Gén 11

Toq xetalutej ri winaqi'

1Chupan ri q'ij ri' toq xq'ax yan ri ya' ri xmuqun re ruwach'ulew, konojel ri winaqi' xa jun k'a kich'abel. 2Toq xe'el-pe pa relebel-q'ij, xkil jun taq'aj chiri' pa ruwach'ulew rubini'an Sinar. Y chiri' xek'oje-wi-qa. 3Y k'o k'a jun q'ij xkich'ob y xkitzijola' chikiwech: Tiqabana' taq xan y tiqaporoj pa q'aq', richin niqaben ladrillo, xecha'. Y keri', rije' ladrillo k'a ri xkikusaj pa ruk'exel abej y petróleo k'a xkikusaj richin xok rulo' ri xabachike kisamaj. 4Chirij re' xkibij chik: Tiqapaba' jun tinamit y jun torre y re torre re' xtapon k'a chila' chikaj, richin keri' xtel qatzijol y man xqojtalutej ta chuwech re ruwach'ulew, xecha'.

5Jak'a ri Jehová xqaqa-pe richin xorutz'eta-qa ri tinamit ri yetajin chubanik ri winaqi' y chuqa' ri torre ri xkik'is yan rubanik. 6Y ri Jehová xubij: Ri winaqi' xa jun tinamit kibanon y xa jun ri kich'abel; y k'a nabey kisamaj re' ri nikiben. Y kan man jun k'a xkeq'aton richin nikiben ri nikirayij. 7Wakami k'a, jo-qa y tiqasacha' ri kich'abel, richin chi man niq'ax ta chikiwech ri nikibij, xcha'.

8Keri' k'a xuben ri Jehová chike; roma ri' xkitalula-el-ki' chuwech re ruwach'ulew y xkitanaba' kan rubanik ri tinamit ri ye'ajin chubanik. 9Roma chiri' ri Jehová xujel kich'abel konojel ri winaqi', roma ri' ri tinamit ri' xubini'aj kan Babel.*f11* Y jari' k'a ri xbanon chike ri winaqi' ri' chi xkitalula-el-ki' chuwech chijun ruwach'ulew.

Ri e rati't-rumama' ri Abram

10Wawe' k'a e tz'ibatel-wi kan ri kibi' ri e rijatzul ri Sem. K'a ka'i' k'a juna' tiq'ax ri ya' ri xmuqun ri ruwach'ulew, toq xralk'ualaj ri Arfaxad y ri Sem k'o wok'al rujuna' chiri'. 11Y toq xalex yan ri Arfaxad, ri Sem xk'ase' chik na 500 juna', y xek'oje' ch'aqa' chik ralk'ual.

12Y toq ri Arfaxad k'o juwineq wolajuj rujuna', jari' toq xralk'ualaj ri ruk'ajol rubini'an Sélah. 13Chirij ri ralaxik rija', ri Arfaxad k'a xk'ase' na chik 403 juna', y xek'oje' ch'aqa' chik ralk'ual.

14Y toq ri Sélah k'o juwineq lajuj rujuna' jari' toq xralk'ualaj ri ruk'ajol ri xubini'aj Éber. 15Chirij ri ralaxik rija', ri Sélah xk'ase' na chik 403 juna', y xek'oje' chik ch'aqa' ralk'ual.

16Y toq ri Éber k'o juwineq kajlajuj rujuna' jari' toq xralk'ualaj ri ruk'ajol ri xubini'aj Péleg. 17Chirij ri ralaxik rija', ri Éber xk'ase' na chik 430 juna', y xek'oje' ch'aqa' chik ralk'ual.

18Y toq ri Péleg k'o juwineq lajuj rujuna' jari' toq xralk'ualaj ri ruk'ajol rubini'an Reú. 19Y chirij ri ralaxik rija', ri Péleg xk'ase' na chik 209 juna', y xek'oje' ch'aqa' chik ralk'ual.

20Y toq ri Reú k'o juwineq kablajuj rujuna' jari' toq xralk'ualaj ri ruk'ajol ri xubini'aj Serug. 21Y chirij ri ralaxik rija', ri Reú xk'ase' na chik 207 juna', y xek'oje' ch'aqa' chik ralk'ual.

22Y toq ri Serug k'o juwineq lajuj rujuna' jari' toq xralk'ualaj ri ruk'ajol ri xubini'aj Nacor. 23Chirij ri ralaxik rija', ri Serug xk'ase' na kan 200 juna', y xek'oje' ch'aqa' chik ralk'ual.

24Y toq ri Nacor k'o juwineq beleje' rujuna' jari' toq xralk'ualaj ri ruk'ajol ri xubini'aj Taré. 25Chirij ri ralaxik rija', ri Nacor xk'ase' na chik 119 juna', y xek'oje' ch'aqa' chik ralk'ual.

26Y toq ri Taré k'o oxk'al lajuj rujuna', jari' toq xeralk'ualaj e oxi' ruk'ajol ri xkibini'aj, Abram, Nacor y Harán.

Ri e rijatzul ri Taré

27Wawe' e tz'ibatel-wi kan ri kibi' ri e rijatzul ri Taré: Ri Abram, ri Nacor y ri Harán; y ri Harán xralk'ualaj ri Lot. 28Ri Harán xken pa tinamit Ur, jun tinamit richin Caldea y nabey rija' xken chuwech ri rutata'. Y xken chiri' ri akuchi xalex-wi.

29Y ri Abram xk'ule' rik'in ri xten rubini'an Sarai, y chuqa' ri Nacor xk'ule' rik'in ri xten rubini'an Milcá, rumi'al kan ri Harán, rana' ri Iscá. 30Ri Sarai man xek'oje' ta ral, roma rija' kan keri' banon chire roma ri Dios.

31Ri Taré xel-el chiri' pan Ur kichin ri winaqi' caldeo richin xbe pa ruwach'ulew Canaán y xeruk'uaj-el ri Abram ri ruk'ajol, ri Sarai ri rali' y chuqa' xuk'uaj-el ri Lot ri ruk'ajol kan ri Harán, ri ruk'ajol rija'; y toq xe'apon chupan ri tinamit rubini'an Harán, chiri' xek'oje-wi-qa. 32Y chiri' k'a pan Harán xken-wi ri Taré toq k'o 205 rujuna'.

Currently Selected:

Gén 11: KQC

Highlight

Copy