Jue 20
20
Ri labal kik'in ri tzobaj richin Benjamín
1Jari' k'a xe'el-pe ri achi'a' ri e richin ri ch'aqa' chik tzobaj richin niban jun molojri'il pa tinamit Mispá chuwech ri Jehová. Xkimol k'a ki' y xa jun xkiben, xtiker-pe pa Dan ri k'o pa xaman, k'a pa Beerseba ri k'o pa xokon, y konojel ri achi'a' ri ek'o juk'an chik chire ri raqen-ya' Jordán. 2Konojel k'a ri xe'apon chupan ri molojri'il ri', jari' ri e aj-raqen chikikojol, y pa ruwi' ri' xe'apon e 400,000 aj-labal ri e beneq chikaqen. 3Jak'a ri aj-Benjamín xkinabej chi ri ch'aqa' chik tzobaj xejote-q'anej pa Mispá. Chiri' ri winaqi' ri kimolon-ki' xech'on rik'in ri levita pa ruwi' ri kamik ri xuk'uluwachij ri ru-concubina, y xkibij chire: Tabij chiqe achi'el toq xbanatej re jun kamik re', xecha'.
4Jari' toq ri levita ri rachijil ri ixoq ri xken, xubij: Yin xinapon pa tinamit Guibeá richin ri tzobaj Benjamín wachibilan ri nu-concubina, richin niqaq'axaj ri aq'a' ri' chiri'. 5Y xeyakatej k'a chuwij ri aj-Guibeá. Xkisutij-rij ri jay ri akuchi ojk'o-wi ri aq'a' ri', rik'in ri kich'obonik richin yinkikamisaj. Jak'a ri nu-concubina xkiqasaj ruq'ij y xek'oje' rik'in chi jun aq'a', y roma ri' xken. 6Y roma ri' yin xinwelesaj pa kablajuj peraj ri ruch'akul ri nu-concubina, y xinteq jujun peraj pa taq itzobaj richin niwetamaj re jun nimalej etzelal y kamik re xbanatej chupan re qaruwach'ulew Israel. 7Wakami k'a qonojel roj ri oj rijatzul kan ri Israel, k'atzinel k'a chi k'o niqaben: Qojch'obon k'a jebel y tiqabij k'a ri achike ri xtiqaben, xcha'.
8K'ari' konojel ri winaqi' ri kimolon-ki' chiri', xeyakatej y xa jun kich'abel xkiben y xkibij: Man jun chiqe roj nitzolin chirachoch k'a toq qachojmirisan chik na kan ronojel re'. 9Wakami, kere' k'a xtibeqabana' chike ri aj-Guibeá: Xqojyakatej k'a el chikij y rik'in sakinik xtiqatz'et achike chiqe roj ri xkebe richin nibekibana' ri oyowal y ri xkek'oje' kan 10richin nikichojmirisaj ronojel ri k'atzinel chike ri ch'aqa' chik aj-labal. Xkeqak'en k'a el e lajuj achi'a' chikikojol ri wok'al achi'a' chupan chikijujunal ri tzobaj, richin yek'oje' kan. Y ri ch'aqa' chik, jari' ri xkebe pan oyowal richin nikiben chike ri aj-Guibeá richin Benjamín, chi niqaqa pa kiwi' ri etzelal ri xkiben chupan ri qaruwach'ulew Israel, xecha'.
11Y xkimol k'a ki' konojel ri achi'a' ri' y xa jun xkiben richin xeyakatej chirij ri tinamit Guibeá. 12Y xekiteq k'a el achi'a' chupan chijun ruwach'ulew richin Benjamín y xkibij: ¿Achike k'a chi etzelal ri xbanatej chi'ikojol rix? 13Wakami k'a tiya' q'ij chiqe chi yeqachop ri itzel taq achi'a' ri ek'o chiri' pa Guibeá, richin yeqakamisaj, y keri' nich'ajch'ojir ri qatinamit Israel chire re mak re', xecha'. Jak'a ri aj-Benjamín man xkajo' ta xkak'axaj ri kich'abel ri kach'alal. 14Rije' xa xe'el-pe pa taq kitinamit, y xkimol-ki' chiri' pa tinamit Guibeá, richin nibekibana' oyowal kik'in ri ch'aqa' chik kach'alal israelita. 15-16Y ri kajlabal ri aj-Benjamín ri xe'el-pe pa taq tinamit e 26,000 aj-labal. Pa ruwi' ri', xkitun-ki' e 700 achi'a' aj chiri' pa tinamit Guibeá, ri yek'aqon rik'in ri kajxokon, y konojel k'a rije' yek'aqon rik'in ikeq' y kan nikimej stape' jun ti rusumal-wi'aj ri nikiq'ijuj. 17Y ri kajlabal ri e yakatajineq-pe chikij ri aj-Benjamín e 400,000 achi'a' ri kan e tijon jebel richin nikiben labal.
Xchapatej ri labal kik'in ri aj-Benjamín
18Ri ch'aqa' chik israelita xebe k'a q'anej pa rachoch ri Jehová richin xbekik'ulubej y xkibij chire: ¿Achike tzobaj ri xtik'o-el chiqawech richin nibekibana' oyowal kik'in ri aj-Benjamín?, xecha'. Y ri Jehová xubij chike chi ja ri tzobaj richin Judá ri xtik'o-el chikiwech. 19Xeyakatej k'a el nimaq'a' yan ri israelita y xbekipabala' ri taq kachoch chunaqaj ri Guibeá, 20y xe'el k'a pe richin nikichop ri oyowal kik'in ri aj-Benjamín, y xkicholajij k'a ki' chunaqaj ri Guibeá. 21Jak'a ri aj-Benjamín xe'el-pe chikij ri israelita y xekich'ek, y chupan ri q'ij ri' xekikamisaj e 22,000 achi'a' israelita. 22Ri ruka'n q'ij ri achi'a' israelita xk'oje' chik k'a el kuchuq'a' richin nibekibana' oyowal jun bey chik, y xkicholajij chik ki' ri akuchi xkicholajij-ki' ri nabey q'ij, 23roma rije' kan xejote' k'a q'anej pa rachoch ri Jehová ri jun q'ij kan y chijun q'ij xe'oq' chuwech k'a toq xok na pe ri aq'a'. Rije' xkik'utuj k'a chire ri Jehová wi utz yebe chik jun bey richin nibekibana' oyowal kik'in ri aj-Benjamín, ri e kach'alal. Y ri Jehová kan xubij k'a chi utz yeyakatej chik el chikij. 24Roma ri' ri israelita xkichop chik k'a oyowal kik'in ri aj-Benjamín ri ruka'n q'ij. 25Y ri ruka'n q'ij ri', xe'el chik k'a pe ri aj-Benjamín chiri' pa Guibeá richin xkiben oyowal kik'in ri ch'aqa' chik israelita y xekikamisaj chik, e 18,000 aj-labal. 26Y roma ri' konojel ri aj-labal israelita y konojel ri winaqi' xebe chik jun bey pa rachoch ri Jehová, y xetz'uye' y xe'oq' chuwech, y man xewa' ta ri jun q'ij ri' k'a toq xok na ri aq'a'; y xkisuj kamelabel ri niporox chijun y chuqa' xkisuj sipanik richin nikiq'alajirisaj chi junan kiwech rik'in rija'.
27-28Chupan ri q'ij ri' ri káxa richin ri rujikibel-tzij ri Dios k'o chiri', y ja k'a ri Finees ri ruk'ajol ri Eleazar, y rumam kan ri Aarón, ri nisamej rik'in ri káxa. Y xkik'utuj chik k'a chire ri Jehová wi utz yebe chik jun bey richin nibekibana' oyowal kik'in ri aj-Benjamín ri e kach'alal. Y ri Jehová xubij chike chi kebe chik jun bey, roma pa rox q'ij xkerujech ri aj-Benjamín pa kiq'a'.
29Y chupan ri aq'a' ri', jujun chike ri israelita xekiyala' pikbel chuchi' ri Guibeá. 30Y ri pa rox q'ij xejote' chik k'a q'anej ri ch'aqa' chik israelita chikij ri aj-Benjamín, y xkicholajij chik k'a ki' ri aj-labal richin nikichop chik oyowal rik'in ri Guibeá, achi'el kibanon-pe ri ka'i' mul. 31Y xe'el k'a pe ri aj-Benjamín richin xkichop chik oyowal kik'in. Y ri israelita eqal-eqal xebe nej chire ri tinamit, y ri aj-Benjamín kan e kitzeleliben-el. Y xkichop yekikamisaj jujun chike ri israelita achi'el ri kibanon-pe chupan ri bey ri nibe pa rachoch ri Jehová y ri bey ri nibe pa Guibeá y xekikamisaj jun la'eq e juwineq lajuj achi'a' israelita. 32Y ri aj-Benjamín xkibij-qa chikiwech: Xa xkixibij yan ki' chiqawech achi'el ri rubanon-pe, xecha'.
Jak'a ri israelita chuqa' xkibij-qa: Qojanimej y keqelesaj-el nej chire ri kitinamit, y keqak'uaj k'a más nej chire ri bey, xecha'. 33K'ari' ri israelita xkichop chik el binen y xe'apon k'a pa Baal-tamar, y xkinuk'-ki' richin nikiben oyowal chiri'. Chuqa' ri kewan-ki' chunaqaj ri Guibeá xeyakatej-q'anej, 34richin xkichop oyowal chiri' pa tinamit Guibeá; y ri kajlabal ri israelita ri xkiben oyowal chiri' e 10,000 aj-labal ri e cha'on-pe chikikojol ri kachibil. Y ri oyowal kan xnimer k'a q'anej; jak'a ri aj-Benjamín man ketaman ta ri achike ruk'ayewal ri peteneq chikij. 35Y ri Jehová xuben chi xetzaq ri aj-Benjamín pa kiq'a' ri ch'aqa' chik israelita; y chupan ri q'ij ri' ri israelita xekikamisaj 25,100 achi'a' aj-Benjamín chiri'. 36Jari' toq ri aj-Benjamín xkinabej chi xa xech'akatej yan.
Ri rubanik ri ch'akonik kichin ri ch'aqa' chik israelita
Ri israelita ri e animajineq-el chikiwech ri aj-Benjamín kan kikuquban kik'u'x kik'in ri kewan kan ki' chunaqaj ri Guibeá. 37Y ri achi'a' ri kewan-ki' chi'anin xe'ok-apo pa Guibeá, y xekikamisaj chi espada konojel ri ek'o pa tinamit. 38Y k'o k'a jun retal ri xkiya' chikiwech ri israelita y ri achi'a' ri kewan-ki', chi toq xke'ok chupan ri tinamit, jari' toq xtikiya' ruq'aq'al richin nikitz'et ri nimalej sib ri xtijote' chikaj. 39Rokik ri' ri israelita ri ek'o pa bey xkiben chi xech'akatej yan chupan ri oyowal, y ri aj-Benjamín xkichop yekikamisaj ri israelita, y xekikamisaj jun la'eq e juwineq lajuj achi'a', y xkibij-qa: Rije' xa xetzaq yan pa qaq'a' achi'el ri rubanon-pe, xecha' chikiwech. 40Jak'a toq xetzu'un kan chikij, xkitz'et ri nimalej sib ri jotol chikaj ri eleneq-el pa ruwi' ri kitinamit. 41Jari' toq ri israelita xkipaba-ki', y ri aj-Benjamín kan xkik'en janila rukiy, roma ri ruk'ayewal xa pa kiwi' chik rije' k'o-wi. 42Y xe'animej k'a chikiwech ri israelita, y xkinim-ki' pa taq k'echelaj; jak'a ri oyowal xa xeruq'i' k'a xabakuchi xebe-wi, y ri israelita ri xeya'on ruq'aq'al ri tinamit xe'el-pe. Keri' k'a ri aj-Benjamín ri e animajineq-pe xek'oje' pa nik'aj chike ri israelita y kan xekamisex. 43Keri' ri israelita xkisutij-kij ri aj-Benjamín, y xekitzeqelibej k'a pa relebel-q'ij chire ri Guibeá y yekikamisala' k'a e beneq chupan ri bey ri'. 44Y xeken k'a e 18,000 aj-labal ri más e utz chike ri aj-Benjamín.
45Y ek'o k'a chike rije' ri xe'animej chik y xebe pa tz'iran ruwach'ulew, pa ruchojmilal ri juyu' akuchi k'o-wi ri nima-abej rubini'an Rimón. Chupan ri bey ri napon chiri' xekikamisaj k'a e 5,000 achi'a' aj-Benjamín. Ri israelita kan xekitzeqelibej k'a y xekikamisaj chik e 2,000. 46Y ri kajlabal ri aj-Benjamín ri xeken chupan ri q'ij ri' e 25,000 aj-labal ri más e utz chikikojol. 47Y ek'o k'a e 600 achi'a' ri xetikir xe'animej, y xkewaj kan ki' pa tz'iran ruwach'ulew, y xek'oje' kaji' ik' chiri' chupan ri nima-abej Rimón. 48Y ri israelita xetzolin chik k'a chikij ri aj-Benjamín ri k'a e ek'o kan, y xekikamisaj chi espada konojel ri winaqi' y ri chikopi', y xekiyala' kan kiq'aq'al ronojel ri kitinamit.
Currently Selected:
Jue 20: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.