Génesis 45

Xi tma'n José cye ttzic ka ax cyerman cyib

1Minti' o tipatl José tu'n mi'n tjaw ok' cywitz cycyakil ke ajbel te. Tu'ntzun jlu jaw tk'ajk'ajel twi' ex tma: Cyexe cycyakile tzalu, chi José. Cyja'tzun, mi jun ajbel cyaj ten tuc'il tej t-xi tma'n cye ttzic ka cyerman cyib. 2Octzun ten José ok'el cyuwxix, o cybi cycyakil aj Ejipt, ex pon tkanil jlu max tuj tja Faraón. 3Xitzun tma'n José cye terman:

—Akine José. ¿Itz'xpe nmane? Chi José.

Atzun cye terman minti' o bant ttzak'wenjtz cyu'n, tu'nju bi'x e sec'paj twitz José. 4Xitzun tma'n José cye terman:

—Che lak'etze ntxlaje, chi José.

Atzun cye e je'x lak'e', ex xi tma'n cye:

—Akine José aju cyermaniye, aju tzaj cyc'ayine tuj Ejipt. 5Atzun ja'lo, mi'n che bisune ex mi'n tzaj cyk'oje cyxole ti'j ju ntzajlen cyc'ayine tzalu, tu'nju ate Dios tzaj samante weye tu'n wul neje cywitze tu'n cyclet xjal. 6Ma bant-xi cab abk'i ttzajlen we'yaj twitz tx'otx', ex tuj jwe'tl abk'i ja'lo mi a'l jun xjal c'awal mi cchmol twitz awal. 7Ate Dios tzaj samante weye tu'n wul neje cywitze tu'n tcyaj clet cyiyjile twitz tx'otx', ex tu'n cycolpete tuj jun tumel ma'xix toclen. 8Tu'ntzun jlu, mya cyu'ne in tzaj cysama'ne tzalu, nok o'cx tu'n te Dios, ex ax te o tz'oc k'onte weye te onil te Faraón, te nejenel tuj tja ex te gobernador tibaj tcyakil tx'otx' Ejipt. 9Cyxi naje tuc'il nmane ex cymanxe te cyja': Chitzun José aju tcy'ajala: Ate Dios o tz'oc k'onte weye te gobernador tibaj tcyakil tx'otx' Ejipt. Tzaja wuc'ile jurat naj. 10Atzun cnajala tuj lugar Gosén, cyuc'ix ke tc'wa'la, ke tal tchmana, cycyakil ke taluna ex tcyakilju at teya. Cyja'tzun, nikayin ntxlaje ctela. 11Atzun cxel nk'o'ne twaya tu'nju atx jwe' abk'i we'yaj, tu'ntzun mi'n tcyima tu'n mebyil, aya ex keju ate' tuj tjaya ex tcyakilju at teya, che chicuye te nmane. 12Lu witz'ine Benjamín, ax icx cyeye che oquele testiw ti'j, ka acu kine in chin yolin cyuc'ile. 13Cytx'olbanxe te nmane ti'j tcyakil woclene toc tzalu tuj Ejipt, ex ti'j tcyakilju ma cyile tzalu. Cyxi naje k'ilte nmane, chi José xi tma'n cye.

14Tzajtzun tchle'n José aju titz'in Benjamín tbi, ex oc ten ok'el. Ax icx te Benjamín oc ten ok'el chle'ntok José tu'n. 15El ttz'uban José cywitz cycyakil ke terman, ex oc ten ok'el tej cytzaj tchle'n. Te tibajxi jlu, e oc ten ke terman yolil tuc'il.

16O pon tkanil lu tuc'il Faraón tuj tja, chi cyja': Ma che ul ke terman José, chi, ex o jaw tzalaj Faraón cyuc'ix ke ajbel te. 17Xitzun tma'n Faraón te José cyja':

—K'manxa cye termaniya tu'n toc cyk'o'n tikatz cychej tu'n cyaj tuj Canaán, 18ex e ttzaj cyi'n cyman cyuc'ix ke cyxu'jil ex cyc'wa'l, ex e cyul wuc'ile. Cxel nk'o'ne cye aju tbanil tx'otx' tzalu tuj Ejipt, ex che wa'l ti'j tbanil wabj ctzajel tuj tx'otx' lu. 19K'manxa cye tu'n cyxi cyi'n carwaj tzalu tuj Ejipt tu'n ttzaj cyi'n cyxu'jil ex ke cyc'wa'l, tuc'ix cymane, ex e cytzaj tzalu. 20Mi'n che oc we' ti'j aju at cye ma chixin, porque c'oquel te cye aju k'inumabl at tzalu tuj Ejipt, chi Faraón.

21Banttzun cyu'n ke tcy'ajal Israel icju. E je'x tk'o'n José carwaj cye ic tza'nx otok tma Faraón, ex xi tk'o'n cywa tuj cybe. 22Ax icx xi tk'o'n José jun pak t-xbalun teyle junjun; atzun te Benjamín xi tk'o'n ox syent sak pwak te, ex jwe' pak t-xbalun. 23Ex xi t-sama'n José laj bur tjak' iktz tbanilxix attok tuj Ejipt. Ex lajtl bur xi' tjak' iktz triw tuc'ix wabj ex chibj, tu'n tbaj tu'n tman tuj tbe oc ttzaj. 24Baj tk'olben tib José cyuc'il ke terman ex xi tma'n cye cyja': Mi'n che k'ojle tuj be, chi José.

Cubtzun be cyu'n. 25E ajtztzun tuj Ejipt, ex e pon tuj Canaán jatum najltok Jacob aju cyman. 26Xitzun cytx'olba'n te cyman cyja': Itz'x te José, ex a in cawin tibaj tcyakil tx'otx' Ejipt, che chi. Bi'x naj tnabl Jacob tu'n jlu, ex minti' xi tniman. 27Tej tbaj cytx'olba'n tcyakilju otok tma José cye, ex tej tlonte Israel ke carwaj otok che tzaj t-sama'n José te k'ibl te, jaw tzalaj nim, 28ex tma cyja': Ax toc itz'x José aju ncy'ajale. Ma chinxe tuc'il, ex oc wilaye na'nxtok ncyime.

Currently Selected:

Génesis 45: MAMH

Highlight

Copy