1 Timoteus 6
6
Ovapika
1Ovapika ngava tumbaleke ovahona vawo, ena lyaKalunga nelongo lyetu opo háli penywa. 2Ovapika mbave na ovahona ovaitaveli, háve ve tombo, mena lyokutya ovaitaveli vakwawo. Iya ngave ve undapele nomitima omiwa, mena lyokutya mbamava undapelwa ovilinga oviwa ovaitaveli ovakwawo ovahivilikwa.
Omalongo ngae lili nouhona watjatjili
Longa, ove u teethe ovipuka hembi. 3Andaa pe na omuntu nguma longo ovantu omalongo ngae lili ngahamaa i kumo nodhondaka dhatjatjili dhaMuhona wetu Jesus Kristus nelongo ndii na ontilokalunga, 4omuntu nguu li nyahoka omulinomi, ye ke na hiee i, odhondunge dhe dha ngwangwana, u hole okutetha odhombata. Modhombata mu dha ovipuka ovivi, omalutangu, onki, omatukano nomalimbililo omavi. 5Ovantu mbahave na odhondunge, mbahava landula otjatjili, apehe ve hole odhombata. Wo va tya pamo okukala omukriste okwiila omuhona.
6Iinga ontilokalunga ouhona tjatjili, andaa hiuu na tjo tje ku hulu. 7Mouye katu na hitwe ya mo natjo, nt̯e katu na himatu dhi mo natjo. 8Iya andaa tu na ovikulya nomidhalo, mbyoka ngavi kale avye tu hulu. 9Iya mbava hala okukala ovahona, ve li momatyoletho nomomoo womahalo omengi ouhima ngamaa twala omuntu mehan̯auno nomekeko. 10Olwiho lwodhombongo etindi lyouvi auhe. Ovantu va lomboka mo omitima kodhombongo, nomeitavelo hava dhi mo. Ve lietela vala omaudheu momitima vyawo.
Ekondjo ewa lyeitavelo
11Iya ove, umuntu waKalunga, yepa ovipuka avihe ovivi. Kondjela ouvyuuki, ontilokalunga, eitavelo, ohole, elikambulithilo nelinunupiko. 12Kondja ekondjo ewa lyeitavelo. Kondjela omwenyo waapehe. Kalunga we ku ithanena omwenyo hembu, hiwa hipulula eitavelo lyoye nawa movipathi vyovaitaveli ovengi. 13Ame me ku heele kotjipala tjaKalunga nguu yandja omwenyo kovipuka avihe nokotjipala tjaKristus Jesus ngwaa hipulula otjihipululo otjiwa kotjipala tjaPontius Pilatus,#Joh. 18:37 14kambulitha otjitumino hehi, kala awa kohoka, hó kala nombedhi katee etango ndyoka Muhona wetu Jesus Kristus ma ka hololoka. 15Okuhololoka kwe maku ningwa potembu ombwa kuKalunga ngwaa tumbala, nguu li Omutumini aika, Ohamba yodhohamba, Muhona wovahona. 16Oye vala aika nguha t̯i. U kala motjiten̯i muhamu tjiiwa okwiiwa. Kaku na tja omuntu ngwee mu mona, ko kaku na tja omuntu nguma ulu oku mu tala. Kalunga nga tumbalekwe, ye nga tumine apehe katee apehe. Amen.
17Pukulula ovahona wokombanda yohi, háve linomo, wo háve liun̯ike movipuka vyouhona mbimavi hulu, iya ngave liun̯ike muKalunga nguu tu pa ovipuka avihe, nguha lwaapele. 18Ve pukulula, va undape ouwa, va ninge ovahona wovilinga oviwa. Ngava pe mo ovakwawo mouhona wawo. 19Iya mave liungulile emona ndyaa kola, komeho humava ka kulamena, opo va mone omwenyo watjatjili.
20Timoteus, ungula nawa, ove kambulitha hiwa pewa. Yepa omalaka omavi nodhombata dhowoova, ovantu hive lipula okutya odhondunge, tjo ahatji thi odhondunge. 21Iya ovantu vamo mbave litya ve na odhondunge, va yetha eitavelo.
Et̯ilonkenda lyaKalunga ngali kale nan̯e.
Currently Selected:
1 Timoteus 6: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
