Jue 18
18
Ri Micaías y ri achi'a' richin ri tzobaj richin Dan
1Chupan k'a ri q'ij ri' man jani k'o rey pan Israel. Y je q'ij ri' chuqa' toq ri tzobaj richin Dan nikikanoj akuchi ta yek'oje-wi, roma rije' man jani tikich'ek kan ri k'o chi nikichinaj. 2Y ri rijatzul ri Dan xekiteq-el e wo'o' achi'a' ri maneq xibinri'il chikiwech, ri e aj-Sorá y Estaol, richin nibeketamaj kan jebel ri ruwach'ulew; y kan keri' k'a xkiben. Xebe ri chuwi' taq juyu' richin ri Efraín, y xe'apon k'a chunaqaj ri rachoch ri Micaías, y chiri' xkik'owisaj-wi ri aq'a'. 3Toq ek'o chiri' chunaqaj ri rachoch ri Micaías, xketamaj ri ruch'abel ri ala' levita. Xe'ok k'a apo y xkibij chire: ¿Achike at k'amayon-pe wawe'? ¿Y achike naben wawe'? ¿Y achike nakanoj ke taq re'?, xecha' chire. 4Ri levita xubij ri achike rubanik rubanon ri Micaías rik'in, y achi'el toq xok ru-sacerdote. 5Y rije' xkibij chire: Tak'ulubej ri Dios wakami, richin niqetamaj wi utz xtel chiqawech re qataqikil re nibeqabana', xecha'.
6Y ri sacerdote xubij chike: Kixbiyin k'a rik'in uxlanibel-k'u'x; ri Jehová kan xtibe iwik'in xabakuchi xkixbe-wi, xcha'.
7Jari' toq ri wo'o' achi'a' ri' xe'el k'a el chiri', y xe'apon pa tinamit Lais; y xkitz'et chi ri winaqi' ri ek'o chupan ri tinamit ri' kan e jikil chiri', y kan kikuquban kik'u'x, achi'el ri kibanobal ri aj-Sidón. Y ri chiri' kan man jun k'a yenaqo rik'in ronojel ri yekiben, ni man jun k'a achoq pa ruq'a' k'o-wi ri q'atbel-tzij. Pa ruwi' re' ri tinamit Sidón xa kan janila k'a nej k'o chike rije', y kan man jun tinamit ri achoq ik'in ta nikiben-wi oyowal.
8Xetzolej k'a ri achi'a' ri' kik'in ri kach'alal ri ek'o kan pa Sorá y Estaol, y ri kach'alal xkibij: ¿Achike rutzijol ik'amon-pe chiqe?, xecha'.
Y ri e wo'o' achi'a' xkibij: 9Jo' qojyakatej chikij, roma roj xqabenik'oj yan kan jebel ri ruwach'ulew, y kan xqatz'et kan chi kan janila jebel. Y rix ¿Achike roma kan man jun niben? Man tiq'oraj yixbe richin yojbe'ok chupan ri ruwach'ulew ri xtok qichin. 10Toq xqojbe, xqojapon kik'in winaqi' ri kikuquban kik'u'x, y xqojapon chupan jun ruwach'ulew ri kan janila nim, y chuqa' chiri' kan man jun achike ta ri man ta k'o; xa kan ronojel k'o. Ri Dios xa kan xujech yan k'a pa qaq'a', xecha'.
11Y kan jari' xe'el-el chiri' pa Sorá y Estaol, e 600 achi'a' e rijatzul ri Dan e kachibilan-el ri e aj pa kachoch, y ri achi'a' kan kik'uan ri kikamisabal richin labal.
12Xebe k'a y xebek'oje' pa tinamit Quiriat-jearim ri k'o pa Judá, y roma ri' ri chiri' xubini'aj: Ri Akuchi-k'o-wi ri Tzobaj Richin Dan, keri' nibix chire k'a re wakami; y re' k'o pa qajbel-q'ij chire ri Quiriat-jearim. 13Xe'el-el chiri' y xe'apon chuwi' taq juyu' richin ri tzobaj richin Efraín, y xe'apon rik'in ri rachoch ri Micaías.
14K'ari' ri wo'o' achi'a' ri xbeketamaj kan ri ruwach'ulew Lais y xkibij chike ri kiwinaq: Chupan re jay re' k'o jun efod, chuqa' kokoj taq wachibel, jun wachibel toch'on ri ya'on saqipueq chirij y jun chik banon rik'in saqipueq ya'erisan pa q'aq'. Wakami k'a tich'obo' achike niqaben rik'in ronojel re', xecha'.
