Hch 2

Da'me lovidaĝac ñe'me Dios Lepaqal 'me ja 'nalegue

1Ca'li yovita da'me qo'nonaĝachigui di'me nolo' jo'ne Pentecostés ena'uaque joga'me p'etaqadaiquipi cha'li nach'ega ga'me ueteda'a da'me yema'a't. 2Qampaja'a qaale, 'uo ga'me 'noĝoyaĝac jo'ne chiyoĝogue di'me piyem, ena'am ga'me layat qom vichaĝaguet, yema en t'oqo ga'me emec jo'ne uetedaue jogaa'me. 3Qama'le ena'uaque jogaa'me, onolqa'tape netelo'te naa'me laqai'go ga'me dole' 'me ena'am ga'me nachaĝat. 4Qama'le yemeda jogaa'me yataqachiñe najaqachiguilo ñe'me Dios Lepaqal, nataq'aen paja'a yadenaĝa't gaa'me 'naqataqa laqaya', nach'e naq'aeta ga'me Dios Lepaqal yamaĝalo'te ta'le 'yaĝatetedac.

5Uo'oe ga'me judiopi jo'ne neda'ña di'me Jerusalén, chiyoĝoguelo yemeda naa'me ale'u lael, nach'egaua jo'ne nach'e eta't 'nonaĝachidegue joñe'me Dios. 6Ga'me jiyaĝadipi yema'a't ca'li domachita da'me nalimaĝa, nataq'aen ja yayate'n ga'me lelnataĝa'j, qa'a onolqa'tape jogaa'me domachiyalo gaa'me p'etaqadayaqa da'me 'yaĝate'tape naa'me mach'e 'laqataqa. 7Yataqachiñe jalcote da'me yoqochetem jogaa'me, qama'le nenatetapega't:

—¡Cha'li auec'achiñe da'me dojo'! ¿Qo'li ja 'lachaqa't di'me Galilea naa'me naajo' jo'ne doje'tape? 8Qama'te ¿toqoch'e jomachaĝalo gaa'me qat'aqataqa da'me yadenaĝa't? 9Ga'me jiyaĝadipi ueteda'a jenjo' chiyoqoda'alo di'me Partia, di'me Media, di'me Elam, di'me Mesopotamia, di'me Judea, di'me Capadocia, di'me Ponto, nataq'aen yema ga'me aleua di'me Asia, 10di'me Frigia nataq'aen di'me Panfilia nataq'aen di'me Egipto nataq'aen ena'uaque gaa'me ale'u di'me Libia yauoqoda'a di'me noic jo'ne Cirene. Nach'e ena'am 'uo ga'me jiyaĝadipi jo'ne Roma laje' jo'ne neteda'ña jena'me jenjo'; 11uo'oe gaa'me yataqachiñe judiopi jo'ne 'lachaqa't jena'me jenjo' nataq'aen gaa'me laqaya' ch'e tadoue ga'me lepe'e' jena'me judiopi. Nach'e ena'ama uo'oe gaa'me chiyoqoda'a di'me Creta nataq'aen Arabia. Qama'le ¡jomachaĝalo gaa'me mach'e qat'aqataqa da'me yadenaĝa't: 'yaĝate'tape joda'me p'ajodaye 'lonataqa joñe'me Dios!

12Ena'uaque jalcote da'me yoqochetem da'me dojo', nataq'aen ja yayate'n ga'me lelnataĝa'j; qama'le nenatetapega't:

—¿Jach'e ga'me yelo'teguet yema naa'me naajo'?

13Qalaĝaja uo'oe gaa'me ch'e de'uenaĝa'tape, enapega't:

—¡Jouaĝat da'me ch'e taĝayaqa naa'me!

Nechachiñe ñe'me Pedro da'me ya'uo 'laqatac

14Chane'eja Pedro nechachiñe ca'li choqogaa'me once namaĝa's laqaya', qama'le netenec ga'me 'laqatac, enaac: “Ami judiopi, nataq'aen ena'uaque ami jo'ne oñita'ña jenjo' Jerusalén, 'noota qom yataqachiñe anaquiaĝañiya ga'me jo'ne ami ja'aĝatema, qaedi auayachiñe ga'me yelo'teguet da'me dojo'. 15Naajo' jiyaĝa'u jo'ne auepíchitapega da'me taĝayaqa, ja naq'aeta da'me dojo' queda'me maliaĝa ne'teta. 16Naq'aeta taĝa da'me dojo', dite da'me nayi da'me 'uo jo'ne auañiya nach'eda 'yaĝatetac ca'li di'me Dios 'laqataĝanaĝanec Joel, ca'li enaac:

17«Ñe'me Dios 'yaĝatetac gaa'me uo'oe qomle,

Gaa'me noloqo'ote jo'ne p'atedegue:

Jeyala'aque ñe'me Yepaqal ena'uaque ga'me jiyaĝadipi;

Qama'le jogaa'me ac'oqo'tolqa

Nataq'aen ac'oqoteldi' 'yaĝa'tape qomle

Daa'me mach'e 'yaqataĝanaĝaco,

Nataq'aen ga'me joĝodipi 'uo da'me lauanaĝanaĝa'j

Nataq'aen joga'me 'yaĝaicachidipi male uo'oe qomle

Daa'me lichoĝonaĝaco.

