Lc 12

Ena'te ami qolanaqayaqa da'me a'uaqataĝañetac

(Mt 10.26-31)

1Qamaliaĝa ue'tedi, qama'le yema'a't ga'me jiyaĝadipi yataqachiñe jalcote ga'me, qama'le 'uo ga'me pelo'te gaa'me laqaya'. Jesús male dojapegue'to gaa'me lapaĝaguenataqa: “Achiya'aguet ga'me lalequetenaĝanaĝat gaa'me fariseopi, jo'ne nach'eda ch'e nenaĝatedegue da'me yataqatelo'te. 2Qa'a qaya'te gamachaqaega qoyapadetalegue ta'le ja yovita da'me male qo'youatelegue, nataq'aen qaya'te qoyoĝotetapiñe ta'le ja yovita da'me qonoma'a. 3Chane'eja ena'uaque gaa'me anenaĝachidegue ca'li ovi'ta ga'me 'lalaĝa male qodomachiya qom nolo'; nataq'aen ga'me at'aqataqui jo'ne auoĝochitañi nale p'auo ga'me emec, male petalegue ga'me emec jo'ne p'ajeguem da'me dechoĝot qomle.

4“Ami yaqaya'olqa, ami ja'aĝatema queda'me 'noota qom ena'te at'oiyapega gaa'me jo'ne yaqanate't ta'le ami yala't, qa'a ua'edi ja yitaĝa yaqanate't ta'le 'uo ga'me ami 'yeteque. 5Male ami ja'aĝatema ñe'me jo'ne nach'eñe 'noota ta'le at'oiyapega: at'oiyapega ñe'me jo'ne yaqanatet ta'le yapalaĝat da'me at'oyaĝaqui qama'le ua'edi yaqanatet ta'le ami yamaĝauelo ga'me ne'uaĝanaqa' ga'me loeco lo'olpi jo'ne payac 'lachaqa'. Naq'aeta, 'noota qom nach'eñe at'oiyapega joñe'me Dios.

6“¿Qo'li ja aueñi 'te tayilo gaa'me dojole nemenal nale auemeñi' gaa'me cinco mayodi? Qalaĝaja, Dios qaya'te onolec ta'le yapalaĝate'ta joga'me. 7Qama'le da'me ami, chayovida'alo naa'me adayoqochidi', ñe'me Dios joote onolqa'tape naloqote'tape. Chane'eja ena'te ami qolanaqayaqa: qa'a ami yataqachiñe anapaquiyalegue da'me lajo'viyaĝa'j gaa'me qayoĝode' mayodipi.

A'uaĝachetac ñe'me Jesucristo nale auajoyiya'agueta ga'me jiyaĝadipi

(Mt 10.32-33; 12.32; 10.19-20)

8“Ami ja'aĝatema queda'me, qom 'uo gamachaqaega jayem yotauan nale dajoya'agueta ga'me jiyaĝadipi, qama'le nach'e ena'am da'me jayem jo'ne yataqachiñe jayem Jiyaĝaua Lec'oĝot, jotauan joga'me qom jajoya'agueta gaa'me piyem laje' jo'ne lamaĝa's joñe'me Dios. 9Qalaĝaja, ga'me jo'ne jayem nematapec nale dajoya'agueta ga'me jiyaĝadipi, qamqa'me qonemanec qom dajoya'agueta jogaa'me piyem laje' jo'ne lamaĝa's ñe'me Dios.

10“Ena'uaque ga'me jo'ne uo'oe gaa'me 'laqataqa jo'ne nauteta joñe'me Jiyaĝaua Lec'oĝot, da'me laviyaĝac qoyapalaĝat qomle; qalaĝaja ga'me jo'ne ye'uetac ñe'me Dios Lepaqal qamqa'me ja qoyapalaĝat da'me laviyaĝac.

