2 P 3
3
Da'me 'liyelaĝajoĝoc ñe'me Jaliaĝanec
1Ami yaqaya'olqa, naajo' yedii's male dos gaa'me nedel 'me ami jamaĝalo. Da'me mach'e 'yamaqatenataĝanaĝac naa'me dos nedel uedaye da'me ami japaĝagueneque, da'me ami jayatenaĝanaĝaneque da'me jo'ne chimaqategue. 2Anetoviñetaque jaa'me noloqo'ote laqaya' da'me 'yaĝatetedac dia'me Dios 'laqataĝanaĝanaqa jo'ne ja 'nalo'te; nataq'aen da'me lamaĝajoĝonaĝac joñe'me Qadejaliaĝanec mach'e Qadec'alaĝaiqui Jesucristo, da'me jo'ne joote ami yapaĝagueneque jogaa'me lamaĝa's.
3Qama'le 'noota qom ena'uac da'me ami yataqata auayachiñe nataq'aen da'me anetoviñetaque da'me dojo': jogaa'me noloqo'ote jo'ne p'atedegue qama'le novi't qomle ga'me jiyaĝadipi jo'ne quetapegue'to jogaa'me ja 'noe'n jo'ne mach'e lamaico, choqoda'me e'n le'uenaĝanaĝaco 4da'me denataĝa'tape: “¿Jach'e ga'me eeta da'me 'yaĝatetac ñe'me Cristo, da'me eetapega 'niyelaĝaquena? Nayi joote yele'u jodia'me mach'e qadet'al, qama'le chiyoqotelegue joca'li yemta qoye'et jena'me aleua, maliaĝa queta yemeda daa'me jo'ne uo'oe.” 5Qa'a jogaa'me jiyaĝadipi ja jetaque uenate'talo jaa'me 'uoidi jo'ne 'uaechidiñe da'me jalchi'ena da'me 'uo di'me piyem joca'li, nach'e ena'am jena'me aleua jo'ne qoyen chiyaqañgui ga'me noĝop ca'li ñe'me Dios ya'uo da'me 'laqatac, qama'le qoyen netañgui laeñi jena'me noĝop. 6Nach'e ena'am da'me en chiyaqayi ga'me noĝop joga'me nedep let'adaic jo'ne nejoyiñe joca'li yema gaa'me uetedalegue jena'me aleua. 7Qalaĝaja di'me piyem nataq'aen jenjo' aleua jo'ne cha'li 'uo nayi, joote qoyeuataqateta'aguet ga'me dole' qa'a nach'eñe ñe'me Dios da'me damaĝajoĝolegue ga'me dole' en yavic, qom yovita ga'me nolo' qom ya'uo da'me lec'atenaĝanaĝac qama'le qoyala't jogaa'me qaleuaĝayaqa.
8Nataq'aen da'me laqaya, ami yaqaya'olqa, eet'oi: ena'te auapalaĝache'ta da'me ee'tec ñe'me Qadejaliaĝanec, ga'me onolec nolo' en ena'am ga'me mil na'me 'uoidi, qama'le ga'me mil na'me 'uoidi ena'am ga'me onolec nolo'. 9Uo'oe gaa'me jo'ne eetedapega ja eja da'me 'niyelaĝaquena ñe'me Qadejaliaĝanec, qalaĝaja ja naq'aeta, dite da'me cha'li uayaloĝoden da'me en yepaquichigui da'me jo'ne joote 'yaĝatetac, qa'a yajouaĝat da'me ami neualaĝae'to, queda'me ja 'yamaqaten ta'le 'uo ga'me yeleu, dite da'me yeuate'ta ena'uac da'me 'niyeloqot joñe'me.
10Qalaĝaja ga'me nolo' qom 'niyelaĝaquena ñe'me Jaliaĝanec, qama'le nejeteteuo ena'am ga'me cachaĝaic. Ua'a qama'le di'me piyem male 'uo da'me 'loĝoyaĝac let'adaic da'me iyiñe, qama'le 'uo ga'me dole jo'ne yaviyaĝa't yema jogaa'me neteda'ague di'me piyem. Yem qama'le jena'me aleua choqogaa'me jo'ne uetedalegue da'me male tadoue da'me laloqotenaĝanaĝac ñe'me Dios.
11Yema gaa'me uo'oe male qoyolaĝachigui qomle. Chane'eja da'me ami, ¡'noota qom let'adaic da'me anetelaĝaqui nataq'aen da'me nach'e eta't aueñi yoqovita da'me at'oyaĝaqui da'me oquitapegue' ñe'me Dios! 12Aueuachi'taguet ga'me nolo' 'me lovidaĝaiqui ñe'me Dios, qama'le auadeñita'aguet qomle ga'me nolo'. Qama'le qom yovita ga'me nolo', di'me piyem male qoyaviyaĝat, qama'le pal. Nach'e ena'ama gaa'me uo'oe male nimichidiñe da'me uedaue ga'me dole' lauaq. 13Qalaĝaja da'me qo'mi jeuataqa'ta ga'me piyem jo'ne dalaĝaic nataq'aen ga'me aleua jo'ne dalaĝaic, nach'egaua jo'ne Dios joote qo'mi 'yaĝatema, qama'le ena'uaque ga'me jiyaĝadipi jo'ne ueda'ña nach'e eta't da'me 'noote' nataq'aen da'me yataqatelo'te.
14Chane'eja, ami yaqaya'olqa, da'me cha'li auachetaque da'me dojo', 'noota qom ena'te aueñi qalaq da'me dojo', qaedi ñe'me Dios ami yauanalo da'me 'uo da'me at'emaĝaqui, nataq'aen yema da'me ami yoqovite' choqoda'me qaya'te adaviyaĝaje'che. 15Anetoviñetac da'me napogaĝadenaĝac ñe'me Qadejaliaĝanec, queda'me qo'mi yeuate'talo qaedi 'uo da'me mach'e qadec'alaĝac. Naqaeda jo'ne joote ami 'yaĝatema ñe'me jo'ne mach'e qadaqaya Pablo, da'me joote ami yamaĝalo gaa'me ledii's, da'me jo'ne chiyaqayi da'me layatenaĝanaĝac 'me Dios yanem ca'li. 16Onole'tape jogaa'me jo'ne mach'e lediijel joñe'me, da'me joote 'yaĝate'tape da'me dojo', mate mane'e uo'oe jogaa'me 'laqataĝanaĝaco jo'ne 'uo da'me laqalaico ta'le qoyayate'n, qama'le jogaa'me qaya'te layatenaĝanaĝa'j nataq'aen da'me qaya'te 'lañaĝac da'me lepe'e', nach'egaua jo'ne yajaĝadiñe naa'me naajo' napaĝaguenataĝanaĝaco, qama'le nach'e ena'ama q'aen jogaa'me Dios 'laqataĝanaĝaco laqaya' da'me yajaĝadiñe, qama'le 'uo qomle da'me mach'e laviyaĝaje't.
Da'me p'ategue nep'iyenataĝanaĝac
17Chane'eja, ami yaqaya'olqa, da'me male joote auayachiñe da'me dojo' 'naqataĝanaĝac, 'noota qom yataqata anechilela't, qaedi ja ami 'te yauetegue da'me loqovinaĝanaĝa'j jogaa'me loeco lo'olpi, qama'le ja 'naĝat da'me chimaqachiñe jo'ne ami uetauelo. 18Qalaĝaja 'noota da'me yataqachiñe auatetoñi ñe'me Qadejaliaĝanec mach'e Qadec'alaĝaiqui Jesucristo, qama'le da'me ami nichiguegue da'me adoqopich'i. ¡'Noota qom qoyauana da'me 'lonaĝa joñe'me, nayi jenjo' nolo' nataq'aen yemeda naa'me noloqo'ote, nach'e eta't ja pal! Jaja'a, nach'e naq'aeta da'me dojo'.
Currently Selected:
2 P 3: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina