Zacarías 7
7
In cub cyyo'n we'yaj, pero mya ax toc cyu'n
1Tuj tcyajin k'ij te tbelajin xjaw (aju xjaw toc tbi Quisleu), tej lajo'ntok tcyajin abk'i ttzyetlen tcawin rey Darío, tzaj tma'n Kman jun tkanil te Zacarías aju t-sanjel. 2Tuj tk'ijlalil lu, ke xjal tuj tnam Betel xi cysama'n Sarezer tuc'ix Regem-melec cyuc'ix ke mastl cyuc'il tu'n t-xi cykanin tcy'iwbil Kman 3ex tu'n t-xi cykanin cye ke t-sanjel Dios ex cye ke pal ate' tuj tja Kman aju Tajaw Tcyakil, che chi cyja': ¿Cucxpe ko bisule ex cucxpe cbel kyo'ne we'yaj tuj tjwe'yin xjaw tuj junjun abk'i ic tza'n in kbincha'ne ma tz'el ela'xi abk'i ex cucx ja'lo? Che chi.
4Tzaj yolin Kman weye, aju Tajaw Tcyakil, ex tma cyja': 5K'manxa cye cycyakil tnam xjal najlke tuj tx'otx' lu ex cye ke pal: Ma bant-xi 70 abk'i in cub cyyo'ne we'yaj ex in che bisune tuj tjwe'yin ex tuj twukin xjaw te junjun abk'i, pero minti' in cybincha'ne jlu tu'n njaw cynimsa'ne, 6nok o'cx, oc in che wa'ne ex oc in che c'ane in cybincha'ne nok tu'n tnoj cyc'u'je, chicuya cye. 7¿Myapetzun ax yol lu o k'manjtz tu'n Kman cyu'n ke t-sanjel o che ten ojtxi, tej attok tnam Jerusalén tuj txubtxaj ex tej attok nimcu xjal tuj, ex ate'xtok xjal cyuj ke tnam ate' ti'jele tnam Jerusalén, ex tej najlke'xtok ke xjal tuj Néguev ex tuj chk'ajlaj t-xe witz?
Tu'nju miban che niman, cyja'tzun e je'x k'i'n pres tuj juntl lugar
8Tzaj yolin Kman tuc'il Zacarías aju t-sanjel ex chi cyja': 9Atzun jlu o txi nma'ne: Cybinchanxe cyi'j xjal tuj tumelxix, cybinchame xtalbil ex tenxwit tk'ak'bil cyc'u'je cyi'j cyuc'ile. 10Mi'n cub cyyajla'ne ke meba xu'j, mi ke c'wa'l minti' cyman ex cytxu', mi ke stranjer xjal ex mi ke meba minti' at cye. Mi'n cub cyximane tu'n toc cybincha'ne mya ba'n ti'j cyuc'ile, chi Dios. 11Pero minti' cub tuj cywitz xjal tu'n t-xi cyniman. Cycyakil ajtz cyk'o'n ttzal cyi'j twitz Dios ex oc cymaksi'n cyẍcyin tu'n mi'n cybinte tyol. 12Cub cycyuwsa'n cyanmi ic tza'n abj cyuw, tu'n mi'n t-xi cybi'n ke xnak'tzbil ex ke yol e tzaj tma'n Kman aju Tajaw Tcyakil, aju o tzaj tma'n cye t-sanjel ojtxi.
Cyja'tzun tzaj nimxix tk'oj Kman aju Tajaw Tcyakil, 13ex tma: Tza'nxtzun cye minti' ma chinx cybi'n tej nyoline, cyja'xtzun weye, mlay che'x nbi'ne oc cytzaj yolin weye. 14Cyja'tzun e baj nsputine ic tza'n tu'n xcyakinpaẍ cyxol cycyakil nasyon minti' ojtzki'n cyu'n, ex cyetzlenxi tuj cytanmi oc cytx'otx' te tzkij tx'otx' jatum mi jun xjal jacu najan tuj. Tbanilxix aju tx'otx' ex cyu'nx ma tz'oc te tzkij tx'otx'.
Currently Selected:
Zacarías 7: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993
