Amós 4
4
1Cybintze jlu, akeye xu'j aj Samaria ma' cyoclene ex tbanilxix che que'yine, akeye in che oc tene yajlal cye ke meba ex in che oc tene yajlal cye keju minti' at cye ex in xi cyma'ne te cychmile: Cyi'ntze vin tu'n kc'an ti'j, che chiye. 2Ma tzaj ttziyan Kman Dios Xjan jun yol axix toc lu: Tzul tk'ijlalil tu'n cyxi k'i'ne pres ex che tzyetele tu'n ganch; cycyakile che tzyetele mer ic tza'n in che tzyet cyiẍ tu'n ganch. 3Cycyakile che elex k'i'ne jatum otok jaket muro toc ti'jele tnam, txolin cytene che elex k'i'ne ex che xel k'i'ne tu'n cypone tumlal witz Hermón. A Kman ma k'mante jlu.
Jun yol te xmaybil cye xjal ti'j ju in bant cyu'n
4Cyxi'ye tuj Betel ex che binchane il ex cyxi'ye tuj Gilgal ex che binchane mastl mya ba'n. Cyi'nxe chojbil te Dios cycyakil prim ex cyi'nxe tlaji'n tuj tcyakil toxin k'ij. 5Cyk'onxe ke pan at t-samel cyuj te cyoyaje te ak'bil chjonte ex cyk'manxe tkanil tuj tcyakil lugar ti'j cyoyaje in xi cyk'o'ne tu'n cyexe tbis cyc'u'je, porque ti'jtzun jlu mas in che tzalaje, chi Kman Dios.
Masque cub cycastiw aj Israel, pero minti'x el cynic' ti'j
6Wu'ne tzaj we'yaj tuj tcyakil cytanmiye ex wu'nxe minti' o canun cywaye tuj tcyakil cylugare, pero minti'x e ajtz meltz'aje wuc'ile, chi Kman. 7Ax icx minti' tzaj jbal wu'ne tej atxtok ox xjaw tu'n tjaw chmet twitz cyawale; tzaj jbal wu'ne tuj jun tnam, atzun tuj juntl minti' tzaj; tzaj jbal tuj jun cojbil, atzun tuj juntl cojbil tcyakil o tzkij tu'n tlaj minti' tzaj jbal; 8e betje'ye jyol a' cyuj ke tnam, ex aju ch'in cnet cyu'ne minti' canun tu'n tk'ajen txketle'n cyi'je, atzun cyeye minti' e ajtz meltz'aje wuc'ile, chi Kman.
9Tzaj nsama'ne cyk'ik' cyi'je nim ta'w cyak ikan tu'n, ex tzaj nsama'ne soj ti'j cyawale; wu'ne e tzkij cyawale cyuc'ix tkan cy-uvaye, ex ke tkan higo awa'n cyu'ne e naj cyu'n ẍplon, cyuc'ix ke tkan olivo. O nbinchaye tcyakil jlu, pero minti'x e ajtz meltz'aje wuc'ile, chi Kman.
10Tzaj nsama'ne jun c'ixbisabl cyibaje ic tza'n xi nsama'ne cyibaj xjal aj Ejipt; o che cyim ke cycu'xune wu'ne tuj k'oj ex xi nk'o'ne ambil cye aj k'oj cyi'je tu'n cyoc te cyajwil cycheje; o che sakone cyi'j cyxewil cyimni tuj lugar jatum e cub ten ke soldad, pero mi tu'n icju, minti' e ajtz meltz'aje wuc'ile, chi Kman.
11E naj nimcu cyeye wu'ne ic tza'n e baj naj aj Sodoma ex aj Gomorra, atzun ke txkantl ic e oc ic tza'n jun ttx'an si' nne'tz tuj k'ak' otok baj tz'e'y ti'j. Masque icju pero minti'x e ajtz meltz'aje wuc'ile, chi Kman.
12Cyja'tzun akeye aj Israel icxtzun che telbiye wu'ne, ex tu'nju cbantel wu'ne cyi'je icju, cyja'tzun cybincham cytene tu'n cyc'lunte cyibe wuc'ile, tu'n cyoque tuj xjel wu'ne, chi Dios.
13Tu'n Kman e bant ke witz ex ax o binchante cyk'ik', in tzaj tchic'ba'n cye xjal alcye t-ximbetz ex in ch'expaj spic'un tu'n tu'n toc te klolj; in baj tbetin cycyakil lugar tiwitz tx'otx': Kman aju Tajaw Tcyakil, atzun tbiju.
Currently Selected:
Amós 4: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993
