Ri Job 19
19
Cäch'aw ri Job:
1-2Ri Job je xubij wa':
“¿C'ä jampa' quitanaba'
nu c'axc'obisaxic
xukuje' nu soquic
cumal tak ri e i tzij?
3Jumul camul ix yok'oninak chwe;
¿la ma ta quixq'uixic
chi je i banom wa' chwe?
4Pune' ta c'u ne in uxinak ajchak'mac,
xuwi ri in ri' qui nu kajbej
ri nu chak'maquil.
5Are pa i c'u'x ix
chi ix utz na chnuwäch,
qui q'uiak c'ut ri nu quiäkasakil
chi nu palaj.
6Kas ba' chi wetamaj chi are'
ri Dios banowinak ri c'ax chwe,
are banowinak chi in kajinak
pa ri c'amibal.
7In quinrak nu chi':
‘¡Quincämisaxic!’,
man c'o ta c'u jachin c'o jas cubij;
quintz'onoj nu to'ic,
man c'o ta c'u jachin jun
cuban ta suq'uilal chwe.
8Ri Dios u tz'apim ri be
chnuwäch rech man quinoc'owtaj;
u nojisam ri nu be che k'ekumalil.
9E resam ri nu k'inomal;
resam ri nu corona.
10In u yo'm can
pa jun nimalaj etzeletajic;
¡e resam ri e u c'amal
ri weyebal c'uxaj!
11Xukasaj ri royowal panuwi'
je ta ne ri u banom ta u c'ulel chwe.
12Conojel ri rajch'ojab
xquiq'uiak quib panuwi';
xquicholajij quib chrij ri wachoch
xquisuc'umaj quib
che u q'uiakic quib chwij.
13Ri Dios u banom chi ri e wachalal
xukuje' tak ri e wachil quenajtin chwe
caquiban c'u chwe chi je ta ne
ri ma ta queta'm nu wäch.
14-15Ri e wachalaxic xukuje'
tak ri e wachil in qui tzakom canok;
ri xejeki' can pa ri wachoch
in sachinak pa qui jolom.
Ri e nu pataninel tak we ixokib
man c'o ta chi nu banic chquiwäch;
man caquiya' ta chi nu k'ij.
16We quinsiq'uij
jun achi pataninel wech,
man cach'aw taj
pune' ta sibalaj quinta' tok'ob che.
17We quinkeb ruc' ri wixokil,
qui nu pakchi'j jela';
ri kas e nu c'ojol
camuluw qui c'u'x chwe.
18Xukuje' ne ri ac'alab
caquetzelaj nu wäch;
xuwi quinwalijic,
caquichaplej nu yok'ic.
19Ri e wachil ri sibalaj kanima' kib
cuc' caquetzelaj nu wäch;
ri sibalaj e lok' chnuwäch
qui banom qui c'ulel chwe.
20Ri nu tz'umal
canaq'ui chque ri nu bakil,
xak alicha' nu takem c'aslem.
21Chel i c'u'x chwe, ix ri ix wachil,
rumal rech chi ri Dios
u kasan ri u k'ab panuwi'.
22¿Jasche quitakej u banic c'ax chwe
jacha' ri cuban ri Dios?
¿La ma ta sibalaj i banom
chi c'ax chwe?
23¡C'o ta banom wi c'o ta jachin
quetz'iban tak ri e nu tzij
quebutzoc' ta c'u can chuwäch ch'ich'!
24¡C'o ta banom wi
chi c'o ta jachin jun
ruc' jun ch'ich' tzoc'obal
quebutzoc' ta c'u
chuwäch ri räxmamaj ch'ich'
o chuwäch jun abaj
rech man quesach taj!
25 # 19.25 Jujun tak tz'ibatalic je caquibij wa': “In weta'm chi ri nu ch'awenel c'aslic, are' c'ut ri are cach'aw na panuwi' waral cho ri uwächulew.” Jujun tak tz'ibatalic caquibij chupam we pajtzij ri': “In weta'm chi c'asal ri torol wech”, jujun chic cäquibij caquibij “In weta'm chi ri to'l wech c'aslic”. In weta'm chi ri to'l we c'aslic,
are' c'ut ri ch'awenel panuwi'
waral cho ri uwächulew.
26Pune' ta c'u ne
ri nu tz'umal quetzak pa tak ch'akatak,
in, chi winakil
quinwil na u wäch ri Dios.
27Cuc' ri kas e nu bak'wäch
quinwil na u wäch,
kas in, man jun winak ta chic.
28Ri e nu chuk'ab xetuktubic
aretak xinta' ri quibij:
‘¿Jas ri cakabano rech
ma ta cäkatanaba' u banic c'ax che?
Ri e u xe' ri retzelal
kas ruc' e c'o wi.’
29Chixe'j ba' iwib
chuwäch ri ch'ich' re ch'o'j,
ri ch'ich' re ch'o'j ri cucoj ri Dios,
che u c'äjisaxic u wäch ri lawaloyil.
Rech qui wetamaj
chi c'o jun k'atan tzij.”
Currently Selected:
Ri Job 19: QUICH1
Highlight
Share
Copy
Want to have your highlights saved across all your devices? Sign up or sign in
Biblia Quiché © Sociedades Bíblicas Unidas, 1995.
