Ioane 21
21
Na bàrawià Galilée
1Gée na càùru pàra tòotù, â é ipaarié mwara wà Iésu, tà tèpa *câmu kêe, na bàrawià Galilée#21.1 Galilée—Grec: Tibériade. Côo mwara Nawià Galilée naa na Neeremuru (Vocabulaire).. Â wàéni ê pai ipaarié tàra:
2Rà picaatâa [wà pàra tèpa câmu kêe]—wà Simona Pétéru, ma Toma (jè nee mwara ‘Bérepidu’), ma Natanaël#21.2 Natanaël—Nee Barthélemy naa na pâ tii kà Mataio, Maréko ma Luka. (pwi âboro gée Kana wâ Galilée), ma wà tupédu naî Zébédée, ma tupédu ârailu mwara.
3 # Luka 5.4–7 Â é ina tàra wà Simona Pétéru pâ: «Go bwaa pâra nau pwa puà.»
 rà ina têe pâ: «O wàijè.»
 rà pâra, â rà too naa na i wànga, â rà pâra nau pwa puà. Êco na, na pwi ne-bà, âna nye ticè ârapokâa kàra.
4Na pâra nau pwaa dòme, âna wà Iésu, âna é nye tà tâa nidò bàrawià. Êco na bwaa càra caa côoinaê. 5Â é ina tàra pâ: «Ico tàpéeni, nye pwa cè ârawéà kàwà?»
 rà tòpi têe pâ: «Auwa, nye âji ticè.»
Rà côoina Iésu
6É ina tàra pâ: «Guwà tòpò i puà naa gòro étò kàwà, ma o pwa cè ârawéà kàwà!»
 rà tòpò, â jèe càcaa pâri ma rà dàgòtù, ba dau tòina goro ê pai wâru wàra pâ ârawéà. 7#Mataio 14.29; Ioane 13.23 wà i pwi a câmu na ia dau wânüma Iésu gooé, âna é ina tà Pétéru, pâ: «Ée! Wà Pwi Ukai pwiri!»
 wà Pétéru, âna é nye nama pòpii i ârabwée kêe goro opiié, â é nye êgò kaa naa nawià, [â é éoo too dari Iésu]. 8 rà gére me mariru wà pàra tèpa câmu bée gòro i wànga.  rà jèe po tadàti i puà, goro ê pai wâru wàra ê ârawéà na. Ba rà jèe tà wâmwünyabweri ê bàrawià#21.8 Wâmwünyabweri… Napéaati naa na grec pâ: Wâpâ na 100 mètres.. 9 rà tâdòo, â rà boo gée na i wànga, [â rà tòpaé].  rà pâmari ê poloa bau ê pâ ârawéà na tâa na dàuru ânye.
10Â é ina tàra wà Iésu pâ: «Pame cè pàra ârawéà gée goro ê pwina guwà bwaa taa.»
11 # Luka 5.6 Â wà Simona Pétéru, âna é wâjué côwâ naa na i wànga ba na é dàti dò naa gòromwari i puà. Â po 153 ârawéà maina na tâa na i puà, êco na càcaa madàpa i puà.
12-13Â é ina tàra wà Iésu pâ: «Jè ija.» Â é popa i poloa ma i ârawéà, â é jèpa naa tàra jècaa.
 nye ticè pwi jèpwi gée goorà, cèna é tawèerié pâ «Gona wâgà wàa?» Ba rà jèe nye tâmogòori pâ wà Pwi Ukai.
14 # Ioane 20.19,26 Wàépwiri béâracié kâra pai ipaarié kêe tà tèpa câmu kêe, gée na càùru ê pai wâro côwâ kêe gée na aubà.
Ru pitùra Iésu ma Pétéru
15Gée na càùru ê pai pi-ija kàra, â wà Iésu, âna é tawèeri Simona Pétéru pâ: «Simona, pwina naî Iona#21.15 Iona—é, Ioane., gona dau pimaina ê pwâranümagà gooò, jii ê pwâranüma wà tàpéeni gooò?»
