ᑭᔅᑫᓕᑖᑯᑖᑫᐎᓐ 3
3
ᐊᓂᑭ ᑖᐺᑕᒧᐗᒃ ᓵᕐᑎᓯᒃ ᒥᓛᑲᓂᐎᐗᒃ ᑎᐹᒋᒧᐎᓂᓕᐤ
1ᐊᓇ ᐁᓐᒐᓪ ᓀᔥᑕ ᑳ ᑎᐯᓕᒫᑦ ᒫᒪᐎᐋᔭᒥᐋᐗ ᓵᕐᑎᓯᒃ ᒪᓯᓇᐊᒪᐤ:
ᐅᐅ ᑫᒀᓇ ᐃᑗᐤ ᐊᓇ ᑳ ᐋᔮᐎᒫᑦ ᑭᒋᒪᓂᑐ ᓂᔂᔅ ᐅᑦ ᐊᒑᑯᒪ, ᓀᔥᑕ ᐊᓂᐃ ᓂᔂᔅ ᐊᒐᑾ: ᓂ ᑭᔅᑫᓕᑌᓐ ᑭᑦ ᐊᑑᔅᑫᐎᓇ, ᐁ ᐋᔮᔭᓐ ᐃᔑᓂᑳᓱᐎᓐ ᐁ ᐱᒫᑎᓯᔭᓐ, ᒫᑲ ᐁ ᓂᐱᔭᓐ᙮ 2ᐊᔕᐙᐱ, ᐋᔨᒋᑕ ᒫᑲ ᐊᓂᐃ ᑫᒀᓇ ᑳ ᐃᔥᑯᐸᓕᑭ, ᐋᔕᔾ ᑫᑳᑦ ᑳ ᓂᐱᒪᑲᑭ: ᐌᓴ ᓇᒪᐎᓚ ᓂ ᑮ ᒥᔅᑫᓐ ᑭᑦ ᐊᑑᔅᑫᐎᓇ ᒥᑐᓂ ᐁ ᒀᔭᔅᑾᑭ ᐅᑎᔥᑲᐤ ᑭᒋᒪᓂᑐ᙮ 3ᑭᔅᑭᓯ ᒫᑲ ᑳ ᑭ ᐃᔑ ᐅᑎᓇᒪᓐ ᓀᔥᑕ ᐯᑕᒪᓐ, ᒪᔥᑲᐎ ᒥᒋᒥᓇ ᒫᑲ ᓀᔥᑕ ᒥᒋᓚᐌᔦᓕᑕ᙮ ᑭᔥᐱᓐ ᒫᑲ ᐁᑳ ᐊᔕᐙᐱᔭᓀ, ᑭ ᑳ ᐯᒋ ᓈᑎᑎᓐ ᑖᐱᔅᑯᒡ ᑭᒧᑎᔉ, ᓇᒪᐎᓚ ᒫᑲ ᑭ ᑳ ᑭᔅᑫᓕᑌᓐ ᑫᑯ ᑎᐹᔨᑲᓂᒃ ᐃᔅᐱ ᑫ ᐯᒋ ᓈᑎᑖᓐ᙮ 4ᑭᑦ ᐋᔮᓐ ᐋᑎᑦ ᐃᔑᓂᑳᓱᐎᓇ ᐊᐳᒋᑲ ᓵᕐᑎᓯᒃ, ᐁᑳ ᑳ ᑭ ᐎᓕᐱᑖᒋᒃ ᐅ ᐎᓛᒋᑲᓂᐙᐗ: ᓂ ᑳ ᐎᒋᐱᒧᑌᒥᑾᒃ ᒫᑲ ᐁ ᐙᐱᐅᒋᒃ; ᐌᓴ ᑌᐸᑫᓕᑖᑯᓯᐗᒃ᙮ 5ᐊᓇ ᑳ ᔖᑯᒋᐃᐌᑦ, ᐁᐗᒀᓇ ᑫ ᐙᐱᐅᑦ: ᓇᒪᐎᓚ ᒫᑲ ᓂ ᑳ ᑳᓯᐊᒸᓐ ᐅᑦ ᐃᔑᓂᑳᓱᐎᓐ ᐱᒫᑎᓯᐎᓂ ᒪᓯᓇᐃᑲᓂᒃ ᐅᒋ, ᒫᑲ ᓂ ᑳ ᐎᑕᒸᓐ ᐅᑦ ᐃᔑᓂᑳᓱᐎᓐ ᐅᑎᔥᑲᐤ ᓄᑖᐎ, ᓀᔥᑕ ᐅᑎᔥᑲᐤ ᐅᑦ ᐁᓐᒐᓕᒪ᙮
