TITUS 2
2
Okukala kwOvakriste
1Ndelenee ove tonga eshi sha wapalela elongo liwa. 2Ovashamane nava kale ovalidiliki, ve neenghedi da fimana, ovakoshoki, ve li nawa meitavelo nomohole nomelidiliko. 3Osho tuu novakainhu nava kale ve neenghedi da wapalela ovayapuki, vehe fi ovalundili, havapika voikunwa ihapu, ndelenee ovalongi vomwaashi shiwa, 4opo va shiive okupukulula ovakainhu ovanyasha vo va kale ve hole ovalumenhu vavo nokuhola ovana vavo, 5ndele va kale ve neenghedi diwa novakoshoki ve shii okutekula omaumbo avo, ve nomwenyo muwa, ndele tava dulika kovalumenhu vavo vene, opo ondjovo yaKalunga iha shekifwe.
6Novalumenhu ovanyasha va kumaida yo va kale ovalidiliki. 7Ove mwene liulikila omuhopaelelwa moilonga aishe iwa, nelongo loye nali kale la yela nola fimana 8neendjovo doye nadi kale diwa nodihe noshipo, omunandubo a fifwe ohoni eshi ina mona omhito oku tu popila molwii.
9Kumaida ovapiya va dulike koovene vavo, vo ve va hafife moinima aishe, inava kala neenyamukudi, 10vaha vake, ndelenee va holole oudiinini meenghedi adishe, opo va wapaleke mwaaishe elongo laKalunga, Omukulili wetu.
Efilonghenda laKalunga tali xupifa ndele tali yapula omunhu
11Osheshi efilonghenda laKalunga ola holoka li etele ovanhu aveshe exupifo, 12ndele tali tu tekula, fye tu efe okudina Kalunga nouhalu wopaunyuni, fye tu kale tu neendunge nouyuki nokuhola Kalunga fimbo tu li mounyuni ou wopaife, 13mokuteelela kwetu ewanifo leteelelo lelao neholoko loshinge shaKalunga omunene nolOmukulili wetu Jesus Kristus, 14Oye ou e liyandja ponhele yetu e tu kulile mo mowii aushe Ye e liyelifile oshiwana shaye mwene, osho hashi diinine shili oilonga iwa.
15Oinima ei i tonga noku va kumaida noku va hanyena meenghono adishe we di pewa. Paha kale nande umwe te ku dini.
Currently Selected:
TITUS 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
