ᐅᐸᓓᑭᔅ ᒫᕐᒃ 2
2
ᒋᓴᔅ ᒥᓇᐙᒋᐁᐤ ᑳ ᓇᓇᒫᔅᐱᓀᓕᒋ ᓈᐯᐗ
(ᒫᑎᐤ 9:1–8; ᓘᒃ 5:17–26)
1ᐋᑎᑦ ᑭᔑᑳᐗ ᒫᑲ ᑳ ᒫᔭᐎᐸᓕᓕᑭ ᒥᓇ ᑮ ᐱᑐᑫᐤ ᑲᐸᕐᓀᔭᒥᒃ; ᑮ ᐹᐯᑖᑾᓐ ᒫᑲ ᐱᒋ ᐙᔅᑳᔨᑲᓂᒃ ᐁ ᐃᑖᑦ᙮ 2ᑣᔦᒃ ᒫᑲ ᒥᒉᑦ ᑮ ᒫᒪᐎ ᒫᐗᒋᐃᑐᐗᒃ, ᐱᓕᔥ ᐃᓕᑯᒃ ᐁᑳ ᐁ ᑌᐸᔅᑭᓀᒋᒃ; ᓇᒪᐎᓚ, ᓇᒪ ᐊᐴᒋᑲ ᐙᔅᑲ ᐃᔥᒀᑌᒥᒃ: ᑮ ᐙᐎᑕᒪᐌᐤ ᒫᑲ ᐋᔭᒥᐎᓂᓕᐤ᙮ 3ᑮ ᐯᒋ ᓈᑌᐗᒃ ᒫᑲ, ᐁ ᐯᔑᐙᒋᒃ ᐊᐌᓂᐗ ᐁ ᓇᓇᒫᔅᐱᓀᓕᒋ, ᓀᐤ ᐁ ᐱᒥᐎᓛᒋᒃ᙮ 4ᐃᔅᐱ ᒫᑲ ᐁᑳ ᐯᔓᒡ ᐁ ᑮ ᓈᑖᒋᒃ, ᐁ ᐃᔅᐱᒋ ᓯᑎᔅᑳᑐᓈᓂᐗᒃ, ᑮ ᐹᔅᑭᐱᑕᒶᒃ ᐊᑾᓇᐃᑲᓂᓕᐤ ᐃᑕ ᐁ ᐃᑖᓕᒋ: ᐃᔅᐱ ᒫᑲ ᑳ ᑮ ᑕᐎᓇᑭᒃ, ᑮ ᓛᔑᓇᒶᐤ ᓂᐯᐎᓂᓕᐤ ᐃᑕ ᐅᓇᓇᒫᔅᐱᓀᐗ ᐁ ᐱᒥᔑᓂᓕᒋ᙮ 5ᐃᔅᐱ ᒋᓴᔅ ᐎᐋᐸᑕᒸᑦ ᐅ ᑖᐺᔨᓕᑕᒧᐎᓂᓕᐤ, ᑮ ᐃᑌᐤ ᐅᓇᓇᒫᔅᐱᓀᐗ, ᓂᑯᓯᔅ, ᑭ ᒪᒋᑐᑕᒧᐎᓇ ᑭ ᐌᐯᓕᑕᒫᑲᐎᓐ᙮
6ᒫᑲ ᐁᑯᑕ ᐁᐱᒋᒃ ᐋᑎᑦ ᐅᒪᓯᓇᐃᑫᐗᒃ, ᐁ ᒫᒥᑐᓀᓕᑕᑭᒃ ᓀᔥᑕ ᐅᑌᐃᐙᒃ, 7ᑖᓀᑭ ᐌᒋ ᐊᐗ ᐃᓕᓕᐤ ᐅᒪ ᐃᔑ ᐹᐹᔅᑖᒧᑦ? ᐊᐌᓇ ᑫ ᑮ ᐌᐯᓕᑕᒫᑫᑦ ᒪᒋᑐᑕᒧᐎᓇ ᑭᒋᒪᓂᑐ ᐱᑯ?
8ᑣᔦᒃ ᒫᑲ, ᐃᔅᐱ ᒋᓴᔅ ᑫᔅᑫᓕᑕᒃ ᐅᑦ ᐊᒑᑯᒃ ᐅᒪ ᐁ ᐃᔑ ᒫᒥᑐᓀᓕᑕᒥᓕᒋ, ᑮ ᐃᑌᐤ, ᑖᓀᑭ ᐌᒋ ᐅᐅ ᑫᒀᓇ ᒫᒥᑐᓀᓕᑕᒣᒃ ᑭᑌᐃᐙᒃ? 9ᑖᓂᒪ ᐊᐙᓯᑌ ᐎᐁᑕᒃ ᑭᒋ ᐃᑖᑲᓂᐎᑦ ᐅᓇᓇᒫᔅᐱᓀᐤ, ᑭ ᒪᒋᑐᑕᒧᐎᓇ ᑭ ᐌᐯᓕᑕᒫᑲᐎᓐ; ᓀᔥᑕᐱᑯ ᑭᒋ ᐃᑖᑲᓂᐎᑦ, ᐗᓂᔥᑲ, ᐅᑎᓇ ᓀᔥᑕ ᑭ ᓂᐯᐎᓐ, ᐱᒧᑌ ᒫᑲ᙮ 10ᒫᑲ ᑭᒋ ᑭᔅᑫᓕᑕᒣᒃ ᐃᓕᓕᐎᑯᓯᓵᓐ ᐁ ᐋᔮᑦ ᑲᔥᑭᐅᐎᓂᓕᐤ ᐅᑕ ᐊᔅᑮᒃ ᑭᒋ ᐌᐯᓕᑕᒫᑫᑦ ᒪᒋᑐᑕᒧᐎᓇ, ᐃᑌᐤ ᐅᓇᓇᒫᔅᐱᓀᐗ, 11ᑭᑦ ᐃᑎᓐ, ᐗᓂᔥᑳ, ᐅᑎᓇ ᒫᑲ ᑭ ᓂᐯᐎᓐ, ᐃᑐᑌ ᒫᑲ ᑭ ᐙᔅᑳᔨᑲᓂᒥᒃ᙮
12ᑣᔦᒃ ᒫᑲ ᑮ ᐗᓂᔥᑲᐤ, ᓀᔥᑕ ᐁ ᐅᑎᓇᒃ ᐅ ᓂᐯᐎᓐ, ᑮ ᐗᓚᐎᐤ, ᐁ ᐙᐸᒥᑯᑦ ᒥᓯᐌ; ᑳ ᐅᒋ ᒪᒪᔅᑳᑕᒥᓕᒋ ᒥᓯᐌ ᐁ ᐃᑕᓯᓕᒋ, ᑮ ᑭᔅᑖᒋᒣᐗᒃ ᒫᑲ ᑭᒋᒪᓂᑐᐗ, ᐁ ᐃᑗᑦ, ᓇᒪᐎᔅᑳᑦ ᐅᒪ ᓂ ᑮ ᐃᔑ ᐙᐸᑌᓐ᙮
ᒋᓴᔅ ᓇᑐᒣᐤ ᓕᐹᐃᐊ ᑭᒋ ᓄᔅᐱᓇᑎᑯᑦ
(ᒫᑎᐤ 9:9–13; ᓘᒃ 5:27–32)
13ᒥᓇ ᒫᑲ ᑮ ᐃᑐᑌᐤ ᔑᔓᒡ ᑭᒋᑲᒥᒃ; ᑮ ᐯᒋ ᓈᑎᑯ ᒫᑲ ᒥᓯᐌ ᒥᔮᒪᐎᒥᒉᑎᓕᒋ ᐃᓕᓕᐗ, ᑮ ᑭᔅᑭᓄᐊᒪᐌᐤ ᒫᑲ᙮ 14ᐁ ᐊᑎ ᐱᒧᑌᑦ ᒫᑲ, ᑮ ᐙᐸᒣᐤ ᓖᐹᐃᐊ ᐋᓪᐱᔭᔅ ᐅᑯᓯᓯᓕᐗ ᐁ ᐊᐱᓕᒋ ᐃᑕ ᐁ ᐅᑎᓂᒥᒋ ᑎᐯᓕᒋᑫᐎ ᔔᓕᐋᓇ, ᑮ ᐃᑌᐤ ᒫᑲ, ᓄᔅᐱᓇᔑᓐ᙮ ᑮ ᐸᓯᑯ ᒫᑲ, ᓀᔥᑕ ᑮ ᓄᔅᐱᓇᑌᐤ᙮
15ᑮ ᐃᑭᓐ ᒫᑲ, ᒣᒀᒡ ᒋᓴᔅ ᐁ ᐊᐱᑦ ᐁ ᒥᒋᓱᑦ ᐅ ᐙᔅᑳᔨᑲᓂᒥᓕᒃ, ᒥᒉᑦ ᐸᑉᓕᑳᓇ ᓀᔥᑕ ᐅᒪᒋᑡᐗ ᑮ ᐎᑕᐱᒥᑯ ᒋᓴᔅ ᓀᔥᑕ ᐅ ᑭᔅᑭᓄᐊᒪᐙᑲᓇ: ᐌᓴ ᑮ ᒥᒉᑎᐗᒃ, ᓀᔥᑕ ᑮ ᓄᔅᐱᓇᑌᐗᒃ᙮ 16ᐃᔅᐱ ᒫᑲ ᐅᒪᓯᓇᐃᑫᐗᒃ ᓀᔥᑕ ᐹᕋᓯᔭᒃ ᐎᐋᐸᑕᑭᒃ ᐁ ᐎᒋᒥᒋᓱᒫᓕᒋ ᐸᑉᓕᑳᓇ ᓀᔥᑕ ᐅᒪᒋᑣᐗ, ᑮ ᐃᑎᒣᐎᒃ ᐅ ᑭᔅᑭᓄᐊᒪᐙᑲᓇ, ᑖᓀᑭ ᐌᒋ ᐎᒋᒥᒋᓱᒫᑦ ᓀᔥᑕ ᐎᒋᒥᓂᑴᒫᑦ ᐸᑉᓕᑳᓇ ᓀᔥᑕ ᐅᒪᒋᑡᐗ?
17ᐃᔅᐱ ᒋᓴᔅ ᐱᐁᑕᒃ, ᐃᑌᐤ, ᐊᓂᑭ ᑳ ᒥᓗᐋᔮᒋᒃ ᓇᒪᐎᓚ ᓇᑕᐌᓕᒣᐗᒃ ᓇᑕᑯᓚᓇ, ᒫᑲ ᐊᓂᑭ ᑳ ᐋᑯᓯᒋᒃ: ᓇᒪᐎᓚ ᓂ ᑮ ᐯᒋ ᐃᑐᑖᓐ ᑭᒋ ᓇᑐᒪᑭᒃ ᐅᒀᔭᔅᑭᑖᑎᓯᐗᒃ, ᒫᑲ ᐅᒪᒋᑣᐗᒃ ᑭᒋ ᑴᔅᑳᑎᓯᒋᒃ᙮
ᒋᓴᔅ ᑲᑴᒋᑫᒪᑲᓂᐎᐤ ᓂᑳᓱᐎᓐ ᐅᒋ
(ᒫᑎᐤ 9:14–17; ᓘᒃ 5:33–39)
18ᐅ ᑭᔅᑭᓄᐊᒪᐙᑲᓂᐙᐗ ᒫᑲ ᒐᓐ ᓀᔥᑕ ᐹᕋᓯᔭᒃ ᑮ ᓂᑲᓱᓕᐗ: ᐁ ᐯᒋ ᐃᑐᑌᒋᒃ ᒫᑲ ᐃᑌᐗᒃ, ᑖᓀᑭ ᐌᒋ ᐅ ᑭᔅᑭᓄᐊᒪᐙᑲᓂᐙᐗ ᒑᓐ ᓀᔥᑕ ᐹᕋᓯᔭᒃ ᓂᑲᓱᓕᒋ, ᒫᑲ ᑭ ᑭᔅᑭᓄᐊᒪᐙᑲᓇᒃ ᓇᒪᐎᓚ ᓂᑲᓯᐗᒃ?
19ᒋᓴᔅ ᒫᑲ ᑮ ᐃᑌᐤ, ᑲᑕ ᑮ ᓂᑲᓱᓕᐗ ᓈ ᐅᔥᑭᓈᐯᐙᓐ ᐅᑐᑌᒪ ᒣᒀᒡ ᐅᔥᑭᓈᐯᐙᓐ ᐁ ᐎᒉᐙᑦ? ᐃᓕᑯᒃ ᐅᔥᑭᓈᐯᐙᓐ ᐁ ᐎᒉᐙᑦ ᓇᒪᐎᓚ ᑲᑕ ᑮ ᓂᑲᓱᓕᐗ᙮ 20ᒫᑲ ᑭᔑᑳᐗ ᑲᑕ ᐅᑎᒋᐸᓕᐗ ᐃᔅᐱ ᐅᔥᑭᓈᐯᐗᓇ ᑫ ᒪᔅᑲᒫᑲᓂᐎᒋᒃ, ᒣᒀᒡ ᐊᓂᐃ ᑭᔑᑳᐗ ᒫᑲ ᑲᑕ ᓂᑲᓱᐗᒃ᙮
21ᓇᒪᐎᓚ ᐊᐌᓇ ᓀᔥᑕ ᐊᑯᔅᑕᐊᒻ ᐅᔥᑭ ᒪᓂᑐᐌᑭᓂᓕᐤ ᑳᔮᔑ ᐎᓛᒋᑲᓂᒃ; ᑭᔅᑎᓈᒡ ᐊᓂᒪ ᐅᔥᑭ ᒪᓂᑐᐌᑭᓐ ᑳ ᒥᔕᐃᑳᑳᓂᐗᒃ ᑖᑐᐱᑕᒧᒪᑲᓐ ᑳᔮᔑ ᐎᓛᒋᑲᓐ, ᐁᑯ ᒫᑲ ᐊᓐᑕ ᐁ ᑖᑐᐸᓕᒃ ᐊᐙᓯᑌ ᒣᔖᒃ᙮ 22ᓇᒪ ᓀᔥᑕ ᐊᐌᓇ ᐱᑕᐊᒻ ᐅᔥᑭ ᔓᒥᓈᐳᓕᐤ ᑳᔮᔑ ᐎᒀᒃ; ᑭᔅᑎᓈᒡ ᐅᔥᑭ ᔓᒥᓈᐳ ᓂᔑᐗᓈᒋᑖᒪᑲᓐ ᐎᒀᔭ, ᐁᑯ ᒫᑲ ᓯᐃᑭᐸᓕᒃ ᔓᒥᓈᐳ: ᒫᑲ ᐅᔥᑭ ᔓᒥᓈᐳ ᑲᑕ ᐱᑕᐃᑲᑌᐤ ᐅᔥᑭ ᐎᒀᒃ᙮
