Masmur 9
9
Amisye Po patimu moyare raugaje mine so rai
1Masmur Daud po ratoe. Nto irati akari po vatano matayao ukiny maugavo ransyerane rai ai. Mamaisyo ransyeran ‘‘Mut-Laben’’ rai.
2 # 9:2 Arono Masmur 9 muno 10 ratoe no wusyinoe, omamo masmur mbe intabove. Masmur umaso omamo ransyerano Ibrani akrostik inta mije, weye ntavondi urupijo Ibrani ama ntetebeaje rai. Weramu ayao Yawa ntavondi urupije so rai jewen.Syare syo kove raura seo AMISY Winai, inanuga ntenami rautan,
muno syare syo Nya anakotaro ndaveti mbe anaanibe rariri.
3Syare inananibe muno inanayanambe weye Winya ana ndave mbewar,
sya Amisy Winyi Ntiti Rave, syare rikiny syo Nya tame rararimbe.
4Weye wimarovave sya marova mai ti wansuk muno unanajibe,
onawamo utaopon muno ugwenen.
5Weye Winyirati Nyo marimbe rinai,
muno Winyirati Akari Nyo moyare rapatimu rinai.
6Winyo mangke rapatimu susyo wanave Nai jewene mai to,
muno Nyo vatano mamune maupaeta ti makanive,
muno awa tame mamo Nyo raupaisy ti rakanive ntoa nuge nuganui.
7Reama marova nawamo maupaeta ti makanive to,
awa muni mainyamo Nyo rakupi ti ntuna,
weti vatane inta mansaemendi akato mai jewen.
8Weramu AMISY Winyirati mbe akarive ntoa nuge nuganui,
wintuna no kursijo titi rai indamu Nyo mangke rapatimu mine so rai.
9Winyirati Nyo patimu moyare raugaje vatan tenambe mine so mai,
muno Nyo ayao mamaisye rapatimu susye kotare mai.
10AMISY Winyirati yano oram ntiti no irati vatano matawanto maora,
Winyirati ndarino maora arono una irati ana nsosobe rai.
11Sya AMISY, vatano wo naen tugaive no manuga rai nawamo mansanaveano winamen,
weye vatano ude ubeaje Nai nawamo winaneme mpaya mai jewen.
12Wakiny! AMISY ararin, Wepirati be akarive no Sion!
Wapo Apa ana dave ravovo susye kotare mai.
13Weye Opirati Po mangke rasakinavo vatano maneme nijame mai,
yara aemeno vatano matawanto mai, muno animari wanonae rai ramu.
14Sya AMISY, syare naemeno rinai,
Nyo rinaen, sya marova wo rinansewabe ti risiuri rave,
syare Nyo inapaya irati weno mare mo inaunto so rai.
15Indamu Nya ana ndave ti mamai dave mamo
syo rararimbe no vatano Israel mansamun no nai unsanda akoe sisa no Yerusalem.
Muno rinanayanambe weye Winyirati Nyo inapaya irati kakai rai.
16Susyo wanave Nai jewene nawamo utatayasyo atemo taune wo rawae rai,
wakata usawa taune awa isyeano wo ratugare rai.
17AMISY Po taune aroron kakavimbe,
pare taune Pirati Po patimu moyare raugaje.
Vatano mamune awa ana udave mo taune maokaisy. Higayon.#9:17 Ayao Ibrani higayon ama ine mare: nsopi vavai indamu ransyerano Masmur Israel ukiny dai umaso ama ine ratantona no nanuga.
18Vatano mamune nawamo indati muenen ti wasya no amani,
onawamo susyo wanave Amisye Ai jewene nao tenambe.
19Weramu vatano awa ana jajewembe mai nawamo Amisy Opamo parandeno mai jewen,
muno vatano una siuri rai nawamo awa anave mpatimu jewen ntoa nuge nuganui.
20AMISY, syare mbeseo, Nyo mangke raugaje susyo wanave Nai jewene mai.
Vemo Nyo vatan bayave umaso manyanyut bayave inya,
weye umararin wo ratantona ware awa vambunine mi mo Winya rakivan.
21Sya AMISY, syare Nyo mavera ujaniv dave,
wirati susyo wanave Nai jewene wo taune mansaen dirive ware tugae, onawamo vatan bayave nanawa.
Currently Selected:
Masmur 9: yva
Highlight
Share
Copy
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
