Rom 8

Aju ac'aj kchwinklal tu'n Xewbaj Xjan

1Cyja'tzun, mlay cub k'o'n cysentens tu'n cyxi' tuj najen akeju at cymojbabl cyib tuc'il Jesucrist, [akeju minti' in che bet ic tza'nx tajbil cychibjal, o'cx ic tza'n tajbil Xewbaj Xjan.] 2Porque ma ko tzokpet tjak' tipumal il ex tjak' tipumal camic tu'n tipumal T-xew Dios, aju in k'onte kchwinklal nok tu'nju kmojbabl kib tuc'il Jesucrist. 3Porque minti' xcye' tley Moisés ti'j tu'n ktzokpet tjak' tipumal il, tu'nju minti' tipun ley, tu'n tlaj tajbil kchibjal mya ba'n, atzun ja'lo ma ko tzokpet tu'n Dios tu'nju tzaj t-sama'n acu Tc'wa'l, oc t-ximlal Tc'wa'l ic tza'n t-ximlal xjal aj il, ex tzaj t-sama'n tu'n tchjet kil; cyja'tzun cyaj il tjak' sentens tej tcyim t-ximlal Crist, 4tu'ntzun tjapun ku'n aju tz'aklxix ic tza'n in tma'n ley, akeko' minti' in ko bet ic tza'nx tajbil kchibjal, nok o'cx ic tza'nx tajbil Xewbaj Xjan.

5Porque akeju in cybincha'n tajbil cychibjal, o'cx in che ximan ti'j ju tajbil cychibjal; atzun keju in cybincha'n tajbil Xewbaj Xjan, o'cx in che ximan ti'j ju tajbil Xewbaj Xjan. 6Porque ka ma ko ximan ti'j ju tajbil kchibjal, camic in tzaj tu'n; pero ka ma ko ximan ti'j ju tajbil Xewbaj Xjan, tu'n jlu in tzaj k'o'n kchwinklal ex kmojbabl kib tuc'il Dios. 7Porque aju xjal o'cx in ximan ti'j tajbil tchibjal, aj k'oj ti'j Dios, porque minti' in xi tniman aju tley Dios, ex mlay bant tu'n. 8Ex akeju in che ank'in ic tza'nx tajbil cychibjal, mlay bant cyu'n aju in tzalaj Dios ti'j.

9Atzun cyeye myatzun in che ank'ine ic tza'nx tajbil cychibjale, nok o'cx ic tza'nx tajbil Xewbaj Xjan, ka ax toc najl T-xew Dios tuj cyanmiye. Ex ka at jun minti' T-xew Crist tuj tanmi, myatzun te Cristju. 10Katzun najl Crist tuj cyanmiye, masque ic tza'n cyimni cyximlale tu'n tlaj il, pero aju cyanmiye at tchwinklal tu'nju ma che oc k'o'ne te tz'aklxix tu'n Dios. 11Katzun najl T-xew Dios tuj cyanmiye, aju Dios jatz ank'in Jesús tu'n cyxol cyimni, ax icx cyeye cjawil ank'in cyximlale tu'n, aju at tcyimel. Nok tu'nju T-xew Dios najl tuj cyanmiye, cjawil ank'in cyximlale, ic tza'n o jatz ank'in Jesucrist tu'n cyxol cyimni.

12Cyja'tzun erman, mya il ti'j tu'n t-xi kniman tajbil kchibjal, ex mya il ti'j tu'n kank'in ic tza'nx tajbil; 13porque ka ma che ank'ine ic tza'nx tajbil cychibjale, che cymele; katzun ma cub cyxitune aju tak'unben cychibjale nok tu'n Xewbaj Xjan, octzun che ank'ile.

14Porque cycyakil keju ẍaklun tu'n T-xew Dios, atzun ke tc'wa'l Diosju. 15Porque ma cyc'ame aju Xewbaj Xjan, mya tu'n cytene juntl maj te majen ex mya tu'n cytene juntl maj tuj xobajil; nok o'cx ma cyc'ame Xewbaj Xjan tu'n cyoque te tc'wa'l Dios; tu'ntzunju nno'c kma'n te Kman Dios: Tat, ko chi. 16Porque axte Xewbaj Xjan tuc'ix kanmi in cyma'n ka tc'wa'l Dios ko'. 17Ex ka tc'wa'l Dios ko', ax icx at koclen tu'n ttzaj k'o'n ketzbil; tu'n Dios ctzajel k'o'n ketzbil, ex at koclen ti'j etzbil ctzajel k'o'n te Crist; ka ma tzic'x ku'n junx tuc'il Crist, ax icx ko tel junx tuc'il tuj tajwalil tuj cya'j.

18Porque ma cub nximane, aju yajbil ke tuj tk'ijlalil ja'lo mya junx ta' tuc'il ju nimbil ke tzul, aju ctzajel tk'o'n Dios ke. 19Porque tcyakil tch'isben Dios cucx in che ayonxix ti'j ex in cyajbe'n tu'n cytzaj tyec'un Dios alcye ke tc'wa'l. 20Porque aju tch'isben Dios oc te minti' tajben, mya tu'nju tex tajbil, nok o'cx tu'nju atzun tajbil Diosju; ex ax Dios k'ukbante tc'u'j tu'n tayon ti'j ju oybil te. 21Porque ax icx ax tch'isben Dios ctzokpetel tu'n mi'n ttentl tjak' tipumal najen, o'cx tu'n tten junx cyuc'il tc'wa'l Dios tuj tzokpibl cye ma' t-xilen. 22Porque ba'n ku'n, tcyakil tch'isben Dios junx ate' tuj c'ixc'oj ex cucx cy-ayin ja'lo ic tza'n jun xu'j nnu'l itz'j tal. 23Ex mya o'cx ke jlu, ax icx ke nimxix in ko ayin tuj kanmi, masque ma kc'am Xewbaj Xjan ic tza'n jun señ ti'j ju ctzajel k'o'n ke, ex in ko ayon ti'j tu'n kc'monte koclen te c'wa'lbaj, ex tu'n jlu ccolpetel kximlal. 24Porque tej kclet, bi'x ke' kc'u'j ti'j jlu ex in ko ayon ti'j; pero ka ma kil aju in ko ayon ti'j, mlay ko ayon mastl; porque ka ma kil ¿ti tten tu'n kayontl? 25Katzun in ko ayon ti'j ju na'nx klonte, ba'n tu'n kayon ti'j tuc'il kpasens.

26Ax icx te Xewbaj Xjan in onin kuc'il tu'nju minti' kipun; porque minti' ba'n ku'n tza'n tten tu'n kna'n Dios; pero axte Xewbaj Xjan in cubsan ki'j twitz Dios tu'nju nimxix tajbil ki'j ex tu'nju minti' in cnet tumel ku'n tu'n kyolin. 27Atzunte Dios in xpich'un tuj kanmi ex ojtzki'n tu'n alcye t-ximbetz Xewbaj Xjan ki'j; porque in cubsan Xewbaj Xjan cyi'j ocslal ic tza'n tajbil Dios.

In cub ti'j tcyakil ku'n nok tu'n Crist

28Ex ba'n ku'n, tuj tcyakil in ak'nan Dios tu'n tel ba'n cye keju in che c'ujlan te, cye keju txco'majtl ke ic tza'nx t-ximbetz Dios. 29Porque akeju ojtzki'maj tu'n Dios ojtxi, ax icx cub t-ximan Dios ojtxi tu'n cyoc ic tza'nx ju Tc'wa'l, tu'ntzun toc Tc'wa'l te nej c'wa'l cyxol nimcu tz'inbaj. 30Ex akeju o che el tpa'n Dios ojtxi, ax icx e tzaj ttxco'n; ex akeju e tzaj ttxco'n, ax icx ma che oc tk'o'n te tz'aklxix; ex akeju ma che oc tk'o'n te tz'aklxix, ax icx tzaj tk'o'n Dios cyoclen tu'n cyten tuc'il tuj tajwalil.

31¿Titzun oc kma' ti'j jlu? Ka a Dios kuc'il, ¿alcyetzun ba'n tk'ojl ki'j? 32Minti' cub t-xc'ayin Dios tu'n ttzaj tk'o'n Tc'wa'l, nok o'cx xi tk'o'n tu'n tcyim tu'n tlaj kil kcyakil. Ka ma tbincha ke icju, ¿tza'ntzun tten tu'n mi'n ttzaj tk'o'n tcyakil ke junx tuc'il Tc'wa'l? 33¿Alcye ba'n ttx'olbante cyil keju sc'o'maj tu'n Dios? Mi a'l jun porque a Dios ma tz'oc k'onte cye te tz'aklxix. 34¿Alcye ba'n tcub k'onte cysentens? Mi a'l jun porque o cyim Crist ex jaw ank'in cyxol cyimni, at ttxlaj Dios tuj bank'abaj, ex ax in cubsan ki'j. 35¿Alcye ba'n tel pa'nte ke ti'j tc'ujlalil Crist? ¿Apelo ju c'ixc'oj in tzaj ki'j, ex ka tu'n yajbil ke, ex ka tu'nju in ko yajlanjtz tu'n tlaj tyol Dios, ex ka tu'n we'yaj, ex ka tu'n kxbalun minti', ex ka tu'n xobajil, ex ka tu'n kcub byo'n? 36Ic tza'n in tma'n tuj Tu'jil:

Tcyakil k'ij nne'lje' ki'je tu'n kcub byo'ne nok tu'n tlaja; in ko oc k'o'ne ic tza'n ke ẍne'l in che cub byet, chi tuj Tu'jil.

37Masque icju, pero tuj tcyakil jlu in cubxix cyi'j ku'n nok tu'n Crist aju o ko tc'ujla. 38Cyja'tzun k'ukl nc'u'je ti'j, mi a'l jun ba'n tel pa'nte ke ti'j tc'ujlalil Dios; mi camic, mi ju kchwinklal tzalu twitz tx'otx', mi ke anjel, mi ke nejenel minti' k'ancha'l, mi keju at cyipumal, mi ju at ja'lo, mi ju tzul, 39mi keju ate' twitz cya'j, mi keju ate' tjak'xi tx'otx', ex mi jun tch'isben Dios jacu ko el cypa'n ti'j tc'ujlalil Dios, aju ma tzaj k'o'n ke tu'n Jesucrist aju Kajaw.

Currently Selected:

Rom 8: MAMH

Highlight

Copy