Matey 24

O tma Jesús ka tu'n tcub xitj tja Dios

Marcos 13.1-2; Lucas 21.5-6

1Tej tetz Jesús tuj tja Dios cyja' t-xi' tuj juntl lugar, e pon lak'e' ke t-xnak'tzben ttxlaj, xi cyyec'un tja Dios te, tza'n tten binchben te. 2Pero xi ttzak'we'n Jesús:

—¿Mape cyile tcyakil jlu? Ax toc cxel nma'ne cyeye, mlay cyaj ten abj tibaj juntl abj, tcyakil cbel tilj.

Ke señ na'nxtok tjapun mancbil tk'ijlalil

Marcos 13.3-23; Lucas 21.7-24; 17.22-24

3E je'xtzun twi witz Olivos, ex tejtzun tcub ke' Jesús e pon lak'e' ke t-xnak'tzben ttxlaj junx cye, ex xi cyma'n te:

—K'mantza keye, ¿jtoj ban tjapun tcyakil jlu ex alcye señ tzul ch'ixtok tula ex ch'ixtok tjapun baj tk'ijlalil? Che chi.

4Xi ttzak'we'n Jesús:

—Ten cycwente cyi'je tu'n mi'n cycub sbu'ne cyu'n xjal. 5Porque nimcu xjal che ul ex c'oquel cyk'on cyib ic tza'n weye ex oc cyma': Akine ju Crist at woclene tu'n Dios, che chilo; ex nimcu xjal che bel cysbu'n. 6Oc cybi'ye oc toc k'oj ex oc cybi'ye tkanil ti'j k'oj, cycwentin oc cyibe tu'n mi'n cyjaw sec'paje, porque il ti'j tu'n tjapun tcyakil jlu; pero myatzun a mancbil tk'ijlalil tu'n tjapun baj tcyakil. 7Porque ke xjal tuj jun nasyon che k'ojlel ti'j juntl nasyon, ex che k'ojlel ke tnam cyi'j mastl tnam; ex nok jachak tzul tx'u'j yabil ex we'yaj ex cyaknajnab. 8Tcyakil jlu atzun tnejel c'ixbisabl.

9Entons che xel k'o'ne tuj cyk'ab xjal tu'n cybaj c'ixbisa'ne, ex che bel byo'ne cyu'n, ex che elel ic'une cyu'n cycyakil xjal tu'n tlaj ocslal keye wi'je. 10Tu'ntzun jlu nimcu xjal cyjel cycolin cyocslabl; ax ke cyuc'il che oquel te aj k'oj cyi'j ex c'elel cyic'un cyib cyxolx. 11Ex nimcu xjal che ul, c'oquel cyk'on cyib te t-sanjel Dios pero mya ax toc cyu'n, ex nimcu xjal che bel cysbu'n. 12Ex tu'nju otok chmet il, nimcu xjal mi'n tentl cyc'ujlalil cyxolx. 13Pero alcye cucx ma tzic'x tu'n ex minti' ma cub numj, atzunju oc cletel. 14Aju tkanil ba'n lu ti'j tcawbil Dios cxel pacbet tuj tcyakil twitz tx'otx' tu'ntzun tchic'banjtz ju yol lu cye cycyakil nasyon; maxitzun tzul mancbil tk'ijlalil.

15At jun yol cyaj ttz'iban Daniel aju t-sanjel Dios; c'oquex cyk'o'n xjal jun tilbilal ic'bilxix ax tuj tja Dios, chi Daniel. Alcye ma jaw sch'inte jlu, tz'elx tnic' ti'j. Cyja'tzun oc cylonteye tocx tilbilal lu tuj lugar xjan, 16entons ke xjal ate' tuj tx'otx' Judey, cyxi ok twi witz. 17Alcye jun xjal tjax twi ja, oc tcu'tz mi'n tz'ocx tuj tja tu'n tetz ti'n jun ti'xti; 18ex alcye jun xjal at tuj cojbil, mi'n tz'ajtz meltz'aj k'ilte ttxo'w. 19Pero bec'bil cywitz ke xu'j ch'ixtok tul itz'j cyal tuj tk'ijlalil tzul, ex bec'bil cywitz ke xu'j cucx cych'u'n cyal. 20Cyja'tzun, che na'ne Dios tu'ntzun mi'n cyel oke tuj jbalil ex tuj k'ij te ojlabl; 21porque tzul jun c'ixbisabl ma'xix, bajx tzaj jun maj icju atxix tej tbant twitz tx'otx', ex mlay tzaj juntl maj ic tza'n jlu. 22Nokwit minti' tu'n tajtz lak'e' ti'j tk'ijlalil c'ixbisabl, miwtlo jun xjal tu'n tcyaj clet; pero tu'n cylaj keju sc'o'maj tu'n Dios, c'ajetz lak'e' ti'j tk'ijlalil c'ixbisabl.

23Ka at jun xjal ma k'mante cyeye: Lu Crist lu aju at tulel, ka chi, ex ka lu at ma chixin, ka chi, mi'n txi cyocsla'ne tyol. 24Porque che ul xjal c'oquel cyk'on cyib ic tza'n Crist ke, pero mya ax toc cyu'n, ex che ul xjal c'oquel cyk'on cyib te t-sanjel Dios, pero mya ax toc cyu'n; ex oc cybincha' ke señ ma'xix ex ke binchben nim cyipumal tu'n cysbun cyi'j xjal, ax icx oc cyajbe tu'n cysbun cyi'j keju sc'o'maj ke tu'n Dios, nokwit at tumel. 25Ya ma txi nma'ne tcyakil cyeye na'nxtok tul canun tcyakil jlu. 26Cyja'tzun, ka ma cyma xjal: Lu Crist at tuj lugar minti' cynajbil xjal tuj, ka che chi, mi'n che'xe que'yilte te; ex ka ma cyma: Lu Crist tocx tuja, ka che chi, mi'n txi cyocsla'ne cyyol. 27Porque ic tza'n xle'laj cya'j in jaw tuj tjawitz k'ij ex in pon koptz'aj tuj telex k'ij, ictzun tten chin ule, akine sc'o'maj kine tu'n Dios tu'n ntene cyuc'il xjal. 28Porque jatum ta' t-ximlal cyimni, atzun che chmetel ke c'utz.

