2 P 1
1
Lep'iyenataĝanaĝac ñe'me Pedro
1Jayem Simón Pedro, da'me jayem necochoqo't joñe'me Jesucristo nataq'aen da'me jayem lamaĝajec joñe'me, ami jamaĝalo da'me yep'iyenataĝanaĝac, da'me ami jo'ne joote auacoñiyeguet da'me nepe'e jo'ne yataqachiñe onaĝaic, yajouaĝat da'me ami yichoĝode'n joñe'me Qanedios jo'ne Qadec'alaĝaiqui mach'e Jesucristo, nach'eñe jo'ne yataqachiñe yataqatelegue. Chane'eja da'me adepi'i male ena'am da'me jo'ne mach'e qadepe'e. 2'Noota qom nichiquetajeguem da'me lichoĝodenataĝanaĝac joñe'me Dios jo'ne ami yanema, nataq'aen da'me 'nemaĝac, yajouaĝat da'me male auatetoñi joñe'me Qanedios choqoñe'me Jesús mach'e Qadejaliaĝanec.
Da'me lajoĝoc da'me qoquetapegue' joñe'me Jesús
3Joñe'me Jesús joote en chiyaqayi da'me mach'e lañoqotaĝanaĝac da'me qo'mi yanema yema ga'me jo'ne youetaque da'me qat'oyaĝac qaedi yataqata qolaqatapegue' joñe'me. Qama'le qo'mi yatetonaĝanaĝaneque joñe'me Qadet'a, nach'eñe jo'ne qo'mi yiyaĝanalo qaedi jaĝaue da'me 'lonaĝac choqoda'me lejaliaĝa jo'ne ja 'nalegue. 4Naa'me naajo' jo'ne uo'oe, nach'enaua jo'ne chiyaqauelo da'me jo'ne qo'mi 'yaĝatema jo'ne yataqachiñe let'adayaqa nataq'aen da'me jalcote da'me lajo'viyaĝac, qaedi naa'me naajo' jo'ne uo'oe e'n auañoĝochi da'me aneuañiya'uo da'me lajoĝoc ñe'me Dios qama'le nach'e ena'am da'me ami yaĝa'n da'me neleuaĝa jo'ne chiyaqayilo naa'me ja 'noe'n jo'ne lelnataĝaco ga'me loeco lo'olpi 'me uetedalegue jena'me aleua. 5Chane'eja 'noota qom a'nañaĝachiyeguet da'me aviyamaĝacheta't da'me adepi'i jo'ne onaĝaic, qama'le anoqochiñegue da'me adiyamaqataĝanaĝaqui choqoda'me adayatenaĝanaĝaqui. 6Nach'e ena'am anoqochichiñegue da'me auayachiñe da'me anomachi' gaa'me mach'e adamaicodi', choqoda'me yataqata anapogaĝadeñi nataq'aen da'me oqui'tegue ñe'me Dios. 7Nach'e ena'am avichoĝodeñi' gaa'me adaqayadi' qama'le yataqata adoqopichiya ena'uac.
8Qom naq'aeta da'me aueñi adoqochidi' naa'me naajo' jo'ne uo'oe nataq'aen da'me anichiyaĝachiyegue, qama'le da'me at'oyaĝaqui 'uo ga'me chiyaqayi qomle, qa'a ja ch'e yajamaĝajaye da'me auatetoñi ñe'me Jesucristo mach'e Qadejaliaĝanec. 9Qalaĝaja ga'me jo'ne ja yaconeguet da'me dojo', nach'ega jo'ne ena'am ga'me qanam uotaĝa ga'me jo'ne jaqaloq da'me lec'atenaĝanaĝac, queda'me ja netouenec da'me joote qoyiyo'y jogaa'me loeco toye's. 10Chane'eja ami yaqaya'olqa, yajouaĝat da'me Dios ami yiyaĝanalo ca'li qama'le nayi male ami liquiyaqa, 'noota qom auepaquitapega da'me dojo' qaedi nach'e eta't nichiquetajeguem da'me adepi'i, qa'a qom naq'aeta da'me auauoyi qama'le ja yitaĝa ta'le auapolegaĝañi. 11Qama'le naq'aeta qomle da'me nalo'ta't da'me ami qo'youategueta jogaa'me najo'mi ga'me nejaliaĝa jo'ne qaya'te loiquiaqa', nach'egaua jo'ne lejaliaĝa ñe'me Qadejaliaĝanec mach'e Qadec'alaĝaiqui Jesucristo.
