ᐅᐸᓓᑭᔅ ᓘᒃ 3
3
ᐅᑭᔅᑭᓄᐊᒫᑫᐎᓐ ᒑᓐ ᐅᓯᑲᐋᑖᑫᐤ
(ᒫᑎᐤ 3:1–12; ᒫᕐᒃ 1:1–8; ᒑᓐ 1:19–28)
1ᐁ ᓂᔮᓚᓗᔖᑉ ᐱᐴᓂᓕᒃ ᒫᑲ ᐁ ᑎᐯᓕᒋᑫᑦ ᑕᐃᐱᕆᔭᔅ ᓯᓴᕐ, ᐸᓐᑎᔭᔅ ᐹᐃᓚᑦ ᐁ ᑎᐯᓕᑕᒃ ᒎᑎᐊ, ᓀᔥᑕ ᐦᐁᕋᑦ ᐁ ᑎᐯᓕᑕᒃ ᑳᓕᓕ, ᐎᒋᔖᓇ ᐱᓕᑉ ᒫᑲ ᐁ ᑎᐯᓕᑕᒃ ᐊᐃᑎᕆᐃᐊ, ᓀᔥᑕ ᑦᕌᑯᓇᐃᑕᔅ ᐊᔅᑭᓕᐤ, ᓀᔥᑕ ᓚᐃᓭᓂᔭᔅ ᐁ ᑎᐯᓕᑕᒃ ᐋᐸᓕᓂ, 2ᐋᓇᔅ ᓀᔥᑕ ᑳᔭᐸᔅ ᐁ ᑭᒋ ᓵᓵᑭᐎᓕᐌᐎᓕᓕᐎᒋᒃ, ᒑᓐ ᓵᑲᕌᔭ ᐅᑯᓯᓴ ᑮ ᐅᑎᑎᑯᐌᐤ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐤ ᐸᑾᑕᔅᑲᒥᑳᒃ᙮ 3ᑮ ᐯᒋ ᐃᑐᑌᐤ ᒫᑲ ᒥᓯᐌ ᐊᔅᑮᒃ ᐯᔓᒡ ᒐᕐᑕᓂᒃ, ᐁ ᐙᐎᑕᒃ ᐊᓂᐁᓕᐤ ᑴᔅᑳᑎᓯᐎᓂ ᓯᑲᐋᑖᑫᐎᓂᓕᐤ ᑭᒋ ᐅᒋ ᐌᐯᓕᒋᑳᑌᑭ ᒪᒋᑐᑕᒧᐎᓇ᙮ 4ᐁ ᐃᑕᓯᓇᐃᑳᑌᒃ ᒪᓯᓇᐃᑲᓂᒃ ᐃᑕ ᐁ ᐃᑕᒀᓂᓕᒃ ᐋᐃᓭᔭ ᐅᑭᔅᑭᐙᐃᑫᐤ ᐅᑦ ᐋᔭᒥᐎᓇ, ᐁ ᐃᑗᒪᑲᒃ, ᐅ ᐯᑖᑯᓯᐎᓐ ᐊᐌᓇ ᐁ ᑌᐺᑦ ᐸᑾᑕᔅᑲᒥᑳᒃ, ᐋᔦᔅᑲᐎᑕᒫᒃ ᑫ ᐃᔑ ᐯᒋ ᐃᑐᑌᑦ ᐅᑎᐯᓕᒋᑫᐤ, ᒀᔭᔅᑯᒧᑕᐙᒃ ᐅ ᒣᔅᑲᓇᐗ᙮ 5ᒥᓯᐌ ᑕᑐ ᐁ ᑕᐗᑎᓈᒃ ᑲᑕ ᒧᔥᑭᓇᑖᓂᐗᓐ, ᓀᔥᑕ ᒥᓯᐌ ᑕᑐ ᐗᒋ ᓀᔥᑕ ᐗᒋᔑᔥ ᑲᑕ ᑕᑕᑯᐃᑳᑌᐤ; ᐃᑕ ᐁ ᐙᑲᑭ ᑲᑕ ᒀᔭᔅᑯᑖᓂᐗᓋ, ᓀᔥᑕ ᐁ ᐸᐯᔅᒀᑭ ᒣᔅᑲᓇᐗ ᑲᑕ ᔓᔕᐎᑖᓂᐗᓋ; 6ᒥᓯᐌ ᒫᑲ ᑳ ᐎᔮᓯᒋᒃ ᑲᑕ ᐙᐸᑕᒬᐗᒃ ᑭᒋᒪᓂᑐᐗ ᐅ ᐱᒫᒋᐃᐌᐎᓂᓕᐤ᙮
7ᐁᑯ ᐁᑖᑦ ᒥᔮᒪᐎᒥᒉᑎᓕᒋ ᐃᓕᓕᐗ ᑳ ᐯᒋ ᓈᑎᑯᑦ ᑭᒋ ᓯᑲᐋᑖᑯᑦ, ᐅ ᐋᔮᓂᔅᑫ ᑭᓀᐱᑯᐎᔦᒃ, ᐊᐌᓇ ᑳ ᐎᑕᒫᑖᒃ ᑭᒋ ᐅᔑᑕᒣᒃ ᐋᑯᓚᐌᓯᐎᓐ ᑫ ᐅᑎᒋᐸᓕᒃ? 8ᓄᑯᑖᒃ ᐃᓴ ᐁ ᐃᔑ ᒥᓂᔑᐗᒃ ᑴᔅᑳᑎᓯᐎᓐ; ᐁᑳᐎᓚ ᒫᑲ ᒫᒋ ᐃᑎᑎᓱᒃ, ᓂᑦ ᐋᔮᐙᓈᓐ ᐁᑉᕃᐋᒻ ᐁ ᐅᑖᐎᔮᒃ: ᐌᓴ ᑭᑦ ᐃᑎᓇᐗᐤ ᑭᒋᒪᓂᑐ ᐁ ᑲᔥᑭᑖᑦ ᐅᐅ ᐊᓯᓂᔭ ᑭᒋ ᐅᒋ ᐅᑕᐙᔑᒥᔑᑲᐙᑦ ᐁᑉᕃᐊᒪ᙮ 9ᐊᓄᒡ ᒫᑲ ᐊᓯᒋ ᒋᑲᐃᑲᓐ ᐃᑖᓂᑳᑌᐤ ᐁ ᐅᒉᐱᑭᐎᒋᒃ ᒥᔅᑎᑾᒃ: ᐁᐗᑯ ᐅᒋ ᒥᓯᐌ ᑕᑐ ᒥᔅᑎᒃ ᐁᑳ ᑳ ᓂᑕᐎᑭᑖᑦ ᒥᓗᒥᓇ ᑲᐗᐙᑲᓂᐎᐤ, ᒪᒎᔅᑕᐌᐱᓈᑲᓂᐎᐤ ᒫᑲ᙮
10ᐃᓕᓕᐗᒃ ᒫᑲ ᑮ ᑲᑴᒋᒣᐗᒃ, ᐁ ᐃᑗᒋᒃ, ᑫᒀᓐ ᒫᑲ ᑫ ᑐᑕᒫᒃ?
11ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᐊᓇ ᑳ ᐋᔮᑦ ᓂᔓ ᐱᓯᔅᑳᑲᓇ, ᐁᑯᔑ ᑲᑕ ᒥᓓᐤ ᐊᓂᐃ ᐁᑳ ᑳ ᐋᔭᓕᒋ: ᐊᓇ ᓀᔥᑕ ᑳ ᐋᔮᑦ ᒥᒋᒥᓕᐤ, ᐁᑯᔑ ᑖᐱᔅᑯᒡ ᓀᔥᑕ ᑲᑕ ᑐᑕᒻ᙮
12ᐁᑯ ᒫᑲ ᐸᑉᓕᑳᓇᒃ ᐊᓯᒋ ᐱᐁᒋ ᐃᑐᑌᒋᒃ ᑭᒋ ᓯᑲᐋᑕᐙᑲᓂᐎᒋᒃ, ᓀᔥᑕ ᑮ ᐃᑌᐗᒃ, ᑫᔅᑭᓄᐊᒫᑫᔭᓐ, ᑫᒀᓐ ᑫ ᑐᑕᒫᒃ?
13ᑮ ᐃᑌᐤ ᒫᑲ, ᐁᑳᐎᓚ ᐊᐙᓯᑌ ᐅᑎᓇᒧᒃ ᐃᔥᐱᔥ ᐊᓂᒪ ᑳ ᐃᑕᔓᒥᑲᐎᔦᒃ᙮
14ᓇᑐᐸᓕᐎᓕᓕᐗᒃ ᓀᔥᑕ ᑮ ᑲᑴᒋᒣᐗᒃ, ᐁ ᐃᑗᒋᒃ, ᑫᒀᓐ ᓂᓚᓈᓐ ᓀᔥᑕ ᑫ ᑐᑕᒫᒃ?
ᑮ ᐃᑌᐤ ᒫᑲ, ᐁᑳᐎᓚ ᐅᔑᑯᐃᒃ ᐊᐌᓇ, ᐁᑳᐎᓚ ᓀᔥᑕ ᑭᓛᔅᑭ ᒪᒥᔑᒥᒃ ᐊᐌᓇ; ᑌᐯᓕᑕᒧᒃ ᒫᑲ ᑭ ᑎᐸᐊᒫᑯᓰᐃᓂᐗᐤ᙮
15ᒣᒀᒡ ᒫᑲ ᐃᓕᓕᐗᒃ ᐁ ᑴᑕᐎᐃᑌᓕᑕᑭᐤ, ᓀᔥᑕ ᒥᓯᐌ ᐃᓕᓕᐗᒃ ᐁ ᒫᒥᑐᓀᓕᒫᒋᐤ ᒑᓇ ᐅᑌᐃᐙᒃ ᑮᔥᐱᓐ ᐃᔮᐎᓕᑴ ᐊᓇ ᙭, ᓀᔥᑕᐱᑯ ᐁᑳ᙮ 16ᒑᓐ ᑮ ᓇᔥᑴᐗᔑᐃᐌᐤ, ᐁ ᐃᑖᑦ ᒥᓯᐌ ᐁ ᐃᑕᓯᓕᒋ, ᓂᓚ ᑖᐺ ᑮ ᓯᑲᐋᑖᑎᓇᐗᐤ ᓂᐱ ᐅᒋ; ᒫᑲ ᐊᐌᓇ ᐊᐙᓯᑌ ᐁ ᓱᑳᑎᓰᑦ ᐃᔥᐱᔥ ᓂᓚ ᐯᒋ ᐃᑐᑌᐤ, ᐅ ᒪᔅᑭᓯᓀᐋᐱᔭ ᓇᒪᐎᓚ ᓂᑦ ᐃᔅᐱᑌᓕᑖᑯᓯᓐ ᑭᒋ ᐊᐱᑯᓇᒶᒃ: ᐎᓚ ᑭ ᑳ ᓯᑲᐋᑖᑯᐗᐤ ᐸᓓᑭ ᐊᒑᑾ ᐅᒋ, ᓀᔥᑕ ᐃᔥᑯᑌᓕᐤ; 17ᐅ ᐺᔮᔅᒋᒋᑲᓐ ᑕᑯᓇᒻ ᐅᒋᒌᒃ, ᒥᑐᓂ ᒫᑲ ᑲᑕ ᐹᔦᑭᑕᐤ ᐃᑕ ᐁ ᐃᔑ ᐸᑭᑎᓂᒥᒋ ᐅ ᐸᑴᔑᑲᓂᒥᓇ, ᑲᑕ ᒫᐗᒋᑕᐤ ᒫᑲ ᐸᑴᔑᑲᓂᒥᓇ ᐅ ᐸᑴᔑᑲᓂᑲᒥᑯᒃ; ᒫᑲ ᑲᑕ ᐃᔅᒀᓴᒻ ᓯᑭᐌᐸᓕᒋᑲᓂᓕᐤ ᐃᔥᑯᑌᒃ ᐁᑳ ᑫ ᐋᔅᑕᐌᓕᒃ᙮
