ᐅᐸᓓᑭᔅ ᒫᑎᐤ 21
21
ᒋᓴᔅ ᐁ ᐊᑎ ᑕᑯᔑᒃ ᒋᕉᓴᓚᒥᒃ
(ᒫᕐᒃ 11:1–11; ᓘᒃ 19:28–40; ᒑᓐ 12:12–19)
1ᐃᔅᐱ ᒫᑲ ᑭᔑᐙᒃ ᒋᕉᓴᓚᒥᒃ ᑌᑯᔑᑭᒃ, ᓀᔥᑕ ᐌᑎᑕᑭᒃ ᐯᑦᐯᒋ, ᐊᓕᑉᔅ ᐗᒌᒃ, ᐁᑯ ᒋᓴᔅ ᑫᒋᑎᔕᐙᑦ ᓂᔓ ᐅ ᑭᔅᑭᓄᐊᒪᐙᑲᓇ, 2ᐁ ᐃᑖᑦ, ᐃᑐᑌᒃ ᓀᒪ ᐃᑖᐎᓂᔑᒃ ᐅᑎᔥᑲᐤ ᑳ ᐃᑕᑾᒃ, ᑣᔦᒃ ᒫᑲ ᑭ ᑳ ᒥᔅᑲᐙᐗᐤ ᐯᔭᒃ ᐋᔅ ᐁ ᒫᑯᐱᓱᑦ ᐁ ᐎᒋᑳᐸᐎᔅᑖᑯᑦ ᐅᑯᓯᓴ: ᐋᐸᐅᑯᒃ, ᐯᑐᐎᒃ ᒫᑲ᙮ 3ᑮᔥᐱᓐ ᒫᑲ ᐊᐌᓇ ᐙᔦᔥ ᐃᑎᑖᑴ, ᑭ ᑳ ᐃᑖᐗᐤ, ᐅᑎᐯᓕᒋᑫᐤ ᓇᑕᐌᓕᒣᐤ; ᑣᔦᒃ ᒫᑲ ᑲᑕ ᐯᒋᑎᔕᐌᐤ᙮
4ᒥᓯᐌ ᐅᒪ ᑮ ᑐᒋᑳᑌᐤ, ᑭᒋ ᑎᐱᐸᓕᓕᒃ ᑳ ᑮ ᐃᑗᑦ ᐅᑭᔅᑭᐙᐃᑫᐤ, ᐁ ᐃᑗᑦ, 5ᐎᑕᒥᒫᒃ ᓵᐃᐊᓐ ᐅᑖᓂᓴ, ᒫᑎᑲ, ᑭ ᑭᒋᐅᑭᒫᒻ ᑮ ᐯᒋ ᓈᑎᒃ, ᐁ ᓗᔅᐱᓯᑦ, ᓀᔥᑕ ᐁ ᑌᑕᐱᑐᑕᐙᑦ ᐋᓴ, ᓀᔥᑕ ᐋᓯᔑᔕ, ᐋᔅ ᐅᑯᓯᓴ᙮
6ᑭᔅᑭᓄᐊᒪᐙᑲᓇᒃ ᒫᑲ ᑮ ᑭᑐᑌᐗᒃ, ᑮ ᑐᑕᒶᒃ ᓀᔥᑕ ᑳ ᑮ ᐃᑕᔓᐙᑎᑯᒋᒃ ᒋᓴᓴ᙮ 7ᑮ ᐯᔑᐌᐗᒃ ᒫᑲ ᐋᓴ ᓀᔥᑕ ᐋᓯᔑᔕ, ᑮ ᑌᑕᔅᑖᐗᒃ ᒫᑲ ᐅ ᐎᓛᒋᑲᓂᐙᐗ, ᐁᑯ ᒫᑲ ᑎᐁᑕᓛᒋᒃ᙮ 8ᓈᔅᐱᒡ ᒫᑲ ᒥᔮᒪᐎᒥᒉᑎᒋᒃ ᐃᓕᓕᐗᒃ ᒫᑲ ᑮ ᑕᔗᓕᑭᑎᑖᐙᒃ ᐅ ᐎᓛᒋᑲᓂᐙᐗ ᒣᔅᑲᓇᒃ; ᑯᑕᑭᔭᒃ ᒫᑲ ᑮ ᑮᔥᑲᐊᒶᒃ ᐗᑎᑾᓇ ᒥᔅᑎᑯᒃ ᐅᒋ, ᑮ ᐊᓈᔅᑫᑎᑖᐗᒃ ᒫᑲ ᒣᔅᑲᓈᒃ᙮ 9ᐊᓂᑭ ᒥᔮᒪᐎᒥᒉᑎᒋᒃ ᐃᓕᓕᐗᒃ ᒫᑲ ᑳ ᓂᑳᓄᑌᒋᒃ ᓀᔥᑕ ᑳ ᓄᔅᐱᓇᔑᐌᒋᒃ, ᑮ ᑌᐺᐗᒃ, ᐁ ᐃᑗᒋᒃ, ᐦᐅᓵᓇ ᑌᐱᑦ ᐅᑯᓯᓴ: ᔕᐌᓕᑖᑯᓯᐤ ᐊᓇ ᑳ ᐯᒋ ᐃᑐᑌᑦ ᐅᑎᐯᓕᒋᑫᐗ ᐅᑦ ᐃᔑᓂᑳᓱᐎᓂᓕᒃ: ᐦᐅᓵᓇ ᒫᐗᒋ ᐃᔥᐱᒥᒃ ᑳ ᐃᑖᑦ᙮
10ᐃᔅᐱ ᒫᑲ ᑌᑯᔑᑭᒃ ᒋᕉᓴᓚᒥᒃ, ᒥᓯᐌ ᐁᑯᑕ ᐃᑖᐎᓂᒃ ᑳ ᐃᑖᒋᒃ ᑮ ᐙᐙᓀᓕᑕᒶᒃ, ᐁ ᐃᑗᒋᒃ, ᐊᐌᓇ ᐊᐗ?
11ᒥᔮᒪᐎᒥᒉᑎᒋᒃ ᐃᓕᓕᐗᒃ ᑫ ᐃᑗᐗᒃ, ᐁᐗᑯ ᐊᐗ ᒋᓴᔅ ᐅᑭᔅᑭᐙᐃᑫᐤ ᓈᓴᕆᑎᒃ ᐅᒋ ᑳᓕᓕᒃ᙮
ᒋᓴᔅ ᐱᑐᑫᐤ ᑭᒋ ᐊᔭᒥᐁᐎᑲᒥᑯᒃ
(ᒫᕐᒃ 11:15–19; ᓘᒃ 19:45–48; ᒑᓐ 2:13–22)
12ᒋᓴᔅ ᒫᑲ ᑮ ᐱᑐᑫᐌᐤ ᑭᒋᒪᓂᑐᐗ ᐅ ᑭᒋᐋᔭᒥᐁᐎᑲᒥᑯᓕᒃ, ᑮ ᐗᓚᐎᑎᔕᐌᐤ ᒫᑲ ᒥᓯᐌ ᐊᓂᐃ ᑳ ᐊᑖᐙᑫᓕᒋ ᓀᔥᑕ ᑳ ᐊᑖᐌᓕᒋ ᑭᒋᐋᔭᒥᐁᐎᑲᒥᑯᒃ, ᑮ ᑴᑕᐱᐌᐸᐊᒬᐤ ᒫᑲ ᐅᒥᒋᓱᓈᑎᑯᓕᐗ ᐊᓂᐃ ᑳ ᒦᔅᑾᑐᓇᒫᑫᓕᒋ ᔔᓕᐋᓇ, ᓀᔥᑕ ᐅ ᑌᑕᐱᐎᓂᓕᐗ ᐊᓂᐃ ᑳ ᐊᑖᐙᑫᓕᒋ ᐅᒥᒥᐗ, 13ᑮ ᐃᑌᐤ ᒫᑲ, ᐃᑕᓯᓇᐃᑳᑌᐤ, ᐋᔭᒥᐁᐎᑲᒥᒃ ᑲᑕ ᐃᔑᓂᑳᑌᐤ ᓂ ᐙᔅᑳᔨᑲᓂᒻ: ᑭᓚᐗᐤ ᒫᑲ ᑭᒧᑎᔅᑲᒃ ᐅ ᐙᑎᐗᐤ ᑭ ᑮ ᐃᔑᑖᓇᐗᐤ᙮