18Nach'e ena'ama gaa'me yalemaĝaje'te

Nataq'aen gaa'me yalemaĝajetel

Jeyala'aque qom'te gaa'me noloqo'ote ñe'me Yepaqal,

Qama'le 'yaĝate'tape daa'me mach'e 'yaqataĝanaĝaco.

19Yataqachiñe 'uo da'me li'yoĝodi'j gaa'me jaloĝo'n qom'te,

Jaga'me netauo', ga'me dole' chaqaga'me nemala',

'Me uedalegue di'me piyem,

Jo'ne nalalegue jena'me aleua.

20Taya napidiyi qomle jañe'me ajeua,

Nataq'aen ñe'me auoĝoic taya netauo',

Qom maliaĝa ja yovita ga'me nolo'

Jo'ne lovidaĝaiqui ñe'me Jaliaĝanec,

Nolo' jo'ne p'ajaye nataq'aen 'yoĝodaq.

21Nataq'aen ena'uaque gaa'me

Jo'ne yiyaĝatedaque ñe'me Jaliaĝanec,

Yaqanate't ta'le tadoue da'me qonec'alaĝatedegue.»

22“Chane'eja, ami jo'ne israelpi, yataqachiñe anaquiaĝañiya da'me ami ja'aĝatema: queda'me joote auayachiñe jo'ne Dios ami yaloĝonalo ca'li da'me lañoqotaĝanaĝac ñe'me Jesús jo'ne Nazaret le'ec, nach'eñe en na'yalo da'me yaloĝo'n gaa'me p'ajodaye li'yoĝodico, gaa'me lañoqotaĝanaĝaco nataq'aen 'nanaqa jo'ne yauo'oe. 23Qama'le Jesús, jo'ne qoyaneuo ca'li queda'me nach'eda joote yaqataĝañi ñe'me Dios jo'ne ya'uo da'me 'lonataĝanaĝac, ami aualachi, auep'eñiyajeguem auaviquelo'te gaa'me jiyaĝa'u jo'ne ja 'noe'n. 24Qalaĝaja Dios 'niyelaĝachijeguem, yachiyoĝotaue da'me leco'yaĝac da'me leleuaĝa, qa'a da'me neleuaĝa ja yaqanatet ta'le nale'en nomat. 25Qa'a ñe'me David 'yaĝatetac ca'li ñe'me Jesús, eet'oi:

«Jauana ñe'me Jaliaĝanec da'me jayem dajo'taguet;

Qa'a nach'e eta't jayem ue'tajop,

Qaedi qaya'te gamachaqaega jayem yedaĝat.

26Qo'che' machiñe jena'me yeuel,

Nataq'aen jena'me yachaĝat yataqachiñe 'uo da'me lamaic;

Chayovida'a da'me ñejiyaĝauayaĝac

'Nomateguejop da'me leuataqataĝanaĝac,

27Qa'a ja auaje'tem ta'le nale'en jouetaue jaga'me napa'l lae't,

Uotaĝa ta'le auaje'tem da'me chayovida'a ja no'en da'me yapat,

Jayem jo'ne adalemaĝajet 'me ja 'nalegue.

28Jayem auatetonaĝanec da'me ladic dojo' 'noyaĝac

Nataq'aen jayem auen jaqachigui da'me yamaic

Queda'me jayem oue'tajop.»

29“Ami yaqaya'olqa, cha'li jayem auomachiyi'ya da'me ami ja'aqataĝanema queda'me yeleu ca'li di'me jachiyojoĝoguet David choqoda'me qoyijeñi, nataq'aen ga'me napa'l lae't maliaĝa qo'mi uetauelo. 30Qalaĝaja David mach'e Dios 'laqataĝanaĝanec, nataq'aen yayaten da'me Dios 'naĝateguet ga'me 'laqatac jo'ne yanem queda'me 'uo qomle chiyaqaue ga'me c'oqo'tepi jo'ne nañgui jaga'me nejaliaĝaiqui. 31Chane'eja queda'me joote 'uaeñe yauana da'me 'niyelaĝajeguem ñe'me Dios Liquiyac, David 'yaĝatetac da'me dojo' queda'me ja nale'en uetaue jaga'me napa'l lae't ñe'me Dios Liquiyac uotaĝa ta'le nec'oechiñe ga'me lapat. 32Chane'eja nach'eñe ñe'me Jesús da'me Dios 'niyelaĝachijeguem, qama'le ena'uaque qo'mi jechoĝotaqatac da'me dojo'. 33Qama'le Dios yana'ña di'me yayaten, nataq'aen yi'yoĝoden, nataq'aen yanem ñe'me Lepaqal 'me ja 'nalegue jo'ne joote 'yaĝatetapem ca'li. Qama'le ñe'me nach'eñe chiyoqo'tot da'me qo'mi yeyala'aque: dojo' nach'eda auañiya nataq'aen auomachiya nayi. 34Qa'a ja naqaedi di'me David ta'le yec'adije'ma di'me piyem, queda'me nach'edi enaac:

«Joñe'me Jaliaĝanec dojapegue' ñe'me Yejaliaĝanec:

Ona'ña jena'me jayaten,

35Chayovida'a qom jen auapeta'ñelo

Ena'uaque gaa'me adaute'udi'.»