18ᒥᒉᑦ ᒫᑲ ᑯᑕᑭᔭ ᑫᒀᓇ ᐅ ᑲᑫᔅᑭᒥᐌᐎᓂᒃ ᑮ ᐙᐎᑕᒪᐌᐤ ᐃᓕᓕᐗ᙮ 19ᒫᑲ ᐦᐁᕋᑦ ᑳ ᑭᒋᐅᑭᒫᐎᑦ, ᐁ ᑮ ᑭᑐᑎᑯᑦ ᐦᐃᕈᑎᔭᓴ ᐅᒋ ᐎᒋᔖᓇ ᐱᓕᐸ ᐎᐎᓕᐗ, ᓀᔥᑕ ᒥᓯᐌ ᐊᓂᐃ ᑳ ᑳᓛᑕᓂᓕᑭ ᑳ ᑮ ᑐᑕᒃ ᐦᐁᕋᑦ, 20ᑮ ᑐᑕᒻ ᐅᒣᓕᐤ ᐊᐙᓯᑌ ᐁ ᒫᓛᑕᓂᓕᒃ ᐃᔥᐱᔥ ᒥᓯᐌ, ᐁ ᑮ ᑭᐸᐙᑦ ᒑᓇ ᑭᐸᐅᑐᐎᑲᒥᑯᒃ᙮
ᒋᓴᔅ ᓯᑲᐋᑖᐙᑲᓂᐎᐤ
(ᒫᑎᐤ 3:13–17; ᒫᕐᒃ 1:9–11)
21ᐃᔅᐱ ᒫᑲ ᒥᓯᐌ ᐃᓕᓕᐗᒃ ᑳ ᓯᑲᐋᑕᐙᑲᓂᐎᒋᒃ, ᑮ ᐃᑭᓐ, ᒋᓴᔅ ᓀᔥᑕ ᐁ ᑮ ᓯᑲᐹᑕᐙᑲᓂᐎᑦ, ᓀᔥᑕ ᐁ ᐋᔭᒥᐋᑦ, ᑭᒋᑭᔑᒃ ᑮ ᐹᔅᑭᑌᐸᓕᐤ; 22ᑮ ᐯᒋ ᓛᔑᔅᑖᑯ ᒫᑲ ᐸᓓᑭ ᐊᒑᑾ, ᐁ ᐎᔭᐎᓕᒋ, ᑖᐱᔅᑯᒡ ᐅᒥᒦᒃ, ᐯᑖᑯᓯᐎᓐ ᒫᑲ ᑭᒋᑭᔑᑯᒃ ᑮ ᐅᒋᐸᓕᐤ, ᐁ ᐃᑗᒪᑲᒃ, ᑭᓚ ᓂᑯᓯᔅ ᑳ ᓵᑭᐃᑖᓐ, ᑭᓚ ᓈᔅᐱᒡ ᑭ ᓇᐃᓚᐌᐃᓐ᙮
ᐅᑖᓂᔅᑫ ᓂᑖᐎᑭᐎᓐ ᒋᓴᔅ
(ᒫᑎᐤ 1:1–17)
23ᒋᓴᔅ ᒫᑲ ᓈᓐᑕᐤ ᑮ ᐊᑎ ᓂᔅᑐᒥᑕᓇᐤ ᐱᐴᓀᓯᐤ ᐁ ᐅᑯᓯᓯᒥᑯᑦ ᒍᓯᐸ, (ᐁ ᐃᑌᓕᒋᑳᑌᒃ,) ᐊᐗ ᒍᓯᑉ ᐁᐗᒀᓇ ᐦᐃᓛᐃ ᐅᑯᓯᓴ, 24ᐁᐗᒀᓇ ᒫᑦᑖᑦ ᐅᑯᓯᓴ, ᐁᐗᒀᓇ ᓕᐸᐃ ᐅᑯᓯᓴ, ᐁᐗᒀᓇ ᒣᓪᑲᐃ ᐅᑯᓯᓴ, ᐁᐗᒀᓇ ᒑᓇ ᐅᑯᓯᓴ, ᐁᐗᒀᓇ ᒍᓯᑉ ᐅᑯᓯᓴ, 25ᐁᐗᒀᓇ ᒫᑕᑖᔭᔅ ᐅᑯᓯᓴ, ᐁᐗᒀᓇ ᐁᒪᔅ ᐅᑯᓯᓴ, ᐁᐗᒀᓇ ᓀᐊᒻ ᐅᑯᓯᓴ, ᐁᐗᒀᓇ ᐁᔅᓚᐃ ᐅᑯᓯᓴ, ᐁᐗᒀᓇ ᓈᑭ ᐅᑯᓯᓴ, 26ᐁᐗᒀᓇ ᒣᐋᑦ ᐅᑯᓯᓴ, ᐁᐗᒀᓇ ᒫᑕᑖᔭᔅ ᐅᑯᓯᓴ, ᐁᐗᒀᓇ ᓯᒥᔭᐃ ᐅᑯᓯᓴ, ᐁᐗᒀᓇ ᒍᓯᑉ ᐅᑯᓯᓴ, ᐁᐗᒀᓇ ᒎᑕ ᐅᑯᓯᓴ, 27ᐁᐗᒀᓇ ᒎᐊᓇ ᐅᑯᓯᓴ, ᐁᐗᒀᓇ ᕆᓴ ᐅᑯᓯᓴ, ᐁᐗᒀᓇ ᓱᕋᐸᐱᓐ ᐅᑯᓯᓴ, ᐁᐗᒀᓇ ᓴᓓᑎᔭᓪ ᐅᑯᓯᓴ, ᐁᐗᒀᓇ ᓂᕋᐃ ᐅᑯᓯᓴ, 28ᐁᐗᒀᓇ ᒣᓪᑲᐃ ᐅᑯᓯᓴ, ᐁᐗᒀᓇ ᐋᑕᐃ ᐅᑯᓯᓴ, ᐁᐗᒀᓇ ᑯᓵᒻ ᐅᑯᓯᓴ, ᐁᐗᒀᓇ ᐁᓪᒧᑖᒻ ᐅᑯᓯᓴ, ᐁᐗᒀᓇ ᐊᕐ ᐅᑯᓯᓴ, 29ᐁᐗᒀᓇ ᒍᓯ ᐅᑯᓯᓴ, ᐁᐗᒀᓇ ᐁᓕᐁᓴᕐ ᐅᑯᓯᓴ, ᐁᐗᒀᓇ ᒍᕆᒻ ᐅᑯᓯᓴ, ᐁᐗᒀᓇ ᒫᑦᑕᑦ ᐅᑯᓯᓴ, ᐁᐗᒀᓇ ᓕᐸᐃ ᐅᑯᓯᓴ, 30ᐁᐗᒀᓇ ᓯᒥᔭᓐ ᐅᑯᓯᓴ, ᐁᐗᒀᓇ ᒎᑕ ᐅᑯᓯᓴ, ᐁᐗᒀᓇ ᒍᓯᑉ ᐅᑯᓯᓴ, ᐁᐗᒀᓇ ᒍᓈᓐ ᐅᑯᓯᓴ, ᐁᐗᒀᓇ ᐃᓛᔭᑭᒻ ᐅᑯᓯᓴ, 31ᐁᐗᒀᓇ ᒥᓕᔭ ᐅᑯᓯᓴ, ᐁᐗᒀᓇ ᒥᓈᓐ ᐅᑯᓯᓴ, ᐁᐗᒀᓇ ᒫᑕᑕ ᐅᑯᓯᓴ, ᐁᐗᒀᓇ ᓀᑖᓐ ᐅᑯᓯᓴ, ᐁᐗᒀᓇ ᑌᐱᑦ ᐅᑯᓯᓴ, 32ᐁᐗᒀᓇ ᒉᓯ ᐅᑯᓯᓴ, ᐁᐗᒀᓇ ᐅᐯᑦ ᐅᑯᓯᓴ, ᐁᐗᒀᓇ ᐳᐋᔅ ᐅᑯᓯᓴ, ᐁᐗᒀᓇ ᓵᓪᒪᓐ ᐅᑯᓯᓴ, ᐁᐗᒀᓇ ᓀᐋᓴᓐ ᐅᑯᓯᓴ, 33ᐁᐗᒀᓇ ᐊᒥᓇᑖᑉ ᐅᑯᓯᓴ, ᐁᐗᒀᓇ ᐁᕌᒻ ᐅᑯᓯᓴ, ᐁᐗᒀᓇ ᐁᔅᕋᒻ ᐅᑯᓯᓴ, ᐁᐗᒀᓇ ᐯᕇᔅ ᐅᑯᓯᓴ, ᐁᐗᒀᓇ ᒎᑕ ᐅᑯᓯᓴ᙮ 34ᐁᐗᒀᓇ ᒉᑲᑉ ᐅᑯᓯᓴ, ᐁᐗᒀᓇ ᐋᐃᓯᒃ ᐅᑯᓯᓴ, ᐁᐗᒀᓇ ᐁᑉᕃᐋᒻ ᐅᑯᓯᓴ, ᐁᐗᒀᓇ ᑌᕋ ᐅᑯᓯᓴ, ᐁᐗᒀᓇ ᓀᑲᕐ ᐅᑯᓯᓴ 35ᐁᐗᒀᓇ ᓭᕋᒃ ᐅᑯᓯᓴ, ᐁᐗᒀᓇ ᕃᑲᐤ ᐅᑯᓯᓴ, ᐁᐗᒀᓇ ᐯᓓᒃ ᐅᑯᓯᓴ, ᐁᐗᒀᓇ ᐦᐃᐸᕐ ᐅᑯᓯᓴ, ᐁᐗᒀᓇ ᓭᓚ ᐅᑯᓯᓴ, 36ᐁᐗᒀᓇ ᑫᓈᓐ ᐅᑯᓯᓴ, ᐁᐗᒀᓇ ᐋᕐᐹᒃᓵᑦ ᐅᑯᓯᓴ, ᐁᐗᒀᓇ ᓭᒻ ᐅᑯᓯᓴ, ᐁᐗᒀᓇ ᓄᐊ ᐅᑯᓯᓴ, ᐁᐗᒀᓇ ᓓᒣᒃ ᐅᑯᓯᓴ, 37ᐁᐗᒀᓇ ᒫᑑᓴᓚ ᐅᑯᓯᓴ, ᐁᐗᒀᓇ ᐃᓇᒃ ᐅᑯᓯᓴ, ᐁᐗᒀᓇ ᒉᕆᑦ ᐅᑯᓯᓴ, ᐁᐗᒀᓇ ᒣᓕᓖᓐ ᐅᑯᓯᓴ, ᐁᐗᒀᓇ ᑫᓈᓐ ᐅᑯᓯᓴ, 38ᐁᐗᒀᓇ ᐁᓇᔅ ᐅᑯᓯᓴ, ᐁᐗᒀᓇ ᓭᑦ ᐅᑯᓯᓴ, ᐁᐗᒀᓇ ᐋᑕᒻ ᐅᑯᓯᓴ, ᐁᐗᒀᓇ ᑭᒋᒪᓂᑐ ᐅᑯᓯᓴ᙮
Currently Selected:
ᐅᐸᓓᑭᔅ ᓘᒃ 3: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