14ᑮ ᐯᒋ ᓈᑎᑯ ᒫᑲ ᑭᒋᐋᔭᒥᐁᐎᑲᒥᑯᒃ ᐁᑳ ᑳ ᐙᐱᓕᒋ ᓀᔥᑕ ᐁᑳ ᑳ ᓂᑖᐅᑌᓕᒋ; ᑮ ᒥᓇᐙᒋᐁᐤ ᒫᑲ᙮ 15ᐃᔅᐱ ᒫᑲ ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᐅᒪᓯᓇᐃᑫᐗᒃ ᐎᐋᐸᑕᑭᒃ ᐊᓂᐃ ᒫᒪᔅᑳᒋ ᑫᒀᓇ ᑳ ᑐᑕᒥᓕᒋ, ᓀᔥᑕ ᐊᐙᔑᔕ ᐁ ᑌᐺᓕᒋ ᑭᒋᐋᔭᒥᐁᐎᑲᒥᑯᒃ, ᐁ ᐃᑗᓕᒋ ᒫᑲ, ᐦᐅᓵᓇ ᑌᐱᑦ ᐅᑯᓯᓴ; ᓈᔅᐱᒡ ᓇᒪ ᑮ ᓇᐁᓕᑕᒶᒃ, 16ᑮ ᐃᑌᐤ ᒫᑲ, ᑮ ᐯᑕᐙᐗᒃ ᓈ ᐅᑯ ᑳ ᐃᑗᒋᒃ?
ᒋᓴᔅ ᒫᑲ ᐃᑌᐤ, ᐁᐁ; ᓇᒪ ᓈ ᐐᔅᑳᑦ ᑭ ᐅᒋ ᐋᔭᒥᑖᓇᐗᐤ, ᐊᐱᔅᑕᐙᔑᔕᒃ ᓀᔥᑕ ᐅᓄᔖᓂᐗᒃ ᐅᑐᓂᐙᒃ ᑭ ᑮ ᒥᑐᓂᐎᑖᓐ ᒪᒥᒋᒥᐌᐎᓐ?
17ᑮ ᓇᑲᑌᐤ ᒫᑲ, ᐃᑖᐎᓂᒃ ᒫᑲ ᑮ ᐅᒋ ᐗᓚᐎᐤ ᐯᑕᓂᐃᒃ ᐁ ᐃᑐᑌᑦ, ᐁᑯᑕ ᒫᑲ ᑌᔑᑫᑦ᙮
ᒋᓴᐢ ᒪᒐᑭᒣᐤ ᐸᑫᓵᓂᒥᓈᑎᑾ
(ᒫᕐᒃ 11:12–14, 20–24)
18ᑭᐁᑭᔐᐹᔮᓂᒃ ᒫᑲ, ᒣᒀᒡ ᐃᑖᐎᓂᒃ ᐁ ᐃᔑ ᑭᐌᑦ, ᑮ ᐎ ᒥᒋᓱ᙮ 19ᐃᔅᐱ ᒫᑲ ᐎᐋᐸᒫᑦ ᐸᑫᓵᓂᒥᓈᑎᑾ ᒣᔅᑲᓈᒃ, ᑮ ᐯᒋ ᓈᑌᐤ, ᓇᒪᐎᓚ ᑫᒀᓕᐤ ᒫᑲ ᑮ ᒥᔅᑲᒻ, ᓂᐱᔕ ᐱᑯ, ᑮ ᐃᑌᐤ ᒫᑲ, ᐁᑳᐎᓚ ᐐᔅᑳᑦ ᑭ ᑳ ᓂᑖᐎᑭᑖᓐ ᒥᓂᔕᑳᑭᑫ᙮ ᐎᐸᒡ ᒫᑲ ᐸᑫᓵᓂᒥᓈᑎᒃ ᑮ ᐊᑎ ᐹᓱ᙮
20ᐃᔅᐱ ᒫᑲ ᑭᔅᑭᓄᐊᒪᐙᑲᓇᒃ ᐎᐋᐸᑕᑭᒃ, ᑮ ᒫᒪᔅᑳᑕᒶᒃ, ᐁ ᐃᑗᒋᒃ, ᐙ ᐎᐸᒡ ᐹᓱᑦ ᐊᐗ ᐸᑫᓵᓂᒥᓈᑎᒃ!
