Lc 6

Jogaa'me Jesús lapaĝaguenataqa napo'j ga'me trigo jala ga'me nolo' jo'ne niyamaqatac

(Mt 12.1-8; Mc 2.23-28)

1'Uo jo'me nolo' jo'ne niyamaqatac, Jesús quetalo'te gaa'me nanaĝanaqa'te. Jogaa'me lapaĝaguenataqa napo'j ga'me jala ga'me trigo, e'n naa'me loua' da'me nejola'y qama'le yali'j ga'me jala. 2Qama'le uo'oe gaa'me fariseopi jo'ne denataĝa'n:

—¿Toqoch'e auauoyi ga'me jo'ne ja qoyajeta ta'le qoya'uo ga'me nolo' jo'ne niyamaqatac?

3Jesús 'yategueta jogaa'me:

—¡Anetoviñetac daa'me nedii's jo'ne 'yaĝatetac ca'li da'me ya'uo di'me David choqogaa'me lequiaĝa'u! Ca'li yoqoua't jogaa'me, 4qama'le David taue ga'me Dios 'lemec qama'le yaconalo gaa'me paan jo'ne joote 'uo da'me niyamaqataguec queda'me qoyanoto joñe'me Dios, yali'j jogaa'me nataq'aen yanema jogaa'me naequetapegue'to, taqaeue'ta yaqalan taĝa queda'me mate mane'e nach'egauate' gaa'me tamenaĝaiqui lo'ol qoyaje'tema da'me yali'j gaa'me.

5Nataq'aen noqotetenegue:

—Mach'e jayem jo'ne yataqachiñe Jiyaĝaua Lec'oĝot, yataqachiñe 'uo da'me yañoqotaĝanaĝac qaedi ñejaliaĝatelegue di'me nolo' jo'ne niyamaqatac.

Jesús en yemegue q'aen ñe'me leuaĝaic ga'me nolo' jo'ne niyamaqatac

(Mt 12.9-14; Mc 3.1-6)

6Yenoĝodegue gaa'me noloqo'ote qama'le yitaĝa yovita ga'me nolo' jo'ne niyamaqatac, qama'le Jesús taue ga'me nemaĝaiqui qama'le paja'a dapaĝaguenataĝatac. 'Uo ñe'me jiyaĝaua jo'ne ja daconaĝana ga'me louaq jo'ne yayaten; 7qama'le joga'me judiopi napaĝaguenoqo'tpi nataq'aen gaa'me fariseopi ch'e nauateda'a ñe'me Jesús qaedi yauachidigui qom en yemegue ga'me nolo' jo'ne niyamaqatac, qama'le naq'aeta da'me jetaque e'n chiyaqayi da'me uajoilegue. 8Qalaĝaja ñe'me Jesús yayaten ga'me eeta da'me lelnataĝa'j; qama'le dojapegue' ñe'me jiyaĝaua jo'ne ja daconaĝana ga'me louaq:

—¡Oñijeguem nataq'aen anechachi'ña na'me nojo' laeñi!

Ñe'me jiyaĝaua ñijeguem ca'li qama'le nechachi'ña. 9Qama'le Jesús yachimaĝatalo jogaa'me jiyaĝa'u laqaya':

—'Uo ga'me ami jenateque: ¿Jach'e ga'me qoyajeta ta'le qoya'uo ga'me nolo' jo'ne niyamaqatac? ¿Qo'li qoyajeta ta'le qoye'tem ga'me 'noota jenjo' qadaqaya, uotaĝa ta'le qoye'tem ga'me ja no'en? ¿Qo'li qoyajeta ta'le qonec'alaĝategue ga'me 'loyaĝac, uotaĝa ta'le qoyapalaĝat?

10Yem qama'le yelapegouelo ena'uac gaa'me jo'ne quedejop, qama'le dojapegue' ñe'me jiyaĝaua:

—¡Anodegue na'me adouaq!

Ñe'me jiyaĝaua naq'aeta da'me ya'uo, qama'le paja'a 'noota ga'me louaq. 11Qalaĝaja gaa'me jiyaĝa'u laqaya' jalcote da'me dalemata'y qama'le nenatetapega't:

—¿Jach'e jogamaĝa jaqanatetaq ta'le je'etaĝac joñe'me?

