Lucas 6

El cyi'n t-xnak'tzben Jesús triw twi tkan tuj k'ij te ojlabl

Matey 12.1-8; Marcos 2.23-28

1In bettok Jesús cyxol awal tuj jun k'ij te ojlabl, cyuc'ix ke t-xnak'tzben; in che bettok ex e oc ten k'ilte triw twi tkan, ex cub cyxk'uchin tuj cyk'ab, ex xi cywa'n. 2Entons at junjun parisey xi cyma'n cye:

—¿Tiku'n in cybincha'ne jlu, aju mya k'o'n tu'n ley tu'n tbinchanjtz tuj k'ij te ojlabl?

3Xi ttzak'we'n Jesús:

—¿Bajxpe jaw cysch'i'ne tuj Tu'jil ti o tbincha David tej ttzaj el tc'u'j cyuc'ix ke tuc'il? 4Ocx tuj tja Dios, e jaw ttzyu'n ke pan cy'iwla'maj ex xi twa'n, ex xi tk'o'n cye tuc'il, masque minti' cyoclen ti'j tu'n t-xi cywa'n ke pan lu, porque o'cx ke pal cye judiy at cyoclen ti'j.

5Ex xi tma'ntl cye:

—Akine tajaw k'ij te ojlabl, akine sc'o'maj kine tu'n Dios tu'n ntene cyuc'il xjal.

Banix jun xjal tzkijtok tk'ab

Matey 12.9-14; Marcos 3.1-6

6Tuj juntl k'ij te ojlabl ocx Jesús tuj ja te c'ulbil in tk'o'n xnak'tzbil cye xjal. Axtok ta' jun xinak tzkijtok tbank'ab. 7Atzun cye xnak'tzal ti'j ley ex ke parisey in che que'yintok ti'j ka tu'n tbant tk'ab xjal tu'n Jesús tuj k'ij te ojlabl, in che jyon tumel tu'n tcub tz'ak tuj cyley. 8Atzunte Jesús el tnic' ti'j cyximbetz, ex xi tma'n te xinak tzkij tk'ab:

—We'ctza ex we'cuya cyxol xjal.

Jawtzun we' ex ax cub we'. 9Xitzun tma'n Jesús cye parisey:

—At jun yol cxel nxjeline cyeye: ¿K'o'npelo tu'n ley tu'n tbinchet ba'n tuj k'ij te ojlabl, ex ka tu'n tbinchet mya ba'n? ¿K'o'npelo tu'n ley tu'n tclet jun xjal ex ka tu'n tnaj?

10Xitzun tque'yin Jesús cywitz cycyakil ti'jele, ex xi tma'n te xinak:

—Nukpi'mil tk'aba.

Atzunte xinak el tnukpi'n, ex banttzun tk'ab. 11Atzun cye parisey tzaj nim cyk'oj, in che yolintok cyxolx alcye tu'n cybinchante ti'j Jesús.

E jaw t-sc'o'n Jesús ke cablaj t-xnak'tzben

Matey 10.1-4; Marcos 3.13-19

12Ax tk'ijlalil lu xi aj Jesús twi witz na'l Dios, ex jun konic'an tu'n in na'n Dios. 13Tejtzun tjawil k'ij e tzaj ttxco'n ke t-xnak'tzben, ex e jaw t-sc'o'n cablaj cyxol ex oc tk'o'n cybi apostl. 14Atzun ke jlu: Simón aju oc k'o'n tbi Pedro, tuc'ix Andrés aju titz'in Pedro, tuc'ix Jacobo, tuc'ix Juan, tuc'ix Pelip, tuc'ix Bartolomé, 15tuc'ix Matey, tuc'ix Tomás, tuc'ix Jacobo aju tcy'ajal Alfeo, tuc'ix Simón aju toctok te tajlal cyxol jun partid xjal Cananist cybi, 16tuc'ix Judas aju titz'in Jacobo, tuc'ix Judas Iscariote aju xi k'onte Jesús tuj cyk'ab xjal.

Xi tk'o'n Jesús xnak'tzbil cye nimcu xjal

Matey 4.23-25

17Cu'tz Jesús twi witz cyuc'ix apostl ex cub ten tuj jun tal chk'ajlaj cyuc'il t-xnak'tzben ex cyuc'il nim xjal tzajni ke tuj tx'otx' Judey ex tuj tnam Jerusalén ex tuj mlaj te tnam Tiro ex te tnam Sidón, otok che tzaj bilte tyol Jesús, ex tu'n cybanix ke yab. 18Akeju in che yajlanjtz cyu'n ju'ẍ ax icx e bant. 19Ex cycyakil xjal oc tilil cyu'n tu'n toc cymaco'n Jesús, porque tu'n tipumal Jesús in che banix cycyakil yab.

