ᐅᐸᓓᑭᔅ ᓘᒃ 11
11
ᒋᓴᔅ ᑭᔅᑭᓄᐊᒫᑫᐤ ᐊᔭᒥᐊᐎᓂᓕᐤ
(ᒫᑎᐤ 6:9–13; 7:7–11)
1ᑮ ᐃᑭᓐ ᒫᑲ ᐯᔭᑾᐤ ᑳ ᐋᔭᒥᐋᑦ ᐙᔦᔥ, ᐃᔅᐱ ᑳ ᐳᓂᑦ, ᑮ ᐃᑎᑯ ᐯᔭᒃ ᐅ ᑭᔅᑭᓄᐊᒪᐙᑲᓇ, ᑌᐯᓕᒋᑫᔭᓐ, ᑭᔅᑭᓄᐊᒪᐎᓈᓐ ᑭᒋ ᐋᔭᒥᐋᔮᒃ, ᑖᐱᔅᑯᒡ ᒑᓐ ᓀᔥᑕ ᑳ ᐃᔑ ᑭᔅᑭᓄᐊᒪᐙᑦ ᐅ ᑭᔅᑭᓄᐊᒪᐙᑲᓇ᙮
2ᑮ ᐃᑌᐤ ᒫᑲ, ᐃᔅᐱ ᐃᐋᔭᒥᐋᔦᑯ, ᐃᑗᒃ, ᓄᑖᐎᓈᓐ, ᑭᒋᑭᔑᑯᒃ ᑳ ᐃᑖᔭᓐ, ᑲᑕ ᐎ ᐸᓓᑫᓕᒋᑳᑌᐤ ᑭᑦ ᐃᔑᓂᑳᓱᐎᓐ᙮ ᑭᑦ ᐅᑭᒫᐎᐎᓐ ᑲᑕ ᐎ ᐅᑎᒋᐸᓕᐤ᙮ ᐁ ᐃᑌᓕᑕᒪᓐ ᑲᑕ ᐎ ᑐᒋᑳᑌᐤ, ᑖᐱᔅᑯᒡ ᑭᒋᑭᔑᑯᒃ, ᐁᑯ ᓀᔥᑕ ᐊᔅᑮᒃ᙮ 3ᒥᓕᓈᓐ ᑕᑡᐤ ᐁ ᑭᔑᑳᒃ ᑫ ᐅᒋ ᐱᒫᑎᓯᔮᒃ᙮ 4ᐌᐯᓕᑕᒪᐎᓈᓐ ᒫᑲ ᓂ ᒪᒋᑐᑕᒧᐎᓂᓈᓇ; ᐌᓴ ᓂᓚᓈᓐ ᓀᔥᑕ ᓂ ᐌᐯᓕᑕᒪᐙᓈᓐ ᒥᓯᐌ ᑕᑐ ᐊᐌᓇ ᑳ ᒪᓯᓇᐃᑫᑐᑕᐎᔭᒥᑦ᙮ ᐁᑳᐎᓚ ᒫᑲ ᐃᑐᑕᐃᓈᓐ ᑫ ᐃᔑ ᑲᑴᒋᐃᑲᐎᔮᒃ; ᒫᑲ ᒥᑖᑴᓇᒪᐎᓈᓐ ᒪᒋ ᑫᒀᓇ᙮
5ᑮ ᐃᑌᐤ ᒫᑲ, ᐊᐌᓇ ᐁ ᐃᑕᔑᔦᒃ ᐁ ᐅᑐᑌᒥᑦ ᑫ ᓇᑕᐙᐸᒫᑦ ᐁ ᐋᐱᑕ ᑎᐱᔅᑳᓕᒃ, ᓀᔥᑕ ᑫ ᐃᑖᑦ, ᓂᑐᑌᒻ, ᐋᐎᐃᓐ ᓂᔅᑐ ᐊᓚᑯᓇᐗᒃ; 6ᐌᓴ ᓂ ᑮ ᐯᒋ ᐅᑎᑎᒃ ᐯᔭᒃ ᓂᑐᑌᒻ ᐁ ᐱᒥᐱᒋᑦ, ᓇᒪᐎᓇ ᑫᒀᓐ ᒫᑲ ᓂᑦ ᐋᔮᓐ ᑭᒋ ᐅᓚᔅᑐᐗᒃ? 7ᐎᓚ ᒫᑲ ᐱᑐᑲᒥᒃ ᑲᑕ ᐅᒋ ᓇᔥᑴᐗᔑᐃᐌᐤ, ᐁ ᐃᑗᑦ, ᐁᑳᐎᓚ ᒥᑯᔅᑳᒋᐃᓐ; ᐃᔥᒀᑌᒻ ᐋᔕᔾ ᑭᐸᐃᑳᑌᐤ, ᓂᑦ ᐊᐙᔑᒥᔕᒃ ᓀᔥᑕ ᓂ ᐎᐯᒥᑾᒃ ᓂᐯᐎᓂᒃ: ᓇᒪᐎᓚ ᓂ ᑮ ᐗᓂᔥᑳᓐ ᑭᒋ ᒥᓕᑖᓐ᙮ 8ᑭᑦ ᐃᑎᓇᐗᐤ, ᐋᑕ ᐁᑳ ᐁ ᐎ ᐗᓂᔥᑳᑦ ᑭᒋ ᒥᓛᑦ ᐁ ᐅᑐᑌᒥᒫᑦ; ᐁᓕᐌᒃ ᒫᑲ, ᒥᒉᑡᐤ ᐁ ᓇᑐᑕᒫᑯᑦ, ᑲᑕ ᐗᓂᔥᑲᐤ, ᓀᔥᑕ ᑲᑕ ᒥᓓᐤ ᑕᑐ ᑳ ᓇᑕᐌᓕᒫᓕᒋ᙮
9ᑭᑦ ᐃᑎᓇᐗᐤ ᒫᑲ, ᓇᑐᑕᒫᑫᒃ, ᑭ ᑳ ᒥᓕᑲᐎᓇᐗᐤ; ᓈᓇᑕᐌᓕᑕᒧᒃ, ᑭ ᑳ ᒥᔅᑫᓇᐗᐤ ᒫᑲ; ᐹᐹᐙᔨᑫᒃ, ᑭ ᑳ ᐹᔅᑭᑌᓇᒫᑲᐎᓇᐗᐤ ᒫᑲ᙮ 10ᐌᓴ ᒥᓯᐌ ᑕᑐ ᐊᐌᓇ ᑳ ᓇᑐᑕᒫᑦ, ᒥᓛᑲᓂᐎᐤ; ᐊᓇ ᒫᑲ ᑳ ᓈᓇᑕᐌᓕᑕᒃ, ᒥᔅᑲᒻ; ᐊᓇ ᒫᑲ ᑳ ᐸᐹᐙᔨᑫᑦ ᐹᔅᑭᑌᓇᒪᐗᐤ᙮ 11ᑮᔥᐱᓐ ᐊᐌᓇ ᐁ ᐃᑕᔑᔦᒃ ᐁ ᐅᑖᐎᒫᐎᑦ ᐊᓚᑯᓇᐗ ᑫ ᓇᑐᑕᒫᑯᑦ ᐅᑯᓯᓴ, ᐅᓯᓂᔭ ᓈ ᑲᑕ ᒥᓓᐤ? ᓀᔥᑕᐱᑯ ᑮᔥᐱᓐ ᓇᒣᓴ ᑫ ᓇᑐᑕᒫᑯᑦ, ᒦᒃᓱᒡ ᓇᒣᓴ ᓈ ᑲᑕ ᒥᓓᐤ ᑭᓀᐱᑾ? 12ᓀᔥᑕᐱᑯ ᑮᔥᐱᓐ ᐙᐎᓕᐤ ᑫ ᓇᑐᑕᒫᑯᑦ, ᑲᑕ ᒥᓓᐤ ᓈ ᔅᑲᕐᐱᔭᓇ? 13ᑮᔥᐱᓐ ᒫᑲ ᑭᓚᐗᐤ ᐁ ᐋᑕ ᒪᒋᑣᔦᒃ ᑫᔅᑫᓕᑕᒧᐌᑴ ᑭᒋ ᐃᔑ ᒥᓓᑾᒃ ᒥᓗ ᒥᓕᐌᐎᓇ ᑭᑦ ᐊᐙᔑᒥᔑᐙᐗᒃ, ᑖᓂ ᒫᑲ ᐊᐙᓯᑌ ᐃᔥᐱᔥ ᑯᑖᐎᐗᐤ ᑭᒋᑭᔑᑯᒃ ᑳ ᐃᑖᑦ ᐸᓓᑭ ᐊᒑᑾ ᑫ ᒥᓛᑦ ᐊᓂᐃ ᑳ ᓇᑐᑕᒫᑯᑦ?
ᒋᓴᔅ ᓀᔥᑕ ᐯᓪᓯᐸᑉ
(ᒫᑎᐤ 12:22–30; ᒫᕐᒃ 3:20–27)
14ᑮ ᐗᓚᐎᐌᐱᓀᐸᓐ ᒫᑲ ᒥᒋ ᐊᒑᑾ, ᓇᒪ ᒫᑲ ᑮ ᓂᑕᐌᓕᐗ᙮ ᑮ ᐃᑭᓐ ᒫᑲ, ᐃᔅᐱ ᑳ ᐗᓚᐐᑦ ᒪᒋ ᐊᒑᒃ, ᐁᑳ ᑳ ᓂᑕᐌᑦ ᑮ ᐋᔭᒥᐤ; ᐃᓕᓕᐗᒃ ᒫᑲ ᑮ ᒫᒪᔅᑳᑕᒶᒃ᙮ 15ᒫᑲ ᐋᑎᑦ ᐁ ᐃᑕᓯᒋᒃ ᑮ ᐃᑗᐗᒃ, ᐗᓚᐎᐌᐯᓀᐤ ᒪᒋ ᐊᒑᑾ ᐁ ᐎᒋᐃᑯ ᐲᓪᓯᐸᓚ ᒪᒋ ᐊᒑᑾᒃ ᐅᑦ ᐅᑭᒫᒥᐙᐗ᙮
16ᑯᑕᑭᔭᒃ ᒫᑲ, ᐁ ᑲᑴᒋᐋᒋᒃ, ᑮ ᓇᑕᐌᓕᑕᒪᐌᐗᒃ ᑭᔅᑭᓄᐙᒋ ᐙᐸᑎᓕᐌᐎᓂᓕᐤ ᑭᒋᑭᔑᑯᒃ ᐅᒋ᙮ 17ᒫᑲ ᐎᓚ, ᐁ ᑭᔅᑫᓕᑕᒸᑦ ᐅ ᒥᑐᓀᓕᒋᑫᐎᓂᓕᐗ, ᑮ ᐃᑌᐤ, ᒥᓯᐌ ᑕᑐ ᐅᑭᒫᐎᐎᓐ ᑳ ᓄᑎᓂᑎᓱᒪᑲᒃ ᐅᒋᑕᐤ ᑲᑕ ᓂᔑᐗᓈᑕᓐ; ᓀᔥᑕ ᐙᔅᑳᔨᑲᓐ ᑳ ᓄᑎᓂᑎᓱᒪᑲᒃ ᐸᑭᑎᓐ᙮ 18ᑮᔥᐱᓐ ᓀᔥᑕ ᓭᑖᓐ ᓂᐅᑎᓂᑎᓱᑴ, ᑖᓂ ᑫ ᐃᔑ ᐃᑕᔅᑭᑌᓕᒃ ᐅᑦ ᐅᑭᒫᐎᐎᓐ? ᐌᓴ ᑭᑦ ᐃᑣᓇᐗᐤ ᐁ ᐗᓚᐎᐌᐱᓇᑭᒃ ᒪᒋ ᐊᒑᑾᒃ ᐁ ᐎᒋᐃᑦ ᐲᓪᓯᐸᓪ᙮ 19ᑮᔥᐱᓐ ᒫᑲ ᐲᓪᓯᐸᓪ ᐅᒋ ᐌᓚᐎᐌᐱᓈᓈᑫᓇᒃ ᒪᒋ ᐊᒑᑾᒃ, ᐊᐌᓇ ᐊᓇ ᑳ ᐅᒋ ᐗᓚᐎᐌᐱᓈᒋᒃ ᑭᑯᓯᓯᐙᐗᒃ? ᐁᐗᑯ ᐅᒋ ᐎᓚᐗᐤ ᑭ ᑳ ᑎᐹᔅᑯᓂᑯᐙᐗᒃ᙮ 20ᒫᑲ ᑮᔥᐱᓐ ᓂᓚ ᑭᒋᒪᓂᑐ ᐅ ᓕᓕᑭᒋᒑᓐ ᐅᒋ ᐗᓚᐎᐌᐱᓇᑭᒃ ᒪᒋ ᐊᒑᑾᒃ, ᐁᑯ ᑫᒋᓈᔥ ᐌᑎᑎᑯᐌᒃ ᑭᒋᒪᓂᑐ ᐅᑦ ᐅᑭᒫᐎᐎᓐ᙮
