OVAROMA 3
3
Eshi Ovajuda ve shi kwete komesho yovapaani
1Omujuda oku na shike e dule vamwe? Ile epitotanda otali kwafa shike? 2Heeno, Ovajuda ova pewa shihapu nopaenghedi adishe, tete ova pewa eendjovo daKalunga. 3Ongahelipi hano? Vamwe ngeenge inava itavela, okuhaitavela kwavo otaku dimi po mbela oudiinini waKalunga? 4Nandenande. Kalunga na kale omunashili, ndele keshe omunhu omunaipupulu, ngaashi pa shangwa:
“Opo u shiivike oove omuyuki meendjovo doye,
u findane ngeenge to hokololifwa.”
5Ndelenee oulunde wetu ngeenge tau holola ouyuki waKalunga, ohatu ti ngahelipi opo? Kalunga omulunde mbela, eshi ta handukile ta fulu onya? Nandenande. Ohandi popi panghedi yopanhu. 6Osheshi ngeenge ongaha, Kalunga ota dulu ngahelipi okutokola ounyuni ngeenge ye ke fi omuyuki? 7Hano oshili yaKalunga ngeenge tai hololwa nawa koipupulu yange, ye a fimanekwe, oshike hano ame handi tokolwa vali ngaashi omulunde? 8Omolwashike inatu ningeni ngaashi vamwe moku tu lundila tava ti, ohatu ti vati: “Tu ningeni owii, omo mu dje ouwa?” Etokolo lavo ola yuka.
9Ongahelipi hano? Otu li po tuu tu va dule? Ahowe, nande okanini. Osheshi opo otwa tomha aveshe, nokutya, aveshe Ovajuda nOvagreka, ove li koshi youlunde, 10ngaashi pa shangwa:
“Kape na omuyuki nande umwe,
11kape na omunandunge, kape na ou ta kongo Kalunga;
12ovo aveshe va pumha mo, aveshe va vayapala;
kape na ou ta longo ouwa, nande umwe.
13Ominino davo odo eembila da yeuluka,
nomalaka avo tava kotokele,
oudiyo wonhoka u li koshi yomilungu davo;
14omakanya avo e yadi efingaelo noululu.
15Eemhadi davo ohadi endelele okutilashi ohonde.
16Ehanauno noluhepo li li meendjila davo,
17nondjila yombili vehe i shii.
18Etilokalunga kali li moipafi yomesho avo.”
19Ndele fye otu shi shii, ashishe osho omhango tai shi popi, otai shi lombwele ava ve li koshi yomhango, opo okanya keshe ka mutikwe, nounyuni aushe u kale, u netimba koshipala shaKalunga; 20osheshi kape na omunhu ta ka ninga omuyuki koshipala shaye okoilonga yomhango; osheshi momhango ohamu di eshiivo loulunde.
Ouyuki womeitavelo
21Ndelenee paife ouyuki waKalunga ou wa hepaululwa komhango nokovaxunganeki, owa holoka uhe nomhango, 22nokutya, ouyuki waKalunga owomeitavelo laJesus Kristus otau uya mwaaveshe nokwaaveshe ava hava itavele, osheshi kaku na nande etongolo. 23Osheshi aveshe ova nyona, novehe noshinge shaKalunga, 24ndele otava yukipalifwa oshali okefilonghenda laye omolwekulilo eli lomuKristus Jesus. 25Oye ou a tulwa po kuKalunga a ninge Omuhanganifi okeitavelo mohonde yaye, opo a holole ouyuki waye, osheshi monheni yaye Kalunga a efa omatimba a ningwa nale ine a handukila, 26opo a holole ouyuki waye mefimbo eli lopaife, Ye mwene a kale omuyuki, Ye a yukipalife ou a itavela Jesus.
27Elitango oli li peni? Ola kufwa po molwomhango yashike? Oyo ei yoilonga? Ahowe, omolwomhango yeitavelo. 28Onghee hano ohatu ti: Omunhu ota yukipalifwa keitavelo pehe noilonga yomhango. 29Ile Kalunga okOvajuda aveke mbela? Ke fi kovapaani yo? Heeno, oshili okovapaani yo, 30osheshi Kalunga Oye umwe ta yukipalifa ovapiti vetanda, omeitavelo, naava inave li pita okeitavelo. 31Omhango ohatu i dimi po keitavelo? Nandenande, ndelenee ohatu pameke omhango.
Currently Selected:
OVAROMA 3: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
