ᐅᐸᓓᑭᔅ ᒫᑎᐤ 9
9
ᒋᓴᔅ ᒥᓇᐙᒋᐁᐤ ᐃᓕᓕᐗ ᑳ ᓇᓇᒫᔅᐱᓀᓕᒋ
(ᒫᕐᒃ 2:1–12; ᓘᒃ 5:17–26)
1ᑮ ᐳᓯᐤ ᒫᑲ ᓈᐱᒀᓂᒃ, ᑮ ᐊᔓᐗᐊᒻ ᓀᔥᑕ, ᑮ ᐅᑎᑕᒻ ᒫᑲ ᑎᐱᓚᐌ ᐅᑦ ᐃᑖᐎᓐ᙮ 2ᒫᑎᑲ, ᒫᑲ, ᑮ ᐯᑐᐌᐗᒃ ᐃᓕᓕᐗ ᐁ ᓇᓇᒫᔅᐱᓀᓕᒋ, ᐁ ᐱᒥᔑᓂᓕᒋ ᓂᐯᐎᓂᒃ: ᒋᓴᔅ ᒫᑲ ᐁ ᐙᐸᑕᒸᑦ ᐅ ᑖᐺᔦᓕᑐᒧᐎᓂᓕᐤ, ᑮ ᐃᑌᐤ ᐅᓇᓇᒫᔅᐱᓀᐗ; ᓂᑯᓯᔅ, ᒥᓜᓕᑕ ᐃᓴ; ᑭ ᒪᒋᑐᑕᒧᐎᓇ ᑭ ᐌᐯᓕᑕᒫᑲᐎᓐ᙮
3ᒫᑎᑲ, ᒫᑲ, ᐋᑎᑦ ᐅᒪᓯᓇᐃᑫᐗᒃ ᑮ ᐃᑎᑎᓱᐗᒃ, ᐊᐗ ᐃᓕᓕᐤ ᐸᐹᔅᑖᒧ᙮
4ᒋᓴᔅ ᒫᑲ ᐁ ᑭᔅᑫᓕᑕᒸᑦ ᐅ ᒥᑐᓀᓕᒋᑫᐎᓂᓕᐗ ᑮ ᐃᑗᐤ, ᑖᓀᑭ ᐌᒋ ᒪᒋ ᒫᒥᑐᓀᓕᑕᒣᒃ ᑭᑌᐃᐗᒃ? 5ᐌᓴ ᑖᓂᒪ ᓇᐗᒡ ᐎᔦᑕᒃ ᑭᒋ ᐃᑣᓂᐗᒃ, ᑭ ᒪᒋᑐᑕᒧᐎᓇ ᑭ ᐌᐯᓕᑕᒫᑲᐎᓐ; ᓀᔥᑕᐱᑯ ᑭᒋ ᐃᑣᓂᐗᒃ, ᐸᓯᑯ, ᐱᒧᑌ ᒫᑲ? 6ᒫᑲ ᑭᒋ ᑭᔅᑫᓕᑕᒣᒃ ᐃᓕᓕᐎᑯᓯᓵᓐ ᐁ ᐋᔮᑦ ᑲᔥᑭᐅᐎᓂᓕᐤ ᐅᑕ ᐊᔅᑮᒃ ᑭᒋ ᐌᐯᓕᑕᒫᑫᑦ ᒪᒋᑐᑕᒧᐎᓐ, ᐁᑯ ᐁᑖᑦ ᐅᓇᓇᒫᔅᐱᓀᐗ, ᐗᓂᔥᑳ, ᐅᑎᓇ ᑭ ᓂᐯᐎᓐ ᐃᑐᑌᐤ ᒫᑲ ᑭ ᐙᔅᑳᔨᑲᓂᒥᒃ᙮
7ᐁᑯ ᒫᑲ ᐌᓂᔥᑳᑦ, ᑮ ᐃᑐᑌᐤ ᒫᑲ ᐅ ᐙᔅᑳᔨᑲᓂᒥᒃ᙮ 8ᒫᑲ ᐃᔅᐱ ᑳ ᒫᒪᐎᒥᒉᑎᒋᒃ ᐃᓕᓕᐗᒃ ᐎᐋᐸᑕᑭᒃ, ᑮ ᒫᒪᔅᑳᑕᒶᒃ, ᓀᔥᑕ ᑮ ᒫᒥᒋᒣᐗᒃ ᑭᒋᒪᓂᑐᐗ, ᑳ ᑮ ᒥᓛᓕᒋ ᐃᓕᓕᐗ ᐅᒪ ᐃᔑ ᑲᔥᑭᐅᐎᓂᓕᐤ᙮