21ᐃᔅᐱ ᐁ ᒪᔥᑲᐎᓯᑦ ᐃᓕᓕᐤ ᐁ ᓇᑐᐸᓕᐎᐅᑦ ᑫᓇᐌᓕᑕᑭ ᐅ ᑭᒋᐙᔅᑳᔨᑲᓐ, ᐅᑦ ᐋᔮᓇ ᑲᔭᒻ ᐃᑕᑾᓂᓕᐗ: 22ᒫᑲ ᐃᔅᐱ ᐅᑎᑎᑯᑌ ᐊᐙᓯᑌ ᐁ ᒪᔥᑲᐎᓯᓕᒋ ᐃᓕᓕᐗ, ᓀᔥᑕ ᔖᑯᒋᐃᑯᑌ, ᒪᔅᑲᒥᑯ ᒥᓯᐌ ᐅ ᓇᑐᐸᓕᐎ ᐋᐸᒋᑖᑲᓇ ᑳ ᑮ ᒪᒥᔑᑐᑕᒃ, ᓀᔥᑕ ᓈᓂᔓᑖᓕᐗ ᐅ ᒪᔅᑲᑗᐎᓂᓕᐗ᙮
23ᐊᓇ ᐁᑳ ᑳ ᐎᒋᐃᑦ ᓂ ᓇᔅᑯᔅᑖᒃ: ᐊᓇ ᓀᔥᑕ ᐁᑳ ᑳ ᐎᒋᐃᑦ ᐁ ᒧᔕᑭᓂᑫᐗᒃ, ᐗᓴᓶᐱᓂᑫᐤ᙮
ᑳ ᐯᒋ ᑮᐌᑦ ᒪᒋ ᐊᒑᒃ
(ᒫᑎᐤ 12:43–45)
24ᐃᔅᐱ ᐎᓕᐱ ᐊᒑᒃ ᑳ ᐗᓚᐎᒋ ᐃᓕᓕᒃ ᐅᒋ, ᐹᐱᒧᑌᐤ ᐃᑕ ᐁ ᐹᒀᓕᒃ, ᐁ ᓈᓇᑕᐙᐸᑕᒃ ᑫ ᐃᔑ ᐋᓜᐱᑦ: ᐁᑳ ᒫᑲ ᐁ ᒥᔅᑲᒃ, ᐃᑗᐤ, ᓂ ᑳ ᑭᐙᓐ ᓂ ᐙᔅᑳᔨᑲᓂᒥᒃ ᐃᑕ ᑳ ᑮ ᐅᒋ ᐙᓚᐎᔮᓐ᙮ 25ᐃᔅᐱ ᒫᑲ ᑌᑯᔑᒃ, ᒥᔅᑲᒻ ᐁ ᐌᐸᐃᑳᑌᓕᒃ ᓀᔥᑕ ᐁ ᐙᐌᔑᒋᑳᑌᓕᒃ᙮ 26ᐁᑯ ᐁᑐᑌᑦ, ᐅᑎᓇᒫᓱ ᒫᑲ ᓂᔂᔅ ᑯᑕᑭᔭ ᐊᒑᑾ ᐊᐙᓯᑌ ᒣᒋᑣᓕᒋ ᐃᔥᐱᔥ ᐎᓚ ᑫᒋᐙᒃ; ᐱᑐᑫᐗᒃ ᒫᑲ, ᐁᑯᑕ ᓀᔥᑕ ᐙᑭᒋᒃ: ᒫᒋᒡ ᐅᑦ ᐃᔑᐋᔭᐎᓐ ᒫᑲ ᐊᓇ ᐃᓕᓕᐤ ᐊᐙᓯᑌ ᒫᓛᑕᓂᓕᐤ ᐃᔥᐱᔥ ᓃᔥᑕᒻ᙮
ᑖᐺ ᒥᓜᓕᒧᐎᓐ
27ᑮ ᐃᑭᓐ ᒫᑲ, ᒣᒀᒡ ᐁ ᐋᔭᒥᑦ ᐅᐅ ᑫᒀᓇ, ᐯᔭᒃ ᐃᔅᑴᐤ ᐁ ᒪᐗᒋᐃᑐᓕᒋ ᐃᓕᓕᐗ ᐅᒋ ᑮ ᑌᐺᐤ, ᓀᔥᑕ ᑮ ᐃᑌᐤ, ᔕᐌᓕᑖᑾᓐ ᐊᓂᒪ ᒥᔅᐹᔭᐤ ᑳ ᐱᒥᐎᓕᑯᔭᓐ, ᓀᔥᑕ ᒥᒍᒍᔑᒪᒃ ᑳ ᐅᒋ ᓄᔖᓂᔭᓐ᙮
28ᒫᑲ ᑮ ᐃᑗᐤ, ᐁᐁ, ᐊᐙᓯᑌ ᔕᐌᓕᑖᑯᓯᐗᒃ ᐊᓂᑭ ᑳ ᐯᑕᒸᒋᒃ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐤ, ᓀᔥᑕ ᑳ ᐱᔑᒋᑕᒀᒋᒃ᙮
