Zac 6
6
Ri ruwaqxaq achi'el achik'
1Yin Zacarías k'o chik k'a jun xk'utumej chinuwech. Y xintz'et kaji' carruaje e richin labal, ri xe'el-pe chukojol ka'i' juyu'. Y ri ka'i' juyu' ri' kan e banon rik'in q'enq'oj-pueq. 2Ri nabey carruaje, ja ri kiej ri kaqkoj kij ri e uk'uayon richin. Ri ruka'n carruaje, ja ri kiej ri q'eq kij ri e uk'uayon richin. 3Ri rox carruaje, ja ri kiej ri seq kij ri e uk'uayon richin. Y ri rukaj carruaje ja ri kiej ri k'o seq'eseq keq y seq chikij ri e uk'uayon richin.
4Yin xink'utuj k'a chire ri ángel achike nuk'exewachuj. 5Y rija' xubij chuwe chi jare' ri kaji' espíritu ri ye'el-pe rik'in ri Jehová richin yepe chuwech chijun ri ruwach'ulew. 6Ri carruaje ri uk'uan koma kiej q'eq kij, jari' ri yepe pa xaman chire ri ruwach'ulew. Ri carruaje ri uk'uan koma kiej seq kij, jari' ri yepe pa qajbel-q'ij chire ri ruwach'ulew. Y ri carruaje ri uk'uan koma kiej ri k'o seq'eseq keq y seq chikij, jari' ri yepe pa xokon. 7Y re kiej re' kan rik'in k'a janila kikoten nikajo' yebe yan chupan chijun ruwach'ulew. Roma ri' ri ángel xubij-el chike chi kebiyin. Y rije' kan keri' xkiben. 8Chirij ri', ri ángel xsik'in-pe wik'in y xubij k'a chuwe chi tintz'eta' ri kiej ri xebe pa xaman, roma xbekiqasaj kan ruwi' ri royowal ri Jehová pa ruwi' ri ruwach'ulew ri'.
Ri ru-corona ri Josué
9Ri Jehová xch'on chik wik'in, y xubij k'a chuwe: 10Ri Heldai, Tobías y ri Jedaías xetzolej yan pe pa Babilonia. y ek'o pa rachoch ri Josías, ri ruk'ajol ri Sofonías. Roma ri' kabiyin yan chiri' kik'in richin nak'ul-pe ri sipanik ri kik'amon-pe. 11K'ari' xtak'uaj k'a el ri saqipueq y ri q'anapueq, richin xtiban jun nima-corona chire ri kan k'o ruwiq. Y xtaya' pa rujolon ri nimalej sacerdote Josué ri ruk'ajol ri Josadac. 12Xkach'on k'a rik'in y xtaya' re jun rutzijol re' chire, yin Jehová k'iytisanel richin ronojel ri yibin: Re wawe' k'o jun ri rubini'an Ri Xjotayin-pe, roma xa xtik'iy-pe achi'el nuben ri ruq'a-che', richin ja rija' xtichojmirisan chik q'anej ri wachoch. 13Ja rija' ri xtipaban k'a ri wachoch y kan xtik'oje' k'a janila ruk'ojlemal. Kan xtitz'uye' k'a pa ruch'akat richin xtuq'et-tzij pa ruchojmilal. Chuqa' kan xtuben ri rusamaj ri sacerdote, y kan xtik'oje' k'a uxlanibel-k'u'x chikikojol. 14Jak'a ri corona xtik'atzin k'a richin jun natabel kichin ri Heldai, Tobías, Jedaías y ri Josías ri chiri' pa wachoch yin Jehová. 15Y xkepe k'a winaqi' e aj nej richin xketo'on y xtikipaba' chik q'anej ri wachoch. Y k'ari' xtiwetamaj k'a chi ja yin Jehová k'iytisanel richin ronojel ri in taqayon-pe iwik'in. Y re' xtibanatej wi rix xtiya' ixikin chire ri nuch'abel yin Jehová. Jare' ri rutzijol ri xuya' chuwe.
Currently Selected:
Zac 6: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