Jesús yiyaĝanalo joga'me doce jo'ne lamaĝa's

(Mt 10.1-4; Mc 3.13-19)

12'Uo ga'me nolo' ca'li Jesús dajoyi ga'me qajoĝonaĝa qaedi netamen, qama'le yemata ga'me pi'yaq da'me netametapecot joñe'me Dios. 13Ca'li yovida'aguet ga'me nolo', qama'le yemata'a't gaa'me lapaĝaguenataqa, qama'le doce gaa'me yiquetelo'te jo'ne yaneque Dios lamaĝa's. 14Naajo' lenaqa'te jogaa'me: Simón, nach'eñe en lenaĝat Pedro; Andrés jo'ne laqaya ñe'me Simón; Santiago, Juan, Felipe, Bartolomé, 15Mateo, Tomás, Santiago jo'ne c'oĝot ñe'me Alfeo; Simón jo'ne celote, 16Judas jo'ne c'oĝot ñe'me Santiago, nataq'aen Judas Iscariote, jo'ne ua'edi yanegue ñe'me Jesús.

17Yem qama'le queda'e ga'me qajoĝonaĝa, nenochidiñe qama'le yovideta'ña ga'me aleua nalo'ta't. Jesús nechachiñe, dajoya'agueta gaa'me jalcote jiyaĝadipi jo'ne mach'e quetedapegue' joñe'me nataq'aen ga'me jiyaĝadipi jo'ne chiyoqoda'a di'me Judea, di'me Jerusalén nataq'aen gaa'me neda'ña di'me loogue, noyaqa jo'ne Tiro nataq'aen Sidón. 18Yovideda'a ca'li ñe'me Jesús qaedi naquiaĝata nataq'aen qaedi yemedegue q'aen jogaa'me lapite'nadi. Jogaa'me jo'ne uo'oe daa'me lachoĝodeco jouaĝat jogaa'me nepaqa'li jo'ne ja 'noe'n, nach'e ena'am yemedegue, 19qama'le yema ga'me jiyaĝadipi jetaque yepo't joñe'me Jesús, qa'a 'uo da'me lañoqotaĝanaĝac jo'ne chiyaqaue joñe'me qaedi ena'uaque e'n yemedegue.

Made'tape gaa'me jo'ne yataqachiñe quetegue ñe'me Jesús

(Mt 5.1-12)

20Jesús yelochiguilo jogaa'me jiyaĝadipi jo'ne quetedapegue', qama'le yapaĝague'tape, enaac:

“Ami made'tapolqa, ami jo'ne choĝodache, qa'a adeyamaqae'teguet da'me lejaliaĝa joñe'me Dios.

21“Ami made'tapolqa, ami jo'ne adoqouachi nayi, qa'a ami chayaĝayaqa qomle.

“Ami made'tapolqa, ami jo'ne 'uo da'me ademalaqataĝanaĝaqui nayi, qa'a male ami najaqachiguilo ga'me adamaiqui qomle.

22“Ami made'tapolqa qom ga'me jiyaĝadipi ami niquiyatapegalo, uotaĝa qom ami qo'yodetapegue'to, nataq'aen qom ami qoyejoue'tape chayovida'alo naa'me adenaĝachi qo'yota'tape ena'am ta'le ja no'en, qa'a yajouaĝat da'me jayem oquiyegue, mach'e jayem jo'ne yataqachiñe Jiyaĝaua Lec'oĝot. 23Qom yovita ga'me nolo' qom ami 'yeteque da'me dojo', qama'le 'noota qom ami made'tape, anaviquila't da'me adamaiqui, qa'a t'adaic ga'me anejetenaguequi jo'ne auacoñiyeguet qomle di'me piyem. Anetoviñetac queda'me dia'me chiyoĝogueta 'me let'alpi jena'me jenjo' jiyaĝadipi 'yeteque da'me ja no'en joca'li dia'me Dios 'laqataĝanaĝanaqa.

24“Qalaĝaja, ¡degueja qomle da'me lachoĝode'j gaa'me neuoyaĝadi, qa'a joote yauata da'me lamai'j jo'ne yem qomle!

25“¡Degueja qomle da'me lachoĝode'j gaa'me jo'ne joote yauata da'me lachaĝayaĝa'j, qa'a male yoqoua't qomle!

“¡Degueja qomle da'me lachoĝode'j gaa'me jo'ne lajaĝa'tape nayi, qa'a demalaqataĝata'ajalo nataq'aen noye'tape qomle!

26“¡Degueja qomle da'me lachoĝode'j gaa'me jo'ne qoyi'yoĝode'tape, qa'a nach'eda naq'aeta da'me yauote dia'me chiyoĝogueta 'me let'alpi jena'me jenjo' jiyaĝadipi yi'yoĝode'tape dia'me pecayaqa jo'ne eetapela'ajalo Dios 'laqataĝanaĝanaqa joca'li!

