Génesis 15

Cyaj bant ti'j jun yol tu'n Dios tuc'il Abram

1Tbajlenxi tcyakil jlu tzaj tma'n Kman te Abram ic tza'n tuj jun witzic', ex tma cyja':

—Mi'n xoba Abram. Akine colol teya, ex nimxix chojbil teya oc tc'ma'ya wu'ne.

2Xitzun ttzak'we'n Abram cyja':

—Nman Dios, ¿Ti tajben weye tu'n ttzaj tk'o'na jun chojbil weye ex minti' jun nc'wa'le at? Ex aju nmajene Eliezer aju aj Damasco, atzun c'elel etzante tcyakilju at weye. 3Xi tma'ntl Abram cyja':

—Que'yintza, na'nx ttzaj tk'o'na jun nc'wa'le, ex alo jun majen ul itz'j tuj njaye c'oquel te etzal.

4Tzajtzun ttzak'we'n Kman te cyja':

—Mya ate Eliezer c'oquel tajwil aju at teya. Ax jun tcy'ajala c'oquel te etzal, chi Kman. 5Etztzun ti'n Kman Abram ttxa'n pe'n ex tzaj tma'n te cyja':

—Que'yinxa twitz cya'j ex ajlanxa ke che'w, ka jacu bant cyajlet tu'na.

Tzaj tma'ntl te cyja':

—Cyja'tzun c'oquel cyajlal tiyjila, chi Kman.

6Xi tocsla'n Abram tyol Kman, ex cyja'tzun oc k'o'm te tz'aklxix tu'n, 7ex tmatl Kman te cyja':

—Akine Tmana, aju etz k'inte teya tuj tnam Ur cyxol aj Caldey, tu'n t-xi nk'o'ne aju tx'otx' lu te tetzbila.

8Xitzun ttzak'we'n Abram cyja':

—Nman Dios, ¿tza'n tten tu'n tel nnic'e ti'j ka chin oquele tajwil?

9Tmatl Kman te cyja':

—K'intza jun tal vac, jun ttxu chip ex jun tman ẍne'l, te ox abk'i teyle junjun, tuc'ix jun ẍpo'k ex jun tal paloma, chi Kman te.

10Tzajtzun ti'n Abram tcyakil jlu, cub tkesin cymij ke alumaj, atzun ke chyu'j minti' cub tkesin cymij, ex cub tk'o'n mij jun pac' ex mij juntl pac'. 11E ul c'utz cyi'j ke alumaj otok che cub byo'n, atzunte Abram in che el tlajo'ntok. 12Tej toc kax, tzaj nimxix watl ti'j Abram, ex tzaj nim t-xobil tu'nju nim klolj cub ten ti'jele. 13Tmatzun Kman te Abram cyja': Tz'elx tnic'a ti'j, ke tiyjila che ul itz'j te tibajxi, che oquel te stranjer xjal tuj juntl nasyon, che oquel te majen xjal ex che bajel yajla'n cyu'n tuj cyaje syent abk'i. 14Atzunju nasyon jatum che oquel tiyjila te majen, cbel tcastiw wu'ne, ex te yajxi che eletz tiyjila tuc'il nim k'inumabl. 15Atzun teya, tuj txubtxaj cymela ex cpola tuc'il ktzan t-xe'chela otok tijina oc tcyima, ex cbelex maku'na. 16Tbajlenxi cyaje syent abk'i, che ajetz meltz'aj ke tiyjila tu'n cyul juntl maj tzalu, porque na'nx tchmet cyil ke aj Amorrey, chi Kman.

17Texlenxi k'ij, tej otok tz'oc klolj, o ilwaj jun c'il in kusintok k'ak' tuj ex jun ttxan tzaj in c'anttok ex in bettok cyic' cyxol ke alumaj kesimaj. 18Axtzun k'ij lu cyaj bant ti'j jun yol tu'n Kman tuc'il Abram, ex tma Kman te cyja': Aju tx'otx' lu cxel nk'o'ne cye tiyjila che ul itz'j te tibajxi, max ctzajel ke' tmojonil ttzi nima Ejipt ex cpol baj max ttzi nima Éufrates. 19Aju tx'otx' lu cye aj Ceney, aj Cenezey, aj Cadmoney, 20aj Hetey, aj Ferezey, aj Refaim, 21aj Amorrey, aj Canaán, aj Gergesey ex aj Jebusey.

Currently Selected:

Génesis 15: MAMH

Highlight

Copy