'Uo da'me lañoqotaĝanaĝac ñe'me Pedro da'me dapaĝaguenataĝan
12Chane'eja nach'e eta't da'me ja jaĝañi da'me ami ñetouenaĝanaĝaneque yema da'me dojo', queda'me joote yataqachiñe auayachiñe nataq'aen da'me nach'e eta't da'me oquitalegue da'me eja jo'ne joote ami qoyapaĝagueneque. 13Da'me cha'li maliaĝa jec'aletaye, 'uo da'me yelnataĝac da'me jeetapega 'noota ta'le nach'e eta't ami ñetouenaĝanaĝaneque da'me dojo' napaĝaguenataĝanaĝac. 14Ñe'me mach'e Qadejaliaĝanec Jesucristo joote jayem yayatenaĝanaĝanec da'me ja uayaloq da'me jeleu jo' qomle, 15qalaĝaja ja'uo yema ga'me jo'ne maqachaĝa jaqanatet qaedi nach'e ena'am qom male jayem qaya qama'le da'me ami maliaĝa anetoviñetaque yema naa'me naajo' 'naqataĝanaĝaco jo'ne ami janema.
16Joote ami japaĝaguenaĝaque da'me lañoqotaĝanaĝac ñe'me Qadejaliaĝanec Jesucristo nataq'aen da'me eeta da'me 'liyelaĝajoĝoc, qama'le jenjo' napaĝaguenataĝanaĝac jo'ne ami janemaĝam ja chiyaqayi ga'me 'naqataĝanaĝac jo'ne ch'e qoya'uo uotaĝa ga'me jo'ne ch'e qoyepetetapega, qa'a da'me qo'mi yataqata jauanaĝa ca'li ñe'me Jaliaĝanec da'me yataqachiñe let'adaic da'me lañoqotaĝanaĝac. 17Jauanaĝa ca'li ñe'me Qadet'a Dios da'me yanem da'me li'yoĝodenataĝanaĝac nataq'aen da'me en 'lonaĝac, joca'li 'uo da'me 'laqatac joñe'me Dios jo'ne eetac: “Jenjo' jo'ne mach'e Yalec 'me ñoqopitaĝaua: nach'ena jo'ne mach'e yiquiyac.” 18Da'me qo'mi yataqata jomachaĝa jo'me 'naqatac jo'ne chiyoĝogue di'me piyem, qa'a jouaqa'tajop ñe'me Qadejaliaĝanec ca'li ua'ña ñe'me qajoĝonaĝa jo'ne niyamaqatac.
19Qama'le jenjo' jo'ne yataqachiñe 'yaediñi daa'me nedii's jo'ne lapaĝaguenataĝanaĝaco jodia'me Dios 'laqataĝanaĝanaqa. Chane'eja yataqata auacoñiyegueta naa'me naajo' qama'le auoqochiiyalo, qa'a naa'me naajo' napaĝaguenataĝanaĝaco eda'am jaga'me coyadaĝanaqate qom yecoyadelegue ga'me 'nachaqa' jo'ne 'uo da'me 'lalaĝa. Yataqata auoqochiiya chayovida'a da'me yeda'aguet ga'me nete' qama'le nenoĝojeguem jaga'me uaqachiñi jo'ne ni'chije qaedi yecoyadelo'te naa'me adai'lidi'. 20Qalaĝaja 'noota qom yataqata auayachiñe da'me dojo': queda'me qaya'te 'uo ga'me yaqanatet ta'le yachiyoĝotayi ga'me mach'e lelnataĝac da'me 'yaĝatetac naa'me nedii's. 21Qa'a jogaa'me Dios 'laqataĝanaĝanaqa jo'ne uo'oe joca'li ja 'yaĝatetedac da'me jo'ne chiyaqayi da'me mach'e lelnataĝa'j, dite da'me nach'egaua joca'li jogaa'me paĝaguenataĝanaĝayaqa jo'ne quetegue joñe'me Dios, qama'le nach'eñe ñe'me Dios Lepaqal da'me yojaĝanaĝa'n.
Currently Selected:
2 P 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina
