1 Co 2
2
Ja qo'mi p'ajodaye qaedi jaloĝonaq joda'me lañoqotaĝanaĝac ñe'me Dios
1Ami yaqaya'olqa, ca'li ami jec'atalo qaedi ami ja'aĝatapema da'me yataqatelegue jo'ne Dios yaloĝon, qama'le ja ami 'te janema gaa'me 'naqataqa jo'ne qalache uotaĝa jiyaĝaua layatenaĝanaĝaco. 2Qa'a ca'li ami jouetauelo, da'me mach'e yelnataĝac jetaque onolec ga'me ami japaĝagueneque: joda'me 'naqataĝanaĝac 'me 'yaĝatetac queda'me Jesús mach'e Dios Liquiyac, qalaĝaja nach'ena yeleu ca'li netaye jaga'me sodoso. 3Ca'li ami joue'tajopa, jena'me yapat yataqachiñe nejalichiñe nataq'aen jayem yeviloĝolaqatet da'me yoqolanaĝa, 4qama'le ca'li ami jojapegue'to nataq'aen ami japaĝagueneque da'me 'naqataĝanaĝac, ja ami 'te jedolo'te ga'me 'yaqataqa jo'ne qalache qaedi ami ñauela'ajalo. Ja naq'aeta, dite da'me 'yaqataĝanaĝac nach'eda 'nanec queda'me yataqachiñe t'adaic da'me lañoqotaĝanaĝac joñe'me Dios Lepaqal, 5qaedi da'me adepi'i ja chiyaqayi da'me layatenaĝanaĝa'j jogaa'me ch'e jiyaĝa'u, dite da'me lañoqotaĝanaĝac joñe'me Dios.
Da'me nayatenaĝanaĝac yataqachiñe eja mach'e chiyaqayi joñe'me Dios
6Qalaĝaja 'uo da'me nayatenaĝanaĝac jo'ne japaĝaguenaĝaque gaa'me jo'ne t'añi da'me lepe'e', mate mane'e ja layatenaĝanaĝac jena'me aleua, ja layatenaĝanaĝa'j gaa'me jo'ne nejaliaĝatedelegue jena'me aleua, nach'egaua ja cop'a da'me qoyapalaĝa't qomle. 7Da'me nayatenaĝanaĝac jo'ne japaĝaguenataĝanaqatapec nach'eda Dios yaloĝon; ca'li maliaĝa ja ye'et jena'me aleua, ñe'me Dios jetaque ya'uo da'me qo'mi yachiteque joda'me 'lonaĝac joñe'me, qalaĝaja da'me jetaque ya'uo 'me 'yaeñi joca'li ja qoyaloĝon, qoyoĝochi'ñejopa joga'me jiyaĝadipi chayovida'a nayi. 8Qaya'te onolec gaa'me jo'ne nejaliaĝatedelegue jena'me aleua ta'le yayaten dojo' nayatenaĝanaĝac; ta'che joote yayate'n, qama'le ja yanetedaye jaga'me sodoso da'me yala't ñe'me Jaliaĝanec jo'ne naqaeñe netaue da'me 'lonaĝac ñe'me Dios. 9Qalaĝaja, naq'aeta da'me enapega't naa'me nedii's jo'ne qoyedidiñe ca'li, eet'oi:
«Ga'me jo'ne qaya'te yauanapega uotaĝa domachiya,
Da'me jo'ne qaya'te uenate'ta ta'le naq'aeta da'me di'yoq,
Nach'eda dojo' jo'ne joote Dios yiyamaĝateta't
Qaedi yanema gaa'me noqopideta joñe'me.»
10Chane'eja ñe'me Dios Lepaqal 'me ja 'nalegue joote qo'mi e'n di'yoĝoma ga'me jo'ne qoyoĝochiñe joca'li, qa'a ñe'me Lepaqal yataqachiñe nemitaque yema da'me lelnataĝaco joñe'me Dios. 11¿Jach'e jogamaĝa jiyaĝaua yaqanatet ta'le yayaten ga'me lelnataĝac ga'me jiyaĝaua laqaya? Dite ga'me mach'e lepaqal jo'ne netaye ga'me qamqa'me yayaten. Nach'e naq'aeta da'me dojo', onolec ñe'me Lepaqal joñe'me Dios yayaten ga'me lelnataĝac joñe'me. 12Qo'mi qamqa'me joote jayatenaq ga'me jo'ne Dios qo'mi yanema, qa'a ñe'me Lepaqal jo'ne joote jaconaĝaguet ja chiyaqa'ña jena'me jenjo' aleua dite da'me chiyoqo'ot joñe'me Dios. 13Chane'eja, ja'aĝataqa'tape naa'me naajo' uo'oe, qalaĝaja naa'me qat'aqataqa ja chiyaqayilo gaa'me layatenaĝanaĝaco ga'me ch'e jiyaĝaua dite ñe'me Lepaqal joñe'me Dios, qama'le japaĝaguenaĝaque naa'me naajo' uo'oe jogaa'me jo'ne joote yacoteguet ñe'me Dios Lepaqal.
14Qalaĝaja ga'me jiyaĝaua jo'ne ja ue'tajop ñe'me Lepaqal joñe'me Dios ja yaqanatet ta'le 'youategueta gaa'me uo'oe jo'ne chiyoqo'oto joñe'me, qa'a ga'me en lelnataĝac queda'me ch'e chiyoĝojoĝoc, ja yaqanatet ta'le yayaten da'me yataqachiñe lajoĝoc da'me dojo', qa'a ga'me ch'e jiyaĝaua ja yaqanatet ta'le naloqoten ga'me jo'ne chiyaqayi ñe'me Dios Lepaqal qom ja naqaeñe uetaue ga'me. 15Ga'me jo'ne joote yaconeguet ñe'me Dios Lepaqal qamqa'me naloqote'n ena'uaque gaa'me uo'oe, qama'le qaya'te jiyaĝaua laqaya ta'le yaqanatet da'me naloqoten joga'me. 16Qa'a naq'aeta da'me enapega't naa'me nedii's, eet'oi:
«¿Jach'e ga'me yayaten ga'me lelnataĝac ñe'me Jaliaĝanec?
¿Jach'e ga'me yaqanatet ta'le yapaĝaguen joñe'me?»
Qalaĝaja da'me qo'mi, joote qo'mi uetauelo da'me lelnataĝac ñe'me Cristo.
Currently Selected:
1 Co 2: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina
