Gén 34
34
Ri Dina xqasex ruq'ij roma ri Siquem
1K'o k'a jun q'ij ri Dina ri ral ri Lea, rumi'al ri Jacob, xel-el pa rachoch chi retamaxik kiwech ri xtani' aj chiri' chupan ri ruwach'ulew ri'. 2Y ri achin Hamor heveo, ri tata'al ri chiri' chupan ri ruwach'ulew ri' k'o jun ruk'ajol rubini'an Siquem, y rija' xutz'et k'a ri Dina xuchop y rik'in uchuq'a' xkotz'e' rik'in. 3Jak'a ri Siquem man xuya' ta chik kan ri Dina y xbe ránima chirij. Y xutej ruq'ij chirij ri Dina richin chi xajowex ta. 4Y ri Siquem xch'on k'a rik'in ri Hamor ri rutata' y xubij chire: Tak'utuj juba' re jun xten re' richin chi nok wixjayil, xcha'
5Y toq xapon rutzijol rik'in ri Jacob chi ri Dina ri rumi'al xqasex ruq'ij roma ri Siquem, ri e ruk'ajol xa e maneq, rije' xa e beneq k'a pa juyu' e kik'uan-el ri rawej pa yuq'unik; roma ri' ri Jacob man jun xubij k'a ja toq xetzolin na pe. 6Y jari' toq ri rutata' ri Siquem xbe rik'in ri Jacob richin xberuk'utuj ri rumi'al.
7Ri e ruk'ajol ri Jacob xetzolej-pe pa juyu', jari' toq xketamaj, y rije' janila xyakatej koyowal roma kan janila itzel xuben ri Siquem chikikojol ri e rijatzul ri Israel, roma xuqasaj ruq'ij ri rumi'al ri Jacob, ri kan man ruk'amon ta chi nibanatej keri'. 8Jak'a ri Hamor xbech'on k'a kik'in rije' y xubij chike: Ri nuk'ajol Siquem kan xbe ránima chirij ri iwana' rix. Roma ri' tibana' utzil tiya' q'ij richin nok rixjayil, 9richin keri' xtijunamatej-qawech; tiya' ri imi'al chiqe roj, y roj xtiqaya' ri qami'al chiwe rix. 10Kixk'oje' kan qik'in jumul. Ri ruwach'ulew k'o richin niqasamajij. Tibana' itiko'n chuwech. Kixk'ayin y kixloq'on, kan tibana' iwichin chire, xcha'.
11Ri Siquem chuqa' xubij chire ri rutata' ri Dina, y chike ri ruxibal: Yin nink'utuj utzil chiwe richin kinik'ulu' y xtinya' chiwe ronojel ri nik'utuj rix. 12Man jun rubanon wi xtik'utuj k'iy sipanik chuwe. Yin xtinya' chiwe janipe' niwajo' rix, xaxe tiya' q'ij chi ri iwana' nok wixjayil, xcha'.
13Jak'a ri e ruk'ajol ri Jacob rik'in q'oloj xech'on rik'in ri Siquem y ri rik'in ri Hamor ri rutata'. Keri' xkiben roma ri Siquem xuqasaj ruq'ij ri Dina ri kana'. 14Y rije' xkibij k'a chike: Man yojtikir ta niqaben keri'. Wi niqaya' ri qana' chire jun achin ri man qupin ta richin ya'on jun retal, ri keri' xa kan k'ixbel chiqe roj. 15Roj kan utz k'a xtuben chiqawech xaxe wi niben ri niqak'utuj chiwe: Kan kequpix k'a konojel ri achi'a' ri ek'o chi'ikojol rix richin jun retal. 16K'ari' xtiqaya' chiwe ri qami'al, y roj xqojk'ule' kik'in ri imi'al rix, y xqojk'oje' k'a qa jumul iwik'in, y xa jun k'a tinamit xtiqaben. 17Jak'a wi man xqojiwak'axaj ta richin k'a chi yequpix konojel ri achi'a' richin jun retal xtiqak'uaj-el ri qana' y xqojbe, xecha'.
Ri Simeón y ri Leví xkelesaj koyowal chikij ri aj-Siquem
18Ri Hamor y ri Siquem ri ruk'ajol, kan utz k'a xkak'axaj re ch'abel re'. 19Y ri Siquem jak'a rija' ri k'o más ruq'ij chikikojol ri rach'alal chiri' pa rachoch ri rutata' y rija' kan man xuya' ta k'a kan k'iy q'ij richin xuqupij-ri' richin jun retal, roma janila xqa' chuwech ri rumi'al ri Jacob. 20Y roma ri' ri Hamor y ri ruk'ajol xepe chuchi' ri tinamit richin xech'on kik'in konojel achi'a' ri ek'o chiri', y xkibij chike: 21Re achi'a' re' kan janila ch'uch'uj ri kánima qik'in roj, roma ri' tiya' q'ij richin xkek'ayin y xkeloq'on chupan re qatinamit. Re ruwach'ulew re' nim y utz richin yek'oje' qik'in y roj xqojk'ule' kik'in ri kimi'al rije', y ri qami'al roj xtiqaya' chike rije'. 22Xaxe k'a rik'in re jun jikibel-tzij re' xkek'oje-qa ri achi'a' chiqakojol roj; kan kequpix k'a konojel achi'a' chiqakojol roj; achi'el ri kibanon rije', kan keri' chuqa' roj richin chi xa jun tinamit xtiqaben. 23Ronojel ri kibeyomel y ri tzobaj taq awej ri k'o kik'in eqal-eqal xtok qichin roj; xaxe tiqabana' ri nikibij rije' richin xkek'oje-qa qik'in, xecha'.
24Konojel k'a achi'a' richin ri tinamit ri' ri k'o kijuna' richin yebe pa labal kan xkinimaj ri xbix chike koma ri Hamor y ri Siquem, richin yequpix richin jun retal. 25Y jak'a pa rox q'ij toq janila kina'on rukiy, jari' toq ri e ka'i' ruk'ajol ri Jacob, ri Simeón y ri Leví, e ruxibal ri Dina, xkik'uaj k'a el ri ki-espada, xe'apon k'a chupan ri tinamit, y xekikamisaj kan konojel ri achi'a', y ri achi'a' ri' kan man jun k'a nikimey toq xe'apon ri Simeón y ri Leví. 26Rije' xkikamisaj k'a kan ri Hamor y xkikamisaj kan ri Siquem. Xekikamisaj k'a kan chi espada. K'ari' xbekelesaj-pe ri Dina pa rachoch ri Siquem y xebe. 27Ri ch'aqa' chik ruk'ajol ri Jacob xe'apon k'a akuchi ek'o-wi ri kaminaqi' y xkik'uaj-el ri janipe' ri xkil-el chupan ri tinamit richin xkiben ruk'exel chike roma xkiqasaj ruq'ij ri kana'. 28Xekik'uaj k'a el ri kiwákix, ri karne'l y ri kibur, y ronojel ri xkil-el chupan ri tinamit, y ronojel ri ek'o pa taq juyu' ri kitikon-qa ri aj chiri'. 29Y chuqa' xkik'uaj-el ronojel ri k'o rejqalen, xekik'uaj-el ri ixoqi', ri ak'uala' y ronojel ri xekil-el pa taq jay. 30Y ri Jacob xubij chike ri Simeón y ri Leví: Rix janila xiniya' pa ruk'ayewal roma xe'ikamisaj kan re rajaw re ruwach'ulew re'. Wakami xtikimol k'a pe ki' chiqij ri e rijatzul kan ri Canaán y ri Feres y roj xa man oj k'iy ta ok ri achi'a'; xkinkikamisaj k'a yin y ri e aj pa wachoch, xcha' chike.
31Jak'a rije' xkibij: ¿Ruk'amon kami chi ri qana' xban chire achi'el jun xten ri itzel ruk'aslen?, xecha' chire ri kitata'.
Currently Selected:
Gén 34: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