6ᐊᓇ ᑳ ᐅᑖᐗᑳᑦ, ᐁᑯᔑ ᑲᑕ ᐯᑕᒻ ᐊᒑᒃ ᑳ ᐃᑖᑦ ᒫᒪᐎᐋᔭᒥᐋᐗ᙮
ᐊᓂᑭ ᑖᐺᑕᒧᐗᒃ ᐱᓚᑌᓪᐱᔭᐃᒃ ᒥᓛᑲᓂᐎᐗᒃ ᑎᐹᒋᒧᐎᓂᓕᐤ
7ᐊᓇ ᐁᓐᒐᓪ ᓀᔥᑕ ᑳ ᑎᐯᓕᒫᑦ ᒫᒪᐎᐋᔭᒥᐋᐗ ᐱᓚᑌᓪᐱᔭᐃᒃ ᒪᓯᓇᐊᒪᐤ:
ᐅᐅ ᑫᒀᓇ ᐃᑗᐤ ᐊᓇ ᑳ ᐸᓓᑭᓯᑦ, ᐊᓇ ᑳ ᑖᐺᐎᑦ, ᐊᓇ ᑳ ᐊᔮᐙᑦ ᑌᐱᑕ ᐅ ᐎᑯᑕᐃᑲᓂᓕᐤ, ᐊᓇ ᑳ ᐹᔅᑭᑌᓇᒃ, ᐁᑳ ᒫᑲ ᐊᐌᓇ ᐃᓕᓕᐤ ᑳ ᑭᐸᐊᒃ; ᓀᔥᑕ ᑳ ᑭᐸᐊᒃ, ᐁᑳ ᒫᑲ ᐊᐌᓇ ᐃᓕᓕᐤ ᑳ ᐹᔅᑭᑌᓇᒃ: 8ᓂ ᑭᔅᑫᓕᑌᓐ ᑭᑦ ᐊᑑᔅᑫᐎᓇ: ᒫᑎᑲ, ᑭ ᑮ ᓂᑳᓃᔅᑕᒫᑎᓐ ᐁ ᐋᐸᐋᔅᑌᒃ ᐃᔥᒀᑌᒻ, ᓇᒪᐎᓚ ᐊᐌᓇ ᐃᓕᓕᐤ ᑲᑕ ᑮ ᑭᐸᐊᒻ: ᐌᓴ ᐋᐱᔒᔥ ᑭᑦ ᐋᔮᓐ ᒪᔥᑲᐎᓯᐎᓐ, ᓀᔥᑕ ᑭ ᑮ ᑲᓇᐌᓕᑌᓐ ᓂᑦ ᐋᔭᒥᐎᓐ, ᓇᒪ ᒫᑲ ᑭ ᑮ ᐋᓉᑌᓐ ᓂᑦ ᐃᔑᓂᑳᓱᐎᓐ᙮ 9ᒫᑎᑲ, ᓂ ᑳ ᐃᔑᐋᐗᒃ ᑭᒋ ᐅᑖᔭᒥᐁᐎᑲᒥᒥᑯᒋᒃ ᓭᑕᓇ, ᓂ ᒎᐎᓈᓐ ᑳ ᐃᑗᒋᒃ, ᒫᑲ ᐁᑳ ᐁᐗᑯ ᑳ ᑐᐎᑳᓂᐎᒋᒃ, ᒫᑲ ᑳ ᑭᓛᔅᑭᒋᒃ; ᒫᑎᑲ, ᓂ ᑳ ᑐᑕᐙᐗᒃ ᑭᒋ ᐯᒋ ᓇᐗᑮᔅᑖᑫᒋᒃ ᑭᓯᑎᒃ, ᓀᔥᑕ ᑭᒋ ᑭᔅᑫᓕᑕᑭᒃ ᐁ ᑮ ᓵᑭᐃᑖᓐ᙮ 10ᐁ ᑮ ᑲᓇᐌᓕᑕᒪᓐ ᓂ ᔑᐱᓚᐌᓯᐎᓂ ᐋᔭᒥᐎᓐ, ᓂᓚ ᓀᔥᑕ ᑭ ᑳ ᑲᓇᐌᓕᒥᑎᓐ ᐃᔅᐱ ᐅᑎᒋᐸᓕᑫ ᑭᒋ ᑲᑴᒋᐃᐌᐎᓂᐗᒃ, ᑫ ᐯᒋ ᐱᒥᐸᓕᒃ ᒥᓯᐌ ᐊᔅᑮᒃ, ᑭᒋ ᑲᑴᒋᐃᑯᒋᒃ ᐊᓂᑭ ᐊᔅᑮᒃ ᑳ ᑕᔑᑫᒋᒃ᙮ 