21ᒋᓴᔅ ᒫᑲ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑖᐺ ᑭᑦ ᐃᑎᓇᐗᐤ, ᑮᔥᐱᓐ ᐋᔮᔦᒃ ᑖᐺᔦᓕᑕᒧᐎᓐ, ᓀᔥᑕ ᐁᑳ ᐹᔨᑕᐌᓕᑕᒣᒃ, ᓇᒪᐎᓚ ᐅᒪ ᐱᑯ ᑭ ᑳ ᑐᑌᓇᐗᐤ ᑳ ᑐᑕᐙᑲᓂᐎᑦ ᐸᑫᓵᓂᒥᓈᑎᒃ, ᑮᔥᐱᓐ ᓀᔥᑕ ᐃᑕᒣᒃ ᐅᒪ ᐗᒋ, ᐋᒋᐸᓕᐃᑎᓱ, ᐌᐱᓂᑎᓱ ᒫᑲ ᑭᒋᑲᒦᒃ, ᑲᑕ ᑐᒋᑳᑌᐤ᙮ 22ᒥᓯᐌ ᑫᒀᓇ ᒫᑲ ᑳ ᓇᑐᑕᒫᔦᒃ ᐁ ᐋᔭᒥᐋᔦᒃ, ᐁ ᑖᐺᑕᒣᒃ, ᑭ ᑳ ᒥᓕᑲᐎᓇᐗᐤ᙮
ᒋᓴᐢ ᐁ ᑲᑴᒋᒪᑳᓂᐎᑦ ᑖᓐᑕ ᑳ ᐅᒋᐸᓕᒃ ᐅᑲᔥᑭᐅᐎᓐ
(ᒫᕐᒃ 11:27–33; ᓘᒃ 20:1–8)
23ᐃᔅᐱ ᒫᑲ ᑳ ᐱᑐᑫᑦ ᑭᒋᐋᔭᒥᐁᐎᑲᒥᑯᒃ, ᑮ ᐯᒋ ᓈᑎᑯ ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᐃᓕᓕᐗ ᐅᓂᑳᓀᓕᑖᑯᓯᒥᓕᐗ ᒣᒀᒡ ᐁ ᑭᔅᑭᓄᐊᒫᑫᑦ, ᑮ ᐃᑎᑯ ᒫᑲ, ᑫᑯ ᑲᔥᑭᐅᐎᓐ ᐌᒋ ᑐᑕᒪᓐ ᐅᐅ ᑫᒀᓇ? ᐊᐌᓇ ᓀᔥᑕ ᑳ ᒥᓕᔉ ᐅᐅ ᑭᒋ ᑐᑕᒪᓐ?
