Lc 15

Qodaloqotenaĝana ga'me 'naĝanaĝate neuatoqo't jo'ne maqachaĝa yejomalegue jaga'me lalo 'naĝanaĝate

(Mt 18.10-14)

1Ena'uaque ga'me jo'ne lo'ol da'me nejetenaguec ga'me Roma nataq'aen jiyaĝa'u laqaya' jo'ne ja 'noe'n daa'me 'lonataqa yec'adeta joñe'me Jesús qaedi domachita. 2Joga'me fariseopi nataq'aen joga'me judiopi napaĝaguenoqo'tpi en ja 'noe'n daa'me 'laqataqa jouaĝat da'me dojo', enapega't:

—Dojo' yaconegueta joga'me loeco lo'olpi nataq'aen neuanaĝa'u jogaa'me.

3Chane'eja Jesús 'yaĝatema dojo' laloqotenaĝanaĝac: 4“Gamachaqaega ami, qom yauanalo cien ga'me 'naĝanaĝatelpi qama'te onole jaga'me yejomac, qama'le ¿ja yepota'ña joona ga'me 'nonaĝa ga'me laqaya' noventa y nueve, da'me yelaque jaga'me 'naĝanaĝate jo'ne yejomac, chayovida'a yitaĝa yauana? 5Nataq'aen qom yauana, qama'le yachalo'te naa'me lauaguel, qa'a yataqachiñe 'uo da'me lamaic. 6Chane'eja qom yovita ga'me 'lachaqa' qama'le yemata'a't gaa'me naigaĝa'u nataq'aen leje'gue, enaac: «Ami made'tape, auotauañi da'me yamaic, qa'a jauana jana'me 'naĝanaĝate jo'ne te'me yejomac.» 7Ami ja'aĝatema queda'me nach'e ena'am jalcote da'me lamai'j jogaa'me jo'ne neda'ague di'me piyem jouaĝat ga'me onolec loeco lo'o jo'ne 'niyeloqot joñe'me Dios, qamaĝa gaa'me noventa y nueve 'me chimadichidiñe jo'ne ja youetedaque da'me 'ñemaĝadiñe.

Da'me qodaloqotenaĝana jañe'me yauo jo'ne te'me yeguem jaga'me lemena

8“Uotaĝa qom 'uo jaga'me yauo jo'ne yauanalo diez gaa'me lemenal qama'te onole jaga'me yeguem joga'me, qama'le ¿ja yetetoue joona jaga'me lecoyadaĝanaqate qama'le yepoloq ga'me 'lachaqa' neteletalegue da'me yelotaque chayovida'a yauana? 9Qama'le qom yauana, qama'le yemata'a't gaa'me naigaĝa'u nataq'aen leje'gue, enaac: «Ami made'tape, auotauañi da'me yamaic, qa'a jauana jaga'me yemena jo'ne te'me jeguem.» 10Ami ja'aĝatema queda'me nach'e ena'am jalcote da'me lamai'j joñaa'me piyem laje' jouaĝat ga'me onolec loeco lo'o jo'ne 'niyeloqot joñe'me Dios.”

Qodaloqotenaĝana ñe'me net'a jo'ne yichoĝoden ga'me c'oĝot da'me yitaĝa yaconeguet

11Jesús 'yaĝatetac dojo' nataq'aen: “'Uo ñe'me jiyaĝaua jo'ne dojolqa gaa'me c'oqo'te, 12qama'le ñe'me yataqachiñe nejoq dojapegue' ñe'me let'a: «Taĝadena', uoteta jayem auanem da'me adeuoyaĝac lae jo'ne jayem ua'ajop qomle.» Chane'eja ñe'me let'a yecolaĝachigui da'me leuoyaĝac jogaa'me. 13Ja copa'alo gaa'me noloqo'ote jo'ne yenoĝodegue ñe'me c'oĝot 'me nejoq yemen yema ga'me mach'e qoyen loĝot, qama'le dajoyi ga'me aleua laqaya jo'ne qaya'ague, ua'a da'me ja yoden jaga'me naicaua ja nauecala't da'me nejiyaĝauayaĝac. 14Qalaĝaja ca'li male yema yemen jaga'me naicaua, qama'le 'uo da'me louenaĝanaĝa ga'me aleua jo'ne ue'ta, qama'le ñe'me nach'e ena'am 'uo da'me loqouaĝa. 15Qo'che' yec'ata ga'me jiyaĝaua jo'ne 'lachaqaidi qaedi ya'uo 'lonatac, qama'le qoyamaĝague ga'me 'nonaĝa qaedi netelalo ga'me cochepi. 16Qama'le chiliajaĝa yanotec ga'me map jo'ne jalo' ga'me cochepi, qalaĝaja qaya'te ga'me yanem. 17Chane'eja male novita da'me lelnataĝac, enaac: «¡Ena'uaque gaa'me 'lonataĝanaĝanaqa ga'me taĝadena' 'uo ga'me 'liyoĝo't nale ga'me yali'j, qalaĝaja jayem qamqa'me yataqachiñe joqouat jenjo' joue'ta! 18Male ji'iyelaĝague nayi ga'me taĝadena', qama'le jenaac jo': Taĝadena'olec, ja'uo da'me ja no'en jo'ne ñautena ñe'me Dios nataq'aen am ñautena. 19Male ja jalo'taguet ta'le jayem aviyaĝanatapec da'me ac'oĝot; jayem aue'tema qomle da'me ena'am gaa'me at'onataĝanaĝanaqa.»

