ᐅᐸᓓᑭᔅ ᓘᒃ 7
7
ᒋᓴᔅ ᒥᓇᐙᒋᐁᐤ ᓇᑐᐸᓕᐎᑭᒫᐤ ᐅᑕᑐᔅᑫᓛᑲᓂᒪ
(ᒫᑎᐤ 8:5–13)
1ᐃᔅᐱ ᒫᑲ ᑳ ᑮ ᑭᔑᑖᑦ ᒥᓯᐌ ᐅᑦ ᐃᑗᐎᓇ ᐁ ᐯᑖᑯᑦ ᐃᓕᓕᐗ, ᑮ ᐱᑐᑫᐤ ᑲᐸᕐᓀᔭᒥᒃ᙮ 2ᓇᑐᐸᓕᐎᑭᒪᐤ ᒫᑲ ᐅᑦ ᐊᑑᔅᑫᓛᑲᓂᒪ, ᐊᓂᐃ ᑳ ᓵᑭᐋᑦ, ᑮᐋᑯᓯᓕᐗ, ᓀᔥᑕ ᑫᑳᑦ ᐁ ᓂᐱᓕᒋ᙮ 3ᐃᔅᐱ ᒫᑲ ᐱᐁᑕᒃ ᐁ ᐃᑖᒋᒥᒥᒋ ᒋᓴᓴ, ᑮ ᐃᔑᑎᔕᐊᒪᐌᐤ ᑳ ᓂᑳᓀᓕᑖᑯᓯᓕᒋ ᒎᐗ, ᐁ ᓇᑐᑕᒪᐙᑦ ᑭᒋ ᐯᒋ ᐃᑐᑌᓕᒋ ᑭᒋ ᒥᓇᐙᒋᐋᓕᒋ ᐅᑦ ᐊᑑᔅᑫᓛᑲᓂᒪ᙮ 4ᐃᔅᐱ ᒫᑲ ᐱᐁᒋ ᓈᑕᒋᒃ ᒋᓴᓴ, ᓱᑲ ᑮ ᓇᑐᑕᒪᐌᐗᒃ, ᐁ ᐃᑗᒋᒃ, ᑌᐸᑫᓕᑖᑯᓯᐤ ᐊᓇ ᐅᒣᓕᐤ ᑫ ᑐᑕᒪᐗᑦ: 5ᐌᓴ ᓵᑭᐁᐤ ᓂᑦ ᐃᓕᓕᒥᓈᓇ, ᓀᔥᑕ ᓂ ᑮ ᐅᔑᑣᑯᓈᓐ ᐋᔭᒥᐁᐎᑲᒥᑯᓕᐤ᙮
6ᐁᑯ ᒫᑲ ᒋᓴᔅ ᐙᒉᐙᑦ᙮ ᐃᔅᐱ ᒫᑲ ᐁᑳ ᐙᓚᐤ ᐁᑖᑦ ᐙᔅᑳᔨᑲᓂᒃ ᐅᒋ, ᑮ ᐃᔑᑎᔕᐊᒫᑯ ᓇᑐᐸᓕᐎᑭᒫᐗ ᐅᑐᑌᒥᓕᐗ, ᐁ ᐃᑎᑯᑦ, ᑌᐯᓕᒋᑫᔭᓐ, ᐁᑳᐎᓚ ᐊᓕᒥᐃᑎᓱ; ᐌᓴ ᓇᒪᐎᓚ ᓂ ᑌᐸᑫᓕᑖᑯᓯᓐ ᑭᒋ ᐯᒋ ᐱᑐᑫᔭᓐ ᓂ ᐙᔅᑳᔨᑲᓂᒥᒃ: 7ᐁᐗᑯ ᐅᒋ ᓀᔥᑕ ᓇᒪᐎᓚ ᓂ ᐅᒋ ᑌᐸᑫᓕᒥᑎᓱᓐ ᑭᒋ ᓈᑎᑖᓐ: ᒫᑲ ᑌᐱᓛᒃ ᒧᒋ ᐃᑗ, ᐁᑯ ᒫᑲ ᓂᑦ ᐊᕉᔅᑫᓛᑲᓐ ᑫ ᒥᓇᐙᒋᐋᑲᓂᐎᑦ᙮ 8ᐌᓴ ᓂᓚ ᓀᔥᑕ ᓂ ᑎᐯᓕᑕᒥᐃᑲᐎᓐ, ᐁ ᑎᐯᓕᒪᑭᒃ ᓇᑐᐸᓕᐎᓕᓕᐗᒃ; ᐯᔭᒃ ᒫᑲ ᓂᑦ ᐃᑕᐤ, ᒫᒑ, ᒫᒐᐤ ᒫᑲ: ᑯᑕᒃ ᒫᑲ, ᐋᔅᑕᒻ, ᐯᒋ ᐃᑐᑌᐤ ᒫᑲ; ᓀᔥᑕ ᓂᑦ ᐊᑐᔅᑫᓛᑲᓐ, ᐅᒪ ᑐᑕ, ᑐᑕᒻ ᒫᑲ᙮
9ᐃᔅᐱ ᒋᓴᔅ ᐯᐁᑕᒃ ᐅᐅ ᑫᒀᓇ, ᑮ ᒫᒪᔅᑳᑌᐤ, ᓀᔥᑕ ᐁ ᑴᔅᑭᑳᐸᐎᑦ, ᑮ ᐃᑌᐤ ᐊᓂᐃ ᐃᓕᓕᐗ ᑳ ᓄᔅᐱᓈᑎᑯᑦ, ᑭᑦ ᐃᑎᓈᐗᐤ, ᓇᒪᐎᓚ ᓂ ᐅᒋ ᒥᔅᑫᓐ ᑭᒋ ᑖᐺᔦᓕᑕᒧᐎᓐ ᐃᔥᐱᔥ ᐅᒪ, ᓇᒪᐎᓚ, ᓇᒪᐎᓚ ᐃᔅᕃᐃᓕᒃ᙮
10ᐊᓂᑭ ᒫᑲ ᑳ ᐃᔑᑎᔕᐙᑲᓂᐎᒋᒃ, ᐁ ᑭᐌᒋᒃ ᐙᔅᑳᔨᑲᓂᒃ, ᑮ ᒥᔅᑲᐌᐗᒃ ᐊᓂᐃ ᐊᑑᔅᑫᓛᑲᓇ ᑳ ᑮ ᐋᑯᓯᓕᒋ ᐁ ᒥᓗᐋᔮᓕᒋ᙮
ᒋᓴᔅ ᐗᓂᔥᑳᓀᐤ ᑭᑎᒫᑭᔅᑴᐤ ᐅᑯᓯᓴ
11ᑮ ᐃᑭᓐ ᒫᑲ ᐎᐋᐸᓂᓕᒃ, ᑮ ᐃᑐᑌᐤ ᐃᑖᐎᓂᒃ ᓀᐃᓐ ᐁ ᐃᔑᓂᑳᑌᒃ: ᑮ ᐎᒉᐎᑯ ᒫᑲ ᒥᒉᑦ ᐅ ᑭᔅᑭᓄᐊᒪᐙᑲᓇ, ᓀᔥᑕ ᒥᒉᑦ ᐃᓕᓕᐗ᙮ 12ᐃᔅᐱ ᒫᑲ ᐱᐁᔡᐸᑕᒃ ᐃᑖᐎᓂᓕᐤ ᐁ ᐃᔥᒀᑌᒥᐗᓂᓕᒃ, ᒫᑎᑲ, ᐁ ᓂᐱᑦ ᐃᓕᓕᐤ ᑮ ᐱᒥᐗᓚᐎᑕᐊᐤ, ᐎᓚ ᐁ ᐯᔭᑯᔖᓂᒥᑯᑦ ᐅᑳᐎᔭ ᑮ ᑭᑎᒫᑭᔅᑴᐎᓕᐗ ᒫᑲ: ᐎᓚ ᑮ ᐎᒉᐎᑯ ᒫᑲ ᒥᒉᑦ ᐃᓕᓕᐗ ᐃᑖᐎᓂᒃ ᐅᒋ᙮ 13ᐃᔅᐱ ᒫᑲ ᐅᑎᐯᓕᒋᑫᐤ ᐎᐋᐸᒫᑦ, ᑮ ᑭᑎᒫᑫᓕᒣᐤ, ᑮ ᐃᑌᐤ ᒫᑲ, ᐁᑳᐎᓚ ᒫᑐ᙮ 14ᑮ ᐯᒋ ᓵᒥᓇᒻ ᒫᑲ ᑌᑎᓂᑲᓂᓕᐤ: ᐊᓂᑭ ᒫᑲ ᑳ ᑌᑎᓈᒋᒃ ᑮ ᑭᐱᒋᑳᐸᐎᐗᒃ᙮ ᑮ ᐃᑗᐤ ᒫᑲ, ᐅᔥᑭᓂᑭᐤ, ᑭᑦ ᐃᑌᓐ, ᐗᓂᔥᑳ᙮ 15ᐊᓇ ᒫᑲ ᑳ ᑮ ᓂᐱᑦ ᑮ ᔑᒪᑕᐱᐤ, ᓀᔥᑕ ᑳ ᒫᒋ ᐋᔭᒥᐤ᙮ ᐁᑯ ᐯᑭᑎᓇᒪᐙᑦ ᐅᑳᐎᓕᐗ᙮
16ᒥᓯᐌ ᒫᑲ ᑮ ᐅᑎᑎᑯᐗᒃ ᓭᑭᓯᐎᓂᓕᐤ: ᑮ ᑭᔅᑕᒋᒣᐗᒃ ᒫᑲ ᑭᒋᒪᓂᑐᐗ, ᐁ ᐃᑗᒋᒃ, ᑭᒋ ᐅᑭᔅᑭᐙᐃᑫᐤ ᑭᑦ ᐅᑎᑎᑯᓇᐤ; ᓀᔥᑕ ᑭᒋᒪᓂᑐ ᑮ ᒫᐗᑎᑌᐤ ᐅᑦ ᐃᓕᓕᒪ᙮
17ᐅᒪ ᒫᑲ ᐁ ᒫᒪᔅᑳᑖᒋᒫᑲᓂᐎᑦ ᑮ ᐯᐯᑖᑾᓂᓕᐤ ᒥᓯᐌ ᐁᔅᐱᔖᒃ ᒎᑎᐊᐃᒃ, ᓀᔥᑕ ᒥᓯᐌ ᐊᔅᑮᒃ ᐙᔅᑲ᙮
ᒑᓐ ᐅᑭᔅᑭᓄᐊᒪᐙᑲᓇ ᐯᒋ ᑲᑴᒋᑫᒣᐗᒃ ᒋᓴᓴ
(ᒫᑎᐤ 11:2–19)
18ᐅ ᑭᔅᑭᓄᐊᒪᐙᑲᓇ ᒑᓐ ᑮ ᐋᐸᑎᓕᑯ ᒥᓯᐌ ᐅᐅ ᑫᒀᓇ᙮ 19ᒑᓐ ᒫᑲ ᐁ ᓇᑐᒫᑦ ᓂᔓ ᐅ ᑭᔅᑭᓄᐊᒪᐙᑲᓇ, ᑮ ᐃᔑᑎᔕᐊᒪᐌᐤ ᒋᓴᓴ, ᐁ ᐃᑗᑦ, ᑭᓚ ᓈ ᐁᐗᒀᓇ ᑫ ᑕᑯᔑᑭᐸᓐ? ᓀᔥᑕᐱᑯ ᑯᑕᒃ ᓈ ᓂ ᑳ ᐊᔕᐙᐸᒫᓈᓐ?