24ᒋᓴᔅ ᒫᑲ ᑮ ᓇᔥᑴᐗᔑᐁᐤ ᐁ ᐃᑖᑦ, ᓂᓚ ᓀᔥᑕ ᑭ ᑳ ᑲᑴᒋᒥᑎᓇᐗᐤ ᐯᔭᒃ ᑫᒀᓐ, ᑮᔥᐱᓐ ᒫᑲ ᐎᑕᒪᐎᔦᑴ, ᐁᑯ ᓀᔥᑕ ᑫ ᐎᑕᒫᑕᑾᒃ ᑖᓐᑌ ᐌᒋ ᑲᔥᑭᑖᔮᓐ ᐅᐅ ᑫᒀᓇ᙮ 25ᒑᓐ ᐅ ᓯᑲᐋᑖᑫᐎᓐ, ᑖᓐᑌ ᑳ ᐅᒋᐸᓕᓕᒃ? ᑭᒋᑭᔑᑯᒃ ᓈ, ᓀᔥᑕᐱᑯ ᐃᓕᓕᓈᒃ?
ᑮ ᐋᔭᔭᒥᐃᑐᐗᒃ ᒫᑲ, ᐁ ᐃᑗᒋᒃ, ᑮᔥᐱᓐ ᐃᑗᔭᑴ, ᑭᒋᑭᔑᑯᒃ ᐅᒋ; ᑭ ᑳ ᐃᑎᑯᓇᐤ, ᑖᓀᑭ ᒫᑲ ᐌᒋ ᐁᑳ ᑮ ᑖᐺᑕᐌᒃ? 26ᒫᑲ ᑮᔥᐱᓐ ᐃᑗᔭᑴ, ᐃᓕᓕᓈᒃ ᐅᒋ; ᑮ ᑯᔅᑖᓈᐗᒃ ᐃᓕᓕᐗᒃ: ᐌᓴ ᒥᓯᐌ, ᐅᑭᔅᑭᐙᐃᑫᐎᐤ ᒑᓐ, ᐃᑗᐗᒃ᙮ 27ᑮ ᓇᔥᑴᐗᔑᐁᐗᒃ ᒫᑲ ᒋᓴᓴ, ᐁ ᐃᑖᒋᒃ, ᓇᒪᐎᓚ ᓂ ᑮ ᐎᑌᓈᓐ᙮
ᐁᑯ ᒫᑲ ᐁᑖᑦ, ᓂᓚ ᓀᔥᑕ ᓇᒪᐎᓚ ᑭ ᑳ ᐎᑕᒫᑎᓇᐗᐤ ᑖᓐᑌ ᑳ ᐅᒋ ᑲᔥᑭᑖᔮᓐ ᐅᐅ ᑫᒀᓇ ᑭᒋ ᑐᑕᒫᓐ᙮
ᓇᔅᐱᑐᐌᐎ ᐋᑕᓗᑳᓐ ᓃᔓ ᐅᑯᓯᓯᒫᐗᒃ
28ᒫᑲ ᑖᓐ ᐁᑌᓕᑕᒣᒃ? ᐯᔭᒃ ᐃᓕᓕᐤ ᑮ ᓂᔑᓕᐗ ᐅᑯᓯᓴ; ᑮ ᐯᒋ ᐃᑌᐤ ᒫᑲ ᐊᓂᐃ ᓃᔥᑕᒻ, ᓂᑯᓯᔅ, ᓇᑕᐎ ᐋᐸᑎᓯ ᐊᓄᒡ ᐁ ᑭᔑᑳᒃ ᓂ ᔓᒥᓈᑎᑯ ᓂᑖᐎᑭᒋᑲᓂᒃ᙮ 29ᐁ ᓇᔥᑴᐗᔑᐃᐌᑦ ᒫᑲ ᑮ ᐃᑗᐤ, ᓇᒪᐎᓚ ᓂ ᑳ ᐃᑐᑖᓐ: ᐹᑎᒫ ᒫᑲ ᑮ ᑴᔅᑫᓕᑕᒻ, ᑫ ᐃᑐᑌᐤ ᒫᑲ᙮ 30ᑯᑕᑭᔭ ᓀᔥᑕ ᑮ ᐯᒋ ᓈᑌᐤ, ᑖᐱᔅᑯᒡ ᓀᔥᑕ ᑮ ᐃᑌᐤ᙮ ᐁ ᓇᔥᑴᐗᔑᐃᐌᑦ ᒫᑲ, ᑮ ᐃᑗᐤ, ᓂ ᑳ ᐃᑐᑖᓐ: ᓇᒪᐎᓚ ᒫᑲ ᐅᒋ ᐃᑐᑌᐤ᙮ 31ᐊᐌᓇ ᐅᑯ ᑳ ᓂᔑᒋᒃ ᑳ ᑐᑕᒸᑦ ᐅᑦ ᐃᑌᓕᑕᒧᐎᓂᓕᐤ ᐅᑖᐎᐙᐗ?
