Mt 15

Ga'me chiyaqayi da'me en paĝachigui ga'me jiyaĝaua

(Mc 7.1-23)

1Uo'oe ga'me fariseopi jo'ne yec'adeta ñe'me Jesús nataq'aen joga'me judiopi napaĝaguenoqo'tpi jo'ne yovi't ca'li chiyoqoda'a di'me Jerusalén, qama'le yachimaĝadeta:

2—¿Toqoch'e jogaa'me adapaĝaguenataqa yenoĝo'n da'me loe'j jo'ne naeda'ac jodia'me qadet'al 'me jachiyojoĝogueta? ¿Toqoch'e ja yiyo'y naa'me loua' qom maliaĝa ja deque'y?

3Jesús 'yategueta jogaa'me:

—Nataq'aen ¿toqoch'e nach'e ena'am ami auenoĝoñi joda'me lamaĝajoĝonaĝac joñe'me Dios qaedi oquiyegue ga'me mach'e adoequi jo'ne auanaeyiya'ac? 4Qa'a Dios enaac: «A'nonaĝachigui ñe'me adet'a nataq'aen jañe'me adat'e», nataq'aen «Ñe'me jo'ne ye'uetac ga'me let'a uotaĝa jaga'me lat'e nach'ega qoyamaĝaue da'me leleuaĝa qaedi qoyalat.» 5Qalaĝaja ami aueñiyapega gamachaqaega yaqanatet da'me eet'oi ga'me 'laqatac qom nematapeguet ga'me let'a nataq'aen lat'e: «Ja jaqanatet ta'le am yecochiya, qa'a yema ga'me jauana joote jiyota'a da'me janem joñe'me Dios»; 6nataq'aen qom gamachaqaega nenaĝategue da'me dojo', male ja qopaquetapegue' da'me lecochiya ga'me let'a uotaĝa jaga'me lat'e. Nach'eda naq'aeta, ami auapalaĝachi' daa'me 'laqataqa joñe'me Dios qaedi mach'e oquiyeguelo ga'me at'oyaĝaqui jo'ne auanaeyiya'ac. 7¡Ja ami 'te ejoda! Yataqachiñe ejoda naa'me 'laqataqa ca'li ñe'me Dios 'laqataĝanaĝanec Isaías ca'li joote ami 'yaĝa'tape da'me enaac:

8«Jenjo' jiyaĝadipi ch'e jayem 'nonaĝachidegue naa'me nedegaqa'te,

qalaĝaja naa'me lai'li ja jayem 'te yauoqoda'a.

9Qaya'te chiyaqayi da'me jayem 'nonaĝachidegue,

qa'a chiyaqayilo gaa'me lamaĝajoĝonaĝaco jogaa'me ch'e jiyaĝa'u.»

10Qanach'e Jesús yiyaĝanalo ga'me jiyaĝadipi qama'le enaac:

—Anaquiaĝañiya nataq'aen auayachiñe: 11Ga'me taue ga'me jiyaĝaua nedegaĝat ja naqaega ta'le en paĝachigui ga'me, dite ga'me jo'ne chiyaqaue ga'me nedegaĝat, naqaega en paĝachigui.

12Chane'eja nichide'uo gaa'me lapaĝaguenataqa ñe'me Jesús qama'le yachimaĝadeta:

—¡Yataqachiñe dalemata'y joga'me fariseopi ca'li domachita ga'me anenaĝategue!

13Joñe'me 'yategueta:

—Ena'uac ga'me nanapi jo'ne ja naqaeñe ñe'me Taĝadena' ta'le yaañi, chayovida'alo gaa'me patadi qonapodijeguem qomle. 14Auomachi'talo, qa'a naqaegaua jo'ne qana'mi 'me yaco'tagueta gaa'me qana'mi laqaya'. Qalaĝaja qom 'uo ga'me qanam yaco'taguet ga'me laqaya, qama'le nalo'ta'ajalo da'me tadi'ñgui jaga'me limaĝañi.

15Chane'eja Pedro t'aqataĝanem ñe'me Jesús:

—Qo'mi a'uaĝatema joga'me nayi dojo' adaloqotenaĝanaĝac.

16Jesús 'yateguet:

—¿Qo'li nach'e ena'am ami ja auayachiñe? 17¿Ja auetadeñi joona queda'me yema ga'me yalic ga'me jiyaĝaua taue jana'me leta'am, qaedi ua'edi qoyeguem? 18Qalaĝaja ga'me na'ya ga'me nedegaĝat ga'me jiyaĝaua chiyaqaue na'me lauel, qama'le naqaega en paĝachigui q'aen ga'me. 19Qa'a gaa'me chiyoqodaue na'me lauel ga'me jiyaĝaua nach'egaua jo'ne chiyoĝogueta naa'me lelnataĝaco 'me ja 'noe'n, da'me nalataĝanaĝac, da'me leuaua jaga'me ja yataqachiñe loua, da'me nequejeguetaĝa, da'me noqovinaĝanaĝac choqoda'me nejenaĝanaĝac. 20Naajo' uo'oe nach'enaua jo'ne e'n paĝachigui q'aen ga'me jiyaĝaua; qalaĝaja qom ja yiyo'y naa'me loua' da'me deque'e, ja naqaeda ta'le en paĝachigui q'aen.

