Cybinchben 28

Tej tpon Pablo ttzi tx'otx' Malta

1Tejtzun kbaj clete, o kbiye Malta tbi tx'otx' lu tcub tmijil mar. 2Atzun ke xjal ax najl ke, nimxix xtalbil cybincha keye; porque cub cyk'o'n jun k'ak' tu'n tlaj jbal ex tu'n tlaj che'w, ex kcyakile o c'monjtze cyu'n. 3Atzunte Pablo otok tzaj ti'n junjun tk'ab tze' tzkij, ocx tk'o'n tuj k'ak', ex at jun k'anti' tocx tuj tk'ab tze', tej tna'nte k'anti' tcyakil k'ak' etz ok, oc tx'a'n tk'ab Pablo tu'n, ex ax cyaj ten ti'j tk'ab. 4Atzun cye xjal ax najl ke, tej cyque'yinte toc k'anti' ti'j tk'ab Pablo, cyma cyxolx:

—Aju xjal lu balo byol xjal te, masque ma clet tuj mar, pero ja'lo mlay cyaj tk'o'n Dios tu'n tank'intl, che chi xjal.

5Atzunte Pablo el tchto'n ju k'anti' ti'j tk'ab, cub tz'ak k'anti' tuj k'ak', ex minti' jun ti'xti o baj ti'j Pablo. 6Atzun cye xjal in che ayontok ti'j ka tu'n t-xi mal tchibjal Pablo ex ka minaben tu'n tcub tz'ak ex tu'n tcyim; cub cyyo'n nim tuj. Tejtzun cylonte minti' o baj ti'j, ch'expettzun cyximbetz ex o cyma ka jun dios te Pablo.

7Nikayintok ta' ttx'otx' jun xjal Publio tbi, nejenel cyxol xjal tuj Malta, o c'monjtze tu'n, ex tu'n tcyakil tc'u'j tzaj tk'o'n kposadiye ex kwaye tuj ox k'ij. 8Ex aju tman Publio coẍltok otok yabt tu'n cyak ex tu'n chic'oj; ocxtzun Pablo que'yil te, ex tbajlenxi na'n Dios, cub tk'o'n tk'ab tibaj, ex o banix. 9Tejtzun tbanix ju xjal lu, ax icx e ul mastl xjal yab, ax najl ke, ex e banix. 10Ax icx tzaj cyk'o'n xjal nimcu oyaj keye; ex tej kxi'ye tu'n kocxe tuj barc, ocx cyk'o'n tuj barc aju at tajben keye.

Tej tpon Pablo tuj tnam Rom

11Tbajlenxitzun ox xjaw tej ktene cyuc'il, o'xtzune tuj jun barc cye aj Alejandriy aju cyaj ten tuj jbalil ttzi tx'otx' Malta, toc tilbilal Castor ti'j tuc'ix tilbilal Pólux, cydios xjal ke jlu. 12Tejtzun kpone tuj tnam Siracusa, axtzun o cyaj tene ox k'ij. 13Tejtzun kic'e, o'xtzune ttzi'yile mar, o pone tuj tnam Regio; ex tuj juntl k'ij tzaj ch'in cyk'ik' tibaj mar te cubni, tujtzun tcabin k'ij o canune tuj tnam Puteoli. 14Atzun e cnet junjun erman ku'ne, e cubsan kwitze tu'n kcyaj tene wuk k'ij cyuc'il; ex cyja'tzun o pone tuj tnam Rom. 15Tejtzun cybinte erman tuj Rom cyja' kxi'ye, e tzaj canul ki'je max tuj plas Apio ex tuj jun lugar Ox Posad tbi; tej tlonte Pablo cywitz erman, xi tk'o'n chjonte te Dios ex o ke'xix tc'u'j. 16Tejtzun kpone tuj tnam Rom, [e je'x tk'o'n capitán ke pres tuj tcwent nejenel cye polisiy;] atzunte Pablo xi k'o'n permis te tu'n tten junx te tuj juntl ja ex tu'n t-xk'ukinjtz tu'n jun soldad.

Tej tpacban Pablo tuj tnam Rom

17Tbajlenxitzun ox k'ij, e tzaj ttxco'n Pablo ke nejenel cye xjal judiy tuj tnam Rom; tejtzun cypon chmet, xi tma'n cye:

—Akeye erman, minti' jun ti'xti o nbinchaye cyi'j kxjalil ex mi ti'j cyley kxe'chel, pero ma chin tzaj k'o'ne tuj cyk'ab aj Rom, presin kine tzajnix bant tuj Jerusalén. 18Tejtzun woque tuj xjel cyu'n aj Rom, o cyajbe tu'n wetz tzokpi'ne porque minti' jun wile o cnet cyu'n tu'n ncyime. 19Pero nok tu'nju e jaw tzokpaj ke xjal judiy wi'je, cyja'tzun xi nkanine tu'n woque tuj xjel twitz tat gobierni; mya tu'nju atwit nk'oje cyi'j nxjalile ma chin ule k'malte te gobierni. 20Cyja'tzun, tu'n tlaj jlu ma che tzaj ntxco'ne tu'n toc nque'yine cywitze ex tu'n nyoline cyuc'ile, porque c'alo'n kine tu'nju caden lu, nok tu'n tlaj in xi nma'ne tkanil jun Colol aju in ko ayon ti'j ako' aj Israel ko', chi Pablo cye.

21Atzun cye nejenel cye xjal judiy xi cyma'n:

—Minti' ma kc'ame u'j tzajni tuj Judey in yolin ti'ja, ex minti' ul jun kerman tx'olbalte ti'ja ex ka yolil mya ba'n ti'ja. 22Pero kajbile tu'n kbinteye teya alcye t-ximbetza, porque ba'n ku'ne, aju ocslabl lu, tuj tcyakil lugar in che yolin xjal mya ba'n ti'j, che chi nejenel.

23Entons xi cyma'n te Pablo alcye k'ij tu'n cyul, e ultzun nimcu xjal tuc'il tuj tposad. Xitzun tchic'ba'n Pablo cye ti'j tcawbil Dios, oc tilil tu'n tu'n tcub ti'j cynabl, tu'n cyocslan ti'j Jesús, tzaj tna'n ti'j tley Moisés ax icx ti'j cyyol t-sanjel Dios, xe't-x tyolin te prim, japun baj twi' tyol te kale. 24At junjun cub ti'j cynabl tu'n tyol Pablo; atzun junjuntl minti' xi cyocsla'n. 25Cyja'tzun e el lak'e' tu'nju mya junx cyyol cyxolx; na'nxtok cyel lak'e', xi tma'n Pablo ju yol lu cye:

—Ax toc ju yol o tma Xewbaj Xjan tej tyolin Isaías aju t-sanjel Dios cye kxe'chel ojtxi, porque chi Kman:

26Txi'ya ex k'manxa cye xjal lu: Cucx in cybi'ne, pero minti' nne'l cynic'e ti'j; cucx nno'c cyque'yine, pero minti' in cyile, chicuya cye;

27porque aju cyanmi xjal lu ma cyuwix, minti' in xi cybi'n tu'n cyẍcyin, ex ma cub cymaltz'u'n cywitz tu'ntzun mi'n cylonte tu'n cywitz, ex tu'n mi'n cybinte tu'n cyẍcyin, ex tu'n mi'n tel cynic' ti'j tuj cyanmi, ex tu'n mi'n cyajtz meltz'aj tu'n cybanix wu'ne, chi Kman te Isaías.

28Cybinxtzune, aju colbil lu ma tzaj tk'o'n Dios cxel k'met cye xjal mya judiy ke; ex atzun cye cxel cybi'n.

29[Tej tbaj tma'n Pablo jlu, e ic'tzun ke xjal judiy in che yolin nimxix ti'j cyxolx.]

30Atzunte Pablo cyaj ten cab abk'i tuj jun ja majen, ex cycyakil keju in che ul tuc'il in che c'monjtz tu'n, 31in pacban ti'j tcawbil Dios ex in tk'o'n xnak'tzbil cye ti'j Kajaw Jesucrist, tzokpi'n tu'n tyolin ex mi jun oc ten mayol te.

Currently Selected:

Cybinchben 28: MAMH

Highlight

Copy