11ᒫᑎᑲ, ᐎᐸᒡ ᓂ ᑕᑯᔑᓂᓐ: ᐊᓂᒪ ᑳ ᐋᔮᔭᓐ ᒪᔥᑲᐎ ᒥᒋᒥᓇ, ᐁᑳ ᐊᐌᓇ ᐃᓕᓕᐤ ᑭᒋ ᐅᑌᓇᒃ ᑭᑦ ᐅᑭᒪᐗᔅᑐᑎᓂᓕᐤ᙮ 12ᐊᓇ ᑳ ᔖᑯᒋᐃᐌᑦ, ᓯᑣᔅᑯᐃᑲᓐ ᓂ ᑳ ᐃᔑᐊᐤ ᐁ ᑭᒋᐋᔭᒥᐁᐎᑲᒥᑯᒃ ᓂ ᑭᒋᒪᓂᑐᒻ, ᓇᒪᐎᔅᑳᑦ ᒥᓇ ᒫᑲ ᑲᑕ ᐗᓚᐎᐤ: ᓂ ᑳ ᒪᓯᓇᐗᐤ ᒫᑲ ᐅᑦ ᐃᔑᓂᑳᓱᐎᓐ ᓂ ᑭᒋᒪᓂᑐᒻ, ᓀᔥᑕ ᐁ ᐃᔑᓂᑳᑌᓕᒃ ᐅᑦ ᐃᑖᐎᓐ ᓂ ᑭᒋᒪᓂᑐᒻ, ᐁᐗᑯ ᐅᔥᑭ ᒋᕉᓴᓚᒻ ᑭᒋᑭᔑᑯᒃ ᑳ ᐅᒋ ᓛᔑᐸᓕᑖᑦ ᓂ ᑭᒋᒪᓂᑐᒻ: ᓂ ᑳ ᒪᓯᓇᐗᐤ ᒫᑲ ᓂᑦ ᐅᔥᑭ ᐃᔑᓂᑳᓱᐎᓐ᙮
13ᐊᓇ ᑳ ᐅᑖᐗᑳᑦ ᐁᑯᔑ ᑲᑕ ᐯᑕᒻ ᐊᒑᒃ ᑳ ᐃᑖᑦ ᒫᒪᐎᐋᔭᒥᐊᐗ᙮
ᐊᓂᑭ ᑖᐺᑕᒧᐗᒃ ᓓᐅᑎᓯᔭᐃᒃ ᒥᓛᑲᓂᐌᐗᒃ ᑎᐹᒋᒧᐎᓂᓕᐤ
14ᐊᓇ ᐁᓐᒐᓪ ᓀᔥᑕ ᑳ ᑎᐯᓕᒫᑦ ᒫᒪᐎᐋᔭᒥᐊᐗ ᓓᐅᑕᓯᔭᐃᒃ ᒪᓯᓇᐊᒪᐤ:
ᐅᐅ ᑫᒀᓇ ᐃᑗᐤ ᐊᓇ ᐁᒣᓐ, ᐊᓇ ᑳ ᒀᔭᔅᑭᑎᑦ ᓀᔥᑕ ᑳ ᑖᐺᐎᑦ ᐅᑎᐹᒋᒧ, ᐊᓇ ᒫᐗᒋ ᓃᔥᑕᒻ ᑳ ᑮ ᐃᑖᑦ ᐁ ᑮ ᒫᒋ ᐅᔑᒋᑫᑦ ᑭᒋᒪᓂᑐ; 15ᓂ ᑭᔅᑫᓕᑌᓐ ᑭᑦ ᐊᑑᔅᑫᐎᓇ, ᐁᑳ ᐁ ᑕᑭᓯᔭᓐ ᐁᑳ ᓀᔥᑕ ᐁ ᑭᓯᓱᔭᓐ; ᓇᑕᒫᑕ ᑕᑭᓯᔭᓐ ᓀᔥᑕᐱᑯ ᑭᓯᓱᔭᓐ᙮ 16ᐁᑯᔑ ᒫᑲ ᐁ ᑭᔓᔭᒥᓯᔭᓐ, ᐁᑳ ᒫᑲ ᐁ ᑕᑭᓯᔭᓐ ᐁᑳ ᓀᔥᑕ ᐁ ᑭᓯᓱᔭᓐ, ᑭ ᑳ ᐹᑯᒧᑐᑖᑎᓐ ᓂᑐᓂᒃ ᐅᒋ᙮ 17ᐌᓴ ᑭᑦ ᐃᑣᓐ, ᓂ ᒥᔕᑭᓰᓐ, ᓀᔥᑕ ᓂ ᐌᓗᑎᓰᓐ, ᓇᒪ ᓀᔥᑕ ᑫᒀᓐ ᓂ ᒪᓀᓯᓐ; ᓇᒪ ᒫᑲ ᑭ ᑭᔅᑫᓕᑌᓐ ᐁ ᑲᒀᑕᑭᓯᔭᓐ, ᓀᔥᑕ ᐁ ᑭᑎᒫᑭᓈᑯᓯᔭᓐ, ᓀᔥᑕ ᐁ ᑭᑎᒫᑭᓯᔭᓐ, ᓀᔥᑕ ᐁᑳ ᐁ ᐙᐱᔭᓐ, ᓀᔥᑕ ᐁ ᒧᔑᔥᑲᑌᔭᓐ: 18ᑭ ᔑᑭᒥᑎᓐ ᑭᒋ ᐊᑖᒥᔭᓐ ᐅᓵᐎᔔᓕᐊᓈᐱᔉ ᐃᔥᑯᑌᒃ ᑳ ᑲᑴᒋᑖᓂᐗᒃ, ᑭᒋ ᒥᔕᑭᓯᔭᓐ; ᓀᔥᑕ ᑳ ᐙᐹᑭ ᐎᓛᒋᑲᓇ, ᐁᑳ ᑭᒋ ᓄᑾᒃ ᑭ ᓇᓀᐯᐎᓯᐎᓐ ᐁ ᒧᔐᔥᑲᑌᔭᓐ; ᓀᔥᑕ ᑭᒋ ᑐᒥᓇᒪᓐ ᑭᔅᑭᔑᑾ ᒥᔅᑭᔑᑯᑐᒥᓂᑲᓐ ᐅᒋ, ᑭᒋ ᑮ ᐙᐱᔭᓐ᙮ 19ᒥᓯᐌ ᑕᑐ ᑳ ᓵᑭᐊᑭᒃ, ᓂ ᑭᑕᐊᒪᐙᐗᒃ ᓀᔥᑕ ᓂ ᐸᐸᓴᔅᑕᐙᐗᒃ: ᒪᔥᑲᐌᓕᑕ ᒫᑲ ᓀᔥᑕ ᒥᒋᓚᐌᔦᓕᑕ᙮ 20ᒫᑎᑲ, ᓂ ᓂᐸᐎᓐ ᐃᔥᒀᑌᒥᒃ ᓂ ᐹᐸᐙᐃᑳᓐ ᒫᑲ: ᑮᔥᐱᓐ ᐊᐌᓇ ᐃᓕᓕᐤ ᐯᑕᑫ ᓂ ᐯᑖᑯᓯᐎᓐ, ᐹᔅᑭᑎᓇᑫ ᒫᑲ, ᓂ ᑳ ᐱᑐᑲᐗᐤ, ᓂ ᑳ ᐎᒋᒥᒋᓱᒪᐤ ᒫᑲ, ᐎᓚ ᓀᔥᑕ ᓂ ᑳ ᐎᒋᒥᒋᓱᒥᒃ᙮ 21ᐊᓇ ᑳ ᔖᑯᒋᐃᐌᑦ ᓂ ᑳ ᒥᓚᐤ ᑭᒋ ᐎᑕᐱᒥᑦ ᓂᑦ ᐅᑭᒪᐗᐱᐎᓂᒃ, ᑖᐱᔅᑯᒡ ᓂᓚ ᓀᔥᑕ ᐁ ᑮ ᔖᑯᒋᐃᐌᔮᓐ, ᓀᔥᑕ ᐁ ᐎᑕᐱᒪᒃ ᓄᑖᐎ ᐅᑦ ᐅᑭᒪᐗᐱᐎᓂᒃ᙮
22ᐊᓇ ᑳ ᐅᑖᐗᑳᑦ, ᐁᑯᔑ ᑲᑕ ᐯᑕᒻ ᐊᒑᒃ ᑳ ᐃᑖᑦ ᒫᒪᐎᐋᔭᒥᐊᐗ᙮
Currently Selected:
ᑭᔅᑫᓕᑖᑯᑖᑫᐎᓐ 3: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