ᒋᓴᔅ ᓇᑐᒣᐤ ᒫᑎᐤᐗ ᑭᒋ ᓄᔅᐱᓇᑕᑯᑦ
(ᒫᕐᒃ 2:13–17; ᓘᒃ 5:27–32)
9ᐁ ᐊᑎ ᑭᑐᑌᑦ ᒋᓴᔅ ᐊᓐᑕ ᐅᒋ, ᑮ ᐙᐸᒣᐤ ᐃᓕᓕᐗ ᒫᑎᐤ ᐁ ᐃᔑᓂᑳᓱᓕᒋ, ᐁ ᐊᐱᑦ ᐃᑕ ᐁ ᐅᑎᓂᒥᒋ ᔔᓕᐋᓇ: ᐃᑌᐤ ᒫᑲ, ᓄᔅᐱᓇᔑᓐ᙮
ᐁᑯ ᐯᓯᑯᑦ ᓀᔥᑕ ᑮ ᓄᔅᐱᓇᑌᐤ᙮
10ᑮ ᐃᑭᓐ ᒫᑳ, ᒣᒀᒡ ᒋᓴᔅ ᑳ ᐊᐱᑦ ᐁ ᒥᒋᓱᑦ ᐙᔅᑳᔨᑲᓂᒃ, ᒫᑎᑲ, ᑮ ᐯᒋ ᐎᑕᐱᒥᑯ ᒥᒉᑦ ᐸᑉᓕᑳᓇ ᓀᔥᑕ ᐅᒪᒋᑣᐗ ᐊᓯᒋ ᐅ ᑭᔅᑭᓄᐊᒪᐙᑲᓇ᙮ 11ᐃᔅᐱ ᒫᑲ ᐸᕋᓯᔭᒃ ᐎᐋᐸᑕᑭᒃ, ᑮ ᐃᑎᑎᒣᐗᒃ ᐅ ᑭᔅᑭᓄᐊᒪᐙᑲᓇ, ᑖᓀᑭ ᐌᒋ ᐎᒋᒥᒋᓱᒫᑦ ᑭᑦ ᐅᑭᒫᒥᐗᐤ ᐸᑉᓕᑳᓇ ᓀᔥᑕ ᐅᒪᒋᑣᐗ?
12ᒫᑲ ᐃᔅᐱ ᒋᓴᔅ ᐱᐁᑕᒃ, ᑮ ᐃᑌᐤ, ᐊᓂᑭ ᑳ ᒥᓗᐋᔮᒋᒃ ᓇᒪᐎᓚ ᓇᑕᐌᓕᒣᐗᒃ ᓇᑕᑯᓚᓇ, ᒫᑲ ᐊᓂᑭ ᑳ ᐋᑯᓯᒋᒃ᙮ 13ᒫᑲ ᓇᑕᐎ ᑭᔅᑫᓕᑐᒧᒃ ᐊᓂᒪ ᑳ ᐃᑗᒪᑲᒃ, ᓂ ᑳ ᐋᔮᓐ ᔕᐌᓕᒋᑫᐎᓐ, ᓇᒪ ᒫᑲ ᓵᓵᑭᐎᓕᐌᐎᓐ: ᐌᓴ ᓇᒪᐎᓚ ᓂ ᑮ ᐯᒋ ᐃᑐᑖᓐ ᑭᒋ ᓇᑐᒪᑭᒃ ᐅᒀᔭᔅᑭᑖᑎᓯᐗᒃ, ᒫᑲ ᐅᒪᒋᑣᐗᒃ ᑭᒋ ᑴᔅᑳᑎᓯᒋᒃ᙮
ᓂᑲᓱᐎᓐ ᐅᒋ
(ᒫᕐᒃ 2:18–22; ᓘᒃ 5:33–39)
14ᐁᑯ ᐱᐁᒋᓈᑎᑯᓕᒋ ᒑᓐ ᐅ ᑭᔅᑭᓄᐊᒪᐙᑲᓇ, ᐁ ᐃᑗᓕᒋ, ᑖᓀᑭ ᐌᒋ ᓂᓚᓈᓐ ᓀᔥᑕ ᐸᕋᓯᔭᒃ ᒥᒉᑣᐤ ᓂᑲᓱᔮᒃ, ᒫᑲ ᑭ ᑭᔅᑭᓄᐊᒪᐙᑲᓇᒃ ᓇᒪᐎᓚ ᓂᑲᓱᐗᒃ?
15ᒋᓴᔅ ᒫᑲ ᑮ ᐃᑌᐤ, ᑲᑕ ᑮ ᓇᓀᑳᑌᓕᒧᓕᐗ ᓈ ᐅᔥᑭᓈᐯᐙᓐ ᐅᑐᑌᒪ, ᒣᒀᒡ ᐅᔥᑭᓈᐯᐙᓐ ᐁ ᐎᒉᐙᑦ? ᒫᑲ ᑲᑕ ᐅᑎᒋᐸᓕᐗ ᐁ ᑭᔑᑳᑭ, ᐃᔅᐱ ᑫ ᒪᔅᑲᒫᑲᓂᐎᓕᒋ ᐅᔥᑭᓈᐺᐙᓇ, ᐁᑯ ᒫᑲ ᑫ ᓂᑲᓱᓕᒋ᙮
16ᓇᒪᐎᓚ ᐊᐌᓇ ᒥᔖᐃᑳᑫᐤ ᐅᔥᑭ ᒪᓂᑐᐌᑭᓐ ᑳᔮᔑ ᐎᓛᒋᑲᓂᒃ; ᐌᓴ ᐊᓂᒪ ᑳ ᒥᔖᐃᑳᑳᓂᐗᒃ ᑖᑐᐱᑕᒧᒪᑲᓐ, ᐁᑯ ᐊᑕ ᐁ ᑖᑐᐸᓕᒃ ᐊᐙᓯᑌ ᒣᔖᒃ᙮ 17ᓇᒪᐎᓚ ᓀᔥᑕ ᐃᓕᓕᐗᒃ ᐱᑕᐊᒶᒃ ᐅᔥᑭ ᔓᒥᓈᐳᓕᐤ ᑳᔮᔑ ᐎᒀᒃ: ᑭᔅᑎᓈᒡ ᐎᒀᔭ ᑲᑕ ᐱᑯᐸᓕᐗ, ᔓᒥᓈᐳ ᒫᑲ ᑲᑕ ᐗᓚᐎᐋᔑᑲᐗᓐ, ᓀᔥᑕ ᐎᒀᔭ ᑲᑕ ᓂᔑᐗᓈᑕᓋ: ᒫᑲ ᐱᑕᐊᒶᒃ ᐅᔥᑭ ᔓᒥᓈᐳᓕᐤ ᐅᔥᑭ ᐎᒀᔮᒃ, ᐁᑯ ᒫᑲ ᑖᐱᔅᑯᒡ ᑫᓇᐌᓕᒋᑳᑌᓕᑭ᙮
ᒋᓴᔅ ᐱᒫᒋᐁᐤ ᑳ ᓂᐱᓕᒋ ᐃᔅᑴᔑᔕ ᓀᔥᑕ ᑳ ᑮ ᐋᑯᓯᓕᒋ ᐃᔅᑴᐗ
(ᒫᕐᒃ 5:21–43; ᓘᒃ 8:40–56)
18ᒣᒀᒡ ᒫᑲ ᐅᐅ ᑳ ᐋᐃᑖᑦ, ᒫᑎᑲ, ᑮ ᐯᒋ ᓈᑎᑯ ᐯᔭᒃ ᐅᑭᒪᐗ, ᑮ ᓇᐗᑮᔅᑖᑯ ᒫᑲ ᐁ ᐃᑎᑯᑦ, ᓂᑖᓂᔅ ᐋᔕᔾ ᓇᒪ ᐱᒫᑎᓯᐤ: ᐯᒋ ᐃᑕᔅᑖ ᒫᑲ ᑭᒋᒋᐎᔭᐎᒃ, ᐁᑯ ᒫᑲ ᑫ ᐱᒫᑎᓰᑦ᙮
19ᒋᓴᔅ ᒫᑲ ᑮ ᐸᓯᑯ, ᑮ ᓄᔅᐱᓇᑌᐤ ᒫᑲ, ᐊᓯᒋ ᓀᔥᑕ ᐅ ᑭᔅᑭᓄᐊᒪᐙᑲᓇ
20ᒫᑎᑲ, ᒫᑲ, ᐯᔭᒃ ᐃᔅᑴᐗ, ᑳ ᐋᑯᓯᓕᒋ, ᐁ ᐅᒋᑲᐗᓂᓕᒃ ᐅᒥᑯ ᐃᔥᐱᔥ ᓂᔓᔖᑉ ᐱᐴᓋ, ᐅᔅᐱᔅᑾᓂᒃ ᑮ ᐯᒋ ᓈᑎᑯ, ᐁ ᓵᒥᓇᒥᓕᒋ ᐅ ᐎᓛᒋᑲᓐ ᑎᑎᐱᔅᑕᐃᑲᓂᒃ: 21ᐌᓴ ᑮ ᐃᑎᑎᓱ, ᑮᔥᐱᓐ ᐱᑯ ᓵᒥᓇᒶᑫ ᐅ ᐎᓛᒋᑲᓐ, ᓂ ᑳ ᒥᓇᐙᒋᐃᑲᐎᓐ᙮
22ᒫᑲ ᒋᓴᔅ ᑮ ᑴᔅᑭᑳᐸᐎᐤ, ᐃᔅᐱ ᒫᑲ ᐎᐋᐸᒫᑦ, ᑮ ᐃᑗᐤ, ᓂᑖᓂᔅ, ᒥᓜᓕᑕ ᐃᓴ; ᑭ ᑖᐺᔦᓕᑕᒧᐎᓐ ᑭ ᑮ ᒥᓇᐙᒋᐃᑯᓐ᙮ ᐊᓇ ᐃᔅᑴᐤ ᒫᑲ ᑭ ᒥᓇᐙᒋᐊᐤ ᐁᐗᑯ ᑎᐹᔨᑲᓂᒃ ᐱᓯᒧᑳᓂᒃ᙮
23ᐃᔅᐱ ᒫᑲ ᒋᓴᔅ ᑳ ᐱᑐᑫᐙᑦ ᐅᑭᒪᐗ ᐅ ᐙᔅᑳᔨᑲᓂᒪᓕᒃ, ᓀᔥᑕ ᑳ ᐙᐸᒫᑦ ᑭᑐᒋᑫᐎᓕᓕᐗ ᓀᔥᑕ ᐃᓕᓕᐗ ᐁ ᓇᓀᑳᑗᐎᑕᒪᓕᒋ; 24ᑮ ᐃᑌᐤ, ᑖᐎᒃ; ᐌᓴ ᓇᒪᐎᓚ ᓂᐱᐤ ᐊᐗ ᐃᔅᑴᔑᔥ, ᒫᑲ ᓂᐸᐤ᙮ ᐁᑯ ᒫᑲ ᓱᑲ ᐱᐋᐱᐃᑯᑦ᙮ 25ᒫᑲ ᐃᔅᐱ ᐃᓕᓕᐗᒃ ᑳ ᐗᓚᐎᑎᔕᐙᑲᓂᐎᒋᒃ, ᑮ ᐱᑐᑫᐤ, ᑮ ᐅᑎᓇᒬᐤ ᒫᑲ ᐅᒋᒋᓕᐤ, ᐁᑯ ᒫᑲ ᐌᓂᔥᑳᑦ ᐊᓇ ᐃᔅᑴᔑᔥ᙮ 26ᐅᒪ ᒫᑲ ᑭ ᐋᐃᐹᓕᒧᒋᑳᑌᒃ ᒥᓯᐌ ᐊᓂᒪ ᐊᔅᑮᒃ᙮
ᒋᓴᔅ ᒥᓇᐙᒋᐁᐤ ᓂᔓ ᐁᑳ ᑳ ᐙᐱᒋᒃ
