Aj Epesib 6
6
Ri alc'ualaxelab xukuje' ri tataxelab
1Alc'ualaxelab, rumal rech chi ix cojoninak che ri Ajawaxel, chebinimaj ri i tat i nan. Are c'u wa' ri suc'.
2 # 6.2-3 “Nim chawila' wi ri a tat xukuje' ri a nan”: Ex 20.12; Dt 5.16. Are wa' nabe takomal ri rachilam jun chi'nic: “Nim chawila' wi ri a tat xukuje' ri a nan,
3rech utz catelic, naj c'ut catc'asi' na cho ri uwächulew.”
4Ri ix c'ut tataxelab, miyac coyowal ri e iwalc'ual, xane' chebiq'uiyisaj ruc' pixbenic, chebitijoj che ri u tzij ri Ajawaxel.
Ri lok'om pataninelab xukuje' ri ajawib
5Ri ix lok'om pataninelab, chebinimaj ri e iwajaw waral cho ri uwächulew. Nim chebiwila' wi, china' iwib chquiwäch, chebinimaj ruc' ronojel iwanima', je ta ne are ri Crist quipatanij.
6Chixpataninok, man xuwi ta aretak cätajin quixcalawächij rech utz quixil wi. Xane' jacha' chixpataninok chi ix u pataninelab ri Crist, ruc' ronojel iwanima' chibana' jas ri cäraj ri Dios.
7Chixpataninok ruc' ronojel iwanima', je ta ne are quipatanij ri Ajawaxel, man are ta ri winak.
8Iweta'm c'ut we ix lok'om pataninelab, o man ix lok'om pataninelab taj, ri utzil ri quiban chi jujunal qui c'amowaj na che ri Ajawaxel Dios.
9Xukuje' ri ix ajawib, xa' junam chibana' chque ri e i pataninelab. Chiya' can ri u cojic qui xibriquil. Iweta'm chi ri ix cuc' ri e are', xa' junam ix c'o pa u k'ab ri Iwajaw ri c'o chicaj. Ri are' man are ta cäril qui wäch ri winak we nim o man nim ta qui banic.
Ri e aj uxlabalalaj tak u ch'ojibal ri ajcrist
10Are c'u ri camic, wachalal tak, chicowirisaj iwib pa ri Ajawaxel Jesus, xukuje' pa ri u cuinem ri u chuk'ab.
11Chito' iwib ruc' conojel ri ch'ojibal ri cuya' ri Dios chiwe. Jeri' quixcuinic co quixtaq'ui' chuwäch ri itzel, ri cäraj quixusubu ruc' ri itzel tak u no'j.
12Man cujch'ojin ta cuc' winak, xane' cuc' itzel tak uxlabal ri e c'o pa ri caj, ri c'o qui takanic xukuje' qui cuinem puwi' we uwächulew ri' re ri k'eku'm, xukuje' quetakan puwi'.
13 # 6.13 Jujun Tz'ibatalic je caquibij wa': “aretak c'u utz chi u suc'umaxic quib qui banom, co che canajok”; jujun chic je caquibij wa': “quixch'äcanic, co c'ut chixcanajok”. Rumal c'u ri' chebic'ama' conojel ri chacubal re ch'o'j ri cuya' ri Dios, rech quixcuin che u to'ic iwib pa ri itzel k'ij. Aretak c'ut coc'ow ronojel, co quixtaq'ui' canok.
14 # 6.14 “Co ba' chixtac'alok”: Is 11.5; 59.17; 52.7; 59.17; Sal 7.13. Co ba' chixtac'alok. Chicojo' ri kastzij, je jas jun pas ximibal re ri u xe' i pam. Chicojo' ri suq'uil, je jas jun ajch'o'j cucoj ch'ich' cho uwo u c'u'x che u to'ic rib.
15Chisuc'umaj iwib che u tzijoxic ri jamaril, jas jun ajch'o'j cucoj ri u xajäb.
16Paquiwi' c'u conojel, ri i cojonic are chicojo' che i quetequic ch'ich' ri quebelpoc'naj wi conojel tak ri e u ch'ab ri itzel ri quenicowic.
17Chicojo' ri colobal iwib je jas jun ajch'o'j cucoj to'bal u jolom. Chic'ama' ri u ch'ich' re ch'o'j ri Uxlabaxel, are wa' ri u tzij ri Dios.
18Mitanaba' ri u banic ch'awem ruc' Dios: chixbochi'nok xukuje' chixtz'onom che ri Dios amak'el, pa ri Uxlabaxel. Chixc'asc'atok, mixtuktubic, chibana' c'u ch'awem puwi' ronojel ri u tinimit ri Dios.
19Xukuje' chibana' ch'awem panuwi' in, rech aretak quinch'awic, ri Dios cuya' ri tzij chwe, rech man quinxe'j ta wib aretak quintzijoj ri tzij re colobal ib ri man etamatal ta can nabe.
20Ri Dios in u takom che u tzijoxic we utzalaj tzij ri'. Rumal c'u wa' in c'o pa che'. Chibana' ch'awem panuwi' rech man quinxe'j ta wib, quintzijoj jas ri takal u banic wumal.
Ri Pawl cuya' rutzil wächaj
21Ri Tiquico cubij na ronojel chiwe jas ri nu banom xukuje' jas ri cätajin quinbano rech quiwetamaj. Ri Tiquico are' lok'alaj kachalal xukuje' jicalaj pataninel pa ri u chac ri Ajawaxel.
22Rumal c'u ri' xintak bic iwuc' rech quiwetamaj jas ri ka banom, rech cucu'bisaj na i c'u'x.
23Are' ri Dios ri Tataxel, xukuje' ri Ajawaxel Jesucrist, chuya' chque ri achalaxelab jamaril xukuje' lok'ok'ebal c'uxaj, rachilam cojonic.
24Tok'ob chque conojel ri quelok'ok'en ri Kajaw Jesucrist, ruc' jun lok'ok'ebal c'u'x ri man cajalc'at taj.
Currently Selected:
Aj Epesib 6: QUICH1
Highlight
Share
Copy
Want to have your highlights saved across all your devices? Sign up or sign in
Biblia Quiché © Sociedades Bíblicas Unidas, 1995.