Lucas 3

Aju tpacbabl Juan, aju in che byan xjal tu'n tuj a'

Matey 3.1-12; Marcos 1.1-8; Juan 1.19-28

1Tej otok bant olaj abk'i ttzyetlen tcawin aju president Tiberio, ex toctok Ponsio Pilat te gobernador tuj tx'otx' Judey, ex toctok Herodes te gobernador tuj tx'otx' Galiley, ex atzunte Pelip aju titz'in Herodes toctok te gobernador tuj tx'otx' Iturea ex tuj tx'otx' Traconite, ex atzunte Lisanias toctok te gobernador tuj tx'otx' Abilinia, 2ex ate'ctok Anás ex Caipás te nejenel cye pal cyxol xjal judiy, tzaj yolin Dios tuc'il Juan aju tcy'ajal Zacarías, tuj lugar minti' cynajbil xjal tuj. 3Ultzun Juan, ic' cyuj cycyakil lugar ttzi'yile nima Jordán in pacban ex in tma'n tu'n tajtz ti'j cyanmi xjal ex tu'n cybyan tu'ntzun tnajset cyil. 4Ex Juan pacbal tu'ntzun tjapun aju yol tz'iban tuj tu'jil Isaías aju t-sanjel Dios, chi cyja':

In jaw tk'ajk'ajel twi' jun xjal tuj lugar minti' cynajbil xjal tuj, in tma'n: Cybinchame tbe Kman; cybinchame jun tbe jikun ti'j.

5Tcyakil tk'ab xak oc che nojsetel, tcyakil witz ex tal witz chk'ajlaj che cyjel; ke be ẍo'c cyi'j che xel jikumet, ex ke be busl cyuj che bajel tz'umset;

6ex cycyakil xjal c'oquel cyque'yin aju colbil in tzaj tk'o'n Dios, chi Isaías.

7Tej cyul xjal tuc'il Juan tu'n cybyan tu'n tuj a', xi tma'n Juan cye:

—Tiyjil k'anti' keye. ¿Alcye ma k'mante cyeye tu'n cyel oke twitz ju castiw ma'xix tzul tu'n Dios? 8Cybinchame ba'n, tu'ntzun tque'yinjtz ka otok tz'ajtz ti'j cyanmiye, ex mi'n che oc tene k'malte tuj cyanmiye cyja': Tiyjil Abraham ko'ye; porque cxel nma'ne cyeye, jacu bant tu'n Dios tu'n cyoc ke abj lu te tiyjil Abraham. 9Aju si'wbil c'uxbil ya ma canun t-xe tloc' tze'; cyja'tzun tcyakil tze' minti' in tk'o'n twitz ba'n, cjawil tx'emit, ex c'oquex k'ot tuj k'ak', chi Juan cye.

10Xitzun cykanin xjal te:

—¿Titzun oc kbincha'ye?

11Xi ttzak'we'n Juan:

—Alcye at cabe tcamiẍ, k'onx jun teju minti' tcamiẍ ex alcye at twa, k'onx ch'in teju minti' twa.

12Ax icx e ul junjun peyil pwak tu'n cybyan tu'n Juan, ex xi cykanin te:

—Xnak'tzal, ¿yajtzun keye, ti oc kbincha'ye?

13Atzunte Juan xi tma'n cye:

—Mi'n tz'el cypeyine mastl ti'j ju k'ma'maj cyeye tu'n ley.

14Ax icx ke soldad xi cykanin te:

—Yajtzun keye, ¿ti oc kbincha'ye?

Ex xi tma'n Juan cye:

—Mi'n tz'el cyxc'ayine jun ti'xti te juntl, ex mi'n che si'mine yol cyi'j xjal; ex cycyaje conporm ti'j ju twi cyc'u'je.

15Ex in che ayontok xjal, ex cycyakil in che ximantok ti'j tuj cyanmi, kapelo a Juan ju Crist aju at toclen tu'n Dios. 16Pero xi tma'n Juan cye cycyakil xjal:

—Axix toc akine in che byane wu'ne tuj a'; pero tzul juntl mas nim tipumal nwitze, aju minti' woclene tu'n tel npaju'ne tak'al t-xajab; octzun che byale tu'n tu'n Xewbaj Xjan ex tu'n k'ak'. 17Tzyu'n xupbil triw tu'n, ex c'elel t-xupin ttz'isil triw tuj tpe'n; atzun twitz triw c'oquel tchmo'n tuj ttx'utx', atzun ttz'isil triw cbel tpatun tu'n k'ak' aju mlay yupj, chi Juan cye.

18Cyja'tzun in tk'o'ntok Juan cynabl xjal tu'n tyol ex tuj nimcu tumel, ex in tpacba'n tkanil ba'n cye. 19Atzunte Herodes aju gobernador, baj ilin tu'n Juan tu'n tlaj otok tz'oc Herodías te t-xu'jil; ate Herodías t-xu'jil Pelip aju ttzic Herodes; ex baj ilin Herodes tu'n Juan tu'n tlaj tcyakilju mya ba'n tbincha. 20Mya o'cx jlu tbincha Herodes, at juntl mya ba'n tbincha, ocx lamo'n Juan tu'n tuj pres.