20ᐃᔅᐱ ᒫᑲ ᐃᓕᓕᐗᒃ ᐌᑎᑖᒋᒃ, ᑮ ᐃᑗᐗᒃ, ᒑᓐ ᐅᓯᑲᐋᑖᑫᐤ ᓂ ᑮ ᐯᒋᑎᔕᐅᑯᓈᓐ ᑭᒋ ᓈᑎᑖᒃ, ᐁ ᐃᑗᑦ, ᑭᓚ ᓈ ᐁᐗᒀᓇ ᑫ ᑕᑯᔑᑭᐸᓐ, ᓀᔥᑕᐱᑯ ᑯᑕᒃ ᓈ ᓂ ᑳ ᐊᔕᐙᐸᒫᓈᓐ?
21ᐊᓂᒪ ᑫᔮᐸᒡ ᑎᐹᔨᑲᓂᒃ ᐱᓯᒧᑳᓂᒃ ᑮ ᒥᓇᐙᒋᐁᐤ ᒥᒉᑦ ᐅᑦ ᐋᑯᓯᐎᓂᓕᐗ ᓀᔥᑕ ᐅᑦ ᐋᑯᐃᑖᔅᐱᓀᐎᓂᓕᐗ, ᓀᔥᑕ ᒪᒋ ᐊᒑᑾ ᐅᒋ: ᓀᔥᑕ ᒥᒉᑦ ᐁᑳ ᑳ ᐙᐱᓕᒋ ᑮ ᐙᐱᐁᐤ᙮ 22ᐁᑯ ᒋᓴᔅ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑭᐌᒃ, ᐎᑕᒫᒃ ᒑᓐ ᒫᑲ ᐊᓂᐃ ᑫᒀᓇ ᑳ ᑮ ᐙᐸᑕᒣᒃ ᓀᔥᑕ ᑳ ᑮ ᐯᑕᒣᒃ; ᐊᓂᑭ ᐁᑳ ᑳ ᐙᐱᒋᒃ ᐙᐱᐗᒃ, ᐊᓂᑭ ᐁᑳ ᑳ ᓂᑖᐅᑌᒋᐤ ᐱᒧᑌᐗᒃ, ᐅᓓᑉᕈᓯᐃᑖᔅᐱᓀᐗᒃ ᐹᔦᑭᐋᐗᒃ, ᐅᑭᐱᑌᐗᒃ ᐯᑕᒶᒃ, ᐊᓂᑭ ᑳ ᓂᐱᒋᒃ ᐗᓂᔥᑳᓈᐗᒃ, ᐅᑭᑎᒫᑭᓯᐗᒃ ᐙᐎᑕᒪᐙᐗᒃ ᒥᓗᐋᒋᒧᐎᓂᓕᐤ᙮ 23ᔕᐌᓕᑖᑯᓯᐤ ᒫᑲ, ᐊᐌᓇ ᐁᑳ ᑫ ᓈᔦᑕᐌᓕᒥᑴ᙮
24ᐃᔅᐱ ᒫᑲ ᒑᓐ ᐅᑦ ᐃᔑᑎᔕᐙᑲᓇ ᑳ ᑭᑐᑌᓕᒋ, ᑮ ᒫᒋ ᐋᔭᒥᐁᐤ ᐃᓕᓕᐗ ᐁ ᐋᓕᒧᒫᑦ ᒑᓇ, ᑫᒀᓐ ᐙ ᐙᐸᑕᒣᒃ ᐃᔅᐱ ᑳ ᐃᑐᑌᔦᒃ ᐸᑾᑕᔅᑲᒥᑳᒃ? ᐎᐹᔉ ᓈ ᐁ ᐌᐌᐹᔅᑕᒃ? 