1 Crón 29
29
Sipanik richin ri rachoch ri Dios
1Chirij ronojel ri' ri rey David kere' xubij chike konojel ri winaqi': Ri Dios xcha'on ri nuk'ajol Salomón, jak'a rija' jun ala' k'a ko'ol ok y ri samaj janila nim, roma ri jay ri' man achi'el ta ok jun xabachike jay. Re' kan rachoch ri Jehová Dios. 2Rik'in k'a janila uchuq'a' xinmol ruchi' ronojel re', ri k'atzinel chire ri rachoch ri qa-Dios: ri q'anapueq, ri saqipueq, ri q'enq'oj-pueq, ri q'eqapueq, che' pa ruk'iyal, abej ónike, jalajoj kiwech taq abej ri k'o janila kejqalen y chuqa' abej mármol. 3Y pa ruwi' re', roma kan janila wajowabal pa ruwi' ri rachoch ri Jehová Dios, roma ri' ninya-apo ri kan wichin yin: Q'anapueq y saqipueq richin nibek'atzin chire ri jay richin ri Dios. 4Ninjech-apo 2,400 quintal q'anapueq ri más ch'ajch'oj, 5,000 quintal saqipueq richin yeban wiqobel chuwech ri tz'aq richin ri rachoch ri Dios, 5y chuqa' richin yeban ri samajibel. Wakami ja rix, ¿achike chiwe ri kan nalex-pe pan iwánima richin niya' jun sipanik chire ri Jehová?, xcha' ri David.
6K'ari' ri aj-raqen pa kiwi' ri ek'o pa kachoch, ri e tata'al kichin ri tzobaj, ri aj-raqen pa kiwi' ri aj-labal y ri aj-samaj richin ri rey; xalex k'a pe pa kánima richin xkiya' jun sipanik. 7Y xkiya' k'a apo 4,000 quintal q'anapueq, 7,600 quintal saqipueq, 14,000 quintal q'enq'oj-pueq y 75,000 q'eqapueq. 8Chuqa' ri k'o ronojel jebejoj taq abej kik'in xbekiya' kan chire ri Jehiel rijatzul kan ri Guersón ri achoq pa ruq'a' k'o-wi ri beyomel richin ri rachoch ri Dios.
9Ri winaqi' richin ri tinamit janila xekikot roma rik'in ronojel kánima xkiya-apo ronojel re' chire ri Jehová. Chuqa' ri rey David janila xkikot.
Ri David xuya' ruq'ij ri Jehová
10K'ari' ri rey David chikiwech ri winaqi' ri kimolon-ki' chiri' xunimirisaj rubi' ri Jehová, y xubij:
¡Nim ruwa-aq'ij rat Jehová ri qa-Dios tibe-q'ij tibe-seq!
Nim ruwa-aq'ij rat ri chuqa' ri ru-Dios ri qatata' Israel.
11Kan awichin rat ri nimirinen;
kan xaxe wi rat ri k'o aq'ij.
Kan xaxe rat ri k'o uchuq'a' awik'in,
y nim ri aq'ij-ak'ojlen.
Awik'in rat k'o-wi ri ch'akonik,
y pan aq'a' rat k'o-wi ronojel ri k'o chuwech re ruwach'ulew y ri ek'o chikaj.
Ja rat ri at Ajaw ri más nim k'o pa ruwi' ronojel.
12Awik'in rat nipe-wi ri beyomel y ri ruwaq'ijaj.
Kan ja rat yaq'aton-tzij pa ruwi' ronojel,
y pan aq'a' rat k'o-wi ri uchuq'a'.
Keri' chuqa' pan aq'a' k'o-wi ri nanimirisaj ri kiq'ij ri winaqi',
y naya' uchuq'a' pa kiq'a' konojel.
13Roma ri', qa-Dios, roj niqamatioxij chawe,
y niqabixaj ri nimalej abi' ri k'o ruq'ij-ruk'ojlen;
14¿In achike ta k'a yin richin yitikir ninsuj chawe ronojel re sipanik re'?
¿Achike ta k'a ri nutinamit richin yetikir nikisuj chawe ronojel re sipanik re'?
Roma ronojel re' kan awik'in rat nipe-wi,
y roma ri' roj niqaya' chik apo chawe ri qak'ulun.
15Chawech rat xa oj q'axel achi'el ri qati't-qamama',
y ri qak'aslen achi'el muj ri niq'ax chuwech re ruwach'ulew.
16Jehová ri qa-Dios, awichin rat ronojel ri k'o qik'in;
awik'in rat peteneq-wi re beyomel re'.