ᐃᑌᐗᒃ, ᐊᓇ ᓃᔥᑕᒻ᙮
ᒋᓴᔅ ᐃᑌᐤ, ᑖᐺ ᑭᑦ ᐃᑎᓇᐗᐤ, ᐎᓚᐗᐤ ᐸᑉᓕᑳᓇᒃ ᓀᔥᑕ ᐱᔑᒀᑎᔅᑴᐗᒃ ᑲᑕ ᐱᑐᑫᐌᐗᒃ ᑭᒋᒪᓂᑐᐗ ᐅᑦᐅᑭᒫᐎᐎᓂᓕᒃ ᐸᒧᔑ ᑭᓚᐗᐤ᙮ 32ᐌᓴ ᒑᓐ ᑭ ᑮ ᐯᒋ ᓈᑎᑯᐗᐤ ᒀᔭᔅᑭᑖᑎᓯᐎᓂᒃ ᐃᔑ, ᓇᒪᐎᓚ ᒫᑲ ᑭ ᑮ ᐅᒋ ᑖᐺᑕᐙᐗᐤ; ᒫᑲ ᐎᓚᐗᐤ ᐸᑉᓕᑳᓇᒃ ᓀᔥᑕ ᐱᔑᒀᑎᔅᑴᐗᒃ ᑮ ᑖᐼᑕᐌᐗᒃ: ᑭᓚᐗᐤ ᒫᑲ, ᐃᔅᐱ ᑳ ᑮ ᐙᐸᑕᒣᒃ, ᓇᒪᐎᓚ ᑭ ᑮ ᐅᒋ ᒥᒋᓚᐌᔦᓕᑌᓈᐗᐤ, ᑭᒋ ᑮ ᑖᐺᑕᐌᒃ᙮
ᓇᔅᐱᑐᐌᐎ ᐋᑕᓗᑳᓐ ᐊᓂᑭ ᑳ ᐊᐹᑎᓯᒋᒃ ᔓᒥᓈᑎᑯ ᓂᑖᐎᑭᒋᑳᓂᓕᒃ
(ᒫᕐᒃ 12:1–12; ᓘᒃ 20:9–19)
33ᓇᑐᑕᒧᒃ ᑯᑕᒃ ᓇᔅᐱᑐᐌᐎ ᐋᑕᓗᑳᓐ: ᑮ ᐃᑖᐤ ᐊᐌᓇ ᑳ ᑎᐯᓕᑕᒃ ᐙᔅᑳᔨᑲᓂᓕᐤ, ᑳ ᐅᔑᑖᑦ ᔓᒥᓈᑎᑯ ᓂᑖᐎᑭᒋᑲᓂᓕᐤ, ᓀᔥᑕ ᑮ ᑭᐸᐊᒻ ᒥᓯᐌ ᐙᔅᑲ, ᑮ ᒧᓇᐊᒻ ᒫᑲ ᐃᑕ ᔓᒥᓈᐳᓕᐤ ᑭᒋ ᐅᒋᑳᐎᑖᑦ, ᑮ ᒋᒪᑕᐤ ᓀᔥᑕ ᐊᔕᐙᐱᐎᑲᒥᑯᓕᐤ, ᑮ ᐋᐎᐁᐤ ᒫᑲ ᐅᓂᑖᐎᑭᒋᑫᐗ, ᐁᑯ ᒫᑲ ᐊᔅᑮᒃ ᐙᓚᐤ ᐁᑐᑌᑦ᙮ 34ᐃᔅᐱ ᒫᑲ ᑫᑳᑦ ᐌᑎᒋᐸᓕᒃ ᑭᒋ ᑭᔑ ᓂᑖᐎᑭᑭ ᒥᓂᔕ, ᐅᑦ ᐊᑑᔅᑫᓛᑲᓂᒪ ᑮ ᐃᔑᑎᔕᐊᒪᐌᐤ ᐊᓂᐃ ᐅᓂᑖᐎᑭᒋᑫᐗ, ᑭᒋ ᐅᑎᓇᒥᓕᒋ ᒥᓂᔕ ᐊᓐᑕ ᐅᒋ᙮ 35ᐅᓂᑖᐎᑭᒋᑫᐗᒃ ᒫᑲ ᑮ ᐅᑎᓂᒣᐗᒃ ᐅᑦ ᐊᑑᔅᑫᓛᑲᓂᒪ, ᐯᔭᒃ ᒫᑲ ᑮ ᐅᑖᒪᐌᐗᒃ, ᑯᑕᑭᔭ ᒫᑲ ᑮ ᓂᐸᐁᐗᒃ, ᑯᑕᑭᔭ ᒫᑲ ᑮ ᐹᐱᒶᓯᓈᑕᐌᐗᒃ᙮ 36ᒥᓇ, ᑯᑕᑭᔭ ᐊᑑᔅᑫᓛᑲᓇ ᑮ ᐃᔑᑎᔕᐌᐤ ᐊᐙᓯᑌ ᐃᔥᐱᔥ ᓃᔥᑕᒻ: ᑖᐱᔅᑯᒡ ᑯᑕᑭᔭ ᒫᑲ ᑮ ᑐᑕᐌᐗᒃ᙮ 37ᒫᑲ ᐃᔅᒀᔮᒡ, ᑮ ᐃᔑᑎᔕᐊᒪᐌᐤ ᐅᑯᓯᓴ, ᐁ ᐃᑗᒃ, ᑲᑕ ᑭᔅᑌᓕᒣᐗᒃ ᓂᑯᓯᓴ᙮ 38ᒫᑲ ᐃᔅᐱ ᐅᓂᑖᐎᑭᒋᑫᐗᒃ ᐎᐋᐸᒥᒫᒋᒃ ᐅᑯᓯᓴ, ᑮ ᐊᔨᑎᑐᐗᒃ, ᐊᐗ ᐁᐗᒀᓇ ᑫ ᐊᑎ ᐋᓂᔅᑫ ᑎᐯᓕᑕᒃ; ᒫᑎ, ᓂᐸᐋᑕᐤ, ᐁᑯ ᑫ ᐅᑎᓇᒫᓱᐗᒃ ᐅ ᑎᐱᓚᐌᐎᓯᐎᓐ᙮ 39ᑮ ᐅᑎᑎᓀᐗᒃ ᒫᑲ, ᓀᔥᑕ ᑮ ᐗᓚᐎᐌᐱᓀᐗᒃ ᔓᒥᓈᑎᑯ ᓂᑖᐎᑭᒋᑲᓂᒃ ᐅᒋ, ᑮ ᓂᐸᐁᐗᒃ ᒫᑲ᙮
40ᐃᔅᐱ ᒫᑲ ᑳ ᑎᐯᓕᑕᒃ ᔓᒥᓈᑎᑯ ᓂᑖᐎᑭᒋᑲᓂᓕᐤ ᑕᑯᔑᑫ, ᑖᓂ ᑫ ᑐᑕᐙᑦ ᐊᓂᐃ ᐅᓂᑖᐎᑭᒋᑫᐗ?
41ᐃᑌᐗᒃ, ᑲᑕ ᑲᒀᑕᑭ ᓂᔑᐗᓈᒋᐁᐤ ᐊᓂᐃ ᒪᒋ ᐃᓕᓕᐗ, ᑲᑕ ᐋᐎᐁᐤ ᒫᑲ ᐅ ᔓᒥᓈᑎᑯ ᓂᑖᐎᑭᒋᑲᓐ ᑯᑕᑭᔭ ᐅᓂᑖᐎᑭᒋᑫᐗ, ᑫ ᒥᓕᑯᑦ ᒥᓂᔕ ᐁ ᑭᔑ ᓂᑖᐎᑭᓂᓕᑭ᙮
42ᒋᓴᔅ ᐃᑌᐤ, ᓇᒪ ᓈ ᐐᔅᑳᑦ ᑭ ᐅᒋ ᐋᔭᒥᑖᓇᐗᐤ ᑭᒋ ᒪᓯᓇᐃᑫᐎᓂᒃ, ᐊᓇ ᐊᓯᓂ ᑳ ᑮ ᐋᑕᐌᓕᒥᑯᑦ ᐅᐙᔅᑳᔨᑲᓂᑫᐗ, ᐁᐗᑯ ᑫᔅᑕᓛᑲᓂᐎᑦ ᑭᑫᔮᒃ: ᐁᐗᑯ ᐅᒪ ᐅᑎᐯᓕᒋᑫᐤ ᐅᑦ ᐃᑐᑕᒧᐎᓐ, ᑭ ᒫᒪᔅᑳᓯᓀᓈᓇᐤ ᒫᑲ᙮
43ᐁᐗᑯ ᐌᒋ ᐃᑎᑖᑾᒃ, ᑭᒋᒪᓂᑐ ᐅᑦ ᐅᑭᒫᐎᐎᓐ ᑭ ᑳ ᒪᔅᑲᒥᑳᐎᓈᐗᐤ, ᑲᑕ ᒥᓛᐗᒃ ᒫᑲ ᑯᑕᑭᔭᒃ ᐃᓕᓕᐗᒃ ᑫ ᓄᑯᑖᒋᒃ ᐊᓂᐃ ᐃᔑᑣᐎᓇ ᐊᓐᑕ ᑳ ᐅᒋᐸᓕᑭ᙮ 44ᐊᐌᓇ ᒫᑲ ᑫ ᐸᑭᔑᓄᑴ ᐅᐅ ᐊᓯᓃᒃ ᑲᑕ ᐱᑯᔑᓐ: ᒫᑲ ᐊᐌᓇ ᑫ ᑕᓱᓱᑴ, ᑲᑕ ᐱᓯᐳᓕᑯ᙮
45ᐃᔅᐱ ᒫᑲ ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᐸᕋᓯᔭᒃ ᑳ ᐯᑕᒸᒋᒃ ᐅ ᓇᔅᐱᑐᐌᐎ ᐋᑕᓗᑳᓇ, ᑮ ᓂᓯᑕᐌᓕᑕᒶᒃ ᐎᓚᐗᐤ ᐁ ᑮ ᐗᓕᒧᒥᑯᒋᒃ᙮ 46ᒫᑲ ᐃᔅᐱ ᐙ ᐅᑎᑎᓈᒋᒃ, ᑮ ᑯᔅᑌᐗᒃ ᒥᔮᒪᐎᒥᒉᑎᓕᒋ ᐃᓕᓕᐗ, ᐅᑭᔅᑭᐙᐃᑫᐤ ᐁ ᐃᑌᓕᒫᓕᒋ᙮
Currently Selected:
ᐅᐸᓓᑭᔅ ᒫᑎᐤ 21: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