ᓇᑐᒫᐗᒃ ᒪᒫᑕᐎ ᐃᔑᒋᑫᐎᓐ
(ᒫᑎᐤ 12:38–42)
29ᐃᔅᐱ ᒫᑲ ᐃᓕᓕᐗᒃ ᐁ ᒥᒉᑌᒋᒃ ᒥᔭᒪᐎ ᒪᐗᒋᐃᑐᒋᒃ, ᑮ ᒫᒋ ᐃᑗᐤ, ᐅᑯ ᒪᒋ ᐋᓂᔅᑫ ᐃᓕᓕᐎᐗᒃ; ᓈᓇᑕᐌᓕᑕᒶᒃ ᑭᔅᑭᓄᐙᒋ ᐙᐸᑎᓕᐌᐎᓂᓕᐤ, ᓇᒪᐎᓚ ᒫᑲ ᑲᑕ ᒥᓛᐗᒃ ᐱᑯ ᒍᓇ ᐅᑭᔅᑭᐙᐃᑫᐤ ᐅ ᑭᔅᑭᓄᐙᒋ ᐙᐸᑎᓕᐌᐎᓐ᙮ 30ᐌᓴ ᑖᐱᔅᑯᒡ ᐁ ᑮ ᑭᔅᑭᓄᐙᒋ ᐙᐸᑎᓕᐌᐎᓂᐎᑦ ᒍᓇ ᑭᒋ ᐙᐸᒥᑯᑦ ᓂᓂᐱ, ᐃᓕᓕᐗ, ᐁᑯ ᓀᔥᑕ ᑫ ᐃᑎᑦ ᐃᓕᓕᐎᑯᓯᓵᓐ ᑭᒋ ᐙᐸᒥᑯᑦ ᐅᐅ ᐋᓂᔅᑫ ᐃᓕᓕᐗ᙮ 31ᑭᒋᐅᑭᒫᔅᑴᐤ ᔖᐗᓄᑖᒃ ᑳ ᑎᐯᓕᒋᑫᑦ ᑲᑕ ᐎᒋᑳᐸᐎᔅᑕᐌᓐ ᑎᐹᔅᑯᓂᑫᐎᓂᒃ ᐅᐅ ᐃᓕᓕᐗ ᐊᓄᒡ ᑳ ᐱᒫᑎᓯᓕᒋ, ᓀᔥᑕ ᑲᑕ ᓂᔑᐗᓈᒋᒣᐤ: ᐌᓴ ᐎᓚ ᐃᔅᒀᔮᒃ ᐊᔅᑮᒡ ᑮ ᐯᒋ ᐅᑐᑌᐤ ᑭᒋ ᐯᑕᒸᑦ ᓴᓚᒪᓇ ᐅ ᑲᑫᑕᐌᓕᑕᒧᐎᓂᓕᐤ; ᒫᑎᑲ, ᒫᑲ, ᐊᐌᓇ ᐊᐙᓯᑌ ᐁ ᐃᔅᐯᓕᑖᑯᓯᑦ ᐃᔥᐱᔥ ᓴᓚᒪᓐ ᐅᑕ ᐃᑖᐤ᙮ 32ᓂᓂᐱ ᐃᓕᓕᐗᒃ ᑲᑕ ᐎᒋᑳᐸᐎᔅᑕᐌᐗᒃ ᐅᐅ ᐊᓄᒡ ᑳ ᐱᒫᑎᓯᓕᒋ, ᑲᑕ ᓂᔑᐗᓇᒋᒣᐗᒃ ᒫᑲ: ᐌᓴ ᑮ ᒥᒋᓇᐌᔦᓕᑕᒶᒃ ᐁ ᑮ ᑲᑫᔅᑭᒥᑯᒋᒃ ᒍᓇᐗ; ᒫᑎᑲ, ᒫᑲ, ᐊᐌᓇ ᐊᐙᓯᑌ ᐁ ᐃᔅᐯᓕᑖᑯᓯᑕ ᐃᔥᐱᔥ ᒍᓇ ᐅᑕ ᐃᑖᐤ᙮
ᐙᓭᔮᓯᐎᓐ
(ᒫᑎᐤ 5:15; 6:22–23)