Wakami k'a niqabekusaj pa ruk'iyal richin nipabex-q'anej ri awachoch,
ri awachoch ri akuchi xtiya'ox-wi ri aq'ij-ak'ojlen.
17Yin wetaman jebel chi rat natzu' ri qach'obonik,
y kan yeqa' chawech ri winaqi' toq nikiben pa ruchojmilal.
Yin kan rik'in ronojel wánima xinsuj ronojel re' chawe.
Y ri atinamit rik'in ronojel ránima xusuj chawe ri xkik'en-pe.
Roma ri' janila yikikot.
18Ajaw Dios, ri qa-Dios y ri ki-Dios ri qati't-qamama' ri Abraham, ri Isaac y ri Israel, kan richin ta jantape' xtiqa' chawech ri xuya-apo ri atinamit chawe, y tabana' chike richin xtikijech ta chuqa' ri kánima chawe. 19Y keri' chuqa' tabana' chire ri nuk'ajol Salomón chi rik'in ta ronojel ránima xtutaqej ronojel ri pixa', richin xtupaba-q'anej ri awachoch, ri xinben yan kan ruchojmil, xcha'
20Y xeri', ri rey David xch'on kik'in ri winaqi' y xubij: Wakami ja rix xkixya'on ruq'ij-ruk'ojlen ri Jehová ri qa-Dios, y ri ki-Dios ri qati't-qamama', xcha'. K'ari' ri winaqi' kexukuk xeqaqa-qa pan ulew richin xkiya' ruq'ij ri Dios y ri rey.
Toq xok kan rey ri Salomón
21Ri jun chik q'ij ri winaqi' xekikamisaj 1,000 nima-alaji' achija' wákix, 1,000 achija' karne'l y 1,000 nima-alaji' achija' taq karne'l. Xekisuj ronojel re' richin niqa' chuwech ri Jehová, y chuqa' ri vino. 22Chupan k'a ri q'ij ri', jebel k'a xewa-xe'uk'ya' rik'in janila kikoten chuwech ri Dios. Chirij ronojel re' xkiqasaj aceite pa ruwi' ri Salomón richin xok kan rey pa ruka'n mul. Chuqa' xkiqasaj aceite pa ruwi' ri Sadoc richin jun retal chi ja rija' nimalej sacerdote. 23Keri' toq ri Salomón xtz'uye' kan pa rutz'uyubal richin q'atbel-tzij pa ruk'exel ri David ri rutata'. Kan xbe k'a pa jotol y konojel ri winaqi' richin ri Israel xkinimaj k'a rutzij. 24Konojel k'a ri e tata'al y ri achi'a' ri k'o janila kiq'ij y konojel ri e ruk'ajol ri rey David xkiya-ki' chuxe' rutzij ri rey Salomón. 25Y ri Jehová kan janila k'a xunimirisaj ri rey Salomón chikiwech konojel ri winaqi' richin ri ruwach'ulew Israel. Ri q'atbel-tzij ri xuya' ri Dios chire ri Salomón kan k'o janila ruq'ij, man jun achoq chire ta ruya'on-wi achi'el ri xuya' chire ri Salomón.
Ri rukamibal ri David
(1 Rey 2:10-12)
26Ri David, ruk'ajol ri Isaí xq'aton k'a tzij pa ruwi' chijun ri ruwach'ulew Israel 27Kawineq k'a juna' xuq'et-tzij. Wuqu' juna' xq'aton-tzij pan Hebrón, y juwineq oxlajuj juna' pa Jerusalem. 28Xken k'a ri rey David toq janila ri'j chik. K'iy k'a juna' xk'ase-el y kan k'o rubeyomel y kan janila xya'ox ruq'ij. Y ja ri Salomón ri ruk'ajol, jari' ri xk'oje' kan pa ruk'exel.
29Ronojel k'a ri rubanobal ri rey David, ri xeruben pa rutikeribel k'a pa ruk'isibel, e tz'ibatel kan chupan ri wuj kichin ri rey, koma ri Samuel ri nitz'eton ri peteneq, ri Natán y ri Gad ri e q'alajirisey ruch'abel ri Dios. 30Xkitz'ibaj k'a pa ruwi' ri nimalej ruq'atbal-tzij, ronojel ri xuk'uluwachij rija', ri xuk'uluwachij ri ruwach'ulew Israel y ri xkik'uluwachij ri ch'aqa' chik ruwach'ulew.
Currently Selected:
1 Crón 29: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