Ke xjal at tzalajbil cye ex keju bec'bil cywitz

Matey 5.1-12

20Xitzun tque'yin Jesús cywitz ke t-xnak'tzben ex xi tma'n cye:

—At tzalajbil cyeye akeye meba, porque cyeye aju tcawbil Dios.

21At tzalajbil cyeye, akeye nne'l cyc'u'je ja'lo, porque oc che nojele.

At tzalajbil cyeye, akeye in che ok'e ja'lo, porque oc che jawil tze'ne.

22At tzalajbil cyeye oc cyel ic'une cyu'n xjal tu'n nlaje, akine sc'o'maj kine tu'n Dios tu'n ntene cyuc'il xjal, ex oc cyex lajo'ne cyxol, ex oc cyyasun cyi'je, ex oc cyyolin cyi'je ka mya ba'n keye. 23Che tzalajxe tuj ju k'ij oc tbinchanjtz jlu cyi'je, ex che tenxe alegr, porque ma' t-xilen jun oyaj tzul k'o'n cyeye tuj cya'j; porque icx cybincha ke cyxe'chel ojtxi cyi'j t-sanjel Dios.

24Pero, bec'bil cywitze akeye k'inun, porque o'cx ja'lo ma k'ukbanjtz cyc'u'je.

25Bec'bil cywitze akeye ma noj cyc'u'je ja'lo, porque ctzajel el cyc'u'je.

Bec'bil cywitze akeye in che tze'ne ja'lo, porque oc che wu'yile ex oc che ok'ele tu'n bis.

26Bec'bil cywitze oc cyyolin cycyakil xjal ba'n cyi'je, porque icx o cybincha ke cyxe'chel ojtxi cyi'j ke pacbal nic'al yol.

Aju tu'n kc'ujlante ke aj k'oj ki'j

Matey 5.38-48; 7.12

27Atzun cyeye, akeye in che bin ti'j nyole, cxel nma'ne cyeye: Cyc'ujlame ke aj k'oj cyi'je, cybinchame ba'n cye keju in che el ic'un te cyeye; 28cykaninxe cy'iwbil cyibaj keju in tzaj cykanin mya ba'n cyibaje ex che na'ne Dios cyi'j keju in che yasun cyi'je. 29Ex ka at jun xjal ma tz'oc jun tk'o'txa tu'n, k'onxa juntl tk'o'txa ka taj xjal tu'n toc juntl; ex ka at jun xjal ma tz'el k'inte tchicyeta, ax icx k'onxa tcamiẍa te, mi'n cub t-xc'ayina. 30Ka at jun xjal ma tzaj tkanin jun ti'xti teya, k'onxa te; ex ka at jun xjal ma tz'el k'inte jun ti'xti teya, mi'n txi tkanintla. 31Ic tza'n cyaje tu'n cybinchante xjal cyeye, icxtzun cyeye cybinchame cye.

32Ka ma cyc'ujlaye o'cx keju in che c'ujlan cyeye, ¿alcye jun ba'n in cybincha'ne icju? Porque icx ke xjal mya ba'n in cyc'ujla'n keju in che c'ujlan cye. 33Ex ka o'cx ma cybinchaye ba'n cye keju in che binchan ba'n cyeye, ¿alcye jun ba'n in cybincha'ne icju? Porque icx ke xjal mya ba'n in cybincha'n icju. 34Ex ka ma txi cyk'o'ne cych'ex xjal o'cx cye keju at tumel tu'n tchjet cyu'n, ¿alcye jun ba'n in cybincha'ne icju? Porque icx ke xjal mya ba'n in xi cyk'o'n cych'ex xjal mya ba'n tu'nju ba'n cyu'n ka oc cycma' t-xel. 35Cyc'ujlamtzune ke aj k'oj cyi'je ex cybinchame ba'n, ex cyk'onxe cych'ex xjal, ex mi'n che ayone tu'n tajtz k'o'n t-xel; cyja'tzun ma' t-xilen jun oyaj tzul k'o'n cyeye, ex che oquele tc'wa'l Dios, aju Dios Ma'xix Toclen; porque ate Dios in tzaj k'onte ju ba'n cye keju minti' in xi cyk'o'n chjonte te ex cye keju mya ba'n ke. 36Tzaj k'ak'an cyc'u'je cyi'j xjal ic tza'n te Cymane in k'ak'an tc'u'j cyi'j.

Mi'n che yoline mya ba'n cyi'j cyuc'ile

Matey 7.1-5

37Mi'n che yoline cyi'j cyuc'ile ka mya ba'n ke, tu'ntzun mi'n cyoque tuj xjel tu'n Dios. Mi'n cub cyk'o'ne cysentens mastl, tu'ntzun mi'n tcub k'o'n cysentense tu'n Dios. Cynajsame aju mya ba'n in cybincha'n xjal cyi'je, ex cnajseteltzun cyile tu'n Dios. 38Cyk'onxe ch'in cye mastl ex ctzajel tk'o'n Dios ch'intl cyeye; jun malbil tz'aklxix ctzajel tk'o'n Dios cyeye, nojnixix wen ex nne'l tilj. Porque ax ju malbil c'ajbel tu'n Dios cyeye jatum in xi cymalo'ne te juntl.

39Ax icx xi tma'n Jesús jun techal cye:

—¿Jacupe bant tu'n jun moẍ tu'n t-xi tyec'un tbe juntl moẍ? ¿Mlaypelo che'x tz'ak tuj jul cycabil? 40Aju xnak'tzben mya mas toclen twitz ju xnak'tzal te; maxitzun c'oquel ic tza'n te xnak'tzal te ocxi tjapun baj xnak'tzbil tu'n.

41¿Tiku'n nno'c cyque'yine aju tal tz'is tocx tuj twitz cyermaniye, ex minti' nno'c cyk'o'ne cwent ti'j ju viga tocx tuj cywitze? 42¿Tza'ntzun tten tu'n t-xi cyma'ne te cyermaniye: C'eletz ki'ne ju tal tz'is tocx tuj twitza erman, ex lu ju viga tocx tuj cywitze? Xmletz' keye. Nej cyi'metze aju viga tocx tuj cywitze, entons k'ancha'lxix oc cyila'ye tu'n tetz cyi'ne ju tal tz'is tocx tuj twitz cyermaniye.

Nne'l knic' ti'j tze' nok tu'n twitz

Matey 7.17-20; 12.34-35

43Porque jun tze' ba'n minti' in tk'o'n twitz mya ba'n; ex jun tze' mya ba'n minti' in tk'o'n twitz ba'n. 44Porque teyle junjun tze' nne'l knic' ti'j tu'n twitz; mlay tz'el ktuxin klo' higo ti'j ch'i'x, ex mlay tz'el ktuxin klo' uva ti'j ch'i'x c'ul. 45Aju xjal ba'n, in tbincha'n ju ba'n porque atzun ta' ju ba'n tuj tanmi; atzunte xjal mya ba'n in tbincha'n mya ba'n porque atzun ta' ju mya ba'n tuj tanmi; porque ic tza'nx tten tcyakilju at tuj cyanmi xjal, axtzunju in che yolin ti'j.

In yolin Jesús cyi'j cabe simyent

Matey 7.24-27

46¿Tiku'n nno'c cyma'ne weye: Tat, Tat, che chiye, ex minti' in cybincha'ne aju in xi nma'ne cyeye? 47Tcyakilju nnu'l wuc'ile ex in xi tbi'n nyole ex in tbincha'n aju in xi nma'ne, cxel nma'ne cyeye tza'n tten. 48Ic tten ic tza'n jun xinak jaw tbincha'n tja, nej cu'x tlacu'n ma' t-xe' tcubil tja ex cub tk'o'n ju simyent tibaj pc'at. Tejtzun ttzaj jun nintz a', pon tilj nimxix ti'j ja, pero minti' o yucch, porque tcub t-simyentil tibaj pc'at. 49Pero alcye ma binte nyole ex minti' in tbincha'n aju in xi nma'ne, ic tten ic tza'n jun xinak jaw tbincha'n tja tibaj tx'otx' minti' t-simyentil cub tk'o'n; ex pon tilj nimxix a' ti'j, ex cub tilj naj; ex bi'x cub xitj ju ja tcyakil.

Currently Selected:

Lucas 6: MAMH

Highlight

Copy