33ᓇᒪᐎᓚ ᐊᐌᓇ, ᑳ ᓴᔅᑲᐊᑭ ᐙᔅᑌᓇᒫᑲᓂᓕᐤ, ᑳᑕᓄᒃ ᐊᔅᑕᐤ, ᓇᒪ ᓀᔥᑕ ᔑᐹ ᐙᐎᐋᑖᑲᓂᒃ, ᒫᑲ ᐙᔅᑌᓇᒫᑲᓈᑎᑯᒃ, ᐊᓂᑭ ᑳ ᐱᑐᑫᒋᒃ ᑭᒋ ᐙᐸᑕᑭᒃ ᐙᔅᑌᐎᓂᓕᐤ᙮ 34ᒦᔅᑭᔑᒃ ᐌᒋ ᐙᓭᔮᒃ ᒥᔭᐤ: ᑮᔥᐱᓐ ᒫᑲ ᑮᔅᑭᔑᒃ ᐯᓓᑲᓄᑴ, ᒥᓯᐌ ᑭᔭᐤ ᑲᑕ ᐅᒋ ᓵᑲᔅᑭᓀᐤ ᐙᓭᔮᓯᐎᓐ; ᒫᑲ ᐃᔅᐱ ᒥᔭᓛᑕᓄᑴ ᑭᔅᑭᔑᒃ, ᑭᔭᐤ ᓀᔥᑕ ᑲᑕ ᐅᒋ ᓵᑲᔅᑭᓀᐤ ᐗᓂᑎᐱᔅᑭᓯᐎᓐ᙮ 35ᐁᐗᑯ ᐅᒋ ᔮᒀᒥᓰ ᐊᓂᒪ ᐙᓭᔮᓯᐎᓐ ᑳ ᐱᒋᔅᑳᑯᔭᓐ ᐁᑳ ᑭᒋ ᐗᓂᑎᐱᔅᑭᓯᐃᓂᐗᒃ᙮ 36ᑮᔥᐱᓐ ᒫᑲ ᒥᓯᐌ ᑭᔭᐤ ᓯᐋᑲᔅᑭᓀᑴ ᐙᓭᔮᓯᐎᓐ, ᐁᑳ ᐙᔦᔥ ᐃᑕ ᐁ ᑎᐱᔅᑭᓯᒪᑲᒃ, ᒥᓯᐌ ᑲᑕ ᐅᒋ ᓵᑲᔅᑭᓀᐤ ᐙᓭᔮᓯᐎᓐ, ᑖᐱᔅᑯᒡ ᐁ ᐙᔅᑌᓇᒫᑯᔭᓐ ᐙᔅᑌᓇᒫᑲᓐ ᐁ ᐙᔅᑌᒃ᙮
ᒋᓴᔅ ᐋᑕᐌᓂᒣᐤ ᐸᕋᓰᔭ ᓀᔥᑕ ᐊᓂᐃ ᑳ ᑭᔅᑭᓄᐊᒫᑫᒋᒃ ᐅᓚᔓᐌᐎᓂᓕᐤ
(ᒫᑎᐤ 23:1–36; ᒫᕐᒃ 12:38–40)
37ᒣᒀᒡ ᒫᑲ ᐁ ᐋᔭᒥᑦ, ᑮ ᓇᑕᐌᓕᒥᑯ ᐯᔭᒃ ᐸᕋᓯᔭ ᑭᒋ ᐎ ᒥᒋᓱᒫᑦ: ᑮ ᐱᑐᑫᐤ ᒪᑲ, ᓀᔥᑕ ᑮ ᓇᐊᐱᐤ ᑭᒋ ᒥᒋᓱᑦ᙮ 38ᐃᔅᐱ ᒫᑲ ᐊᓇ ᐸᕋᓯ ᐎᐋᐸᑕᒃ, ᑮ ᒫᒪᔅᑳᑕᒻ ᐁᑳ ᐱᑕᒫ ᐁ ᐅᒋ ᑭᒋᔅᑖᐸᐗᓗᓕᒋ ᐸᒧᔑ ᒥᒋᓱᓈᓂᐗᒃ᙮ 39ᐅᑎᐯᓕᒋᑫᐤ ᒫᑲ ᑮ ᐃᑌᐤ, ᑭᓚᐗᐤ ᐁ ᐸᕋᓯᐎᔦᒃ ᑭ ᑳᓯᓀᓇᐗᐤ ᐗᔅᑭᒡ ᒥᓂᒀᑲᓐ ᓀᔥᑕ ᓇᐸᑯᓛᑲᓐ; ᒫᑲ ᐱᒋ ᑭ ᓵᑲᔅᑭᓀᓇᐗᐤ ᒪᔅᑲᑗᐎᓐ ᓀᔥᑕ ᒪᒑᑎᓯᐎᓐ᙮ 40ᑭᓚᐗᐤ ᑲᑫᐹᑎᓯᑐᒃ! ᓇᒪ ᓈ ᐊᓇ ᑳ ᑮ ᐅᔑᑖᑦ ᐊᓂᐁᓕᐤ ᐗᔅᑮᒡ, ᑮ ᐅᔑᑕᐤ ᓀᔥᑕ ᐊᓂᐁᓕᐤ ᐱᒋ ᑳ ᐃᑕᑾᓂᓕᒃ? 41ᒫᑲ ᓇᐗᒡ ᒥᓕᐌᒃ ᐊᓂᐃ ᑫᒀᓇ ᑳ ᐋᔮᔦᒃ ᐅᒋ, ᐁᑯ ᒥᓯᐌ ᑫᒀᓇ ᑫ ᐹᔦᑭᑣᑯᔦᒃ᙮