11“Qom ami qoyauegouelo ga'me nemaĝaiqui, ami qoyajoĝona'agueta gaa'me jiyaĝadipi nec'atenoqo't nataq'aen jaliaĝanaqa, ena'te aviyechitac queda'me jach'e jogamaĝa at'ataĝaqui uotaĝa ga'me anenaĝachiyegue, 12qa'a qom yovita ga'me laloqo' da'me auojeyi, ñe'me Dios Lepaqal ami yayatenaĝaneque ga'me jo'ne 'noota ta'le anenaĝachiyegue.”

Achiya'agueta gaa'me adepitaqataĝanaĝacodi'

13'Uo ñe'me uetaue ga'me jiyaĝadipi dojapegue' ñe'me Jesús, enaac:

—Paĝaguenataĝanaĝaic, auenapega ñe'me yachoqolec qaedi yecolaĝachigui da'me neuoyaĝac jo'ne qadet'al qo'mi yaqauaqatenouelo.

14Qalaĝaja Jesús 'yateguet:

—¿Toqoch'e aueetapega mach'e 'yonatac da'me dojo' qaedi ena'am ta'le jayem anec'atenoqo't uotaĝa jelolegue da'me adeuoyaĝaqui?

15Nataq'aen dojapegue'to ena'uaque ga'me jiyaĝadipi, enaac:

—'Noota qom achiya'aguet ta'le auepichiya'alo gaa'me adepitaqataĝanaĝacodi', qa'a da'me at'oyaĝaqui ja chiyaqayi da'me ta'le jalcote ga'me auañiyalo jo'ne uo'oe.

16Chane'eja 'yaĝatema jenjo' laloqotenaĝanaĝaiqui: “'Uo ca'li ñe'me jiyaĝaua jo'ne neuoyaq, gaa'me lanaĝanaqa'te jalcote da'me jalayaĝac jo'ne chiyaqayi. 17Joñe'me neuoyaq male ya'uo da'me lelnataĝac: «¿Jach'e ga'me 'noota ta'le ja'uo? Qa'a qaya'te 'lachaqa' ta'le jiyamaĝat da'me yaqataĝanaĝac.» 18Qama'le mach'e enaac: «Male jayaten ga'me ja'uo nayi. Ñejoyidiñe gaa'me yiquipi' qama'le 'ñoĝodijeguem laqaya' jo'ne let'adayaqa, qaedi naqaegaua jiyamaĝatouelo yema ga'me yanec jala nataq'aen yema ga'me jo'ne jauana. 19Yem qama'le mach'e jayem da'me jenapela't: Nayi jalcote ga'me jauana jo'ne jiyamaĝatetac nalo'tagueta qayoĝode' gaa'me 'uoidi; qama'le nayi 'ñomategue, jeque'e, nataq'aen ñiyom, qama'le yataqachiñe jayem matac.» 20Qalaĝaja ñe'me Dios enapega: «¡Am chiyoĝojecolec, qa'a jenjo' pi'yaq qama'le adeleu! Qama'le ga'me jo'ne aviyamaĝat, ¿jach'e jogamaĝa ua'ajop?» 21Naq'aeta ga'me nauaneguet nale ga'me jiyaĝaua jo'ne ya'uo laponaqa' da'me leuoyaĝaco jo'ne jetaque mach'e yiyamaĝam, qalaĝaja ñe'me Dios en choĝodaq ga'me.”

Dios netelalo jogaa'me c'oqo'tolqa

(Mt 6.19-21,25-34)

22Yem da'me dojo' qama'le Jesús dojapegue'to gaa'me lapaĝaguenataqa: “Qo'che' ami ja'aĝatema da'me dojo': ena'te diyachitapiyelo naa'me adai'lidi' qa'a jouaĝat da'me at'oyaĝaqui qom qaya'te aualiqui, uotaĝa qom qaya'te adeuodi'. 23Qa'a da'me qat'oyaĝac napacalegue ga'me jo'ne jaliguinaq, nataq'aen da'me qanejiyaĝauayaĝac napacalegue ga'me jo'ne janaĝaiñe. 24Auec'achiñe' ga'me mayodipi jo'ne lenaĝa't da'me cuervos: ja danaĝa'n, ja daqataĝa'n, uotaĝa ta'le maqachaĝa yauata ga'me lanec jala uotaĝa liquipi'; qalaĝaja, Dios yanema ga'me yali'j. Qama'le ¡ami yataqachiñe anapaquiyalo'te gaa'me mayodipi! 25Qom aueñi diyachitapiyelo naa'me adai'lidi', ¿qo'li auaqanachichi ta'le aueñi nichiguegue da'me at'oyaĝaqui? 26Chane'eja, qom ja auaqanachichi ta'le auauoyi da'me dojo' mate mane'e ga'me yataqachiñe jaleca, qama'le ¿teua'atoqo' aueñi diyachitapiyelo naa'me adai'lidi' qa'a jouaĝat gaa'me laqaya'?

27“Nataq'aen auec'achiñe' gaa'me lolelaĝail jo'ne lirios nale nolelidijeguem nale. Ja t'onataĝa'n uotaĝa ta'le dacalitenaĝa'n. Taqaeue'ta, ami ja'aĝatema queda'me naq'aeta taĝa di'me jaliaĝanec di'me Salomón, yema da'me li'yoĝodic, ena'am taĝa gaa'me leuo jogaa'me lolelaĝail. 28Qa'a qom ñe'me Dios naqaeteque gaa'me lolelaĝail, jo'ne uo'oe ga'me 'nonaĝa nayi qama'te yavi'j qom 'yoĝoñi da'me qoyachaĝauelo jaga'me c'atoĝonaĝaqui, qama'le ¡yataqachiñe p'ajaye da'me ami yanema ga'me adeuodi', ami jiyaĝa'u jo'ne qaya'te adepi'i! 29Chane'eja, ami ena'te aueyachitapiye't, da'me aueloyitaque jach'e jogamaĝa aualiqui uotaĝa jach'e jogamaĝa aniyomiyigui. 30Qa'a yema ga'me jiyaĝadipi jo'ne ja p'iida'a ch'e yelotedaque daa'me daajo'; qalaĝaja ami qamqa'me 'uo ñe'me Adet'ai jo'ne yayaten queda'me auoviñetapiye. 31P'ajaye 'noota, aueloyitaque da'me lejaliaĝa joñe'me, qama'le nach'e ena'am ami qoyanema ena'uaque naajo' uo'oe.

32“Ena'te at'oiyi, ami yaqaya'olqa; ja ami 'te lama'ejoda, qalaĝaja ñe'me Adet'ai yepaquetapega ta'le ami yanema da'me lejaliaĝa. 33Auemeñi ga'me jo'ne auañiya, nataq'aen auañema gaa'me 'uo da'me louenaĝanaĝa'j; 'noota qom auauoyi da'me dojo' qa'a ena'am ta'le a'vichiyeque gaa'me adoĝoiqui'idi' ta'le ja yedalo'te da'me toye's, qama'le naq'aeta da'me 'uo da'me adeuoyaĝaqui 'me ua'ague di'me piyem, 'me qaya'te loiquiaqa'. Nach'edi di'me qaya'te yaqanatet ta'le decachi, nataq'aen qaya'te 'uo ga'me potoĝolo ta'le 'naĝat da'me en dec'oyi. 34Qa'a ga'me ue'ta da'me adeuoyaĝaqui, nach'e ena'am ue'ta jonaa'me adai'lidi'.