'Noota qom adoqopichiyalo gaa'me adaute'udi'

(Mt 5.38-48; 7.12)

27“Qalaĝaja ami jo'ne jayem anaquiaĝañitapega, ami ja'aĝatema: adoqopichiyalo jogaa'me adaute'udi', nataq'aen a'vichiyeque da'me 'noota ga'me jo'ne ami niquiya'alo; 28anachoĝodeñiyot ñe'me Dios ta'le yichoĝode'n gaa'me jo'ne ja 'noote' q'ae'n gaa'me 'laqataqa jo'ne ami yachalo'te, nataq'aen anetameñilo'te gaa'me jo'ne ami yejoue'tape.

29“Qom 'uo gamachaqaega ye'uaĝaneuo na'me adanoc, nach'e ena'am auaje'tem na'me laqaya; qom 'uo gamachaqaega deuodaĝanec ga'me adapoto, nach'e ena'am auaje'tem ta'le yachi na'me anejomaĝaiqui. 30Gamachaqaega 'uo ga'me yiyaĝanaque da'me am yajela, auanem; nataq'aen ga'me jo'ne doĝotaĝanec ga'me jo'ne mach'e adoĝot, ena'te aueloiquiaĝatac da'me ta'le yitaĝa auaconeguet.

31“Ga'me jo'ne jetaque auepaquitapega ta'le ami qo'yeteque, 'noota qom nach'e naq'aeta da'me a'vichiyeque jogaa'me adaqayadi'.

32“Qom nach'egaua adoqopichiyalo gaa'me jo'ne ami noqopitalo, qama'le ¿qo'li 'uo ga'me adi'yoĝodiqui qomle? Chayovida'alo gaa'me loeco lo'olpi naq'aeta da'me 'loyaĝa'j. 33Nataq'aen qom naq'aeta da'me auauoyi nach'egaua aneyamaĝadiñigueta gaa'me jo'ne ami 'yeteque da'me 'noota, qama'le ¿qo'li 'uo ga'me adi'yoĝodiqui qomle? Chayovida'alo gaa'me loeco lo'olpi naq'aeta ga'me 'loyaĝa'j. 34Nataq'aen qom a'nataĝanaĝañiyec ga'me adoĝochi joga'me jo'ne auepíchitapega ta'le auachiyoĝochiya'ajopa ga'me jo'ne auoviñetaque, qama'le ¿qo'li 'uo ga'me adi'yoĝodiqui qomle? Chayovida'alo gaa'me loeco lo'olpi 'natapega't onolqa'tape yajoĝo'ta da'me nach'e ena'am 'uo ga'me chiyoĝota'ajop ga'me laqaya. 35Qalaĝaja ami, 'noota qom adoqopichiyalo gaa'me adaute'udi', nataq'aen auauoyi da'me 'noota, nataq'aen a'nataĝanaĝañiyec ga'me adoĝochi qama'le ena'te auajoĝoñi'ta ta'le ami 'yiyelaĝategueta ga'me lajo'vi. Qaedi naq'aeta da'me jalcote da'me anejetenaguequi, da'me ami qoye'n lec'oqo'tolqa joñe'me Dios jo'ne napacalegue ena'uac, jo'ne nach'e ena'am nichoĝodenoqo't jogaa'me jo'ne ja yane'm da'me lamai'j joñe'me nataq'aen qaleuaĝayaqa. 36'Noota qom ami choĝodenataĝanaĝayaqa, nach'e naq'aeta ñe'me Qadet'a jo'ne choĝodenataĝanaĝaic.

Ena'te am loqotenaĝanaĝaic ga'me adaqaya

(Mt 7.1-5)

37“Ena'te ami loqotenaĝanaĝayaqa jogaa'me adaqayadi', qama'le Dios ja ami 'te yachalo'te da'me laloqotenaĝanaĝac. Ena'te auamaqayoue da'me ne'uaĝanague'j jogaa'me adaqayadi', qama'le Dios ja ya'uo 'te ane'uaĝanaguequi. Ena'te auenachi'ta ga'me anaviyaqataguequi, qama'le Dios yapalaĝa't gaa'me adaviyaĝacodi'. 38'Noota qom 'uo ga'me auañema gaa'me adaqayadi', qama'le Dios nach'e ena'am 'uo ga'me ami yanema. Qa'a ena'am ta'le joñe'me en naloqote'teguet ga'me le'ec ga'me adachoĝonaĝaqui da'me ami yanema, qoyipataĝa't, qoyadiyochigui nataq'aen najaqachigui. Qa'a da'me adapogoqotaĝanaĝaqui jo'ne auañema nale gaa'me adaqayadi' ami qoyipagaqa'te'tegueta, nach'eda da'me Dios ami 'yiyelaĝateque.”