36“Chane'eja auayachiñe jo' da'me dojo', ami Israel c'oqo'tepi, queda'me nach'eñe Jesús jo'ne auep'eñiyajeguem, Dios yejaliaĝat nataq'aen en Liquiyac.”

37Mane'e ca'li domachita da'me dojo' ga'me jiyaĝadipi, qama'le yoqoche' naa'me lai'li, nataq'aen yachimaĝadeta ñe'me Pedro nataq'aen gaa'me namaĝa's laqaya':

—Ami qadaqaya', ¿jach'e ga'me jauoqo nayi?

38Pedro 'yategueta jogaa'me:

—A'niyelaqaeyot joñe'me Dios, nataq'aen onolqa'tape ami auacoñiyeguet da'me nachilaĝanataĝanaĝac jo'ne en di'yoq da'me auep'iiya'a joñe'me Jesucristo, qaedi Dios yapalaĝa't jodaa'me adoecodi', qama'le nach'eda naq'aeta ami qoyanema joñe'me Dios Lepaqal jo'ne ja 'nalegue. 39Qa'a dojo' 'yaĝatetac ca'li ñe'me Dios, queda'me mach'e adoĝochi nataq'aen gaa'me ac'oqo'chedi', choqoga'me jiyaĝadipi jo'ne qaya'aguelo; dojo' mach'e yelo'teguet qaedi ua'ajopa ena'uaque jogaa'me jo'ne jetaque yiyaĝanalo ñe'me Qadejaliaĝanec Dios.

40Qama'le queda'me yitaĝa yauo'oe gaa'me 'laqataqa laqaya', Pedro dojapegue'to jogaa'me nataq'aen noqotetapegalo, enaac:

—¡Anaqaloĝochiyeguet da'me ne'uaĝanague'j qomle jena'me jenjo' jiyaĝadipi jo'ne ja no'en!

41Chane'eja naq'aeta, gaa'me jo'ne yoqochideta da'me 'laqataĝanaĝac qonachilaĝa'n ca'li; qama'le jojo' nolo' uoja'aegaua tres mil jiyaĝadipi da'me nichidegue ga'me p'etaqadaiquipi. 42Nataq'aen yataqachiñe 'nañaĝatela'ajalo ca'li da'me yiyamaĝa't da'me lapaĝaguenataĝanaĝa'j jogaa'me Jesús lamaĝa's nataq'aen en lecochaĝanaĝa't ga'me yauata; nataq'aen yema'a't nale yauo'oe gaa'me netamenaĝaco, nataq'aen necolaĝachidiye ga'me pan.

Da'me 'loyaĝa'j ca'li ga'me 'uaediñe p'etaqadaiquipi

43Ena'uaque jalcote da'me qoyoqoch'em jouaĝa't gaa'me p'ajodaye lañoqotaĝanaĝaco 'me qoyauanalo nataq'aen 'nanaqa jo'ne Dios yauo'oe 'me en na'yalo gaa'me namaĝa's. 44Ena'uaque joga'me p'etaqadaiquipi yataqachiñe nalo'ta't da'me lelnataĝa'j nataq'aen mach'egaua da'me e'n lecochaĝanaĝa't yema gaa'me jo'ne yauata: 45yeme'n gaa'me 'nale'u nataq'aen ga'me yauata, qama'le gaa'me 'uo da'me louenaĝanaĝa'j qonecolaĝate'talo jaga'me laicaua. 46Yemeda gaa'me noloqo'ote yec'adeta ga'me tamenaĝaiqui let'adaic qaedi yema'a't, nataq'aen onolec ga'me 'nachaqa' ueda'a nale neuachidigui ga'me pan, 'uo da'me lamai'j nale dajotedaye ga'me yali'j nataq'aen ja diyachiyaqayaqa naa'me lai'li. 47'Nonaĝachidegue ñe'me Dios nataq'aen qonedo'teneque jogaa'me; nataq'aen yemeda naa'me noloqo'ote en nichiquetaye ga'me napetenegueta joga'me p'etaqadaiquipi ñe'me Jaliaĝanec, gaa'me jo'ne naqaegaua yiyaĝanalo ñe'me, qaedi qonec'alaĝatedegue.

Currently Selected:

Hch 2: TSN

Highlight

Copy