15Toq xe'apon chiri' xe'ok pa rachoch ri ala' levita, chiri' rik'in ri Micaías, y xkik'utuj rutzil ruwech.
16Y ri e 600 aj-labal ri e rijatzul ri Dan kik'ualon ri kikamisabal, y e pa'el kan pa bey chuchi' ri rachoch ri Micaías. 17K'ari' ri wo'o' achi'a' ri xbeketamaj kan ri ruwach'ulew, xe'ok-apo pa rachoch ri Micaías, y xbekik'ama-pe ri wachibel toch'on, ri efod, ri kokoj taq wachibel y ri wachibel ri banon rik'in saqipueq ya'erisan pa q'aq', rokik ri sacerdote k'o chiri' chuchi' ri jay kik'in ri e 600 achi'a' ri kik'uan ri kikamisabal. 18Y toq rije' xbekik'ama' yan pe ronojel re' pa rachoch ri Micaías, jari' toq ri levita xubij chike: ¿Achike k'a niben rix?, xcha'.
19Y rije' xkibij chire: Tatz'apej la achi' y man jun tabij. Jo' qik'in roj, richin chi yatok qapixabanel y qa-sacerdote. ¿Man más ta kami utz yatok sacerdote pa ruwi' jun tzobaj richin Israel ke chuwech at sacerdote xaxe pa rachoch jun achin?, xecha'.
20Y ri levita kan xkikot k'a ránima, y xuchop k'a el ri efod, ri kokoj taq wachibel y ri wachibel toch'on y ya'on saqipueq chirij, y xbe chikikojol ri winaqi' ri'.
21Y ri tzobaj richin Dan xkichop chik k'a el kibey y xekik'owisaj-el chikiwech ri ak'uala', ri kawej y ronojel ri kik'uan, richin ye'apon k'a pa Lais. 22Toq xebe yan nej chire ri rachoch ri Micaías, xkimol k'a ki' ri winaqi' ri ek'o chunaqaj ri rachoch y xekitzeqelibej-el ri e rijatzul ri Dan y kan xebekiq'i'. 23Y yesik'in chikij ri tzobaj richin Dan; roma ri' rije' xetzu'un kan chikij y xkibij chire ri Micaías: ¿Achike xaben chi e amolon-pe ri awinaq?, xecha'.
24Rija' xubij chike: Xik'uaj-el ri nu-dios ri xenben y xik'uaj chuqa' ri nu-sacerdote. Y wakami xa kan man jun chik xk'oje' kan wik'in. ¿Achike k'a roma nibij-pe chuwe chi achike xinben?, xcha'.
25Y ri e rijatzul ri Dan xkibij: Man kasik'in chiqij, roma rik'in juba' ri winaqi' e k'a'el xtiyakatej koyowal y xketzolej chawij, y xkatkikamisaj rat y ri awinaq, xecha'.
26Y ri Micaías toq xutz'et chi kan janila e k'iy ri e rijatzul ri Dan, xtzolej kan chirachoch, y rije' kan xkichop chik k'a el bey. 27Kik'uan k'a ronojel ri e rubanon ri Micaías, y kik'uan chuqa' el ri ru-sacerdote, y xe'apon k'a pa tinamit Lais, jun tinamit ch'uch'uj y kuqul kik'u'x. Xekikamisaj k'a chi espada, y xkiporoj ri tinamit ri'. 28Y man jun xto'on kichin roma janila nej ek'o chire ri Sidón, y kan man jun tinamit achoq ik'in ta nikito-wi ki'. Y ri Lais k'o qa pa taq'aj chunaqaj ri tinamit Bet-rehob. K'ari' ri e rijatzul ri Dan xkipaba' chik q'anej ri Lais y chiri' xek'oje-wi, 29y xkijel k'a rubi', y xkibij Dan chire, achi'el ri rubi' ri kitata', ri ruk'ajol kan ri Israel. 30Y ri rijatzul ri Dan ri xe'apon chiri' xkipaba-q'anej ri wachibel toch'on; y ri levita ri kik'uan-el, rubini'an Jonatán, ruk'ajol ri Guersón y rumam kan ri Moisés. Ri Jonatán y ri e rijatzul jari' ri xe'ok sacerdote chikikojol ri tzobaj richin Dan, k'a ri q'ij toq xe'uk'uex-el pa ximonri'il. 31Keri' xk'oje' k'a chikikojol ri paban wachibel ri rubanon ri Micaías, ri janipe' xk'oje' ri rachoch ri Dios pa Siló.
Currently Selected:
Jue 18: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