Da'me lepe'e jañe'me yauo jo'ne ja judiopi laje

(Mc 7.24-30)

21Yem qama'le Jesús ca'ae di'me ue'ta, da'me taya'ague di'me aleua jo'ne Tiro nataq'aen Sidón. 22Qama'le 'uo jañe'me yauo Canaán laje jo'ne neta'ña di'me dijo' aleua, yec'ata ñe'me Jesús ca'li niyaĝatapejeguem:

—¡Jaliaĝanec, mach'e am David c'oĝot, jayem avichoĝoden! ¡Jalcote da'me lachoĝodec jadi'me yale qa'a uetaye ga'me payac lepaqal!

23Jesús ja 'yateguet. Chane'eja jogaa'me lapaĝaguenataqa davitedapeuo qama'le nachoĝodetot:

—Auenapega janjo' yauo qaedi qo'mi ca'ae, qa'a niyaĝatapejeguem da'me qo'mi dajota'yelo.

24Jesús enaac:

—Ñe'me Dios nach'edata da'me jayem namaĝalo ga'me Israel c'oqo'tepi jo'ne ena'ama gaa'me 'naĝanaĝatel jo'ne yejoma'tape.

25Qalaĝaja jañe'me yauo yec'ata ca'li yejoidiñe naa'me leliquetel da'me dajoya'aguet joñe'me, enaac:

—¡Jaliaĝanec, jayem alecochiya!

26Jesús 'yateguet:

—Ja 'noota da'me qodoĝotaĝanec gaa'me pan 'me ue'tajopa ga'me yataqachiñe nec'oqo'te qaedi qoyanema gaa'me pi'o.

27Jañe'me enaac:

—Eja, Jaliaĝanec, qalaĝaja gaa'me pi'o yali'j nale ga'me lojoche jo'ne chiyaqalegue ga'me ladipa liqui'yaĝala'.

28Chane'eja Jesús enaac:

—¡Am yauo, yataqachiñe let'adaic da'me adepe'e! Am janem ga'me auepaquetapega.

Qama'le nach'ega ua'a ca'li paja'a yemegue jaga'me c'oqote.

Jesús en yemedegue joga'me leuaĝaiquipi

29Jesús ca'e ga'me ue'ta qama'le yec'ata ga'me dajoyaĝajo'ma di'me Galilea 'me loogue jaga'me qa'em lat'edai. Yem qama'le yec'adije'ma ga'me qajoĝonaĝa, ua'a da'me ñiyiñe. 30Jalcote ga'me jiyaĝadipi yema'a ca'li ga'me ue'ta joñe'me. Qoyeda'alo gaa'me uayodaĝayaqa, qana'mi, choĝolaĝayaqa nataq'aen qayoĝode' gaa'me leuaĝayaqa laqaya', jo'ne qoyacho'oto ñe'me Jesús, qama'le ñe'me e'n yemedegue ena'uaque jogaa'me. 31Ga'me jiyaĝadipi yataqachiñe yoqochetem queda'me qoyauana da'me doje'y gaa'me qayaua'te 'laqataqa, gaa'me uayodaĝayaqa male yemedegue, gaa'me choĝolaĝayaqa yeuo'tape, nataq'aen jogaa'me qana'mi male yauana'ape. Qama'le paja'a 'nonaĝachidegue joñe'me Nedios joga'me Israel c'oqo'tepi.

Jesús yiqui'yaĝa'n ga'me cuatro mil jiyaĝadipi

(Mc 8.1-10)

32Jesús yiyaĝanalo jogaa'me lapaĝaguenataqa, qama'le enaac:

—Jalcote janomeguet da'me yichoĝodenataĝanaĝac jena'me jenjo' jiyaĝadipi, qa'a joote yenoĝodegue jogaa'me tres noloqo'ote da'me jayem ueteda'ajop, qama'le nayi qaya'te yali'j. Ja jetaque jen quedeuo da'me qaya'te yali'j, qa'a uotaĝa uo'oe gaa'me copete'y qomle ga'me ladi'j.

33Jogaa'me lapaĝaguenataqa 'yadeteguet:

—Qalaĝaja, ¿jach'e jogamaĝa jachiyojoĝo'tague ga'me yali'j jenjo' jiyaĝadipi, jena'me jenjo' aleua 'me totapega't, qaya'te na'ña?

34Jesús 'yategueta:

—¿Jach'e ga'me layoqote' gaa'me paan 'me auañiyalo?

Qama'le 'yadeteguet jogaa'me:

—Siete, nataq'aen ja lama'y gaa'me niya'.

35Qama'le Jesús damaĝajoĝolo'te ga'me jiyaĝadipi da'me nedalegue ga'me aleua, 36yaconalo gaa'me siete paan nataq'aen jogaa'me niya', qama'le queda'me joote yanem da'me lamaic joñe'me Dios, yecolaĝatapiyelo qama'le yanema jogaa'me lapaĝaguenataqa, qanach'e gaa'me yanouelo joga'me jiyaĝadipi. 37Ena'uaque deque'y jogaa'me chayovida'a yachaqa'y, choqoda'me uoja'aegaua siete natoĝonaĝaiqui' qoyachañguilo ga'me lael 'me niyoqo'te. 38Gaa'me deque'y nalo'taguet cuatro mil ga'me jiyaĝadipi, ja qonaloqote'n ga'me yauodipi nataq'aen ñoqolqapi. 39Yem qama'le Jesús yep'iye'tape ga'me jiyaĝadipi, nañgui jaga'me licota da'me dajoyi di'me aleua jo'ne Magadán.

Currently Selected:

Mt 15: TSN

Highlight

Copy