Da'me youetaque ta'le yataqachiñe qoyauo'oe daa'me 'laqataqa joñe'me Jesús

(Mt 7.17-27; 12.34-45)

39Jesús nach'e ena'am yajoĝonegueta dojo' laloqotenaĝanaĝac: “¿Qo'li yaqanatet ga'me qanam ta'le yauequetague ga'me ladic ga'me qanam laqaya? ¡Yataqachiñe ja yaqanatet, qa'a 'yemeda'ñgui jaĝa'te jaga'me limaĝañi jogaa'me! 40Ga'me napaĝaguenatac ja napacalegue ga'me napaĝaguenoqo't. Qalaĝaja qom yem da'me napaĝaguenaguec, qama'le male ena'am ga'me napaĝaguenoqo't.

41“¿Toqoch'e adema'a da'me auec'aten ga'me letauoĝojet ga'me adaqaya jo'ne netaye jaga'me 'laete, qama'te ja auetaden da'me nach'e ena'am 'uo na'me mach'e adetauoĝojet jo'ne t'adaic 'me am netaye? 42Qom ja auetadenac na'me adetauoĝojet jo'ne t'adaic 'me netaye jana'me at'aete, ¿teua'atoqo' auojapegue' ga'me adaqaya: «Am yaqaya, cha'li jayem auaje'tem ta'le ñaqat na'me adetauoĝojet 'me netaye jana'me at'aete»? ¡Ja am 'te eja! Cha'li 'uaeñe anaqat na'me epaq 'me netaye jana'me mach'e at'aete, qama'le naq'aeta da'me male auauatalegue da'me anaqat ga'me letauoĝojet ga'me adaqaya jo'ne netaye jaga'me mach'e 'laete.

43“Qa'a jaga'me epaq jo'ne onaĝai ja chiyaqayi jaga'me jala jo'ne ja no'en, nataq'aen jaga'me epaq jo'ne ja no'en ja chiyaqayi jaga'me jala jo'ne onaĝai. 44Onole'tape ep'a qoyateto'n da'me yajouaĝat jaga'me jala: qama'le ja qochiyoĝotayilo gaa'me higos joga'me yaĝat, uotaĝa qochiyoĝotayilo gaa'me uvas joga'me laĝayaqaic. 45Nach'e ena'am ñe'me jiyaĝaua jo'ne 'noota nenaĝatedegue gaa'me 'noote', qa'a ga'me 'noota uetaye ga'me lauel, nataq'aen ñe'me jiyaĝaua jo'ne qaleuaĝaic nenaĝatedegue gaa'me ja 'noe'n qa'a da'me ja no'en uetaye ga'me lauel. Qa'a da'me ja nejataĝaic jo'ne uetaye ga'me lauel na'ya ga'me nedegaĝat nale doje.

46“¿Toqoch'e jayem aviyaĝañetapec, «¡Am Qadejaliaĝanec!», qama'te ja auauoyi ga'me jo'ne jenaac? 47Uo'oe gaa'me jayem nec'adeta qama'le jayem naquiaĝata nataq'aen yauote ga'me jo'ne jenaac. Qama'le ami ja'aĝatema 48queda'me nach'egaua eda'am ga'me jiyaĝaua jo'ne jetaque 'noĝojeguem ga'me 'lemec, qama'le 'uaeñe q'aen da'me yataqachiñe en qaya'ñgui ga'me lejedec, qama'le en lamo ga'me qa' ga'me emec. Ca'li nayenegue ga'me ñache, ga'me noĝop ja yilae'teguet da'me 'lañaĝac da'me yauaĝanot ga'me emec, qalaĝaja ja yaqanatet ta'le yidaĝat, qa'a ja qoyalajaĝan da'me qo'nedijeguem. 49Qalaĝaja ga'me jo'ne jayem domachiya qama'te ja ya'uo ga'me jenaac, nach'ega ena'am ñe'me jiyaĝaua jo'ne en ga'me aleua da'me 'noĝojeguem ga'me 'lemec, qaga'te lamo jo'ne p'añe; ca'li naenegue ga'me ñache ja cat'olec ga'me 'lañaĝac ga'me noĝop da'me yauaĝanot, qama'le nojouoĝojeguem qama'le yitaĝa nedo'ta't da'me qaya ga'me emec.”

Currently Selected:

Lc 6: TSN

Highlight

Copy