'Noota qom joote aniyamaĝachita't

35“¡'Noota qom a'vicheta't, nataq'aen aniyamaĝachita't! 36Ena'am ta'le ami nalemaĝaje'te jo'ne yiviteteda'aguet ga'me ladipa' qom 'niyelaq, jo'ne chiyaqa'a ga'me neualaĝayaĝac, qama'le yiviteteda'uet ga'me jom, qaedi qom pelaqatela't da'me yiyaĝaneuo qanach'e 'youatedegue. 37Made'tapolqa gaa'me nalemaĝaje'te jo'ne nelotedaye qom yejomalo'te ñe'me ladipa' da'me yovi'. Eja da'me ami ja'aĝatema queda'me en ñidiñe jogaa'me, qama'le mach'eñe yanouelo ga'me niqui'yaĝat. 38Made'tapolqa jogaa'me, qom nelotedaye da'me yauanalo mate mane'e yovi' da'me laeñi ga'me pi'yaq uotaĝa yamta'le 'yoĝoñi. 39Qama'le anetoviñetac da'me dojo': queda'me qom ñe'me loĝot ga'me emec yayatetelegue ga'me laloqo' da'me yovi' ñe'me cachaĝaic, qama'le ja yajeta ta'le taue ga'me 'lemec qaedi decachi. 40Chane'eja nach'e ena'am a'vicheta't; qa'a jayem jo'ne mach'e Jiyaĝaua Lec'oĝot 'ñiyelaq jo' qom'te, qom qamaĝaya't da'me jayem qoyeuatetaque.”

Ñe'me nalemaĝajet jo'ne yoqo'cha ladipa

(Mt 24.45-51)

41Pedro yenat joñe'me:

—Jaliaĝanec, dojo' adaloqotenaĝanaĝaqui jo'ne a'uaĝatetac, ¿qo'li nach'e qo'mita da'me aueloĝonaĝachiguilo, uotaĝa nach'e ena'ama gaa'me jiyaĝa'u laqaya'?

42Ñe'me Jaliaĝanec 'yateguet:

—Jega: ¿jach'e jogamaĝa ga'me namaĝajec da'me yataqata yepaquetelegue ga'me 'lonatac nataq'aen 'uo da'me yayaten, da'me uotaĝa ga'me ladipa yamaĝalegue qaedi yiqui'yaĝa'tape gaa'me ueteda'a ga'me 'lachaqa' nale yovita ga'me laloqo' da'me niqui'yaĝac? 43Matacolec ga'me nalemaĝajet qom novi' ñe'me ladipa, qama'le yejomalegue da'me 'yetetac ga'me jo'ne yamaĝalegue. 44Eja da'me ami ja'aĝatema queda'me qom naq'aeta, qama'le ñe'me ladipa en yelolegue yema ga'me chiyaqayi da'me liyamaĝac. 45Qalaĝaja qom ga'me nalemaĝajet en lelnataĝac queda'me uayaloqota't da'me 'niyelaq ñe'me ladipa, qama'le ja no'en da'me 'yeteque jogaa'me namaĝa's nataq'aen gaa'me namaĝajel laqaya', nataq'aen yema'a da'me deque'e, da'me niyometac qaedi 'uo da'me taĝaic, 46qama'le 'uo da'me lachoĝodec jo' qom'te. Qa'a qom novi' ñe'me ladipa, ga'me nolo' jo'ne qamaĝaya't da'me qoyeuatetaque nataq'aen ga'me yataqachiñe tachigui ga'me nolo' ja qoyayaten, qama'le ya'uo da'me ne'uaĝanaguec, yamaĝaue da'me yepagaqate'tegue da'me lachoĝode'j gaa'me jo'ne ja yataĝalo'te.

47“Ñe'me nalemaĝajet jo'ne yayaten ga'me yepaquetapega ñe'me ladipa, qalaĝaja maliaĝa ja niyamaĝateta't nataq'aen ja yoqo'cha, joga'me yataqachiñe jalcote da'me qoye'uaĝan. 48Qalaĝaja ñe'me nalemaĝajet jo'ne yauote gaa'me ja yayate'n jo'ne chiyaqayi da'me ne'uaĝanaguec, qamqa'me ja jalcote da'me qoye'uaĝan. Ñe'me jo'ne jalcote da'me qoyanem nach'e ena'am jalcote da'me qoyepaquetapega; nataq'aen ñe'me jo'ne jalcote da'me qoyen yataqatelegue nach'e ena'am jalcote da'me qoyiyaĝatapecot.