20“Chane'eja male ya'uo da'me leuoĝoc, qama'le 'viyelaĝa ñe'me let'a. Ca'li maliaĝa ua'a ga'me qaya'aguet, qanach'e ñe'me let'a yela'aguet qama'le nomeguet da'me yichoĝoden joñe'me. Naqalegoq da'me ca'aguet, qapalec da'me yaconeguet nataq'aen nec'ouoq. 21Joñe'me c'oĝot enaac: «Taĝadena'olec, ja'uo da'me ja no'en jo'ne ñautena ñe'me Dios nataq'aen am ñautena, qama'le ja jalo'taguet ta'le jayem aviyaĝanatapec da'me ac'oĝot.» 22Qalaĝaja ñe'me let'a yamaĝalo'te gaa'me lalemaĝaje'te: «Paja'a anedoyidegue ga'me leuo 'me onaĝayaqa qama'le auañiyayelo; nataq'aen auañiyaye ga'me nechijaĝa jaga'me liaĝata choqogaa'me lapela'te naa'me lapia'te. 23Anaviquiquena ga'me uaca jo'ne 'yaĝadai qama'le aualachi. ¡'Noota qom jauoqo ga'me qadiqui'yaĝac nataq'aen 'uo da'me qat'alaĝa! 24Qa'a jenjo' yalec ena'am ta'le yeleu mañaĝa qama'te 'niyelaĝa da'me lec'alaĝa; te'me yejomac mañaĝa, qalaĝaja yitaĝa jauanaĝa.» Qama'le jogaa'me yauote ga'me neualaĝayaĝac.

25“Ñe'me c'oĝot 'yaĝaic maliaĝa ue'tague ga'me 'nonaĝa; ca'li 'viyelaq qama'le yovida'a ga'me yauaqa'a ga'me 'lachaqa' qanach'e domachiyalo queda'me t'onaĝa'tape nataq'aen deualaĝai'tape. 26Qama'le yiyaĝane'uo ga'me nalemaĝajet da'me yenat jach'e ga'me qoyauotaque. 27Ñe'me nalemaĝajet t'aqataĝanem ñe'me, enaac: «Ñe'me adanoqolec yemta 'niyelaq, maqachaĝa qaya'te yec'on nataq'aen nec'aletaye, qama'le ñe'me adet'a damaĝajoĝolegue da'me qoyalat ga'me uaca jo'ne 'yaĝadai, qa'a yitaĝa yauana.» 28Qalaĝaja yataqachiñe dalemata ñe'me 'yaĝaic qama'le nemanec ta'le yenoĝoneuo'o ga'me 'lachaqa'. Chane'eja ñe'me let'a youen da'me yec'ate'ga qaedi nachoĝodenot da'me yenoĝonaqateuo, 29qalaĝaja 'yamaqaten, nataq'aen enapega joñe'me let'a: «Am yataqachiñe auayaten queda'me qayoĝode' gaa'me 'uoidi da'me am jo'onataĝatape'uo, qama'le nach'e eta't da'me am joqoch'a, qama'te qaya'te ua'a ta'le maqachaĝa ch'e quetaq c'oĝot ga'me jayem auanem taqae'me qaedi 'uo ga'me jalic nach'e ena'am gaa'me ñaigaĝa'u. 30Qalaĝaja nayi queda'me novi' jenjo' ac'oĝot, jo'ne ja yoden jaga'me anaicaua da'me yajouaĝat jana'me quejeguetaĝailpi, qama'te aualat ga'me uaca c'oĝot jo'ne yataqachiñe 'yaĝadaic.»

31“Joñe'me let'a 'yateguet: «Am yalecolec, am nach'e eta't jayem oue'tajop, nataq'aen yema ga'me yoĝot mach'e adoĝot. 32Qalaĝaja, youen da'me jauoqo da'me qanetonaĝac jo'ne qadiqui'yaĝac nataq'aen qo'mi made'tape, qa'a ñe'me adanoqolec ena'am ta'le yeleu mañaĝa, qama'te yitaĝa nec'alegue; te'me yejomac mañaĝa, qalaĝaja yitaĝa jauanaĝa.»”

Currently Selected:

Lc 15: TSN

Highlight

Copy