27ᐃᔅᐱ ᒫᑲ ᒋᓴᔅ ᐊᓐᑕ ᑳ ᐅᒋ ᑭᑐᑌᑦ, ᓂᔓ ᐁᑳ ᐁ ᐙᐱᓕᒋ ᐃᓕᓕᐗ ᑮ ᓄᔅᐱᓈᑎᑯ, ᐁ ᑌᐺᓕᒋ, ᐁ ᐃᑗᓕᒋ ᒫᑲ, ᑌᐱᑦ ᐌᑯᓯᓯᒥᔉ, ᔕᐌᓕᒥᓈᓐ᙮
28ᐃᔅᐱ ᒫᑲ ᐹᑐᑫᑦ ᐙᔅᑳᔨᑲᓂᒃ, ᑮ ᐯᒋ ᓈᑎᑯ ᐁᑳ ᐁ ᐙᐱᓕᒋ ᐃᓕᓕᐗ: ᒋᓴᔅ ᒫᑲ ᐃᑌᐤ, ᑭ ᑖᐺᑌᓇᐗᐤ ᓈᐁ ᑲᔥᑭᑖᔮᓐ ᐅᒪ ᑭᒋ ᑐᑕᒫᓐ?
ᑮ ᐃᑎᑯ ᒫᑲ, ᐁᐁ, ᑌᐯᓕᒋᑫᔭᓐ᙮
29ᐁᑯ ᒫᑲ ᓯᐋᒥᓇᒸᑦ ᐅᔅᑭᔑᑯᓕᐗ, ᐁ ᐃᑗᑦ, ᒬᒋ ᐁ ᐃᔑ ᑕᐺᔦᓕᑕᒣᒃ ᐁᑯ ᑫ ᐃᔑ ᐋᔮᔦᒃ᙮ 30ᐅᔅᑭᔑᑯᐙᐗ ᒫᑲ ᑮ ᐋᐸᐃᑳᑌᓕᐗ; ᒋᓴᔅ ᒫᑲ ᓱᑲ ᑮ ᐃᑕᔓᒣᐤ, ᐁ ᐃᑗᑦ, ᔮᒀᒃ ᐁᑳᐎᓚ ᐊᐌᓇ ᑭᒋ ᑭᔅᑫᓕᑕᒃ᙮
31ᒫᑲ ᐎᓚᐗᐤ, ᐃᔅᐱ ᑳ ᑭᑐᑌᒋᒃ, ᑮ ᐋᐃᐋᓕᒧᒣᐗᒃ ᒥᓯᐌ ᐊᓂᒪ ᐊᔅᑮᒃ᙮
ᒋᓴᔅ ᒥᓇᐙᒋᐁᐤ ᓈᐯᐗ ᐁᑳ ᐁ ᓂᑕᐌᓕᒋ
32ᐁ ᐊᑎ ᐗᓚᐎᒋᒃ ᒫᑲ, ᒫᑎᑲ, ᑮ ᐯᑐᐌᐗᒃ ᐃᓕᓕᐗ ᐁᑳ ᐁ ᓂᑕᐌᓕᒋ ᐁ ᐱᒋᔅᑳᑯᓕᒋ ᒪᒋ ᐊᒑᑾ᙮ 33ᐃᔅᐱ ᒫᑲ ᐌᓚᐎᐌᐱᓈᑲᓂᐎᑦ ᒪᒋ ᐊᒑᒃ, ᐁᑳ ᑳ ᓂᑖᐌᑦ ᑮ ᐋᔭᒥᐤ: ᒥᔮᒪᐎᒥᒉᑎᒋᒃ ᐃᓕᓕᐗᒃ ᒫᑲ ᑮ ᒫᒪᔅᑲᑕᒶᒃ ᐁ ᐃᑗᒋᒃ, ᓇᒪᐎᔅᑳᑦ ᐅᒪ ᐃᔑ ᑮ ᐙᐸᒋᑳᑌᐤ ᐃᔅᕃᐃᓕᒃ᙮
34ᒫᑲ ᐸᕋᓯᔭᒃ ᑮ ᐃᑗᐗᒃ, ᐗᓚᐎᐌᐱᓀᐤ ᒪᒋ ᐊᒑᑾ ᐁ ᐎᒋᐃᑯᓕᒋ ᐅᑦ ᐅᑭᒫᒥᐙᐗ ᒪᒋ ᐊᒑᑾᒃ᙮
ᒋᓴᔅ ᔕᐌᑌᐁᑐᑕᐌᐤ ᐃᓕᓕᐗ
35ᒋᓴᔅ ᒫᑲ ᒥᓯᐌ ᐃᑖᐎᓂᒃ ᓀᔥᑕ ᐃᑖᐎᓂᔑᒃ ᑮ ᐋᐃᑐᑌᐤ, ᐁ ᑭᔅᑭᓄᐊᒫᑫᑦ ᐅᑦ ᐋᔭᒥᐁᐎᑲᒥᑯᓕᒃ, ᓀᔥᑕ ᐁ ᐙᐎᑕᒪᑫᑦ ᐅᑭᒫᐎᐎᓂ ᒥᓗᐋᒋᒧᐎᓂᓕᐤ, ᓀᔥᑕ ᐁ ᒥᓇᐙᒋᑖᑦ ᒥᓯᐌ ᐃᔑ ᐋᑯᓯᐎᓇ, ᓀᔥᑕ ᓇᓈᑲᐤ ᐁ ᐃᑖᔅᐱᓀᓕᒋ ᐃᓕᓕᐗ᙮ 36ᒫᑲ ᐃᔅᐱ ᐎᐋᐸᒫᑦ ᒥᔮᒪᐎᒥᒉᑎᓕᒋ ᐃᓕᓕᐗ, ᑮ ᔕᐌᑌᐁᑐᑕᐌᐤ; ᐌᓴ ᑮ ᐋᔦᔅᑯᓯᐗᒃ, ᓀᔥᑕ ᓇᓈᓂᔅ ᑮ ᐋᐃᑕᐗᒃ, ᑖᐱᔅᑯᒡ ᒫᓂᔥᒑᓂᔕᒃ ᐁᑳ ᐁ ᐅᒫᓂᔥᒑᓂᔑᐎᓕᓕᒥᒋᒃ᙮ 37ᐁᑯ ᐁᑖᑦ ᐅ ᑭᔅᑭᓄᐊᒪᐙᑲᓇ, ᑖᐺ ᐊᓂᒪ ᑫ ᒫᐗᒋᒋᑳᑌᒃ ᒥᒉᑎᓐ, ᒫᑲ ᐅᑕᑑᔅᑫᐗᒃ ᒐᑲᐙᔑᔑᐗᒃ: 38ᐁᐗᑯ ᐅᒋ ᓇᑐᑕᒫᒃ ᑳ ᑎᐯᓕᑕᒃ ᑫ ᒫᐗᒋᒋᑲᑌᓕᒃ ᑭᒋ ᐃᔑᑎᔕᐙᑦ ᐅᑕᑑᔅᑫᐗ ᐃᑕ ᑫ ᐃᔑ ᒪᐗᒋᒋᑳᓂᐗᓂᓕᒃ᙮
Currently Selected:
ᐅᐸᓓᑭᔅ ᒫᑎᐤ 9: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