Tej tbyan Jesús tuj a'

Matey 3.13-17; Marcos 1.9-11

21Tej cybaj byan cycyakil xjal tuj a' tu'n Juan, ax icx te Jesús o byan tu'n Juan; ex matok in na'n Jesús Dios, jaket ttzi cya'j, 22ex cu'tz Xewbaj Xjan tuj cya'j, ul tibaj Jesús, ic que'yin ic tza'n paloma, ex tzaj k'ajt Dios tuj cya'j ex tma:

—Aya Nc'wa'le c'ujla'nxixa wu'ne; in chin tzalaje ti'ja.

Cybi t-xe'chel Jesucrist

Matey 1.1-17

23Matok lajo'n 30 abk'i tu'n Jesús tej ttzyet tak'un. Tuj cynabl xjal ka tcy'ajal José te Jesús; atzunte José tcy'ajal Elí; 24atzunte Elí tcy'ajal Matat; atzunte Matat tcy'ajal Leví; atzunte Leví tcy'ajal Melqui; atzunte Melqui tcy'ajal Jana; atzunte Jana tcy'ajal José; 25atzunte José tcy'ajal Matatías; atzunte Matatías tcy'ajal Amós; atzunte Amós tcy'ajal Nahúm; atzunte Nahúm tcy'ajal Esli; atzunte Esli tcy'ajal Nagai; 26atzunte Nagai tcy'ajal Maat; atzunte Maat tcy'ajal Matatías; atzunte Matatías tcy'ajal Semei; atzunte Semei tcy'ajal José; atzunte José tcy'ajal Judá; 27atzunte Judá tcy'ajal Joana; atzunte Joana tcy'ajal Resa; atzunte Resa tcy'ajal Zorobabel; atzunte Zorobabel tcy'ajal Salatiel; atzunte Salatiel tcy'ajal Neri; 28atzunte Neri tcy'ajal Melqui; atzunte Melqui tcy'ajal Adi; atzunte Adi tcy'ajal Cosam; atzunte Cosam tcy'ajal Elmodam; atzunte Elmodam tcy'ajal Er; 29atzunte Er tcy'ajal Josué; atzunte Josué tcy'ajal Eliezer; atzunte Eliezer tcy'ajal Jorim; atzunte Jorim tcy'ajal Matat; 30atzunte Matat tcy'ajal Leví; atzunte Leví tcy'ajal Simeón; atzunte Simeón tcy'ajal Judá; atzunte Judá tcy'ajal José; atzunte José tcy'ajal Jonán; atzunte Jonán tcy'ajal Eliaquim; 31atzunte Eliaquim tcy'ajal Melea; atzunte Melea tcy'ajal Mainán; atzunte Mainán tcy'ajal Matata; atzunte Matata tcy'ajal Natán; 32atzunte Natán tcy'ajal David; atzunte David tcy'ajal Isaí; atzunte Isaí tcy'ajal Obed; atzunte Obed tcy'ajal Booz; atzunte Booz tcy'ajal Salmón; atzunte Salmón tcy'ajal Naasón; 33atzunte Naasón tcy'ajal Aminadab; atzunte Aminadab tcy'ajal Aram; atzunte Aram tcy'ajal Esrom; atzunte Esrom tcy'ajal Fares; atzunte Fares tcy'ajal Judá; 34atzunte Judá tcy'ajal Jacob; atzunte Jacob tcy'ajal Isaac; atzunte Isaac tcy'ajal Abraham; atzunte Abraham tcy'ajal Taré; atzunte Taré tcy'ajal Nacor; 35atzunte Nacor tcy'ajal Serug; atzunte Serug tcy'ajal Ragau; atzunte Ragau tcy'ajal Peleg; atzunte Peleg tcy'ajal Heber; atzunte Heber tcy'ajal Sala; 36atzunte Sala tcy'ajal Cainán; atzunte Cainán tcy'ajal Arfaxad; atzunte Arfaxad tcy'ajal Sem; atzunte Sem tcy'ajal Noé; atzunte Noé tcy'ajal Lamec; 37atzunte Lamec tcy'ajal Matusalén, atzunte Matusalén tcy'ajal Enoc; atzunte Enoc tcy'ajal Jared; atzunte Jared tcy'ajal Mahalaleel; atzunte Mahalaleel tcy'ajal Cainán; 38atzunte Cainán tcy'ajal Enós; atzunte Enós tcy'ajal Set; atzunte Set tcy'ajal Adán; atzunte Adán tc'wa'l Dios.

Currently Selected:

Lucas 3: MAMH

Highlight

Copy