42ᒫᑲ ᑭ ᑳ ᑲᒀᑕᑭᓯᓇᐗᐤ, ᐸᕋᓯᐃᑐᒃ! ᐌᓴ ᑭ ᐸᑭᑎᓀᓇᐗᐤ ᐯᔭᒃ ᐃᔥᐱᔥ ᐁ ᑮ ᒥᑖᑐᑖᓂᐗᑭ ᒥᓐᑦ ᓀᔥᑕ ᕉ, ᓀᔥᑕ ᒥᓯᐌ ᓇᓈᑲᐤ ᓂᑖᐎᑭᑖᑲᓂᔕ, ᑭᑦ ᐋᔗᐁᓇᐗᐤ ᑎᐹᔅᑯᓂᑫᐎᓐ ᓀᔥᑕ ᑭᒋᒪᓂᑐ ᐅ ᓵᑭᐃᑯᓯᐎᓐ: ᐅᐅ ᑭ ᑳ ᑮ ᑐᑌᑕᐗᐤ, ᐁᑳ ᒫᑲ ᑭ ᑳ ᐋᔗᐁᑕᐗᐤ ᐊᓂᒪ ᑯᑕᒃ᙮
43ᑭ ᑳ ᑲᒀᑐᑭᓯᓇᐗᐤ, ᐸᕋᓯᐃᑐᒃ! ᐌᓴ ᑭ ᓵᑭᑖᓇᐗᐤ ᑭᒋ ᑌᑕᐱᐎᓇ ᐋᔭᒥᐁᐎᑲᒥᑯᒃ, ᓀᔥᑕ ᐊᑕᒥᔅᑳᑯᓯᐎᓇ ᐃᑕ ᐁ ᐊᑖᒥᑐᓈᓂᐗᒃ᙮ 44ᑭ ᑳ ᑲᒀᑕᑭᓯᓇᐗᐤ, ᐅᒪᓯᓇᐃᑫᑐᒃ ᓀᔥᑕ ᐸᕋᓯᐃᑐᒃ: ᐅᑕᔭᒥᐁᑳᓱᑐᒃ! ᐌᓴ ᑖᐱᔅᑯᒡ ᓕᑾᐊᔅᑳᓇ ᐁᑳ ᐁ ᓄᑾᑭ ᑭᑦ ᐃᔑᓈᑯᓯᓇᐗᐤ, ᐃᓕᓕᐗᒃ ᒫᑲ ᑕᑯᒡ ᑳ ᐱᒧᑌᒋᒃ ᓇᒪᐎᓚ ᑭᔅᑫᓕᑕᒶᒃ᙮
45ᐁᑯ ᓀᔥᑴᐗᔑᐃᐌᑦ ᐯᔭᒃ ᐊᓂᑭ ᐅᓚᔓᐌᐎᓕᓕᐙᒃ, ᓀᔥᑕ ᑮ ᐃᑌᐤ, ᑫᔅᑭᓄᐊᒫᑫᔭᓐ, ᐅᒪ ᐁ ᐃᑗᔭᓐ, ᓂᓚᓈᓐ ᓀᔥᑕ ᑭ ᒫᓓᓕᒥᓇᓐ᙮
46ᑮ ᐃᑗᐤ ᒫᑲ, ᑭ ᑳ ᑲᒀᑕᑭᓯᓇᐗᐤ ᓀᔥᑕ ᐅᓚᔓᐌᐎᓕᓕᑐᒃ! ᐌᓴ ᑭ ᐳᔅᒋᐗᑕᐊᐙᐗᒃ ᐃᓕᓕᐗᒃ ᐎᐗᔑᐎᓇ ᐁ ᐋᓕᒪᑭ ᑭᒋ ᐎᐗᔑᓈᓂᐗᑭ, ᑭᓚᐗᐤ ᒫᑲ ᓇᒪᐎᓚ ᑭ ᓵᒥᓀᓇᐗᐤ ᐎᐗᔑᐎᓇ ᐯᔭᒃ ᑭ ᓕᓕᑭᒋᒑᓂᐗᐤ ᐅᒋ᙮ 47ᑭ ᑳ ᑲᒀᑕᑭᓯᓇᐗᐤ! ᐌᓴ ᑭᑦ ᐅᔑᑕᒸᓇᐗᐤ ᐅ ᒋᐹᔨᑲᒥᑯᐙᐗ ᐅᑭᔅᑭᐙᐃᑫᐗ ᑯᑖᐎᐙᐗᒃ ᒫᑲ ᑭ ᓂᐸᐁᐗᐤ᙮ 48ᑖᐺ ᑭ ᓄᑯᑖᓇᐗᐤ ᐁ ᒥᓜᓕᑕᒬᒃ ᑯᑖᐎᐙᐗᒃ ᐅᑦ ᐋᔨᑎᐎᓂᐙᐗ: ᐌᓴ ᐎᓚᐗᐤ ᑖᐺ ᑮ ᓂᐸᐁᐗᒃ, ᑭᓚᐗᐤ ᒫᑲ ᑭ ᐅᔑᑕᒸᓇᐗᐤ ᐅ ᒋᐹᔨᑲᒥᑯᐙᐗ᙮ 49ᐁᐗᑯ ᐌᒋ ᐃᑗᒪᑲᓂᓕᒃ ᑭᒋᒪᓂᑐ ᐅ ᑲᑫᑕᐌᓕᑕᒧᐎᓐ, ᓂ ᑳ ᐃᔑᑎᔕᐊᒪᐙᐗᒃ ᐅᑭᔅᑭᐙᐃᑫᐗ ᓀᔥᑕ ᐊᐸᔅᑕᓚ, ᐋᑎᑦ ᒫᑲ ᐁ ᐃᑕᓯᓕᒋ ᑲᑕ ᓂᐸᐁᐗᒃ ᓀᔥᑕ ᑲᑕ ᑲᒀᑕᑭᐁᐗᒃ; 50ᑭᒋ ᐅᒋ ᓇᑕᐌᓕᑕᒫᒋᒃ ᐅᑯ ᐊᓄᒡ ᑳ ᐱᒫᑎᓯᒋᒃ ᒥᓯᐌ ᐅᑭᔅᑭᐙᐃᑫᐗ ᐅᒥᑯᓕᐤ, ᑳ ᑮ ᓯᑭᓂᑳᑌᓕᒃ ᐊᔅᐱᓐ ᑳ ᐯᒋ ᐊᔅᑭᐗᒃ; 51ᐁᐱᓪ ᐅᒥᑯ ᐅᒋ, ᐱᓕᔥ ᐅᒥᑯ ᓵᑲᕌᔭ, ᑳ ᑮ ᓂᐸᐋᑲᓂᐎᑦ ᑕᔅᑕᐎᒡ ᐸᑭᒋᑲᓈᐱᔅᑯᒃ ᓀᔥᑕ ᑭᒋᐋᔭᒥᐁᐎᑲᒥᑯᒃ: ᑖᐺ ᑭᑦ ᐃᑎᓇᐗᐤ, ᐅᑯ ᐊᓄᒡ ᑳ ᐱᒫᑎᓯᒋᒃ ᑲᑕ ᓇᑕᐌᓕᑕᒪᐙᐗᒃ᙮
52ᑭ ᑳ ᑲᒀᑕᑭᓯᓇᐗᐤ, ᐅᓚᔓᐌᐎᓕᓕᑐᒃ! ᐌᓴ ᑭ ᑮ ᐅᑎᓀᓇᐗᐤ ᑭᔅᑫᓕᑕᒧᐎᓂ ᐎᑯᑖᔨᑲᓐ: ᓇᒪᐎᓚ ᑭ ᐅᒋ ᐱᑐᑳᓇᐗᐤ ᑭᓚᐗᐤ, ᐊᓂᑭ ᓀᔥᑕ ᑳ ᐊᑎ ᐱᑐᑫᒋᒃ ᑮ ᑭᐱᒋᐋᐙᐗᒃ᙮
53ᒣᒀᒡ ᒫᑲ ᐁ ᐃᑖᑦ ᐅᐅ ᑫᒀᓇ, ᐅᒪᓯᓇᐃᑫᐗᒃ ᓀᔥᑕ ᐸᕋᓯᔭᒃ ᓱᑳ ᑭ ᑯᒋ ᑭᔑᐙᐁᐗᒃ, ᓀᔥᑕ ᑮ ᓇᓈᑐᑯᒣᐗᒃ ᒥᒉᑦ ᑫᒀᓇ ᑭᒋ ᐊᔨᑗᓕᒋ; 54ᐁ ᐊᔅᑲᒪᐙᒋᒃ, ᓀᔥᑕ ᐁ ᑯᒋ ᒫᑯᓇᒸᒋᒃ ᑫᒀᓕᐤ ᐅᑐᓂᓕᒃ ᐅᒋ, ᑭᒋ ᐅᒋ ᒫᒥᔑᒫᒋᒃ᙮
Currently Selected:
ᐅᐸᓓᑭᔅ ᓘᒃ 11: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