 é tòpi têe wà Pétéru pâ: «Üu kaa, co Pwi Ukai, gà jèe nye tâmogòori pâ go pwi gòrobéegà.»
 é ina têe wà Iésu pâ: «Gà mwa tà pa-ija i pâ nari mutô kôo.»
16 # Apostolo 20.28 Â é wailu tawèerié pâ: «Simona, pwina naî Iona, gona dau wânümagà gooò?»
 é tòpi têe mwara pâ: «Üu kaa, co Pwi Ukai, ba gà nye tâmogòori pâ go pwi gòrobéegà.»
 é ina têe wà Iésu pâ: «Gà mwa tà wéaari i pâ mutô kôo.»
17Â é wacié tawèerié pâ: «Gona gà nye pwi gòrobéeò?»
 é nye dau pikîri kaa wà Pétéru, gée goro na é jèe po wacié tawèerié.
 é tòpi têe pâ: «Pwi Ukai, gà nye tâmogòori diri ê pâ muru, â gà nye tâmogòori pâ go pwi gòrobéegà.»
 é ina têe wà Iésu pâ: «Gà mwa tà pa-ija i pâ mutô kôo. 18Gà têre bwàti, ba go ina tâgà ê âjupâra pâ: Na pàara na gà bwaa dopwa na, âna gà nye ipii acari ê karapuu'gà.  gà nye pâra naa na ére na gà câbawâdé. Êco na, wiàna gà mwa ijiao, â gà o mwa patàrù ê du îgà, â ée mwa pii ê karapuu'gà cè pwi jèpwi.  ée mwa popagà pâ naa na ére na càcaa nümagà na gà pâ naawê.»
19 # Mataio 16.24–25; 2 Pétéru 1.14 (É ina pwiri, ba na é inapàpari ê pai o bà kà Pétéru#21.19 Pai o bà kà Pétéru—Pai ina wèe pâ, rà o tétàmwara Pétéru wà tèpa cicaraé., târa ma o pwamaina wà Pwiduée.)
Ûna é jèe ina pwiri, â é ina têe wà Iésu mwara pâ: «Gà me wiâô!»
Wà pwina wânüma Iésu gooé
20 # Ioane 13.23–25 [Na gére wàrapwiri, â] wà pwi a câmu na ia dau wânüma Iésu gooé, âna é gére me wiâru. (Wà pwiibà, âna i pwi ia é tâa goro jènere wà Iésu, na i pwi bénabwé pi-ija kàra, na ia é ina têe pâ: «Pwi Ukai, wàilàapà na o ipwa tûâ tâgà?»)
 é tabiié wà Pétéru 21â é côoê, â é ina tà Iésu pâ: «Pwi Ukai, âna wà pwini na?»
22Â é tòpi têe wà Iésu pâ: «Wiàna nümoo na câé caa bà, tiagoro cè pai wâjué kôo côwâ; â ê pwiibà âna târa dà'gà? Wàéni ê pwina go ina tâgà: Gà me wiâô!»
23Gée goo pwiri, na ipâra ê jèkutâ wânabibiu kà tèpa pâra wiâ Iésu, pâ, pwiri o câé caa bà wà pwi a câmu-bà. Caapwi co, na câé caa ina wà Iésu pâ, o câé caa bà. Â é nye po ina co pâ: «Wiàna nümoo na câé caa bà, tiagoro cè pai wâjué kôo côwâ, â târa dà'gà?»
24 # Ioane 19.35 Napwa naa goo wà pwi a câmu-bà, âna wàé na é *paâjupâra ê pâ muru bèepwiri, ma wii naa na tii. Â bà jèe nye tâmogòori pâ âjupâra ê pai ina kêe.
25 # Ioane 20.30 Nye dau wâru awé ê pàra muru na é pwa wà Iésu. Êco na, wiàna jè cau wii diri, â go niimiri pâ, ê gòropuu âna é po dau kîri târa ma tâa na! Nabwé!
Currently Selected:
Ioane 21: pri
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
