Jos 13
13
Ruwach'ulew ri man jani kech'akatej
1Toq ri Josué kan janila chik ri'j, jari' toq ri Jehová xubij chire: Rat kan janila chik k'iy ajuna', y kan k'a k'o k'iy ruwach'ulew ri k'o richin ye'ich'ek richin nok iwichin. 2Jare' ri ruwach'ulew ri k'a ek'o kan: Chijun ri kiruwach'ulew ri aj-Filistea y ronojel ri kiruwach'ulew ri guesureo, 3nitiker-el rik'in ri raqen-ya' Sihor ri k'o pa relebel-q'ij chire ri Egipto y napon k'a rik'in ri ruchi' ri tinamit Ecrón ri k'o pa xaman, y ronojel re' nibix ruwach'ulew kichin ri aj-Canaán chire; y chupan ri' ek'o wo'o' tata'al chikikojol ri aj-Filistea. Re' xek'oje' pa tinamit Gaza, Asdod, Ascalón, Gat y Ecrón. Y keri' chuqa' ri kiruwach'ulew ri aveo 4ri k'o pa xokon chire ri kiruwach'ulew ri aj-Canaán; nitiker-el rik'in ri tinamit Mehara ri kichin ri aj-Sidón, y napon k'a pa tinamit Afec, ri akuchi k'o-wi ri ruk'ulba't ri ruwach'ulew kichin ri amorreo. 5Y chuqa' k'a k'o na ri ruwach'ulew kichin ri aj-Guebal, y chijun ri ruwach'ulew Líbano, nitiker-el pa Baal-gad chuxe' ri juyu' Hermón y napon k'a pa relebel-q'ij rik'in ri tinamit Hamat. 6Yin kan xkenk'is k'a chiwech rix, konojel ri aj-Sidón y ri ek'o chuwi' taq juyu' ri nitiker k'a pa Líbano y napon k'a pa Misrefot-maim. Wakami k'a xtajech chike ri awinaq richin keri' xtikichinaj kan jumul, achi'el ri nubin chawe. 7Tach'ara' k'a re ruwach'ulew re' chikiwech ri beleje' tzobaj y chikiwech ri nik'aj tzobaj richin ri Manasés richin nikichinaj kan, xcha' ri Dios chire ri Josué.
Ri ruwach'ulew ri xuch'er kan ri Moisés
8Ri tzobaj richin ri Rubén, ri Gad y ri nik'aj chik tzobaj richin ri Manasés, kan kik'ulun chik k'a kan ri kulew pa ruq'a' ri Moisés ri rusamajel ri Jehová. Y ri ruwach'ulew ri' k'o pa relebel-q'ij chire ri raqen-ya' Jordán. 9Rije' xkichinaj k'a ri ruwach'ulew ri nitiker-pe pa tinamit Aroer ri k'o chuchi' ri ch'uti'n raqen-ya' Arnón y ri tinamit ri k'o pa taq'aj kojol juyu' chire ri raqen-ya' ri', y chijun ri chuwi' taq juyu' ri nitiker-el rik'in ri tinamit Medebá y napon k'a pa tinamit Dibón, 10y ronojel ri tinamit ri akuchi xq'aton-wi-tzij ri Sihón rey kichin ri amorreo, ri xk'oje' pan Hesbón, y napon akuchi k'o-wi ri k'ulba't richin ri kiruwach'ulew ri e rijatzul kan ri Amón. 11Y chuqa' xkichinaj kan ri ruwach'ulew Galaad y chijun ri kiruwach'ulew ri guesureo y ri maacateo, chijun ri juyu' Hermón y chijun ri ruwach'ulew richin ri Basán y napon k'a pa tinamit Salcá. 12Y ri rey ri xk'oje' pa ruwi' ri ruwach'ulew ri' ja ri Og, ri xk'oje' juba' pa tinamit Astarot y juba' pa tinamit Edrei; rija' jun ruk'isibel chike ri winaqi' refaíta ri nima'q kipalen. Y ri winaqi' ri' kan e ruch'akon kan ri Moisés y xerelesaj kan chupan ri kiruwach'ulew. 13Jak'a ri israelita man xekelesaj ta el pa kiruwach'ulew ri winaqi' guesureo y ri maacateo, y roma ri' xek'oje-qa chikikojol k'a re wakami. 14Jak'a ri tzobaj richin ri Leví man jun xkichinaj kan, roma ri kichin rije', ja ri nel kan chire ri niporox chuwech ri Jehová ri ki-Dios; jari' ri kichinan kan rije', achi'el rubin ri Jehová chike.
