Masmur 25
25
Amisye anajo indamu Po wama ayao kakaije rapaya muno Po wansayaranande
1Masmur Daud po ratoe.#25:1 Masmur somamo ransyerano Ibrani akrostik inta mije, weye ntavondi urupijo Ibrani ama ntetebeaje rai. Weramu ayao Yawa ntavondi urupije so rai jewen.
Sya AMISY, Winyirati inanuga so raijaseo Nai.
2Sya Amisy, Winyirati rinanaveano namen;
syare vemo winaneme mpaya rinai mo risamane inya;
muno vemo sya marova umananibe anakotaro nsosobe rinai rai jinya.
3Tugae, vatano mansanaveano winamene nawamo indati usamane jewen,
yara usamane nawamo vatano nanawirati wangkarive vayave ti wo ana ngkakai rave nao.
4Sya AMISY, syare Nyo Nya unanui mamaisyo ritavondi rai rarorono rinai,
syare Nyo rinanyao Nya unanui rai.
5Syare Nyo rinanyao muno Nyo rinaugavo Nya unanui mamaisye rai,
weye Winyirati Amisy Nyo inapaya irati kakai rai,
masyote tename omainyamo Winyirati inanaveano namen.
6Sya AMISY, syare naemeno reansaijo Nya mbekobe rai muno Nya muinyo no tawane rai,
weye omamo Nyo rarorono reansai no arono wusyinoe to.
7Sya AMISY, sya ayao kakaije muno sya ana dave ti ngkakai,
no arono ta rikamurame wemamo, syare vemo windatantona akareve inya.
Yara syare naemeno rinai,
weye Winyamo ngkov dave muno Nya muinye no tawano rinai.
8AMISY, Opamo kov dave muno moyar,
weti Po Apa unanui mamaisye raroron irati vatano wusya marambe mai.
9Po vatano mansanuga mpayaje maugav indamu utavondi ana mamaisye rai,
muno Po mansanyao irati Apa bekere rai.
10AMISY Opamo Apa muinye no tawan muno teto Apa urairije rai,#25:10 Amisye Apa urairijo Po raokaisyo kawasae Israel mansai ama ayao ratoe no Kel. 24:3-8.
omamo nde irati vatano nanawirati ubeta Apa urairije muno Apa ananyao raije mai.
11Sya AMISY, syare Nyo sya ayao kakai rapaya irati rinai, weye sya ayao kakai manakoe rave,
wirati indamu syo Nya tame raijaseo titive.
12Vatano po AMISY asyanive pamo,
Amisye Po Apa unanui kov mamaisyo Apa bekere rai rarorono ai.
13Vatano napijep opamo no irati kovo ngko dave Amisye Po raugaje ai rai tawan,
muno apa arikainye, apa ajavije nawamo utantuna irati awa muni tawane rai tawan.
14AMISY de pangkepan dave irati vatano wo asyanive mai,
muno Apa urairije mamo Po raveano mansanyao indamu unanta rai.
15Risyamo, AMISY Opirati inanaveano amen tutir,
weye Opirati Po inapaya irati ana ngkakai mo rinamane rai.
16Syare namumbe de rinai muno naemeno rinai,
weye risyamo siuri rave muno vatane inta po inasopan akatoe ramu.
17Syare Nyo inapaya irati inanimaumbe manakoe nseo masyove tutir no inanuga so rai,
muno Nyo inaugav uje irati ana mo inatawan asyo so raora.
18Syare Nyo rinaeno sya siuri muno ana mo inakepe so rai,
muno sya ayao kakaije mamo syare Nyo rapaya tenambe irati rinai.
19Wakoe! Nyo rinaen sya marova wanui rave,
onawamo manuga mamuno rinai rave muno usoowato rinai.
20Syare Nyo rinayaranande muno Nyo inapaya,
inda vemo wo anasineko rinai mo risamane inya,
weye Wibuiny irati rigaugambe Nai.
21AMISY, Wibuiny irati inanaveano namen, weti syare ndarino rinaora,
weye risyamo syo ana mamaisye obo rave muno inanuga nsarokir.
22Sya Amisy, syare Winyo Nya kawasae Israel mapaya
irati ana nsosobe maije rai tenambe.
Currently Selected:
Masmur 25: yva
Highlight
Share
Copy
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
