ᓂᔥᑕᒻ ᑌᓴᓗᓂᔭᓇ 4
4
ᑫ ᐃᔑ ᐱᒫᑎᓯᔭᓐ ᑭᒋ ᓇᐃᓚᐌᐊᑦ ᑭᒋᒪᓂᑐ
1ᐊᐙᓯᑌ ᑫᔮᐸᒡ ᒫᑲ, ᑭ ᐸᑯᓭᓕᒥᑎᓈᓐ, ᓂᒋᔖᓂᑐᒃ, ᓀᔥᑕ ᑲᑫᔅᑭᒥᑎᓈᓐ ᐎᓚ ᐅᒋ ᐅᑎᐯᓕᒋᑫᐤ ᒋᓴᔅ, ᐁ ᑮ ᐃᔑ ᐎᑕᒫᑖᒃ ᑫ ᐃᔑ ᐱᒧᑌᔦᑭᐸᓐ ᓀᔥᑕ ᓇᐃᓚᐌᐁᑭᐸᓐ ᑭᒋᒪᓂᑐ, ᐊᐙᓯᑌ ᓀᔥᑕ ᐊᐙᓯᑌ ᑭᒋ ᐃᔑ ᑐᑕᒣᒃ᙮ 2ᐌᓴ ᑭ ᑭᔅᑫᓕᑌᓇᐗᐤ ᑫᑯ ᑲᑫᔅᑴᐎᓇ ᑳ ᑮ ᒥᓕᑖᒃ ᐅᑎᐯᓕᒋᑫᐤ ᒋᓴᔅ ᐅᒋ᙮ 3ᐌᓴ ᐁᐗᑯ ᐅᒪ ᑭᒋᒪᓂᑐ ᐅᑦ ᐃᑌᓕᑕᒧᐎᓐ, ᑭ ᐸᓓᑭᐃᑯᓯᐎᓂᐗᐤ ᐅᑎ, ᐁᑳ ᑭᒋ ᑐᑕᒣᒃ ᐱᔑᒀᑎᓯᐎᓐ; 4ᒥᓯᐌ ᐊᐌᓇ ᐁ ᐃᑕᔑᔦᒃ ᑭᒋ ᑭᔅᑫᓕᑕᒃ ᑫ ᐃᔑ ᑲᓇᐌᓕᑕᒃ ᐅᑦ ᐊᓱᐗᒋᑲᓐ ᐸᓓᑭᓯᐎᓂᒃ ᓀᔥᑕ ᑭᔅᑌᓕᑕᑯᓯᐎᓂᒃ; 5ᓇᒪᐎᓚ ᐱᔑᒀᑎᓯᐎ ᐃᑌᓕᑕᒧᐎᓂᒃ ᑖᐱᔅᑯᒡ ᐊᓂᑭ ᒉᓐᑖᐃᓚᒃ ᐁᑳ ᑳ ᑭᔅᑫᓕᒫᒋᒃ ᑭᒋᒪᓂᑐᐗ᙮ 6ᐁᑳᐎᓚ ᐊᐌᓇ ᐙᔦᔥ ᐁ ᑐᑕᒃ ᑭᒋ ᒪᒋᑐᑕᐙᑦ ᓀᔥᑕ ᐙᔦᔑᐋᑦ ᐎᒋᔖᓇ; ᐌᓴ ᐅᑎᐯᓕᒋᑫᐤ ᑲᑕ ᐋᔅᑯᒋᐁᐤ ᒥᓯᐌ ᐁᑯᑐᐎ, ᑖᐱᔅᑯᒡ ᐁ ᑮ ᐃᔑ ᓂᔮᑲᓇ ᐎᑕᒫᑖᒃ ᓀᔥᑕ ᐋᓕᒧᑕᒫᑖᒃ᙮ 7ᐌᓴ ᑭᒋᒪᓂᑐ ᓇᒪᐎᓚ ᑭ ᑮ ᐅᒋ ᓇᑐᒥᑯᓇᐤ ᐎᓂᓯᐎᓂᒃ ᐃᔑ ᒫᑲ ᐸᓓᑭᓯᐎᓂᒃ᙮ 8ᐁᐗᑯ ᐅᒋ ᐊᓇ ᑳ ᐋᑕᐌᓕᒋᑫᑦ, ᓇᒪᐎᓚ ᐋᑕᐌᓕᒣᐤ ᐃᓕᓕᐗ, ᒫᑲ ᑭᒋᒪᓂᑐᐗ ᑳ ᒥᓕᑕᒃ ᐊᓯᒋ ᐅ ᐸᓓᑭ ᐊᒑᑾ᙮
9ᒫᑲ ᐁ ᐃᑖᒋᒧᓈᓂᐗᒃ ᐎᒋᔖᓂᒪᐎ ᓵᑭᐃᑐᐎᓐ ᓇᒪᐎᓚ ᑭ ᓇᑕᐌᓕᑌᓇᐗᐤ ᑭᒋ ᒪᓯᓈᐊᒫᑕᑾᒃ: ᐌᓴ ᑭᓚᐗᐤ ᑫᒋᐙᒃ ᑭ ᑭᔅᑭᓄᐊᒫᑯᐗᐤ ᑭᒋᒪᓂᑐ ᑭᒋ ᓵᑭᐃᑐᔦᒃ᙮ 10ᐁᑯᔑ ᑖᐺ ᑭᑦ ᐃᑐᑕᒪᐙᐗᐗᒃ ᒥᓯᐌ ᐎᒋᔖᓂᒪᐗᒃ ᑳ ᐃᑖᒋᒃ ᒥᓯᐌ ᒫᓯᑐᓂᔭᐃᒃ: ᒫᑲ, ᑭ ᐸᑯᓭᓕᒥᑎᓈᓐ, ᓂᒋᔖᓂᑐᒃ, ᐋᒋᐱᑯ ᐋᒋᐱᑯ ᑭᒋ ᐊᑎ ᓚᑭᐋᔮᔦᒃ; 