Chapletajic 15
15
Ri Dios xuban jun c'ulwächinic ruc' ri Abram
1E bantajinak chi we jastak ri', ri Ajawaxel xuch'abej ri Abram pa jun ichic', xubij che: “Abram, maxe'j awib, in ri' ri in to'l awech. Ri tojbal awech sibalaj nim na.”
2-3Ri Abram xutzelej u bixic che: “Ajawaxel ri c'o takanic la puwi' ronojel, ¿jas cupatanij chwe chi cäya' la tojbal wech, eta'm ya' la chi man c'o ta nu c'ojol? Ri quechben na ronojel ri jastak wech are' ri Eliezer ri aj Damasc jun chque ri pataninel wech, rumal rech chi man c'o ta nu c'ojol yo'm la.”
4Ri Ajawaxel xutzelej u bixic che: “Ri quechben na ri jastak awech are ri kas a c'ojol, man are ta jun ri man a winakil taj.”
5Ri Ajawaxel xuc'am bic ri Abram cho ja, xubij che: “Chatca'y chicaj, chebawajilaj ri ch'imil we catcuinic. Jewa' ri qui q'uial ri e awija'lil.”
6Ri Abram xcojon che ri Ajawaxel, rumal ri' ri Ajawaxel xuc'amowaj jacha' suc'.
7Xubij c'u che: “In ri' ri Ajawaxel, in xatinwesaj ulok pa Ur ri culew ri aj caldeyib, che u ya'ic we ulew ri' chawe che awechbal.
8Ajawaxel xukuje' Dios, ¿jas ri quinbano rech kas quinwetamaj chi kas quinwechbej na we ulew ri'?” xcha' ri Abram.
9Ri Ajawaxel xubij che: “Chac'ama' ulok jun alaj ati't wacax, jun ati't q'uisic', jun ama' chij, ox ox qui junab, xukuje' chac'ama' ulok jun tucumux rachil jun alaj palomax.”
10Ri Abram xebuc'ama' ulok conojel tak we awaj ri' xebel u ya' chuwäch ri Dios, xebuperejij xuya' ri jun pa niq'uiaj chuwäch ri jun chic man c'u xebuperejij taj ri chicop ri e c'o qui xic'.
11Quekaj c'u ri c'uch paquiwi' tak ri awaj ri e cämisam, are c'u ri Abram quebuxibij.
12Aretak xoc ri ak'ab, ri Abram xkaj che jun nimalaj waram. Xsutix rij rumal jun nimalaj k'eku'm, sibalaj xuxe'j rib.
13Xubij c'u ri Ajawaxel che: “Rajawaxic cawetamaj chi ri e awija'lil quequirika' na c'ax pa jun ulew chic, queboc na che lok'om tak pataninelab, quiejeb sient (400) junab cäban na c'ax chque.
14Quinc'äjisaj c'u na u wäch ri nim tinimit ri quecojow na che lok'om tak pataninelab, c'ä matam quebel na ulok ri e awija'lil, e nimak tak k'inomab chi c'ut aretak quebel ulok.
15Ri at catcäm na pa utzil aretak sibalaj at nim winak chic, catmuk c'u na cuc' ri e a mam.
16Oc'owinak chi quiejeb sient (400) junab quetzelej na ulok ri e awija'lil pa we c'olbal ri', maja' c'u caquitz'akatisaj u banic ri quetzelal ri aj amoreyib.”
17Aretak chak'ab chic, ronojel c'ut k'ekumarinak chic, xc'utun jun jorno ri cäbukuwic, xukuje' jun k'ak' cänicowic ri coc'ow chquixo'l ri awaj ri banom catakperaj chque.
18Kas pa ri k'ij ri' ri Ajawaxel xuban jun c'ulwächinic ruc' ri Abram: “We ulew ri' quinya' na chque ri e awija'lil cächapletaj ulok chuchi' ri nima' re Ejipt copan c'ä chuchi' ri nimalaj nima' Euprats.
19Ri u bixic, ri culew ri aj seneyib, ri aj senezeyib, ri aj cadmonib,
20ri aj hititib, ri aj perezeyib, ri aj repaitab,
21ri aj amoreyib, ri aj cananeyib, ri aj jerjeseyib, xukuje' ri aj jebuseyib.”
Currently Selected:
Chapletajic 15: QUICH1
Highlight
Share
Copy
Want to have your highlights saved across all your devices? Sign up or sign in
Biblia Quiché © Sociedades Bíblicas Unidas, 1995.
