ᐅᐸᓓᑭᔅ ᓘᒃ 6:27-49 ᒫᑲ ᑭᑦ ᐃᑎᓇᐗᐤ ᑭᓚᐗᐤ ᑳ ᐯᑕᒣᒃ, ᓵᑭᐃᑯᒃ ᐊᓂᑭ ᑳ ᐸᒀᑎᑖᑾᒃ, ᒥᓗᑐᑖᑯᒃ ᐊᓂᑭ ᑳ ᐗᑳᑎᑖᑾᒃ, ᒥᓦᑭᒥᑯᒃ ᐊᓂᑭ ᑳ ᒥᒐᑭᒥᑖᑾᒃ, ᓀᔥᑕ ᐋᔭᒥᐁᔅᑕᒫᑯᒃ ᐊᓂᑭ ᑳ ᐊᔅᐱᐃᑖᑾᒃ᙮ ᐊᓇ ᒫᑲ ᑳ ᐅᑖᒪᐅᔉ ᐯᔭᒃ ᑲᓇᐗᒃ, ᑴᔅᑮᔅᑴᓕᔅᑕᐤ ᑴᔅᑭᑌ ᓀᔥᑕ; ᐊᓇ ᓀᔥᑕ ᑳ ᐅᑎᓇᒃ ᑭᑦ ᐊᒀᓂᐎᓂᓕᐤ, ᐁᑳᐎᓚ ᑭᑕᐊᒪᐤ ᑭ | ᐅᔅᑭ ᑎᔅᑌᒥᓐᑦ (MCNT91)

ᐅᐸᓓᑭᔅ ᓘᒃ 6:27-49 MCNT91

ᒫᑲ ᑭᑦ ᐃᑎᓇᐗᐤ ᑭᓚᐗᐤ ᑳ ᐯᑕᒣᒃ, ᓵᑭᐃᑯᒃ ᐊᓂᑭ ᑳ ᐸᒀᑎᑖᑾᒃ, ᒥᓗᑐᑖᑯᒃ ᐊᓂᑭ ᑳ ᐗᑳᑎᑖᑾᒃ, ᒥᓦᑭᒥᑯᒃ ᐊᓂᑭ ᑳ ᒥᒐᑭᒥᑖᑾᒃ, ᓀᔥᑕ ᐋᔭᒥᐁᔅᑕᒫᑯᒃ ᐊᓂᑭ ᑳ ᐊᔅᐱᐃᑖᑾᒃ᙮ ᐊᓇ ᒫᑲ ᑳ ᐅᑖᒪᐅᔉ ᐯᔭᒃ ᑲᓇᐗᒃ, ᑴᔅᑮᔅᑴᓕᔅᑕᐤ ᑴᔅᑭᑌ ᓀᔥᑕ; ᐊᓇ ᓀᔥᑕ ᑳ ᐅᑎᓇᒃ ᑭᑦ ᐊᒀᓂᐎᓂᓕᐤ, ᐁᑳᐎᓚ ᑭᑕᐊᒪᐤ ᑭ ᐱᓯᔅᑳᑲᓂᓕᐤ ᐊᓯᒋᑭᒋ ᐅᑎᓇᒃ᙮ ᒦᓪ ᒥᓯᐌ ᑕᑐ ᐊᐌᓇ ᑳ ᓇᑐᑕᒫᔉ; ᐊᓇ ᓀᔥᑕ ᑳ ᐅᑎᓇᒃ ᑭᑦ ᐋᐸᒋᑖᐎᓇ ᐁᑳᐎᓚ ᒥᓇ ᓇᑐᑕᒪᐤ᙮ ᑖᐱᔅᑯᒡ ᓀᔥᑕ ᐁ ᐃᔑ ᓇᑕᐌᓕᒣᑾᒃ ᐃᓕᓕᐗᒃ ᑭᒋ ᑐᑕᑖᒀᒃ, ᐁᑯ ᓀᔥᑕ ᑐᑖᑯᒃ᙮ ᐌᓴ ᑮᔥᐱᓐ ᓵᑭᐁᒀᐌ ᐊᓂᑭ ᑳ ᓴᑭᐃᑖᑾᒃ, ᑫᑯ ᓇᓈᔅᑯᒥᑯᓯᐎᓐ ᐁᔮᔦᒃ? ᐌᓴ ᐅᒪᒋᑣᐗᒃ ᓀᔥᑕ ᓵᑭᐁᐗᒃ ᐊᓂᐃ ᑳ ᓵᑭᐃᑯᒋᒃ᙮ ᑮᔥᐱᓐ ᒫᑲ ᒥᓗᑐᑕᐌᑾᐌ ᐊᓂᑭ ᑳ ᒥᓗᑐᑕᑖᑾᒃ, ᑫᑯ ᓇᓈᔅᑯᒥᑯᓯᐎᓐ ᐁᔮᔦᒃ? ᐌᓴ ᐅᒪᒋᑣᐗᒃ ᓀᔥᑕ ᑖᐱᔅᑯᒡ ᑐᑕᒶᒃ᙮ ᑮᔥᐱᓐ ᒫᑲ ᐋᐎᐁᑾᐌ ᐊᓂᑭ ᓂ ᑳ ᑭᐌ ᑎᐸᐊᒫᑯᓈᓇᒃ ᑳ ᐃᑌᓕᒣᑾᒃ, ᑫᑯ ᓇᓈᔅᑯᒥᑯᓯᐎᓐ ᐁᔮᔦᒃ? ᐌᓴ ᐅᒪᒋᑣᐗᒃ ᓀᔥᑕ ᐋᐎᐁᐗᒃ ᐅᒪᒋᑣᐗ, ᐁᑯ ᐃᔥᐱᔥ ᒥᓇ ᑭᒋ ᒥᓕᑯᒋᒃ᙮ ᒫᑲ ᓵᑭᐃᑯᒃ ᑭᓚᐗᐤ ᐊᓂᑭ ᑳ ᐸᒀᑎᑖᑾᒃ, ᓀᔥᑕ ᒥᓗᑐᑖᑫᒃ, ᓀᔥᑕ ᐋᐎᐃᐌᒃ, ᐁᑳ ᑫᒀᓐ ᒥᓇ ᐁ ᐸᑯᓭᓕᑕᒣᒃ: ᑭ ᑎᐸᐊᒫᑯᓯᐎᓂᐗᐤ ᒫᑲ ᑲᑕ ᒥᔕᐤ, ᓀᔥᑕ ᑭ ᑳ ᐅᑕᐙᔑᒥᔑᒥᑯᐗᐤ ᐊᓇ ᒥᔭᐗᒋ ᐃᔅᐯᓕᑖᑯᓯᑦ: ᐌᓴ ᐎᓚ ᑭᔐᐙᑐᑕᐌᐤ ᐊᓂᐃ ᐁᑳ ᑳ ᓇᓈᔅᑯᒧᓕᒋ ᓀᔥᑕ ᑳ ᒪᒋᑣᓕᒋ᙮ ᐁᐗᑯ ᐅᒋ ᔕᐌᓕᒋᑫᒃ, ᑖᐱᔅᑯᒡ ᑯᑖᐎᐗᐤ ᐁ ᐃᔑ ᔖᐌᓕᒋᑫᑦ᙮ ᐁᑳᐎᓚ ᑎᐹᔅᑯᓂᑫᒃ, ᐁᑯ ᐁᑳ ᑫ ᑎᐹᔅᑯᓂᑲᐎᔦᒃ: ᐁᑳᐎᓚ ᓂᔑᐗᓈᒋᒥᐌᒃ, ᐁᑯ ᐁᑳ ᑫ ᓂᔑᐗᓈᒋᒥᑲᐎᔦᒃ: ᐌᐯᓕᑕᒫᑫᒃ, ᐁᑯ ᒫᑲ ᑫ ᐌᐯᓕᑕᒫᑲᐎᔦᒃ᙮ ᒥᓕᐌᒃ, ᑭ ᑳ ᒥᓕᑲᐎᓇᐗᐤ ᒫᑲ; ᐁ ᒥᓗ ᑎᐸᐃᑳᑌᒃ, ᐁ ᒫᑯᓂᑳᑌᒃ, ᓀᔥᑕ ᐁ ᐋᔭᒪᔅᑭᓀᐸᓕᒃ, ᓀᔥᑕ ᐁ ᐹᓚᔅᑭᓀᒃ ᑭ ᑳ ᒥᓕᑲᐙᐗᒃ ᐃᓕᓕᐗᒃ ᑭ ᐱᓗᒧᐎᓂᐙᒃ᙮ ᐌᓴ ᐊᓂᒪ ᑎᐹᔨᑲᓐ ᐁ ᐃᔑ ᑎᐸᔨᑫᔦᒃ, ᐁᑯ ᓀᔥᑕ ᑭᓚᐗᐤ ᑫ ᐃᔑ ᑎᐸᐊᒫᑲᐎᔦᒃ᙮ ᑮ ᐃᑌᐤ ᒫᑲ ᓇᔅᐱᑐᐌᐎ ᐋᑕᓗᑳᓂᓕᐤ, ᐊᓇ ᓈ ᐁᑳ ᑳ ᐙᐱᑦ ᑲᑕ ᑮ ᐱᒧᑕᐁᐤ ᐊᓂᐃ ᐁᑳ ᑳ ᐙᐱᓕᒋ? ᓇᒪ ᓈ ᑖᐱᔅᑯᒡ ᑲᑕ ᐸᑭᔑᓋᒃ ᒧᓈᐃᐹᓂᒃ᙮ ᑭᔅᑭᓄᐊᒪᐙᑲᓐ ᓇᒪᐎᓚ ᐊᐙᓯᑌ ᐃᑌᓕᑖᑯᓯᐤ ᐁᑌᓕᑖᑯᓯᓕᒋ ᑳ ᑭᔅᑭᓄᐊᒫᑯᑦ: ᒫᑲ ᒥᓯᐌ ᐊᐌᓇ ᑳ ᑭᔅᑭᓄᐊᒫᑦ ᑲᑕ ᓇᔅᐱᑕᐌᐤ ᑳ ᑭᔅᑭᓄᐊᒫᑯᑦ᙮ ᑖᓀᑭ ᐌᒋ ᒫᑲ ᓈᑲᑕᐙᐸᑕᒶᑦ ᑭᒋᔖᓐ ᑳ ᐱᓯᓂᑦ, ᒫᑲ ᐁᑳ ᐁ ᓈᑲᑕᐌᓕᑕᒪᓐ ᐱᒥᑕᐗᐸᔓ ᑎᐱᓚᐌ ᑭᔅᑭᔑᑯᒃ ᑳ ᐃᑕᑾᒃ? ᓀᔥᑕᐱᑯ ᑖᓂ ᑫ ᑮ ᐃᔑ ᐃᑕᑦ ᑭᒋᔖᓐ, ᓂᒋᔖᓐ, ᐁᑯᔑ ᓂ ᑳ ᐗᓚᐎᐱᑌᓐ ᑳ ᐱᓯᓂᔭᓐ, ᐁᑳ ᑭᓚ ᐁ ᐱᓯᔅᑳᐸᑕᒪᓐ ᐱᒥᑕᐗᐸᔓ ᑎᐱᓚᐌ ᑭᔅᑭᔑᑯᒃ ᑳ ᐃᑕᑾᒃ? ᑭᓚ ᐅᑕᔭᒥᐁᑳᓱᔉ, ᓃᔥᑕᒻ ᐗᓚᐎᐌᐱᓇ ᐱᒥᑕᐗᐸᔓ ᑭᔅᑭᔑᑯᒃ ᐅᒋ, ᐁᑯ ᒫᑲ ᑫ ᓇᐋᐱᔭᓐ ᑭᒋ ᐗᓚᐎᐱᑕᒶᑦ ᑳ ᐱᓯᓂᑦ ᑭᒋᔖᓐ᙮ ᐌᓴ ᒥᓗ ᒥᓈᑎᒃ ᓇᒪᐎᓚ ᓂᑖᐎᑭᑕᐤ ᒪᒋᒥᓇ; ᓇᒪ ᓀᔥᑕ ᒪᒋ ᒥᓈᑎᒃ ᓂᑖᐎᑭᑕᐤ ᒥᓗᒥᓇ᙮ ᐌᓴ ᒥᓯᐌ ᑕᑐ ᒥᓈᑎᒃ ᑭᔅᑫᓕᑖᑯᓯᐤ ᑎᐱᓚᐌ ᐅ ᒥᓂᔕ ᐅᒋ: ᐌᓴ ᒥᔑᑲᐎᒥᓇᑯᔒᒡ ᐅᒋ ᐃᓕᓕᐗᒃ ᓇᒪᐎᓚ ᒪᐗᓱᐗᒃ ᐸᑫᓵᓂᒥᓈᓇ, ᓇᒪ ᓀᔥᑕ ᒪᐗᓱᐗᒃ ᔓᒥᓂᔕ ᐁ ᑳᔓᑌᐎᓯᓂᒋ ᒥᔅᑎᑾ ᐅᒋ᙮ ᒥᓗ ᐃᓕᓕᐤ ᐁ ᒥᒉᓂᓕᒃ ᑳ ᒥᓨᔑᓂᓕᒃ ᐅᑌᐃᒃ ᓂᑖᐎᑭᑕᐤ ᐊᓂᐁᓕᐤ ᑳ ᒥᓨᔑᓂᓕᐤ; ᒪᒋ ᐃᓕᓕᐤ ᒫᑲ ᐁ ᒥᒉᓂᓕᒃ ᑳ ᒫᓛᑕᓂᓕᒃ ᐅᑌᐃᒃ ᓂᑖᐎᑭᑕᐤ ᐊᓂᐁᓕᐤ ᑳ ᒫᓛᑕᓂᓕᒃ: ᐌᓴ ᐁ ᐃᔑ ᓵᑲᔅᑭᓀᓕᒃ ᐅᑌᐃ ᐁᑯ ᐃᔑ ᐋᔭᒥᒪᑲᓂᓕᒃ ᐅᑐᓐ᙮ ᑫᒀᓐ ᒫᑲ ᐌᒋ ᑌᐯᓕᒋᑫᔭᓐ, ᑌᐯᓕᒋᑫᔭᓐ, ᐃᔑᓂᑳᔑᔦᒃ, ᐁᑳ ᒫᑲ ᐁ ᑐᑕᒣᒃ ᐊᓂᐃ ᑫᒀᓇ ᑳ ᐃᑗᔮᓐ? ᐊᐌᓇ ᒫᑲ ᐱᐁᒋ ᓈᔑᑴ, ᓀᔥᑕ ᑳ ᐯᑕᒃ ᓂᑦ ᐃᑗᐎᓈ, ᓀᔥᑕ ᑳ ᑐᑕᒃ, ᑭ ᑳ ᐙᐸᑎᓕᑎᓇᐗᐤ ᐊᐌᓕᐗ ᓀᔅᐱᑕᐙᑦ᙮ ᓇᔅᐱᑕᐌᐤ ᐃᓕᓕᐗ ᑳ ᐅᔑᑖᓕᒋ ᐙᔅᑳᔨᑲᓂᓕᐤ, ᓀᔥᑕ ᑳ ᒧᓇᐃᑫᓕᒋ ᐊᑖᒥᒃ, ᓀᔥᑕ ᑳ ᒫᒋ ᐅᔑᑖᓕᒋ ᑌᑖᐱᔅᑳᒃ; ᐃᔅᐱ ᒫᑲ ᐱᐁᒋ ᓕᔅᑭᐳᑌᒃ, ᓯᐱ ᐁᓕᑯᒃ ᑮ ᐸᑲᒥᒋᐗᓐ ᐊᓂᒪ ᐙᔅᑳᔨᑲᓂᒃ, ᓇᒪᐎᓚ ᒫᑲ ᑮ ᐋᒋᐸᓕᑖᒪᑲᓐ; ᐌᓴ ᑮ ᒋᒪᑖᓂᐗᓐ ᑌᑖᐱᔅᑳᒃ᙮ ᒫᑲ ᐊᓇ ᑳ ᐯᑕᒃ, ᐁᑳ ᒫᑲ ᑳ ᑐᑕᒃ, ᓇᔅᐱᑕᐌᐤ ᐃᓕᓕᐗ ᐁᑳ ᐁ ᐃᑕᑖᓕᒋ ᐅᓚᔅᑕᒋᑲᓂᓕᐤ ᑳ ᐅᔑᑖᓕᒋ ᐙᔅᑳᔨᑲᓂᓕᐤ ᒣᔅᑕᔅᑲᒥᒃ; ᐁᓕᑯᒃ ᒫᑲ ᓯᐱ ᑮ ᐸᑲᒥᒋᐗᓐ ᐊᓂᒪ ᐙᔅᑳᔨᑲᓂᒃ, ᑣᔦᒃ ᒫᑲ ᑮ ᐸᑭᑎᓐ; ᐊᓂᒪ ᐙᔅᑳᔨᑲᓐ ᒫᑲ ᒥᑐᓂ ᑮᓂᔑᐗᓈᑕᓐ᙮

Read ᐅᐸᓓᑭᔅ ᓘᒃ 6