25ᒫᑲ ᑫᒀᓐ ᐙ ᐙᐸᑕᒣᒃ ᐊᓐᑕ ᑳ ᐃᑐᑌᔦᒃ? ᐃᓕᓕᐤ ᓈ ᑳ ᓗᔅᑳᓕᑭ ᐎᓛᒋᑲᓇ ᐁ ᑭᑭᔥᑲᒃ? ᒫᑎᑲ, ᐊᓂᑭ ᑳ ᓭᓭᑳᐎᐅᒋᒃ ᓀᔥᑕ ᑳ ᒥᓗᐳᒋᒃ, ᑭᒋᐅᑭᒫᐗ ᐎᑭᓕᒃ ᐃᑖᐗᒃ᙮ 26ᒫᑲ ᑫᒀᓐ ᐙ ᐙᐸᑕᒣᒃ ᐊᓐᑕ ᑳ ᐃᑐᑌᔦᒃ? ᐅᑭᔅᑭᐙᐃᑫᐤ ᓈ? ᐁᐁ, ᑭᑦ ᐃᑎᓇᐗᐤ, ᐊᐙᓯᑌ ᐃᔥᐱᔥ ᐅᑭᔅᑭᐙᐃᑫᐤ᙮ 27ᐊᐗ ᐁᐗᒀᓇ ᑳ ᐅᒋ ᐃᑕᓯᓇᐃᑳᑌᒃ, ᒫᑎᑲ, ᓂᑦ ᐃᔑᑎᔕᐗᐤ ᓂᑦ ᐃᔑᑎᔕᐙᑲᓐ ᑭᒋ ᓂᑳᓄᑖᔉ, ᑫ ᐙᐌᔑᑕᒫᔉ ᑭ ᒣᔅᑲᓇᐤ ᑫ ᐃᔑ ᐃᑐᑌᔭᓐ᙮ 28ᐌᓴ ᑭᑦ ᐃᑎᓇᐗᐤ, ᒥᓯᐌ ᑕᑐ ᐊᐌᓇ ᐃᔅᑴᒃ ᑳ ᐅᒋ ᓂᑖᐎᑭᑦ, ᓇᒪᐎᓚ ᐅᒋ ᐯᔭᒃ ᐅᑭᔅᑭᐙᐃᑫᐤ ᐊᐙᓯᑌ ᐃᔅᐯᓕᑖᑯᓯᐤ ᐁᔅᐯᓕᑖᑯᓯᑦ ᒑᓐ ᐅᓯᑲᐋᑖᑫᐤ: ᒫᑲ ᐊᓇ ᑳ ᒪᐗᒋ ᐋᐱᔅᑌᓕᑖᑯᓯᑦ ᑭᒋᒪᓂᑐ ᐅᑦ ᐅᑭᒫᐎᐎᓂᒃ ᐊᐙᓯᑌ ᐃᔅᐯᓕᑖᑯᓯᐤ ᐃᔥᐱᔥ ᐎᓚ᙮
29ᒥᓯᐌ ᒫᑲ ᐃᓕᓕᐗᒃ ᑳ ᐯᑕᐙᒋᒃ ᓀᔥᑕ ᐸᑉᓕᑳᓇᒃ ᑮ ᒥᓗᑣᐌᓕᒣᐗᒃ ᑭᒋᒪᓂᑐᐗ, ᐁ ᑮ ᓯᑲᐋᑕᐙᑲᓂᐎᒋᒃ ᒑᓐ ᐅ ᓯᑲᐋᑖᑫᐎᓂᓕᐤ ᐅᒋ᙮ 30ᒫᑲ ᐹᕋᓯᔭᒃ ᓀᔥᑕ ᐅᓚᔓᐌᐎᓕᓕᐗᒃ ᑮ ᐋᑕᐌᓕᑕᒬᐗᒃ ᑭᒋᒪᓂᑐᐗ ᐅ ᑲᑫᔅᑭᒥᐁᐎᓂᓕᐤ ᑳ ᐃᔑ ᑲᑫᔅᑭᒥᑯᓕᒋ, ᐁᑳ ᐁ ᐅᒋ ᓯᑲᐊᑖᑯᒋᒃ᙮
