Génesis 11

Aju ja ma'xix twa'l tuj Babel

1Tuj tk'ijlalil ojtxi junx yol ba'n cyu'n cycyakil xjal twitz tx'otx'. 2Tej cyetz xjal tuj tjawitz k'ij o cnet jun chk'ajlaj cyu'n tuj tx'otx' Sinar, ex axtzun e najan. 3E octzun ten yolil cyxolx ex cyma cyja': Ko', kbinchan cub lagriy, ex kk'o'ncx tuj k'ak' tu'n ttzk'ajset, che chi. Ajbentzun lagriy te t-xel abj, atzun aspalt ajben cyu'n te t-xel mescla. 4Cymatltzun cyja': Kbinchan jaw jun tnam ex jun ja ma'xix twa'l ex japun pon twa'l max twitz cya'j, tu'n tcyaj jun nabl ke, ex tu'n mi'n kel sputj twitz tx'otx', che chi.

5Cu'tztzun Kman que'yilte aju tnam ex aju ja ma'xix twa'l in banttok cyu'n ke xjal. 6Tmatzun cyja': Lu ke xjal lu junx cytanmi, ax icx junx yol ba'n cyu'n; ma tzyet ak'untl lu cyu'n ex mlay che mayet ti'j ju in cub cyximan tu'n cybinchante. 7Ja'lotzun ko', ko cu'x tzpet-salte cyyol tu'ntzun mi'n tel tnic' jun ti'j tyol juntl, chi Kman.

8Ictzun tten e el t-sputun Kman ke xjal tuj tcyakil twitz tx'otx', ex cyaj cycolin ak'untl ti'j tnam. 9Tu'ntzun jlu, Babel tbi tnam oc, tu'nju atzun cub ttzpet-sa'n Kman cyyol cycyakil xjal. Tujtzun tnam lu e je'l t-sputun tuj tcyakil twitz tx'otx'.

Ke tiyjil Sem

1 Crónicas 1.24-27

10Atzun tx'olbabl jlu cyi'j tiyjil Sem.

Otok japun Sem twi' jun syent abk'i tej tul itz'j Arfaxad aju tcy'ajal, cabe abk'i tic'len k'ekab. 11Titz'jlenxi Arfaxad, ank'intl Sem jwe' syenttl abk'i, ex tzajtzun mastl tcy'ajal ex tme'jel.

12Otok japun Arfaxad twi' 35 abk'i tej tul itz'j Sala aju tcy'ajal. 13Titz'jlenxi Sala, ank'intl Arfaxad 403 abk'i, ex tzajtzun mastl tcy'ajal ex tme'jel.

14Otok japun Sala twi' 30 abk'i tej tul itz'j Heber aju tcy'ajal. 15Titz'jlenxi Heber, ank'intl Sala 403 abk'i, ex tzajtzun mastl tcy'ajal ex tme'jel.

16Otok japun Heber twi' 34 abk'i tej tul itz'j Peleg aju tcy'ajal. 17Titz'jlenxi Peleg, ank'intl Heber 430 abk'i, ex tzajtzun mastl tcy'ajal ex tme'jel. 18Otok japun Peleg twi' 30 abk'i tej tul itz'j Reu aju tcy'ajal. 19Titz'jlenxi Reu, ank'intl Peleg 209 abk'i, ex tzajtzun mastl tcy'ajal ex tme'jel.

20Otok japun Reu twi' 32 abk'i tej tul itz'j Serug aju tcy'ajal. 21Titz'jlenxi Serug, ank'intl Reu 207 abk'i, ex tzajtzun mastl tcy'ajal ex tme'jel.

22Otok japun Serug twi' 30 abk'i tej tul itz'j Nacor aju tcy'ajal. 23Titz'jlenxi Nacor, ank'intl Serug cab syenttl abk'i, ex tzajtzun mastl tcy'ajal ex tme'jel.

24Otok japun Nacor twi' 29 abk'i tej tul itz'j Taré aju tcy'ajal. 25Titz'jlenxi Taré, ank'intl Nacor 119 abk'i, ex tzajtzun mastl tcy'ajal ex tme'jel. 26Otok japun Taré twi' 70 abk'i tej tul itz'j Abram, Nacor ex Harán, akeju tcy'ajal.

Ke tiyjil Taré

27Atzun tx'olbabl jlu cyi'j ke tiyjil Taré.

Ate Taré tman Abram, Nacor ex Harán, ex ate Harán tman Lot. 28Nej cyim Harán twitz tman tujx tx'otx' jatum ul itz'j, tuj tnam Ur cyxol ke aj Caldey.

29Moje'tzun Abram tuc'il Sarai, atzun te Nacor moje' tuc'il Milca aju tme'jel Harán ex tanb Isca. 30Minti'tok tal Sarai tu'nju mibantok alin.

31Etztzun Taré tuj tnam Ur cyxol ke aj Caldey tu'n tul tuj tx'otx' Canaán, ex tzaj tuc'in Abram aju tcy'ajal, tuc'ix Lot aju tal tchman ex tcy'ajal Harán, ex tuc'ix Sarai aju tlib. Tejtzun cyul tuj tnam Harán, axtzun e cyaj ten najal. 32Japun Taré twi' 205 abk'i, ex cyim ax tuj tnam Harán.

Currently Selected:

Génesis 11: MAMH

Highlight

Copy