ᒋᓴᔅ ᑲᑴᒋᑫᒪᑲᓂᐎᐤ ᐋᓜᐱᐎ ᑭᔑᑳᐤ ᑫ ᐃᔑ ᐋᐸᑕᑭᐸᓐ
(ᒫᑎᐤ 12:1–8; ᓘᒃ 6:1–5)
23ᑮ ᐃᑭᓐ ᒫᑲ ᐁ ᑮ ᔕᐳᔥᑲᒃ ᒪᑖᒥᓇ ᓂᑖᐎᑭᒋᑲᓇ ᐁ ᐋᔭᒥᐁᑭᔑᑳᓕᒃ; ᐅ ᑭᔅᑭᓄᐊᒪᐙᑲᓇ ᒫᑲ ᐁ ᐊᑎ ᐱᒧᑌᓕᒋ ᑮ ᒪᒪᓂᐱᑌᓕᐗ ᐁ ᐱᔅᑾᑕᔅᑭᓕᒃ ᒪᑖᒥᓇ᙮ 24ᐹᕋᓯᔭᒃ ᒫᑲ ᑮ ᐃᑌᐗᒃ, ᒫᑎᑲ, ᑖᓀᑭ ᐌᒋ ᑐᑕᑭᒃ ᐁ ᐋᔭᒥᐁᑭᔑᑳᓕᒃ ᐊᓂᐁᓕᐤ ᐁᑳ ᑳ ᐅᓚᔓᐌᓕᑖᑾᓂᓕᒃ?
25ᑮ ᐃᑌᐤ ᒫᑲ, ᓇᒪ ᓈ ᐎᔅᑳᑦ ᑭ ᐅᒋ ᐋᔭᒥᑖᓇᐗᐤ ᑳ ᑮ ᑐᑕᒃ ᑌᐱᑦ ᐃᔅᐱ ᐌᐙᓂᓯᑦ ᓀᔥᑕ ᐙ ᒥᒋᓯᑦ; ᐎᓚ ᓀᔥᑕ ᐊᓂᐃ ᑳ ᐎᒉᐎᑯᑦ? 26ᐁ ᑮ ᐱᑐᑫᐙᑦ ᑭᒋᒪᓂᑐᐗ ᐅ ᐙᔅᑳᔨᑲᓂᒥᓕᒃ ᒣᒀᒡ ᐁ ᐅ ᑭᔑᑳᒥᑦ ᑭᒋ ᓵᓵᑭᐎᓕᐌᐎᓕᓕᐤ ᐁᐹᔭᑕᕐ, ᐁ ᑮ ᒧᐙᑦ ᒫᑲ ᐅᓚᔅᑣᑯᐎ ᐊᓚᑯᓇᐗ, ᐁᑳ ᐊᐌᓇ ᑫ ᒧᐙᔅᐸᓐ ᐱᑯ ᓵᓵᑭᐎᓕᐌᐎᓕᓕᐗᒃ, ᐁ ᑮ ᒥᓛᑦ ᓀᔥᑕ ᐊᓂᐃ ᑳ ᐎᒉᐎᑯᑦ?
27ᑮ ᐃᑌᐤ ᒫᑲ, ᐊᔭᒥᐁᑭᔑᑲᐤ ᑮ ᐅᔑᑖᓂᐗᓐ ᐃᓕᓕᐤ ᐅᒋ, ᓇᒪᐎᓚ ᒫᑲ ᐃᓕᓕᐤ ᐋᔭᒥᐁᑭᔑᑲᐤ ᐅᒋ: 28ᐁᐗᑯ ᐅᒋ ᐃᓕᓕᐎᑯᓯᓵᓐ ᑎᐯᓕᑕᒻ ᓀᔥᑕ ᐁ ᐋᔭᒥᐁᑭᔑᑳᓕᒃ᙮
Currently Selected:
ᐅᐸᓓᑭᔅ ᒫᕐᒃ 2: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
