Gén 37

Ri rachik' ri José

1Jak'a ri Jacob chupan ri ruwach'ulew Canaán xk'oje-wi kan, akuchi xk'oje-wi ri rutata'. 2Ja tzijonik re' chirij ri kik'aslen ri Jacob y ri ralk'ual.

Jun k'a chike ri ruk'ajol ri Jacob rubini'an José, toq rija' k'o k'a wuqlajuj rujuna', jari' toq niyuq'un kik'in ri runimal e ral ri Bilhá y ri e ral ri Zilpá, re ixoqi' re' chuqa' e rixjayil ri rutata', y ri José yerusujuj chire ri rutata' ronojel ri itzel ri yekiben ri rach'alal.

3Y ri Jacob más nrajo' ri José chikiwech konojel ruk'ajol, roma rija' xalex toq ri Jacob ri'j chik. Xuben k'a jun rutziaq nim raqen ri xilon rupan ri kan janila jebejoj ok. 4Toq xkitz'et ri rach'alal chi ja rija' ri janila najowex roma ri kitata', kan janila k'a xketzelaj, kan man yech'on ta chik chire rik'in ajowabel.

5Ri José xuben k'a jun achik', y toq xutzijoj chike ri rach'alal, rije' kan más k'a xketzelaj, 6roma xubij chike: Tiwak'axaj re achik' re xinben. 7K'o jun q'ij yojq'aton trigo pa juyu', y ri boraj wichin yin xpa'e-el, y ri boraj iwichin rix ri ek'o chuchi' ri wichin yin, nikiqasaj-ki' chuwech ri wichin yin, xcha'.

8Jak'a ri rach'alal xkibij chire: ¿Xtaq'et ta k'a tzij rat pa qawi' roj? ¿Kan xkatok ta k'a aj-raqen chiqakojol?, xecha'. Xketzelaj k'a más roma ri rachik' roma kan xutzijoj chike.

9Y xuben chik k'a jun achik', y kan xutzijoj chuqa' chike ri rach'alal, y xubij: Yin kan xinben chik k'a jun achik', kan xinwachik'aj chi ri q'ij, ri ik', y julajuj ch'umila' nikiqasaj-ki' chinuwech, xcha'.

10Y chuqa' xutzijoj k'a chire ri rutata' stape' xutzijoj yan chike ri rach'alal, jak'a ri rutata' xuch'olij y xubij chire: ¿Achike k'a chi achik' ri xawachik'aj rat? ¿Chij ri ate' y yin y konojel ri awach'alal xtiqaqasaj ta k'a qi' k'a pan ulew chawech rat?, xcha' chire. 11Ri rach'alal nich'upun kik'u'x chirij, jak'a ri rutata' janila nuch'ob rij re achik' re'.

Toq ri José xk'ayix-el koma ri rach'alal.

12Chirij re', ri rach'alal xebe richin xebekiyuq'uj ri rawej ri kitata' k'a pa Siquem. 13Xeri' ri Israel xubij chire ri José, ri ruk'ajol: Ri awach'alal yeyuq'un k'a pa Siquem. Ninwajo' chi ye'abetz'eta' kan, xcha'. Y rija' xubij: Utz, k'ari' táta yibe, xcha'.

14Y rija' xubij chire: Kabiyin wakami, ja ke'abetz'eta' kan achike kibanon ri animal, y achike kibanon ri karne'l. Nak'en-pe ri rutzijol chuwe, xcha'.

Xel k'a el ri José pa ruwa-taq'aj richin Hebrón, y xapon k'a pa Siquem, 15y rija' nixule-nijote' chikikanoxik ri rach'alal, y jari' toq xuk'ul jun achin, y re achin re' xuk'utuj chire: ¿Achike nakanoj?, xcha' chire.

16Y ri José xubij: Yenkanoj ri wach'alal. Takuyu' juba', ¿man awetaman ta kami akuchi yeyuq'un-wi?, xcha'.

17Ri achin ri' xubij chire: Xe'el yan el wawe'. Yin xinwak'axaj chi nikibij: Jo' pa Dotán, yecha', xcha' ri achin.

K'ari' rija' xeberukanoj y chiri' xeril-wi. 18Toq ri rach'alal xkitz'et-pe nej, rije' xkinojij richin nikikamisaj. 19Y rije' xkibila-qa chikiwech: Jare' peteneq ri achik'anel. 20Wakami k'a tiqakamisaj, y niqaya' chupan la jul la', y xtiqabebij chi jun itzel chikop xukamisaj y xutej, y xtiqatz'et achike xtibanatej rik'in ri rachik', xecha'.

21Toq ri Rubén xrak'axaj re', xrajo' xukol kan pa kiq'a', y xubij: Man tiqakamisaj. 22Man tiqakamisaj roj. Tiqaya' kan chupan re jul re k'o wawe' chupan re tz'iran ruwach'ulew. Man tiqajeluj ri qaq'a' chirij, xcha' ri Rubén.

Keri' xubij richin nukol-el pa kiq'a' ri rach'alal richin nutzolij-el rik'in ri rutata'. 23Y toq xapon kik'in ri rach'alal, xkelesaj-el ri rutziaq ri nim raqen y xilon rupan. 24K'ari' xkichop ri José y xkik'eq-qa chupan ri jul, jak'a ri jul ri' xa maneq ya' chupan. 25K'ari' xebetz'uye' richin xkitej kiway.

Y jari' toq xekitz'et jun tzobaj winaqi' ri e rijatzul kan ri Ismael ri e peteneq, ri yepe k'a kela' pa ruwach'ulew Galaad, y kik'amon-pe jubulej taq aq'om, bálsamo, y mirra chikij ri ki-camello y kik'uan-el richin chi nikik'uaj k'a kela' pa ruwach'ulew Egipto. 26Y jari' toq ri Judá xubij chike ri rach'alal: ¿Achike nuk'en-pe chiqe richin niqakamisaj ri qachaq' y niqewaj ri rubanik ri rukamik? 27¿Achike roma man niqak'ayij-el ri qachaq' José chike la achi'a' la e rijatzul kan ri Ismael?, richin chi man niqajeluj ta ri qaq'a' chirij, roma rija' kan qach'alal-wi, y junan qakik'el rik'in, xcha' ri Judá.

Y konojel utz xkak'axaj ri xubij. 28Y toq yeq'ax yan el ri chiri' ri k'ayinela', ri e rijatzul kan ri Ismael, ri aj kela' pa Madián, jari' toq ri rach'alal ri José xbekelesaj-pe ri pa jul, y xkik'uaj-q'anej richin nikik'ayij-el chike ri winaqi' ri'. Keri' toq xkik'ayij-el ri José, chi juwineq raqen saqipueq, y xuk'uex el k'a pan Egipto. 29Y ri Rubén toq xtzolin-pe akuchi beneq-wi y xbe akuchi k'o-wi ri jul, xutz'et chi xa maneq chik ri José chiri', xpe bis rik'in y roma ri' xuretz ri rutziaq chirij. 30K'ari' xbe kik'in ri rach'alal y xubij chike: Ri ala' maneq chik chupan ri jul. ¿Wakami achike ninben yin?, xcha'.

31K'ari' rije' xkikamisaj jun ti alaj tzuntzun y xbekik'ama-pe ri nim raqen rutziaq ri José y xkiju' chupan ri rukik'el ri ti chikop ri'. 32Y xeri' xkik'uaj ri rutziaq chire ri kitata' y xkibij chire: Re tzieq re' xqil pa juyu'; tatz'eta' na k'a wi jare' o man jare' ta ri tzieq aya'on chire ri ak'ajol, xecha'.

33Y rija' xretamaj k'a ruwech ri tzieq y xubij: Ja', jare' ri rutziaq ri nuk'ajol. Y xubij chuqa': Rik'in juba' jun itzel laj chikop xwech'on richin y xuk'ux, xcha' ri Jacob. 34K'ari' rija' xuretz ri rutziaq chirij, xukusaj ri tzieq ri richin bis y janila k'iy q'ij xubisoj ri rukamik ri ruk'ajol. 35Konojel k'a ri ralk'ual, chi achi'a' chi ixoqi' ye'apon k'a rik'in richin chi nikikuquba' k'a ruk'u'x; jak'a rija' man nik'o ta ri rubis y nubij k'a: Kan qitzij ninbij chi k'a toq xkiken na xtinya' kan re bis re', xcha'. Y kan xroq'ej k'a ri José.

36Jak'a ri aj-Madián xbekik'ayij kan ri José pan Egipto, chire jun achin rubini'an Potifar, jun aj samaj richin ri rey y aj-raqen pa kiwi' ri chajinela'.

Currently Selected:

Gén 37: KQC

Highlight

Copy