11ᓀᔥᑕ ᑭᒋ ᐎᑲᑴᑭᔅᑫᓕᑕᒣᒃ ᑭᒋ ᑳᔮᒪᐱᔦᒃ, ᓀᔥᑕ ᑭᒋ ᑐᑕᒣᒃ ᑎᐱᓚᐌ ᑭᑦ ᐊᑑᔅᑫᐎᓂᐗᐤ, ᓀᔥᑕ ᑎᐱᓚᐌ ᑭᒋᒋᐙᐗ ᑭᒋ ᐅᒋ ᐊᑑᔅᑫᔦᒃ, ᑳ ᑮ ᐃᑕᔓᐙᑎᑖᒃ, 12ᑭᒋ ᒀᔭᔅᑯ ᐱᒧᑌᔅᑕᐌᑾᒃ ᐊᓂᑭ ᐗᓚᐎᑎᒥᒃ ᑳ ᐃᑖᒋᒃ, ᓀᔥᑕ ᐁᑳ ᑫᒀᓐ ᑭᒋ ᑶᑕᒫᔦᒃ᙮
ᐅᑎᐯᓕᒋᑫᐤ ᐅᑕᑯᔑᓄᐎᓐ
13ᒫᑲ ᓇᒪᐎᓚ ᓂ ᓇᑕᐌᓕᑌᓐ ᐁᑳ ᑭᒋ ᑭᔅᑫᓕᑕᒣᒃ, ᓂᒋᔖᓂᑐᒃ, ᐁ ᐃᑖᒋᒫᑲᓂᐎᒋᒃ ᐊᓂᑭ ᑳ ᓂᐹᒋᒃ, ᐁᑳ ᑭᒋ ᒥᒋᓚᐌᓯᔦᒃ, ᑖᐱᔅᑯᒡ ᑯᑕᑭᔭᒃ ᐁᑳ ᑳ ᐅᑦ ᐊᔅᐯᓕᒧᐎᓂᒋᒃ᙮ 14ᐌᓴ ᑮᔥᐱᓐ ᑎᐋᐺᑕᒪᑴ ᒋᓴᔅ ᐁ ᑮ ᓂᐱᑦ, ᓀᔥᑕ ᒥᓇ ᐁ ᑮ ᐗᓂᔥᑳᑦ, ᐁᑯ ᑖᐱᔅᑯᒡ ᐎᓚᐗᐤ ᓀᔥᑕ ᑳ ᓂᐹᒋᒃ ᒋᓴᓯᒃ ᑭᒋᒪᓂᑐ ᑲᑕ ᐊᓯᒋ ᐯᔑᐌᐤ᙮
15ᐌᓴ ᐅᒪ ᑭᑦ ᐃᑎᓈᓐ ᐅᑎᐯᓕᒋᑫᐤ ᐅᑦ ᐋᔭᒥᐎᓐ ᐅᒋ, ᑭᓚᓈᓇᐤ ᑫᔮᐸᒡ ᑫ ᐱᒫᑎᓯᔭᒃ, ᓀᔥᑕ ᑫ ᐃᔥᑯᔮᒃ ᐃᓕᑯᒃ ᑫ ᑕᑯᔑᒃ ᐅᑎᐯᓕᒋᑫᐤ, ᓇᒪᐎᓚ ᑭ ᑳ ᐅᑕᒥᐊᓈᐗᒃ ᐊᓂᑭ ᑳ ᓂᐹᒋᒃ᙮ 16ᐌᓴ ᑌᐯᓕᒋᑫᑦ ᑫᒋᐙᒃ ᑭᒋᑭᔑᑯᒃ ᑲᑕ ᐅᒋ ᐯᒋᓛᔑᐤ, ᐁ ᑭᔗᐙᓂᐗᒃ, ᑭᑭ ᐅ ᐯᑖᑯᓯᐎᓐ ᑭᒋᐁᓐᒐᓪ, ᑭᑭ ᓀᔥᑕ ᐅ ᐳᑖᒋᑲᓐ ᑭᒋᒪᓂᑐ: ᐊᓂᑭ ᒫᑲ ᑳ ᓂᐱᒋᒃ ᙭ᑎᒃ ᐁᐗᒀᓂᑭ ᓃᔥᑕᒻ ᑫ ᐗᓂᔥᑳᒋᒃ: 17ᐁᑯ ᒫᑲ ᑭᓚᓈᓇᐤ ᑫᔮᐸᒡ ᑳ ᐱᒫᑎᓯᔮᒃ ᓀᔥᑕ ᐃᔥᑯᔮᒃ, ᐊᓯᒋ ᐎᓚ ᐗᔅᑯᒃ ᑭ ᑳ ᐃᔑ ᐅᑎᓂᑲᐎᓈᓇᐤ, ᑭᒋ ᓇᑭᔥᑲᐗᒃ ᐅᑎᐯᓕᒋᑫᐤ ᒧᔐᑭᔑᑯᒃ: ᐁᑯ ᒫᑲ ᑳᑭᑫ ᑫ ᐎᒉᐗᒃ ᐅᑎᐯᓕᒋᑫᐤ᙮ 18ᐁᐗᑯ ᐅᒋ, ᑳᑭᒋᐃᑐᒃ ᐅᐅ ᐋᔭᒥᐎᓇ ᐅᒋ᙮
Currently Selected:
ᓂᔥᑕᒻ ᑌᓴᓗᓂᔭᓇ 4: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.