Markus 14

Omalwaambo okudhipaetha Jesus

(Mat. 26:1-5; Luk. 22:1-2; Joh. 11:45-53)

1Iya kwa li omatango avali otjipito tjOpaasa notjomingome mbihavi tuwa ontathi tji thike, ovayambethi ovanene novalongiveta va tompola okutya va kambule Jesus movineya, wo ve mu dhipae.#Eks. 12:1-27 2Va popya hava tyaa: “Hátu tji ningile motjipito, opo hátji eta ovipolokota mokati kovantu.”

Jesus ma vavekwa

(Mat. 26:6-13; Joh. 12:1-8)

3 Jesus hiaa li moBetania monganda yaSimon owovilundu, aa kala pohi pokulya, mwe ya omukadhintu umo nguu na otjivavelo hitje yula otjidhimba tjonarde#14:3 onarde: Otjidhimba hitja pepa nawa, hitji na okalu, hitji ithwa metindi lyotjitho tjimo hitji mena moIndia. yatjatjili yokalu. Iya ye wa pambula otjivavelo, otjidhimba tjatjo he tji tile komutwe waJesus.#Luk. 7:37-38 4Vamo mboka mbava li mo, ve mu velele ombedhi hava tyaa: “Otjidhimba hehi matji yonakele tji nyahika? 5Ngaile tja landethelwe po, ngai tja eta odhondenari oku ka pita omathele atatu, dhi yandjwe kovathona.” Va li amave mu vele odhombedhi.

6Jesus we ve heela ha tyaa: “Mu yethen̯i. Omena lyatji mamu mu ningitha omutima omuvi? Ngunya wa ndjundapele otjilinga otjiwa. 7Ovathona apehe mamu kala nawo, mamu ke ve ningila ouwa auhe mbumamu hala, iya ame híme kala nan̯e apehe.#Deut. 15:11 8Ngunya wa undapa hima ulu, wa vaveke olutu lwandje, tainkolo epako lyandje háliye ya. 9Me mu heele otjatjili okutya akuhe hoka mouye auhe ondaka ombwa humai ka teethelwa, nahehi wo ye hiaa ningi, matji ka hipululwa, ha thipalukilwa ko.”

Judas ma landetha Jesus

(Mat. 26:14-16; Luk. 22:3-6)

10Iya Judas Iskariot, umo owomomulongo navavali, wa ya kovayambethi ovanene, e ke ve welelekele Jesus. 11Iya wo hive tji tee, va li ave hulukwa, wo have mu udhikile oku mu pa odhombongo. Iya Judas wa li ama taendha okaluvedhe koku mu yandja.

Jesus ma li Opaasa pamo novalongwa ve

(Mat. 26:17-25; Luk. 22:7-14,21-23; Joh. 13:21-30)

12Etango lyolutenga lyotjipito tjomingome mbihavi tuwa ontathi moka mumu dhipawa ondjona yOpaasa, ovalongwa vaJesus ve mu pula hava tyaa: “Opi mpamo hala oku ka lila Opaasa, opo tu ke ku longekedhela?”

13Jesus wa tuma vavali owomovalongwa ve, he ve heele ha tyaa: “Enden̯i kotjitungwalongo, mamu ka wanena nomulumentu ngwaa tjindi olundingo#14:13 olundingo: Olata onde, otjiteko. lwomeva. Mu landulen̯i 14katee monganda moka muma i, heelen̯i omwene wonganda mu tyee: ‘Omulongethi ma pula okutya ondjuwo yovayenda i li pi, ndji ka lile mo Opaasa pamo novalongwa vandje?’ 15Ye me mu yulikile ondjuwo onene yopeulu ndjaa kombwa nawa. Ngamo mu tu longekedhela moka.”

16Ovalongwa va ya, hive ya motjitungwalongo, ovipuka avihe vya li ngahi ve vi heelwa. Iya hava longekedha Opaasa.

17Iya okawiiwii hika wile pohi, Jesus we ya novalongwa ve omulongo navavali. 18Iya tainkolo va li ava kala pohi amava li, Jesus we ve heela ha tyaa: “Ame me mu heele otjatjili okutya umo mun̯e, ngumatu li naye, ma ka mbweleleka.”#Eps. 41:9

19Wo va uta okweetetha onkenda, have mu pula koumo naumo hava tyaa: “Ame haame?”

20Jesus we ve yaka ha tyaa: “Yuumo mun̯e mboka omulongo navavali ngoka ngumatu himi naye mombiyona. 21Iinga, Omuna wOmuntu ma i, ngahi tja sonekwa ouhunga naye, atjaa utatyei omuntu ngoka nguma ka weleleka Omuna wOmuntu! Omuntu ngoka ngaile ka yumukilwe, ngai hahe.”

