoal, c'al coxil chon puertail tu'. 32A teal puerta tu' cabil, olivoc'al max oc yin, cax max occ'al yechel querubín yelbubok, yechel palma, c'al yechel xumac, cax max alay oc oro yinlak. 33Max alaycan oc is marcoal puertail templo bay chon octok, ac'ala' a te olivo max oc yin. Man xoyanok yayji yiban puertail tu'. 34Cab jenan max yun te puerta tu', palta a junjun jenan chi je' pakloj is nan. 35Max alay pax oc yechel querubín is yelbubok te puerta tu', yetok yechel palma, c'al yechel xumac ayoc yin. Max lajwi tu' max alay pax oc oro yin. 36Cax max watx'nen pax is muroal bay yinlak amak', ox txol ch'en ch'en josbil max latz'lay ajok, axa jun txolxa xin, a te c'ute' ayoc yin, axcac'al tu' max yun yaji.

37Canebxa abil yoc Salomón yin reyal, yet xajaw Ziv, max el yich yalay ay cimientoal yich is templo Jehová. 38Yinxa usluq'ueb abil yoc Salomón yin reyal, yet xajaw Bul, a ton yet is waxakeb xajaw waay abil tu', cax max yion ba jun templo tu' axca yayji is planoal. Ukeb abil max yitok yet max watx'ji el yuj cham Salomón.

Currently Selected:

1 R 6: ATBYK89

Highlight

Copy