31ᐅᑎᐯᓕᒋᑫᐤ ᒫᑲ ᑮ ᐃᑗᐤ, ᐊᐌᓕᐗ ᒫᑲ ᑫ ᐃᑗᔮᓐ ᐁ ᓇᔅᐱᑕᐗᒋᒃ ᐅᑯ ᐊᓄᒡ ᐯᒫᑎᓯᒋᒃ ᐃᓕᓕᐗᒃ? ᑫᒀᓕᐤ ᒫᑲ ᑖᐱᔅᑯᒡ ᐁᔑᓈᑯᓯᒋᒃ? 32ᓇᔅᐱᑕᐌᐗᒃ ᐊᐙᔑᔕ ᐁ ᐊᐱᓕᒋ ᐃᑕ ᐁ ᐊᑖᒥᑐᓈᓂᐗᒃ, ᓀᔥᑕ ᐁ ᑌᑆᑎᑐᒋᒃ, ᓀᔥᑕ ᐁ ᐃᑗᒋᒃ, ᑭ ᑮ ᐳᑖᑕᒫᑎᓈᓐ, ᓇᒪ ᒫᑲ ᑭ ᐅᒋ ᓂᒥᓇᐗᐤ; ᑭ ᑮ ᒫᑐᑖᑎᓈᓐ, ᓇᒪ ᒫᑲ ᑭ ᐅᒋ ᒫᑐᓇᐗᐤ᙮ 33ᐌᓴ ᒑᓐ ᐅᓯᑲᐋᑖᑫᐤ ᓇᒪᐎᓚ ᑮ ᐯᒋ ᐃᑐᑌᐤ ᐁ ᒧᐙᑦ ᐊᓚᑯᓇᐗ, ᓇᒪ ᓀᔥᑕ ᐁ ᒥᓂᑴᑦ ᔓᒥᓈᐳᓕᐤ; ᑭᑦ ᐃᑣᓇᐗᐤ ᒫᑲ, ᐋᔭᐌᐤ ᒪᒋ ᐊᒑᑾ᙮ 34ᐃᓕᓕᐎᑯᓯᓵᓐ ᐯᒋ ᐃᑐᑌᐤ ᐁ ᒥᒋᓱᑦ ᓀᔥᑕ ᐁ ᒥᓂᑴᑦ; ᑭᑦ ᐃᑣᓇᐗᐤ ᒫᑲ, ᒫᑎᑲ, ᐃᓕᓕᐤ ᐁ ᐅᑳᔑᑭᒥᑦ ᓀᔥᑕ ᐁ ᓂᑖᒥᓂᑴᑦ, ᑳ ᐅᑐᑌᒥᒫᑦ ᐸᑉᓕᑳᓇ ᓀᔥᑕ ᐅᒪᒋᑣᐗ! 35ᒫᑲ ᑲᑫᑕᐌᓕᑕᒧᐎᓐ ᐱᔑᒋᑖᑯ ᒥᓯᐌ ᐅᑦ ᐊᐙᔑᒥᔕ᙮
ᐸᕋᓰ ᓇᑐᒣᐤ ᒋᓴᓴ ᒋ ᐎᒋᒦᒋᓱᒥᑯᑦ
36ᐯᔭᒃ ᒫᑲ ᐊᓂᑭ ᐹᕋᓯᔭᒃ ᑮ ᓇᑕᐌᓕᒣᐤ ᑭᒋ ᐎᒋᒥᒋᓱᒥᑯᑦ᙮ ᑮ ᐱᑐᑫᐌᐤ ᒫᑲ ᐹᕋᓯᔭ ᐅ ᐙᔅᑳᔨᑲᓂᒥᓕᒃ, ᓀᔥᑕ ᑮ ᓇᐊᐱᐤ ᑭᒋ ᒥᒋᓱᑦ᙮ 37ᒫᑎᑲ, ᒫᑲ, ᐃᔅᑴᐤ ᐃᑖᐎᓂᒃ ᐅᒋ, ᑳ ᒪᒋᑣᑦ, ᐃᔅᐱ ᑫᔅᑫᓕᑕᒃ ᐁ ᐊᐱᓕᒋ ᑭᒋ ᒥᒋᓱᓕᒋ ᐸᕋᓯᔭ ᐅ ᐙᔅᑳᔨᑲᓂᒥᓕᒃ, ᑮ ᐯᑕᐤ ᐊᓯᓂᐗᑎᓕᐤ ᑕᒪᔅᑯᐎᓂᓕᐤ ᐁ ᐱᒋᔅᑎᓂᓕᒃ, 38ᓀᔥᑕ ᑮ ᓂᐸᐎᐤ ᐅᓯᑎᓕᒃ ᐅᔅᐱᔅᑾᓂᓕᒃ ᐁ ᒫᑐᑦ, ᑮ ᐊᑎ ᑭᒋᔅᑖᐸᐗᓯᑌᓀᐤ ᒫᑲ ᐁ ᐅᒋᑲᐙᐱᑦ, ᓀᔥᑕ ᑮ ᑳᓯᓇᒬᐤ ᐅᔅᑎᒀᓂᐱᐗᔭ ᐅᒋ, ᓀᔥᑕ ᑮ ᐅᒉᑕᒬᐤ ᐅᓯᑎᓕᐗ, ᑮ ᑕᒪᔅᑯᓇᒬᐤ ᒫᑲ ᑕᒪᔅᑯᐎᓂᓕᐤ ᐅᒋ᙮ 39ᐃᔅᐱ ᒫᑲ ᐊᓇ ᐸᕋᓯ ᑳ ᓇᑐᒫᑦ ᐎᐋᐸᑕᒃ, ᑮ ᐋᔭᒥᐤ ᐅᑌᐃᒃ, ᐁ ᐃᑗᑦ ᐊᐗ ᐃᓕᓕᐤ, ᑮᔥᐱᓐ ᐅᑭᔅᑭᐙᐃᑫᐎᑯᐸᓀ, ᑲᑕ ᑮ ᑭᔅᑫᓕᒣᐸᓐ ᐊᐌᓕᐗ, ᓀᔥᑕ ᑫᑯ ᑐᐎ ᐃᔅᑴᐗ ᐅᐅ ᑳ ᓵᒥᓂᑯᑦ; ᐌᓴ ᒪᒋᑡᐤ᙮
40ᒋᓴᔅ ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ, ᓵᐃᒪᓐ, ᓂᑦ ᐋᔮᓐ ᑫᒀᓐ ᑭᒋ ᐃᑎᑖᓐ᙮
ᐃᑎᑯ ᒫᑲ, ᑫᔅᑭᓄᐊᒫᑫᔭᓐ, ᐃᑗ᙮
41ᑮ ᐃᑖᐤ ᐯᔭᒃ ᐃᓕᓕᐤ ᐁ ᐋᔭᐙᑦ ᓂᔓ ᑳ ᑮ ᒪᓯᓇᐃᑫᑐᑖᑯᑦ; ᐯᔭᒃ ᑭ ᐅᒪᓯᓇᐃᑲᓂᐤ ᓂᔮᓚᓦᐤ ᒥᑖᑐᒥᑕᓇᐤ ᔔᓕᐋᓈᐱᔅᑯᔕ, ᐊᓇ ᑯᑕᒃ ᒫᑲ ᓂᔮᓚᓗᒥᑕᓇᐤ᙮ 42ᐃᔅᐱ ᒫᑲ ᐁᑳ ᐁ ᐋᔮᓕᒋ ᑫᒀᓕᐤ ᑭᒋ ᑎᐸᐃᑳᑫᓕᒋ, ᑖᐱᔅᑯᒡ ᒧᔐ ᑮ ᐌᐯᓕᑕᒪᐌᐤ᙮ ᐎᑕᒫᐎᓐ ᒫᑲ, ᐊᐌᓕᐗ ᐁ ᓂᔑᓕᒋ ᐊᐙᓯᑌ ᑫ ᓵᑭᐃᑯᑦ?
43ᓵᐃᒪᓐ ᑮ ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᐊᓂᐃ ᒥᔅᑕᐃ ᑳ ᐌᐯᓕᑕᒪᐙᑦ ᑳᑳᔦ᙮
ᑮ ᐃᑌᐤ ᒫᑲ, ᒀᔭᔉ ᑭ ᑮ ᐃᑌᓕᑌᓐ᙮ 44ᑮ ᑴᔅᑭᔅᑕᐌᐤ ᒫᑲ ᐃᔅᑴᐗ, ᑮ ᐃᑌᐤ ᒫᑲ ᓵᐃᒪᓇ, ᑭ ᐙᐸᒪᐤ ᓈ ᐊᐗ ᐃᔅᑴᐤ? ᓂ ᑮ ᐱᑐᑳᓐ ᑭ ᐙᔅᑳᔨᑲᓂᒥᒃ: ᓇᒪᐎᓚ ᒫᑲ ᑭ ᐅᒋ ᒥᓕᓐ ᓂᐱ ᑭᒋ ᑭᒋᔅᑖᐸᐗᑖᓂᐗᑭ ᓂᓯᑕ; ᒫᑲ ᐎᓚ ᓂ ᑮ ᑭᒋᔅᑕᐹᐗᓯᑌᓂᒃ ᐁ ᐅᒋᑲᐙᐱᑦ, ᓀᔥᑕ ᑮ ᑳᓯᓇᒻ ᐅᔅᑎᒀᓂᐱᐙᔭ ᐅᒋ᙮ 45ᓇᒪᐎᓚ ᑭ ᐅᒋ ᐅᒉᒥᓐ; ᒫᑲ ᐊᐗ ᐃᔅᑴᐤ, ᐃᔅᑯᓈᒃ ᑳ ᐱᑐᑫᐗᒃ, ᓇᒪᐎᓚ ᐅᒋ ᐳᓂ ᐅᒉᑕᒻ ᓂᓯᑕ᙮ 46ᓂᔅᑎᒀᓂᒃ ᓇᒪᐎᓚ ᑭ ᐅᒋ ᑕᒪᔅᑯᓂᓐ ᒥᔅᑎᑯᐱᒥ; ᒫᑲ ᐊᐗ ᐃᔅᑴᐤ ᑮ ᑐᒥᓇᒻ ᓂᓯᑕ ᑕᒪᔅᑯᐎᓂᓕᐤ᙮ 47ᐁᐗᑯ ᐅᒋ ᑭᑦ ᐃᑎᓐ, ᐅ ᒪᒋᑐᑕᒧᐎᓇ ᑳ ᒥᒉᓂᓕᑭ, ᐌᐁᓕᒋᑳᑌᓕᐗ; ᐌᓴ ᒥᔅᑕᐃ ᑮ ᓵᑭᐃᐌᐤ: ᒫᑲ ᐊᓇ ᐋᐱᔑᔥ ᑳ ᐌᐯᓕᑕᒪᐙᑲᓂᐎᑦ, ᐁᐗᒀᓇ ᐋᐱᔑᔥ ᓯᐋᑭᐃᐌᑦ᙮
48ᑮ ᐃᑌᐤ ᒫᑲ, ᑭ ᐌᐯᓕᑕᒫᑲᐎᓐ ᑭ ᒪᒋᑐᑕᒧᐎᓇ᙮
49ᐊᓂᑭ ᒫᑲ ᑳ ᐎᑕᐱᒫᒋᒃ ᐁ ᒥᒋᓱᒋᒃ ᑮ ᒫᒋ ᐃᑗᐗᒃ ᐅᑌᐃᐙᒃ, ᐊᐌᓇ ᐊᐗ ᑳ ᐁᐯᓕᑕᒫᑫᑦ ᒪᒋᑐᑕᒧᐎᓇ ᓀᔥᑕ?
50ᑮ ᐃᑌᐤ ᒫᑲ ᐃᔅᑴᐗ, ᑭ ᑖᐺᔦᓕᑕᒧᐎᓐ ᑭ ᑮ ᐱᒫᒋᐃᑯᓐ: ᑳᔮᒣᓕᑕᒧᐎᓂᒃ ᑭᑐᑌ᙮
Currently Selected:
ᐅᐸᓓᑭᔅ ᓘᒃ 7: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