15Ri Moisés xujech k'a chire ri tzobaj richin ri Rubén, y xuya' chike achi'el ri kajlabal chi kach'alal-ki'. 16Y ri kiruwach'ulew rije' nitiker-pe pa tinamit Aroer ri k'o chuchi' ri ch'uti'n raqen-ya' Arnón y ri tinamit ri k'o pa taq'aj kojol juyu' chire ri raqen-ya' ri' y chijun ri chuwi' taq juyu' ri nitiker-el rik'in ri tinamit Medebá, 17y napon k'a pa ruwach'ulew Hesbón rik'in ronojel ri rutinamit ri ek'o pa taq'aj: Ja ri Dibón, Bamot-baal, Bet-baal-meón, 18Jahas, Cademot, Mefáat, 19Quiriataim, Sibmá, Séret-sáhar, ri k'o pa taq'aj kojol juyu', 20Bet-peor, Bet-jesimot, y ri tinamit ri ek'o chuwa taq juyu' richin Pisgá. 21Y ronojel re ruwach'ulew re' y ri tinamit ri ek'o chuwi' taq juyu' y ronojel ri ek'o pa ruq'a' ri Sihón rey kichin ri amorreo, ri xk'oje' pan Hesbón. Re rey re' kan ch'akatajineq k'a kan roma ri Moisés; chuqa' xeruch'ek kan re tata'al re' richin ri Madián: Ri Eví, ri Réquem, ri Sur, ri Hur y ri Reba; re tata'al re' ri ojer kan xek'oje' chuxe' ri ruq'atbal-tzij ri Sihón. 22Y chikikojol ri xekikamisaj ri israelita, xken chuqa' ri achin ri nubananej chi nuq'alajirisaj ri peteneq, ri rubini'an Balaam ralk'ual ri Beor. 23Ja ronojel re' ri xkichinaj kan ri tzobaj richin ri Rubén, ri ruwach'ulew ri' rik'in ri kitinamit y ri kokoj taq kitinamit, napon k'a chuchi' raqen-ya' Jordán, xkichinaj kan achi'el ri kajlabal chi kach'alal-ki'.
24Ri tzobaj richin ri Gad xya'ox chuqa' ri kiruwach'ulew roma ri Moisés y xuya' chike achi'el ri kajlabal chi kach'alal-ki'. 25Ri xkichinaj rije' ja ri tinamit Jazer y ronojel tinamit richin Galaad y nik'aj chire ri kiruwach'ulew ri amonita, ri napon k'a pa tinamit Aroer ri k'o-apo chuwech ri tinamit Rabá, 26y chuqa' ri ruwach'ulew ri nitiker-el pan Hesbón y napon pa xaman chire ri tinamit Ramat-mispé, y ri tinamit Betonim, y nitiker-el pa relebel-q'ij chire ri tinamit Mahanaim y napon k'a chuchi' ri tinamit Debir. 27Y chupan ri taq'aj richin ri raqen-ya' Jordán, chuqa' xkichinaj ri tinamit Bet-aram, ri tinamit Bet-nimrá, ri tinamit Sucot, ri tinamit Safón, y ri ch'aqa' chik tinamit ri xek'oje' pa ruq'a' ri Sihón, rey richin ri Hesbón. Ri jun k'ulba't napon pa qajbel-q'ij chire ri raqen-ya' Jordán y ri jun chik k'ulba't napon pa xaman chire ri ruchi' ri choy richin Quinéret. 28Jare' ri ruwach'ulew y ri kitinamit rachibilan ri kokoj taq kitinamit ri xkichinaj kan ri rijatzul ri Gad achi'el ri kajlabal chi kach'alal-ki'.
29Chuqa' ri Moisés xujech kan ri ruwach'ulew richin xkichinaj kan ri nik'aj tzobaj richin ri Manasés; xuya' k'a chike achi'el ri kajlabal chi kach'alal-ki'. 30Ri kiruwach'ulew rije' nitiker-pe rik'in ri tinamit Mahanaim y napon rik'in ri ruwach'ulew Basán ri xk'oje' pa ruq'a' ri rey Og; y keri' chuqa' ri oxk'al kokoj tinamit ri e richin kan ri Jaír, ri xek'oje' pa Basán, 31y chuqa' ri nik'aj ruwach'ulew ri Galaad, ri tinamit Astarot, ri tinamit Edrei. Ronojel re' xok kichin ri nik'aj tzobaj richin ri rijatzul kan ri Manasés ri rutata' ri Maquir, xek'uluman achi'el ri kajlabal chi kach'alal-ki'.
32Chijun k'a re ruwach'ulew re' xujech kan ri Moisés richin xichinex kan ri k'o pa taq'aj richin ri Moab pa relebel-q'ij chire ri raqen-ya' Jordán ri k'o juk'an ya' chuwech-apo ri Jericó. 33Jak'a ri tzobaj richin ri Leví, kan man jun ruwach'ulew xkichinaj pa ruq'a' ri Moisés, roma ja ri Jehová biyon chi ja ri sipanik ri niya'ox chire rija', jari' ri xkichinaj kan rije'.
Currently Selected:
Jos 13: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