Jesús chiyaqayi da'me nelagaĝac

(Mt 10.34-36)

49“Ñanaequena qaedi jetetoue ga'me dole' jena'me jenjo' aleua; qama'le ¡chiliajaĝa nayi da'me joote edoue! 50Jaue qomle da'me ñapiyenaguec jo'ne 'uo da'me lichic, nataq'aen ¡degueja da'me yachoĝodec chayovida'a qom yepacalegue da'me dojo'! 51¿Jeele auepíchitapega ta'le ñeda'a da'me 'lemaĝac jena'me aleua? Ami ja'aĝatema queda'me ja naq'aeta, dite da'me nelagaĝac. 52Qa'a nayi ga'me dajo'tayilo naa'me noloqo'ote, gaa'me mach'e naqaya' jo'ne cinco male nelagaĝa, tres nautenalo gaa'me dos, nataq'aen dos nautenalo gaa'me tres. 53Gaa'me net'al nautenalo qomle gaa'me c'oqo'te, nataq'aen gaa'me c'oqo'te nautenalo qomle gaa'me let'al; gaa'me nat'el nautenalo gaa'me c'oqotel, nataq'aen gaa'me nec'oqotel nautenalo gaa'me mach'e lat'el; gaa'me ne'yodol nautenalo qomle gaa'me latel nataq'aen gaa'me natel nautenalo gaa'me mach'e li'yodol.”

Gaa'me 'nanaqa jo'ne di'yo't qom'te

(Mt 5.25-26; 16.1-4; Mc 8.11-13)

54Jesús nach'e ena'am enapega ga'me jiyaĝadipi: “Nale auañiyalo gaa'me piyem loje' da'me ñidijeguem jena'me tadeuo qama'le paja'a aueñiyapega: «Jetaque uotep qomle,» qama'le naq'aeta da'me yepaquetelegue. 55Nataq'aen qom yajediñe ga'me layat jo'ne qolauaic, aueñiyapega: «Nep'iyañi qomle,» qama'le naq'aeta ga'me ya'uo. 56¡Yataqachiñe da'me ja ami 'te yataqatelo'te! Qom eja auayachiñe da'me a'uaĝachetac da'me 'loyaĝac di'me piyem, nataq'aen jena'me aleua, qama'te ¿toqoch'e ja auayachiñe ta'le a'uaĝachetac gaa'me noloqo'ote jo'ne ovitauelo? 57¿Toqoch'e ja anec'acheñila't qaedi naq'aeta da'me auauoyi ga'me jo'ne chimaqachiñe? 58Qom cha'li oquegue ga'me adauteua da'me auec'achiya ga'me nec'atenoqo't ga'me jiyaĝadipi, qama'le 'noota qom auapitaqatenaac da'me qaedi yovida'a da'me aniyamaĝadeneguet queda'me cha'li 'uo da'me adedaqa', qaedi ja am 'te yauega ñe'me nec'atenoqo't. Qa'a qom ja naq'aeta ga'me aua'uo, qama'le ñe'me nec'atenoqo't am yanoue ñe'me vitaĝaic, qama'le ñe'me vitaĝaic am yamaĝaue jaga'me coñetaĝanaĝaiqui. 59Am ja'aĝatem queda'me ja yitaĝa auenoĝonegue chayovida'a qom yema auejeten da'me adaviyaĝajet.”

Jesús dapaĝaguenataĝanec da'me qo'viyeloqot joñe'me Dios

Currently Selected:

Lc 12: TSN

Highlight

Copy