Okulya Okudhilikwa maku utwa

(Mat. 26:26-30; Luk. 22:14-20; 1 Kor. 11:23-25)

22Hiva li amava li, Jesus wa itha po omungome, ha kumbu, he u nyembula, he u pa ovalongwa ve, ha tyaa: “Tambulen̯i, hehi olutu lwandje.” 23Wa itha po otjinwino, ha kumbu, he ve pa tjo, hava nu mo avehe. 24Ye we ve heela ha tyaa: “Hehi ombindhi yandje, ombindhi yewaneneno, ndjimai tilwahi mena lyovengi.#Eks. 24:8; Jer. 31:31-34 25Me mu heele otjatjili: Híme ka nwa uke ovinyu katee etango ndyoka hime ka nwa ovipe motjilongo tjaKalunga.” 26Iya hiva dhi pokwiimba eimbilo, va ya kOndundu yomiholivi.

Jesus ma londola ovalongwa ve

(Mat. 26:31-35; Luk. 22:31-34; Joh. 13:36-38)

27Iya Jesus we ve heela ha tyaa: “N̯e amuhe mamu ka ndjetha, mena lyokutya omisonekwa mavi tyaa: ‘Me dhipaa omut̯ita, odhondhu hadhi handjana.’#Sak. 13:7 28Iya amba imunwa kout̯e, me ke mu tenga koGalilea.”#Mat. 28:16

29Petrus we mu heela ha tyaa: “Nandaku tiwa avehe ve ke ku yetha, ame híme ke ku yetha.”

30Jesus we mu heela ha tyaa: “Me ku heele otjatjili, otjit̯iku tjandino tainkolo onkondombolo háiya popya tuvali, ove mo lintendele tutatu.”

31Petrus we mu heela nodhonkono ha tyaa: “Nandaku tiwa mba ka t̯a pamo naove, hime ke litendela ove.” Ovakwawo avehe nawo otjo va yaka.

Jesus ma kumbu moGetsemane

(Mat. 26:36-46; Luk. 22:39-46)

32Wo ve ya koluvedhe nduu tiwa oGetsemane, iya Jesus wa heela ovalongwa ve ha tyaa: “Kalen̯i pohi hempa, tainkolo me ka kumba.” 33Iya ye wa itha po Petrus naJakob naJohannes, ha i nawo, iya wa uta okutila, he ihamenwa. 34Iya we ve heela ha tyaa: “Omwenyo wandje wa pongo katee ket̯o. Kalen̯i hempa, pathumuken̯i.”

35Iya ye wa hweena uke komeho kanunu, ha wile pohi, ha kumbu okutya andaa matji tjiiwa okaluvedhe hoka ke mu pon̯oke. 36Wa popya ha tyaa: “Abba, Taa, avihe mo vi ulu, ndjeka ndje otjinwino#14:36 Otjinwino: Matji tya “omatatetho”. hehi. Iya hangahi me hala, ongahi mo hala.”

37Iya Jesus hiaa tjuna, wa vadha ovalongwa ve ava lala. Wa pula Petrus ha tyaa: “Simon, wa lala? Wa anyenwa okupathumuka owola imo vala? 38Pathumuken̯i, mu kumbe, hámu pwile momatyoletho. Ombepo yomuntu mai hala, iya olutu olunkundi.”

39Ye wa tjuna ko uke, ha ka kumba, odhondaka dhatjo ndhoka odho a popya tuu. 40Iya hiaa tjuna uke, we ve vadha uke ava lala, mena lyokutya va li nolupot̯i momeho, wo kava li ave tji i okutya mave mu yaka vi.

41Iya ye wa tjuna uke otjikando otjityatatu, he ve heele ha tyaa: “Mu na tjo, mwa lala tuu, mamu thuva? Tjau, tja hulu. Owola ye thiki. Taa tuutuu, Omuna wOmuntu ma yandjwa momawoko ovalundhi. 42Kulamen̯i, tu enden̯i. Taa tuutuu, nguma mbweleleka u li popedhi.”

Jesus ma kambulwa

(Mat. 26:47-56; Luk. 22:47-53; Joh. 18:3-12)

43Iya dhivadhiva Jesus tainkolo a li ama popi, Judas, umo owomuhemba omulongo navavali, we ya nengundwa lyovantu ndii na omikonda nodhonkunye, va tumwa okudha kovayambethi ovanene nokovalongiveta nokovanene wotjiwan̯a. 44Omuweleleki wa vadhwa ae ve n̯anga onyala, ha tyaa: “Ngume hupita, oye e li ye, mu kambulen̯i, n̯e hámu mu yetha, mu takamethen̯i.”

45Judas hiee ya, wa ya kuJesus dhivadhiva, ha tyaa: “Rabbi,” he mu hupita. 46Iya mbenya ve mu yumba omawoko, have mu kambula. 47Iya umo owomumboka mbava li ava kulama mpoka, wa pweya mo omukonda we, ha tono nawo omupika womuyambethi omunene, he mu kopola okutwi. 48Iya Jesus we ve yaka ha tyaa: “Mwe ya nomaonga nodhonkunye ngambamamu kambula otjimpulu? 49Omatango aehe ndji kala nan̯e motempeli ndji longa ovantu, n̯e kamu nkambula. Iya hehi matji ningwa okutya omisonekwa opo vi hwithilwe po.”#Luk. 19:47; 21:37

50Iya ovalongwa avehe ve mu thiaa po, hava ka inkola.

51Omulumentu umo ngwaa li po omununu kovakwawo, wa landula Jesus. Wa li ae lipoleke otjitopa tjoliina kolutu lwanyahinya, wo ve tje hala oku mu kambula. 52Ye wa thiaa po otjitopa, ha ka inkola nyahinya.

Jesus kovipala vyovanene

(Mat. 26:57-68; Luk. 22:54-55,63-71; Joh. 18:13-14,19-24)

53 Jesus ve mu twalwa komuyambethi omunene, hukwa li akwa onganene ovayambethi ovanene avehe novanene wotjiwan̯a novalongiveta. 54Petrus we mu landula, ae li kon̯ima kokule, we ya katee monganda yomuyambethi omunene. Wa kala pohi povayungi wonganda, a ungulukwe pomulilo. 55Ovayambethi ovanene nOtjoongi atjihe tjovanene va li amava taendha oumbangi wokudhipaetha Jesus, iya ahamave u mono. 56Ovengi ve mu kuminina, atjaa ovithithi vyawo ahamavi i kumo.

57Okudha mpoka vamo va kulama, have mu kuminine amava tyaa: 58“Nt̯e twe mu tyaa ama tyaa: ‘Ame me han̯auna po otempeli hendji ndjaa tungwa nomawoko, moule womatango atatu me tungu imo ndjihamai ka tungwa nomawoko.’ ”#Joh. 2:19 59Iya nomuhehi otjihipululo tjawo katji ile kumo.

60Iya omuyambethi omunene wa kulama movipathi vyawo, ha pula Jesus ha tyaa: “Koo yaka ovantu hemba mbamave ku popi?”

61Iya Jesus wa nyima vala, ke mu yakele. Omuyambethi omunene we mu pula uke ha tyaa: “Oove u li Messias, Omuna wOmutumbalekwa?”

62Jesus we mu yaka ha tyaa: “Aame. Iya mamu ka mona Omuna wOmuntu, aa kala pohi kokulyo kOmunadhonkono, ame ya kombanda yomakaka okeulu.”#Dan. 7:13 63Iya omuyambethi omunene wa taula omidhalo vye, ha tyaa: “Twa hepa uke odhombangi dhatji? 64Epenyo lye mwe li tee. Mamu tya vi?” Iya wo avehe ve mu pa onkali yokut̯a.#Lev. 24:16

65Iya vamo va uta oku mu tjakela omate, have mu kutu pomeho, have mu tono nodhongonyo, hava tyaa: “Thimbila!” Ovayungi wonganda ve mu tona nomapi.

Petrus me litendele Jesus

(Mat. 26:69-75; Luk. 22:56-62; Joh. 18:15-18,25-27)

66Petrus hiaa li pontanga yonganda, pe ya omukadhona umo owomonganda yomuyambethi omunene. 67Iya hiaa mono Petrus ama yoto, we mu tongolola, ha tyaa: “Ove naove wa li pamo naJesus Omunasareta.”

68Iya Petrus we litendela, ha tyaa: “Ame hí mu i, ye himo popi, hí tji yuvite.” Iya hiaa piti pondje, onkondombolo hai popi.

69Iya omukadhona hiee mu mono mpoka, wa heela uke ovantu mbava li ava kulama mpoka ha tyaa: “Omulumentu hengu yuumo owomuwo.”

70Iya ye we litendela uke. Kon̯ima yokaluvedhe mboka mbava li mpoka, va heela Petrus hava tyaa: “Otjatjili oove umo owomuwo, mena lyokutya oove Omugalilea.”

71Iya wa uta okulithinga, ha ana ha tyaa: “Omulumentu hengu ngumamu popi, ame hí mu i.”

72Dhivadhiva onkondombolo ya popya otjikando otjityavali. Iya Petrus wa thipaluka odhondaka ndhaa heelwa kuJesus ndhaa tyaa: “Onkondombolo tainkolo háiya popya tuvali, ove mo lintendele tutatu.” Wa enda omwenyo, ha lili.

Currently Selected:

Markus 14: DBNT

Highlight

Copy