Ovilinga 3
3
Omulumentu otjilema ma velulwa
1Petrus naJohannes va ile kotempeli mondatu yokomatango, ndjaa li owola yokukumba. 2Omulumentu umo ngwaa yumukwa otjilema, etango alihe u tjindwa, ha etwa pomuvelo wotempeli, mboka mbuu tiwa Omuvelomuwa, mpaa kumbila odhombongo kovantu mbamava hiti motempeli. 3Omulumentu hengu hiaa mono Petrus naJohannes, hiva li amava hiti motempeli, we ve kumba, ve mu pe odhombongo. 4Petrus naJohannes ve mu tongolola, Petrus ha tyaa: “Tala kunt̯e!” 5Iya we ve tongolola, he liun̯ike okutya pamo mave mu pa odhombongo. 6Iya Petrus we mu heela ha tyaa: “Ame hí na tja odhombongo, iya hehi hindji na tjo, otjo me ku pa. Mena lyaJesus Kristus Omunasareta me ku heele okutya kulama, enda.” 7Iya we mu yaka mokuwoko kwe kwokokulyo, he mu kulametha, iya dhivadhiva odhompadhi nodhongunyu dhe hadhi kolo, 8iya ye wa lomboka, ha kulama, ha hiti nawo motempeli, wa enda ama lombauka, otjo ma tanga Kalunga. 9Ovantu avehe ve mu mona, hiaa li ama ende, otjo ma tanga Kalunga. 10Iya ve mu dhimbuka okutya oye e li ye nguu kala pomuvelo wotempeli mbuu tiwa Omuvelomuwa, a pewe odhombongo, va kuminwa soka hiaa ningilwa.
Petrus ma teethele motempeli
11Tainkolo omuvelulwa a li nooPetrus naJohannes, ovantu avehe ve kumwa, hava ka dhamukila mo, have ke ve onganena motjiwalanda tjaSalomo. 12Iya Petrus hiee ve mono, we ve heela ha tyaa: “Vaisraeli n̯e, hehi tje mu kumithile tji? Mamu tu tongolola tji? Mamu tya pamo omuntu hengu hima ende twe tji ningi kodhonkono dhetu ovene ne kouvyuuki wetu? 13Kalunga kaAbraham, Kalunga kaIsak naKalunga kaJakob, Kalunga kootateombwale, wa tumbaleketha omuntu we Jesus, ngumwa yandja, a dhipawe, hamu litendele ye movipathi vyaPilatus ngwaa pangele ompango yoku mu yetha.#Eks. 3:15 14N̯e mwa yekelahi Jesus ngwaa li omuvyuuki, omudhilikwa, n̯e hamu kumbu Pilatus, e mu kutululile omudhipai.#Mat. 27:15-23; Mark. 15:6-14; Luk. 23:13-23; Joh. 19:12-15 15Iya mwa dhipaetha Omuyandjimwenyo. Kalunga ngunya we mu imuna kout̯e, nt̯e tudhombangi motjipuka hehi. 16Iya ena hendi ndyaa itavela, lya koleke omulumentu hengu ngumu lwete, ngumu i, neitavelo ndyoka muJesus lya velula omulumentu hengu movipathi vyen̯i.
17“Iya napano vakwetu, ame ndji tji i okutya n̯e novanene ven̯i, hehi himwa undapela Jesus, mwe tji undapa vala, mena lyokutya kamu vadhelwe amu tji i. 18Iya Kalunga ovipuka hembi we vi hwithila po ae lukulu movinyo vyovaprofeti avehe, hiva popya okutya Messias we ma ka tatethwa. 19Iya liteyululen̯i n̯e mu tjune kuKalunga, odhonkali dhen̯i dhi ithwe po, 20opo Muhona Kalunga e ke mu tumine otembu ombwa yomatendeleko. Iya ye me ke mu tumina Messias ngumwa udhikilwa ae lukulu, oye e li Jesus. 21Iya Jesus ma tha okukala meulu, katee Kalunga ovipuka avihe me vi ningi ovipe, Kalunga ngahi a popya ae lukulu okupitila movinyo vyovaprofeti ve ovadhilikwa. 22Iya Moses wa tile: ‘Muhona Kalunga ken̯i me ke mu holowolela umo owomovantu ven̯i, a kale omuprofeti ngahi a ntjolowolele. Omuprofeti ngoka mu tyeen̯i movipuka avihe mbime mu heele.#Deut. 18:15,18 23Ngoka nguhama itavele komuprofeti hengu, ma ithwa mo, ye kaa ka kala uke owomovantu vaKalunga.’#Deut. 18:19 24Iya ovaprofeti avehe okudha kuSamuel novapopi avehe mbave mu landula, va thimbila ouhunga womatango henga. 25On̯e odhompinga dhovaprofeti nodhewaneneno, Kalunga ndyaa ninga nootateombwale, hiaa heela Abraham ha tyaa: ‘Moluyumuko lwoye omaanda aehe mouye maa ka pewa elao.’#Gen. 22:18 26Kalunga hiaa imuna omuntu we kout̯e, olutenga we mu tuma kun̯e, he mu pa elao hiaa teyulula ovantu avehe komauvi awo.”
Currently Selected:
Ovilinga 3: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