Tza'n tten tzul Jesucrist juntl maj

Marcos 13.24-37; Lucas 21.25-33; 17.26-30,34-36

29Tbajlenxitzun yajbil tuj tk'ijlalil tzul, c'oquel klolj twitz k'ij, ex aju xjaw mlay c'ant t-spic'umal, ke che'w twitz cya'j che tzajel tz'ak, ex ke tipumal cya'j che yucchtel. 30Entons ctzajel yec'un jun techal tuj cya'j tu'n wule, akine sc'o'maj kine tu'n Dios tu'n ntene cyuc'il xjal, octzun che jawil ok' cycyakil xjal tuj junjun tnam twitz tx'otx', ex oc cyila' oc ntzaje tibaj muj twitz cya'j tuc'il wipumale nim ex in koptz'aj wi'je tu'n nspic'umale. 31Che tzajel nsama'ne ke n-anjele, c'oquel k'ajtza'n chun cyuw, ex keju sc'o'maj wu'ne che oquel chmo'n cyu'n anjel, che tzajel chmo'n tuj tcyakil twitz tx'otx' ex max ttxa'npun tx'otx'.

32Cyi'mele techal ti'j tkan higo: Oc in tzaj t-xul, nne'l cynic'e ti'j ch'ix tul ttzi jbalil. 33Ax icxtzun cyeye, oc cylonteye tcyakil jlu, tz'elx cynic'e ti'j, nikayin ta' tk'ijlalil tu'n wule, mer ic tza'n otok chin pone ttzi ja. 34Ax toc cxel nma'ne cyeye, na'nxtok cycyim ke xjal ate' tuj tk'ijlalil ja'lo oc tjapun tcyakil jlu. 35Ate cya'j cnajel tuc'ix tx'otx', atzun we nyol mlay naj.

36Pero alcye k'ij ex alcye or tu'n wule, mi a'l jun xjal bilte, mi ke anjel tuj cya'j minti' bi'n cyu'n, ax icx weye minti' bi'n wu'ne, akine Tc'wa'l Dios. O'cx Nmane ba'n tu'n.

37Aju tk'ijlalil oc wule, akine sc'o'maj kine tu'n Dios tu'n ntene cyuc'il xjal, ic tten ic tza'n tuj tk'ijlalil tej tten Noé. 38Porque tuj tk'ijlalil tej na'nxtok ttzaj k'ekab, in che wa'n xjal ex in che c'an, in che moje' xinak tuc'il cyxu'jil ex ke xu'j tuc'il cychmil, cucxtok cybinchante jlu tuj k'ij tej tocx Noé tuj matij barc; 39ex minti'tok toc cycwent ti'j tej ttzaj k'ekab cyibaj; cycyakiltzun e je'x k'i'n tu'n a'. Icxtzun cbajelju oc wule akine sc'o'maj kine tu'n Dios tu'n ntene cyuc'il xjal. 40Ka at cabe xjal tuj cojbil, jun cxel k'i'n ex juntl cyjel k'o'n. 41Ka at cabe xu'j in che che'n ti'j cya', jun cxel k'i'n ex juntl cyjel k'o'n.

42Cyja'tzun che xk'ukine, porque minti' bi'n cyu'ne alcye or tzul Cyajawe. 43Pero tz'elx cynic'e ti'j yol lu, nokwit bi'n tu'n tajaw ja alcye or tzul elek', jaculo cub ten xk'ukil ex mlay txi tk'o'n ambil tu'n tocx tjako'n elek' tja. 44Cyja'tzun icx cyeye cybincham cytene; porque chin ule tuj or aju mya ximan cyu'ne, akine sc'o'maj kine tu'n Dios tu'n ntene cyuc'il xjal.

Aju majen in bant tak'un tu'n ex aju majen minti' in bant tak'un

Lucas 12.41-48

45Aju majen in bant tak'un tu'n ex at tnabl, c'oquel k'o'n tu'n tpatrón te cwentil cye keju ate' tuj tja, tu'n t-xi k'ot cywa oc tpon or. 46At tzalajbil teju majen lu ka in tbincha'n alcye tak'un oc tul tpatrón. 47Ax toc cxel nma'ne cyeye, c'oquel k'o'n majen lu tu'n tpatrón te cwentil te tcyakilju at te patrón. 48Pero ka mya ba'n ju majen lu, ex ka ma tma tuj tanmi: Yaj tzul we npatrón, ka chi, 49ex ka ma tz'oc ten c'ixbisal cye mastl majen, ex ka ma tz'oc ten wa'l ex c'al cyuc'il ke c'al k'e'n, 50tzultzun tpatrón majen lu tuj k'ij minti' in ayon ti'j, ex tuj or minti' bi'n tu'n; 51ex cbel k'o'n nim tcastiw majen lu tu'n tpatrón, ex atzun cxel k'o'n cyxol ke xmletz'; atzun ctzajel ok'el ex atzun ckitx'itx'il t-xe cye' xjal.

Currently Selected:

Matey 24: MAMH

Highlight

Copy